Read Tzotzil Jeremías 13 Bible Online

Jeremías 13 - Tzotzil bible

Jeremías 13

¹Ti Diose xi laj yalbune: “Batan, ba mano jlicuc chuquil ti meltsanbil ta lino noe. Chuquino xtoc un, ja' no'ox un ti mu xt'uxij avu'un ta vo'e.”

²Laj jman ti chuquil jech c'u cha'al laj yalbun ti Diose, lic jchuquin un.

³Va'i un, xi lic xcha'c'oponun ti Dios une:

⁴“Ich'o batel ti chuquil laj aman ti achuquinoj xae. Batan ta uc'um Eufrates. Nac'o comel ta c'al tontic un.”

⁵Libat ec un ta uc'um Eufrates. Laj jnac' jech c'u cha'al laj yalbun ti Diose.

⁶Jal xa ox yech'el un, xi lic yalbun ti Diose: “Batan ta uc'um Eufrates, ba ich'o talel ti chuquil ti laj calbot ava'i ti xanac' comel ti bu taje.”

⁷Libat ta uc'um Eufrates ec un. Lic jots'ilan ta sloq'uesel talel ta banomil ti bu nac'al cu'une. C'a'em xa ti mu'yuc xa c'usi xtun o ta j'ech'el une.

⁸C'opoj no'ox talel ti Dios ta jtojol une,

⁹ti xi laj yalbune: “Ti jech le'e, ja' jech ta xc'ot ta tsutsel stoyobbail ti jteclum Judae, xchi'uc ti jteclum Jerusalene.

¹⁰Ti jteclum ti mu'yuc xch'ulel xa'i sba le'e, ta svalopatinic ta xch'unel ti c'u s'elan ta xcalbeique. Pucujineb ta spasel c'usi xal ti yo'ntonique. Bat xa snaban sbaic ta sts'acliel yan diosetic, ta yaq'uel sbaic ta tunel ta yich'el ta muc' un. Mu xa xtunic xa un jech c'u cha'al ti chuquil ti mu xtune.

¹¹Jech to ox oyic ta jtojol scotol ti jteclum Israele xchi'uc scotol ti jteclum Judae, ti jmoj vololic jech c'u cha'al ti chuquil ti syomoj ta chuquel ti chuquile, yo' jech ta xc'otic ta jteclumale, yo' ta xiyaq'uic ta ojtiquinel ti mu'yuc xa buch'u xtaun o ta xca'i yu'unic ta sventa ti jlequil cutsilale. Le' une, mu'yuc laj yaq'uicun ta venta. Jech xcal ma' ti vu'un Diosune.

¹²“Xi xavalbe ya'iic xtoque: ‘Ti Ajvalil Dios yu'un ti Israele xi ta xale: Ta c'usiuc no'ox, stac' ch'amel o ma' ti vinoe.’ Ti israeletic une xi ta xastac'bote: ‘¿Mi yu'un xavac'touc avaloj ti mu jna'cutic ti stac' ch'amel ta c'usiuc no'ox ti vinoe?’

¹³Xachi xatac'be sutel une: ‘Ti Diose xi ta xale: Ta jyacubtas ya'i scotolic c'u yepal nacalic li' ta jteclume, ti ajvaliletic chotolic ti bu choti to ox ti ajvalil Davide, ti paleetique, ti j'alc'opetique, xchi'uc scotol ti c'u yepal nacalic ta Jerusalene.

¹⁴Ts'acal to un, ta xich' contrainel ta jujun. Mu'yuc ta alel mi totil, mi nich'nabil, ta jbal ya'iic ta lilinel scotol jech c'u cha'al ta xich' voq'uel ti bine. Laj to sc'oplal ma' ti xc'uxul o'ntonal ta stojolique. Mu'yuc xa xc'uxulil ti xpich' to o'ntonal ta jlilinic ta j'ech'el une. Mu stselbuj jc'op ma' ti vu'un Diosun une.

¹⁵Israeletic, laj sc'oponoxuc ma' ti Dios une. Mu xapas abaic ti toyobbaoxuque, a'yibeic xchiquinal.

¹⁶Ich'ic ta muc' ti Ajvalil Dios avu'unique, ti mu to ta xvul ta loq'uel ti ic'uneb ti osil banomile, ti xabosi avacanic ta ic'-cunan vitstique, ti mu to ta xjoybij ta ic'ubel ta j'ech'el ti banomile, ti lajebal xa xal o yic'ubel ti osil banomile. ti amalojic avalojic yutsilal saquil ti osile.

¹⁷Ti mi mu xavaq'uic ta venta une, ta xi'oc' ta nac'al ta scoj ti atoyobbailique. Xmal xa liquel ti ya'lel jsat une, ta scoj ti chucbil ta xbatic xchijtac ti Dios une.

¹⁸Xi laj yalbun ti Diose: “Xi xavalbe ya'i ti ajvalile, xchi'uc ti me' ajvalile: ‘Ictaic comel ti chotoloxuc ta lequil chotlebale, chotlanic ta lumtic. Ti xach'aletic to ox yu'un ti sronail ajolic alapojique, baj xa ta lumtic un.’

¹⁹Ti jteclumetic ta Négueve, joyibtabil xa, mi junuc oy buch'u ta x'ech' un. Sjunul ti jteclum Judae, bec'bil xa bat ta sbajtical banomil, ti j'ech'el bec'bil batique.

²⁰“Toyo asatic, q'uelo avilic batel, vi to ono'ox s'elan xlamet no'ox talel ti jcontrainvanej ti liquemic talel ta yolon ti yolon xocon sloq'ueb c'ac'ale. ¿Bu oy ti chijetic ti sjunul co'nton laj cac' aventain une, ti atuc xa no'ox mu'yuc buch'u xtaun xava'i xchi'uc ti chijetic une?

²¹“¿C'usi stac' xaval un, jteclum Jerusalén, ti ta xlic spasot ta mantal ti buch'u laj atojobtase? Jech avocol ta xava'i yu'un, jech c'u cha'al ta svoq'ues yol ti antse.

²²Mi ta xajac'be aba c'u cha'al jech ta xc'ot ta atojol taje, na'o xa no'ox ava'i un ti ja' ta scoj ti tsots ti amul ataoje. Jech o xal laj avich' t'ananel yu'un, laj ata ilbajinel yu'un.

²³¿Mi xu' ta sjel sba ti c'u ono'ox s'elan ti ic'yaman vinique? ¿Mi xu' ta sjip loq'uel ti c'u ono'ox s'elan sts'i'baronil ti jchop o ta bolome? Ti me'inem xa xava'i ta spasel ti c'usi chopole, mu xu' avu'unic un ta spasel ma' ti c'usi lec une.

²⁴Jech o xal un, ta jvajoxuc ta taniel ech'el jech c'u cha'al ti yacan trigoe, ti cuchbil ta xbat ta ic' ti ta xlic talel ta sbajtical banomile.

²⁵Jech ta xac'ot ta loq'uel, Israel, loc' ta sa'el avu'un ti jech ta jpasbote. Mu lo'iluc ta xcal ma' ti vu'un Diosun une. Laj ach'ayun ta avo'nton. Laj apat avo'nton yu'un ti loc'obbailetic ti mu'yuc c'usi xu' yu'une.

²⁶Ta xajt'ananot ava'i ajunul ec un, ti q'uexlalot ta xac'ot cu'une.

²⁷Quiloj ti lo'labilot yu'un ti avo'ntone, ti avac'ojbe yipal ti sa' mulile, ti abolomalinoj aba ti q'uexlal ta j'ech'ele, ti mu'yuc smelol c'usi ta xapas ta stseleje, ti ta osiltique. Mu xa ono'ox cha'belucot un, Jerusalén. ¿C'u to sjalil ta xbat ti mu'yuc amesoj atusoj abae?”