Read Tzotzil Jeremías 10 Bible Online

Jeremías 10 - Tzotzil bible

Jeremías 10

¹Jteclum Israele, ts'et chiquintao ava'iic ti c'op stacoj talel ti Diose.

²Ti Diose xi ta xale: “Mu xachanbeic stalel ti c'u s'elan ta spas ti yan jteclumetique. Jipo ta spat ajolic xi'elal ti c'usitic ta xac' sba iluc ta vinajele, ti mu ech'baj xi'elal ta xa'i ti muc'tiquil jteclumetique.

³Ti c'usi xch'unojic ti jteclumetic taje, mu'yuc c'usi xu' yu'un. Ta sc'oquic talel jun bascan te' ta vitstic; ti buch'u xc'abaj o xchi'uque, ta xlic xch'ojilan ta loc'tael xchi'uc sjulub.

⁴Mi laj une, ta sbon lec ta plata, ta oro, ta sbaj lec ta martillo xlauxaltac yo' mu xt'ol ti sts'acalultaque.

⁵Ti c'usitic loc'tabilique mu xc'opoj, ja' xchi'ilic jsibtasej-mut, juraxetic ti bu ts'unajtic ti melone. C'ajomal no'ox cucho batel ava'i, yu'un mu xanavic. Altic no'ox ta xaxi'ic yu'un, mi junuc xu' yu'un ta spasel ti c'usi chopole, ti c'usi leque.”

⁶Dios, mu'yuc xa buch'u xtal jech ti xi c'otemote: ti vo'ote oy amuc'ul, ti ac'oplale, muc' ta j'ech'el, jelavem xu' avu'un.

⁷¿Mi yu'un la mu xavich' xi'tael ti c'alal Ajvalilot yu'un ti muc'tiquil lumetique? Ac'otebal o xi'tabilot ma' ti vo'ote. Ta scotol ti buch'utic oy sbijilique, xchi'uc ti ajvaliletic ta sbejel banomile, mi junuc c'otemic jech c'u cha'al ti vo'ote.

⁸Scotolic pimuneb xa'i sbaic, mi jutebuc oy sbijilic. Mi jutebuc xu' ta xchanubtasatic yu'un ti bas-bas te'e.

⁹Ti yajdiosique, plata no'ox ti ich'bil talel ta jteclum Tarsise, xchi'uc oro ti liquem talel ta jteclum Ufaze. Naca c'usitic no'ox ti ja' pasbil yu'unic ti buch'utic sna'ic sloc'taele, xchi'uc ti buch'utic oy c'usi sna'ic yunijesele, ti yax-yax'elantic xa stsajal ti sc'u'tac yu'unique. Taje, scotolic pasbil yu'unic ti buch'utic xtojobic lec ta sloc'taele.

¹⁰Ti Ajvalile, ja' ti Bats'i Diose, ti cuxul Diose, ti sbatel osil oy ta Ajvalilale. C'alal mi iline, ta xnic yu'un ti banomile; ta sc'ac'al no'ox yo'nton, ta xtub sc'oplal yu'un ti muc'tiquil lumetique.

¹¹(Ti vo'oxuque, israeletic, xi xavalbeic ya'iic ti buch'utic yan yajvalique: “Ti diosetic ti ma'uc laj smeltsanic ti vinajel banomile, j'ech'el ta xtub sc'oplalic li' ta banomile. Mi junuc ta xcom ti c'u yepal oyique.”)

¹²Ta sventa smuc'ul stsatsal, laj smeltsan banomil ti Diose; ta sventa sbijil stuc, laj yac'be yic ti banomile; ta sventa sbijil stuc, ti bu c'alal smacoj c'ot yu'un ti vinajele.

¹³Xvo'o'et no'ox ta xtal banomilal vo' yu'un ta vinajel c'alal xc'avlajet no'ox liquel yu'un ti chauque. Xvolet no'ox yu'un ti toc buyuc no'ox ta sjoylej ti banomile. Xjaplajet no'ox yu'un ti sac tsel c'alal xlomet ti banomilal vo'e. Xjumet no'ox liquel yu'un ti ic' c'alal ta xloc' talel ti bu q'uejbil yu'une.

¹⁴Scotol pimuneb xa'i sbaic, ch'abal snopobil yu'unic ta j'ech'el. Yu'un ti buch'utic xtojobic ta yabtelanel ti loc'obbailetique, xi s'elan ta xilbe svocol ti yane: yu'un ti loc'obbailetique mu'yuc c'usi xu' yu'un, mi jutebuc yich'oj xcuxlejal, yijil lo'lael xal o.

¹⁵Mu'yuc c'usi xu' yu'un, j'ac'-labal no'ox. Ta xtubbat sc'oplal c'alal ta xchapanvan ti Diose.

¹⁶Ja'uc ti Dios yu'un ti Jacobe, cajal sc'oplal ta j'ech'el, yu'un ja' laj smeltsan scotol ti c'usitic oye, xchi'uc laj st'uj ti Israele yo' ta xc'ot ta yu'un. Xi ti sc'oplale: Ajvalil Dios ti scotol xu' yu'une.

¹⁷“Muc' ta lum ti volibilot xa ta joyobele, tsobo ti c'usitic x'ayan avu'une.

¹⁸Yu'un xi ta xal ti Diose: ‘Tana li'e, ta jten batel ta nom ti jnaclejetic yu'un ti jteclum li'e. Spajebal xa no'ox ti svocol ta xcac'beique, jq'ueltic quic mi ja' to ta xistaicun ta sa'el.’ ”

¹⁹Mu xa ono'ox cha'bel un, lic'ot xa ta lomel. Ti jyayijemale mu'yuc xpoxil. Laj jnop ti xcac'touc xcuch cu'un ti yipal yavanele.

²⁰Ti caxibalnae lilij xa. Scotol ti yaq'uiltac timajtic to oxe, tuch'em xa. Ti calab jnich'nabe laj xa stenicun comel, tub xa sc'oplal. Laj xa sc'oplal ti oy buch'u ta xcha'va'an ti caxibalnae, ti oy buch'u ta slambe ech'el ti yaxibale.

²¹Ti banquilal jvolvanejetic yu'un ti jteclum li'e, pimuneb xa'i sbaic. Mu'yuc ta yo'ntonic ta sa'ic ti Diose. Jech o xal un, c'otic ta lubtsajel, tan puc xa bat yu'un ti c'u yepal svoloje.

²²A'yio ava'iic, vul ta loq'uel jbel ti c'ope. Ti yajval muc' ta lum ti oy ta yolon ti yac'ol xocon sloq'ueb c'ac'ale, xvolet no'ox talel ta slilinel ti jteclumetic yu'un ti Judae, ti sic cotan ta xcom ti jteclumetic yu'une, ti naca oq'uiletic xc'ulet liquel teye.

²³Cajval, jna' ti mu yu'unuc sba stuc ti jnaclejetique, ti mu xu' ta spas sba ta mantal stuquique.

²⁴Tuq'uibtasuncutic jech c'u cha'al xana' xachapanvane, ma'ucuc ta sc'ac'al avo'nton, naca me c'otcuncutic ta tsutsel yu'un.

²⁵Lamano sc'ac'al avo'nton ta stojol ti muc'tiquil lumetic ti buch'utic mu xayojtiquinote, ta stojol ti jteclumetic ti mu'yuc xvocolet ta atojole. Yu'un laj stsutsesbeic sts'unubal ti Jacobe, j'ech'el tub xa sc'oplal yu'unic. Stuc slilijemal busul com yu'unic ta j'ech'el ti muc' ta lum cu'uncutique.