Read Tzotzil Jeremías 15 Bible Online

Jeremías 15 - Tzotzil bible

Jeremías 15

¹Ti Diose xi laj yalbune: “Manchuc mi ta xtal sva'an sbaic ta jtojol ti Moisese, ti Samuele, mi ja'uc ta xc'uxubaj co'nton yu'un ti jteclum li'e. Albo ya'i, loq'uicuc batel ta jtojol, baticuc.

²Mi ta sjac'bot ti bu ta xbatic une, xi xavalbe ya'i ta jventae: ‘Ti buch'utic ta bate' chamel yich'oj talel ta xc'ot ta tsutsele, bate' chamel xa'i xcham xlaj. Ti buch'utic ta leto yich'oj talel ta xc'ot ta tsutsele, leto xa'i xcham xlaj. Ti buch'utic ta vi'nal yich'oj talel ta xc'ot ta tsutsele, vi'nal xa'i xcham xlaj. Ti buch'utic bec'bil loq'uel ta slumalic yich'oj talele, bec'bil ta xloc' ta slumalic.’

³“Ti vu'un Diosune, mu stselbuj ti xi ta xcale: Xi s'elan ta jtac talel chantos atsitselique: ta xavich'ic milel ta leto. Xajochetic ta ti'el yu'un ti ts'i'etique. Xulemetic xve' avu'unic, xchi'uc yan jti'oval chon bolometic xve' avu'unic.

⁴Ta xc'ot ta pasel cu'un ti ta aventaic mu xa c'usi x'ech' o ta xa'iic xi'el scotol ti muc'tiquil lumetic ta banomil ta scoj ti c'usi chopol laj spas ta jteclum Jerusalén xnich'on ti Ezequiase, ja' ti Manasés ajvalil yu'un ti jteclum Judae.

⁵“¿Mi yu'un la oy buch'u c'ux ta xaya'i un, jteclum Jerusalén? ¿Mi yu'un la oy buch'u yanche xi avu'un ti avaloje? ¿Mi yu'un la oy buch'u svul xa yo'nton xana' un ti lecuc oyote?

⁶Laj avalopatinun, laj atenun comel. Ti vu'un Diosune, mu lo'iluc no'ox ta xcal. Jech o xal un, laj jyales c'oc jc'ob ta stsitselot yo' ta xajtsutses ta j'ech'el, yu'un laj xa ti sts'iquemal xcuchemal cu'une.

⁷Ti ateclumal ti oyic ta jujun lumetic yu'un ti muc' ta lume, co'ol s'elan sc'a'epal majbil trigo laj jtaniic loq'uel. Ti jteclumale, mi junuc yalab xnich'nabic laj quictabeic comel. J'ech'el laj jtubbe sc'oplalic, yu'un mu xictaic ta spasel ti c'usi chopole.

⁸X'ech' to yepal jech c'u cha'al yi'al nab ti stuc xa me'unal antsetic xcha'q'uet laj quictabeic comele. Bats'i yutsil to xchi'il sc'opojel ti queremetic vul ta stojolic ti laj yich'ic milile, ti mu ts'icbaj ta xa'i svocol ti me'iletique. Ta jech yepal vul ta stojolic cu'un ti cuxul j'ilbajinvanej vocole, ti chamebal xa xal o yu'un ti xi'elale.

⁹Ti me'iletic yepal no'ox oy ti squeremique, ic'uneb osil banomil ta xa'iic ti tubem xa yiq'uic ta xlomic ta lum yu'un ti vul o'ntone. Mi oy to jlom c'uxi cuxul come, ta xc'ot ta pasel cu'un ti tsutsesatuc yu'un ti scontrae. Ti vu'un Diosune, mu stselbuj ti jc'ope.”

¹⁰Mu xa ono'ox cha'bel un, me', ja' no'ox livoc' li'ayan avu'un yo' lijoybij ta jun j'ilbajinvanej ti ta xiletovaj xchi'uc ti c'u yepal oyic ta sbejel banomile. Mu'yuc buch'u jch'amunojbe staq'uin, mi ja'uc cac'ojbeic ta ch'om ec. Manchuc mi jech un, scotolic ta xisbisun ta cotol chaval.

¹¹Mi mu'yuc lec laj cac' jba ta tunel ta atojol, mi mu'yuc laj jc'anbot vocol ta atojol yu'un jcontratac c'alal oyic ta vocol ta ilbajinele, c'otuc ta pasel ta jtojol un, Cajval, ti c'usi ta xloc' ta alel yu'unique.

¹²Xi laj yal ti Diose: “¿Mi oy buch'u xu' ta soquesbe sc'oplal ti tsatsal taq'uine xchi'uc ti c'anal tsatsal taq'uin ta xlic talel ta yolon ti yolon xocon sloq'ueb c'ac'ale?

¹³Ta scoj scotol ti amule, Israel, ta xcac'beic ech'el ta yoc ta sc'obic ti avajcontra ti c'usitic toyol stojol avu'une. Ti ac'ulejale xchi'uc scotol ti c'usitic oy avu'un ti li' ta alumale, ta matanal ta xich'ic batel un.

¹⁴Ta xa'ochic ta mosovil cu'un ta stojol avajcontratac, ta jun banomil ti mu ja'uc xavojtiquine. Til xa ta j'ech'el ti sc'ac'al co'nton jech c'u cha'al junuc c'oc' ta stsutsesot ta j'ech'ele.”

¹⁵Cajval, ti xana' lec scotole, vulesun ta avo'nton, tic'o aba ta jpojel un. Pacbo ya'i ti buch'utic ta xiyilbajinique. Ma'uc me ti xaco'oltas abaic xchi'uque, ti xajax-q'uel no'ox ta xichame. Xana' lec ti cuchem cu'un ta aventa ti bisbilun ta cotol chavale.

¹⁶C'alal ta xac'opoj talel ta jtojole, lec laj ca'i. Laj jta ti ximuyubaje, ti xcuxet to banomil yu'un laj ca'ie. Yu'un c'otemun ta avu'un, Ajvalil Dios ti scotol xu' avu'une.

¹⁷C'ot ta co'nton un, laj jch'ac jba loq'uel ta stojolic ti buch'utic lec ta xa'iic ta spasel ti c'usi xal ti yo'ntonique. C'alal lic avu'ninune, jch'ul jtuc ch'acalun talel, yu'un laj alamanbun talel ta jtojol ti sc'ac'al avo'ntone.

¹⁸¿C'u cha'al mu xc'ot ta tsutsel ti mu albajuc ti jvocole? ¿C'u cha'al mu xcol ti jyayijemale, ti xchi'il no'ox ta xich' c'alal ta xich' poxtaele? Lac'ot ta jtojol jech c'u cha'al junuc beo' ti ta jech yepal taquij c'alal tsots sc'oplal ta xtune.

¹⁹Va'i un, ti Diose xi laj stac'bune: “Mi ta xasut talel ta jtojole, jun co'nton xu' ta xacha'tun cu'un. Mi ta xavicta aba ta yalel ti c'usitic jeche' no'oxe, ti ja' no'ox ta xlic avalilan ti bu xloc' ventae, ta xac'opoj batel ta jventa. Yu'un tsots sc'oplal ti suticuc talel ta atojole, ma'uc vo'ot ta xabat ta stojolic.

²⁰Ti jteclum li'e, ta jpas ta atojol ti ta xac'ot yu'un jech c'u cha'al junuc moc ti meltsanbil ta c'anal taq'uine, ti mu tsalbaje. Ta stsaquelot ta leto, mi ja'uc ta stsalot, yu'un ta jcolta jba ta spojelot. Ti vu'un Diosune, mu stselbuj ti jc'ope.

²¹Ta jtic' jba ta apojel ta yoc ta sc'obic ti buch'u mu'yuc xch'ulel xa'i sbaique. Ta jpojot ta yoc sc'obic ti buch'u jelavem spucujil xa'i sbaique.”