Read Tzotzil Jeremías 14 Bible Online

Jeremías 14 - Tzotzil bible

Jeremías 14

¹Ti Jeremíasune, xi laj yalbun ti Dios c'alal laj sc'oponun talel ta scoj ti va'iem ta j'ech'el ti c'ac'ale:

²“Ti jteclum Judae ta xlic oc'uc ta at-o'nton, mu xa stac' a'yeluc c'usi xu' ta spasic ti jteclumetique. Javal ts'e'el ta lumtic ti jnaclejetic yu'une. X'avetic no'ox xchi'uc yipal xc'uxul svocol ti Jerusalene.

³Ti jc'ulejetique stac' xa batel smosovic ta slupel vo'; ta xbatic ta joq'uetic un, pochol sq'uib ta sutic ech'el, ch'abal ti vo'e. Mu x'ech' mu xnel ta xa'i ti svocolique, ti q'uexlal xa smucoj talel ti sjolique.

⁴Ti jchabajometic eque, mu x'ech' mu xnel ta xa'i ti svocolique ta scoj ti ch'abal jset'uc ti vo'e, taquin ti banomil ta j'ech'el une.

⁵Ja' jech ec un ti te'tical chij ta osiltique, ta sten comel yolic ti naca to no'ox voq'ueme, yu'un ch'abal xa ti yaxal ta slo'ique.

⁶Ti te'tical burro cotajtic ta sbajtical vitstique, natic xa ta xich' ic' jech c'u cha'al junuc jti'oval oq'uil. X'ic'ubin xa ti banomil ta xa'ie, yu'un mu'yuc xa yox yaxal ta slo'.”

⁷Cajval, manchuc mi ta xvinaj naca xa mulil ta xve'baj ta jtojolcutique, ta sventauc ti slequil yutsilal ti ac'oplal une, va'ano tec'ano aba un. Yepal xa ma' ti yanij jol co'ntoncutique, ti laj xa jsa' ti jmulcutic ta atojole.

⁸Jpat-o'ntonal yu'un Israel, jcoltavanejot cu'uncutic ta yorail ti chopol ta xvul ta loq'uele, ¿c'u cha'al yan ta xapas aba ta stojol ti jteclume, ti co'ol a'elan jech c'u ch'al junuc j'ech'el-be naca ta x'ech' yu'un ti ac'ubale?

⁹¿C'u cha'al co'ol ta xapas aba jech c'u cha'al jun vinic ti mu xa stac' a'yeluc c'usi xu' ta spase, ti co'ol s'elan jun j'ac'-leto mu stic' sba ta jpojvaneje? Le' une, Dios, li' oyot ta o'lol cu'uncutique. Sna'ic lec scotolic un ti vu'uncutic alumaluncutique, mu xatenuncutic comel.

¹⁰Ti Diose xi ta xalbe sc'oplal ta sventa ti jteclum Israele: “Ti jteclum li'e, lec ta xa'iic ti bu no'ox xva'vun ta jujujote. Jech o xal mu lecuc ta xquil. Tana li'e, ta jvules ta jol ti smulique. Ta xquich'be ye sti'ic ya'iic.”

¹¹Ti Dios une xi laj yalbune: “Mu xac'anbun vocol ta sventa slequilal ti jteclum li'e.

¹²Mi yepal no'ox ta xicta ti yotique, mu xca'ibe ti jech xvocoletique. Mi yepal no'ox ta xaq'uic ti chic'bil matanale, ti sat ts'unubaletique, j'ech'el mu lecuc ta xquil. Ta jtsutsesic ya'i ta leto, ta vi'nal, ta chamel.”

¹³Xichi laj jtac'be une: “Le' une, Cajval, ti j'alc'opetique ta xalbeic ti jteclume, mu'yuc ta xtal leto, mu'yuc ta xtal vi'nal, ti vo'ot la ta xava'an aba ta j'ech'el ta slamajesel ti c'op ti li' ta jteclume.”

¹⁴Va'i un, ti Diose xi laj stac'bune: “Ta sjutic ma' ti j'alc'opetic ti jech ta xalic ta jventae, yu'un mu'yuc jtac'ojic batel. Mu'yuc c'usi calojbeic jset'uc. Mi ja'uc oy bu laj jchi'inic ta lo'ile. Naca no'ox ta xalic ti oy c'usi laj yilique. Naca lo'lavanej xal o ti oy c'usi ac'bat yilique. Naca yesomal sjolic ti xtal no'ox ta alel yu'unique. Ja' jech ma' ti oy c'usi ta xalic ti j'alc'opetic taj une.

¹⁵Ti vu'un Diosune xichi ta xcalbe sc'oplal ma' ti j'alc'opetic ti xc'opojic xa ta jventa yilele, c'alal mu jutebuc tacbilic cu'un, c'alal ta xalic ti mu'yuc ta xtal letoe, ti mu'yuc ta xtal vi'nal ta muc' ta lum li'e: Ti uni j'alc'opetic taje, leto, vi'nal xa'iic.

¹⁶Ti jteclum ti ta xich' albel ti va'i s'elan taje, leto vi'nal ya'iic ec jmoj xchi'uc yajnil squerem stsebtac. Jip xi loq'uel ta calleetic ta jteclum Jerusalén ti animaetic ti mu'yuc buch'u xmucune. Ja' jech ta xcac'be stojic ta sc'oj ti c'usi chopol laj spasique.

¹⁷“Xi xcholet xavalbe ya'i ti jteclumale: ‘C'ac'al ac'ubal xmalmun ma' ti ya'lel jsat une, ta scoj ti q'uelel xa talel svocol ti jlumale, ti spajeb xa no'ox yipal ti svocol ta stae.

¹⁸C'alal ta xibat ta osiltique, quiloj ti busul no'ox ti animaetic ti chamic ta letoe. C'alal ta xi'och batel ta jteclume, quiloj ti yajval lume lamal ta xchamic ta vi'nal. Ti j'alc'opetic une, ti paleetique, ta xbatic ta jun jteclum ti bu mu xojtiquinique.’ ”

¹⁹Cajval, ¿mi ta j'ech'el laj aten comel scotol ti jteclum Judae? ¿Mi mu xa ts'icbaj ta xava'i yu'un ti jteclum Sione? ¿C'u cha'al yepal no'ox ti vocol laj avac'buncutic talele? Jmalaoj calojcutic ti caj tsacal ta xic'otcutique, ti le' une, mu'yuc c'usi lec laj jtacutic. Jmalaoj calojcutic laetuc ech'uc ti banomile, ti le' une, c'ajomal no'ox muc'ul sibtasel laj jtacutic.

²⁰Jna'cutic un, Cajval, ti c'usi chopol laj jpascutique, ti bu jelavic ti jtot jme'cutic ta vo'nee, laj jta jmulcutic ta atojol un.

²¹Ta sventauc ti alequilal avutsilal une, mu xajip xatenuncutic un. Mu xaq'uel no'ox ti jteclum ti c'otem ta yutsil ta apasob mantale. Vuleso ta ajol ti atrate laj apas ta jtojolcutique, c'otuc ta pasel un.

²²¿Mi oy bu loc'tabil jyanlum dios ti xu' yu'un ta xac' taluc ti vo'e? ¿Mi ta smantal no'ox stuc ti vinajel ta xac' taluc ti vo'e? Cajval, Dios cu'uncutic, bu la xata ti jech une. Ti vo'ote ta xavac' taluc vo', aventainoj scotol ma' taj une, jech o xal jmalaojcutic ti c'usi lec ta xapas ta jtojolcutique.