Read Tzotzil Jeremías 2 Bible Online

Jeremías 2 - Tzotzil bible

Jeremías 2

¹Ti Diose xi laj yalbun ti laj sc'oponun talele:

²“Bat c'opojan ta stojol ti lum Jerusalene, xi tsots xaval yo' ta xa'iic lec: ‘Bejel ta jol ta xca'i ti mu jipbajun laj ava'i c'alal yach'il to ox laj jnabanot ta jpat jxocone. Jun avo'nton laj atsacliun ta sbajtical banomil ti bu mu'yuc c'usi xloc' x'ayane’, xi ma' ti Dios une.

³Ti Israele cu'un to ox jtuc, cuni t'ujbil ts'unubil to ox. Mi oy buch'u laj soquese, laj jtsits, laj jtacbe talel ta stojol ti cuxul ilbajinvanej vocole. Ti vu'un Diosune, mu stselbuj ma' ti jc'op une.”

⁴Snitilultac Jacob, jujuchop jnaclejetic ta sjunul Israel, chiquintabeic lec ava'iic sc'opojel ti Diose.

⁵Xi ta xal ti Diose: “¿C'usi chopol laj stabeicun ti amolmuc'totic ta vo'ne ti laj xch'ac sbaic ta jtojole? Yu'un ti stuquique laj sts'acliic diosetic ti mu xcoltavane. Mu'yuc c'usi bal o c'otic ec un.

⁶Mi ja'uc tsots sc'oplal laj ya'iic ta sa'elicun, manchuc mi laj yilic ti chi'inbilic cu'un ti c'alal laj jloq'uesic talel ta jteclum Egiptoe, ti ech'ic cu'un ta sbajtical banomile, ti bu taq'uin ta j'ech'ele, ti bu ch'abal ti vo'e, ti naca lican ch'entique, ti bu lajel xal oe, ti mu'yuc buch'u nacal teye, ti bu mu junuc jxanvil ta x'ech'e.

⁷Laj quiq'uic talel ta ve'ebal banomil li'e, yo' ta stun ta slajesic ti sat te'etic yu'une, xchi'uc ti c'usitic lec ta xloc' x'ayane. Latalic ec un, c'ajomal no'ox laj asoquesic ti jlum jbanomile. Ta acojic, lic ibuc co'nton ta stojol ti muc' ta lum li'e, ti c'otem ta cu'une.

⁸Ti paleetique, laj ta alel yu'unic ti ta sa'icune. Ti jtojobtasvanejetic yu'un ti jteclumale, mu'yuc laj yaq'uicun ta venta. Ti banquilaletique laj stoy sbaic ta scontrainelun. Ti j'alc'opetic une, c'ajomal no'ox oy ta ye ta sti'ic ta stoybel sc'oplal ti Baale. Bat snaban sbaic ta stojol ti c'usitic loc'tabile, ti mu'yuc c'usi xu' yu'unique.

⁹“Ti vu'un Diosune, mu stselbuj ti xi ta xcale: Ta jch'uch'ul sa'ilan yo' ta jta ti c'uxi contra xaquilot xchi'uc ti amamubtaque.

¹⁰Batan avilic ta banomil ti joyobtabil ta nab ti oy ta yeloval stuq'uil smaleb c'ac'ale, tuc'ulano avilic lec ta Cedare, q'uelic un mi oy buch'u jech ta spas jech c'u cha'al ta xapasique.

¹¹Ta xavilic un mi sjelta-jelta no'ox yajdiosic ti jun ch'ayemal muc' ta lume, ti c'alal mu'yuc c'usi xu' yu'unic ta j'ech'el ti diosetic taje. Ja'uc ti jteclumal une laj xa yictaicun comel. Mu'yuc laj yaq'uic ta venta ti c'otemun ta yutsilal slequilalique. C'ajomal no'ox bat yo'ntonic ta sts'acliel ti loc'obbailetic ti mu'yuc c'usi xu' yu'une.

¹²Ti va'i s'elan taje, yalab xnich'nab Jtotic ta vinajel, xi'an yu'un. T'elt'unan yu'un ti mu albajuc xi'elale. Ti vu'un Diosune, mu stselbuj ti jc'ope.

¹³“Yu'un ti jteclumale, cha'tos ti xi laj stsob sba ti smule: laj svalopatin comel ti cuxul sat vo' yu'une, lic sjoc' yaviltac ya'al stuquic ti mu sts'an vo' yu'un ti joq'uetic ta scoj ti chajal ti yute.

¹⁴“Ma'uc sc'oplal ta x'och ta mosovil ti Israele; mu yu'unuc voc' talel yo' ta xc'ot ta mosovil. ¿C'u cha'al ya'yel un cha'e ta xpojbat batel ti c'usi oy yu'une?

¹⁵¿C'u cha'al xloquet no'ox snuq'uic ti co'ol s'elan leónetic ti volibil yu'unic une? Sts'ijlajan xa laj yictabeic comel ti steclumal une; laj yich' chic'bel ti jteclumetic yu'une, mu xa junuc com yu'une.

¹⁶Lavoc'bat ta voq'uel ajolic yu'un ti jnaclejetic oyic ta Menfise, xchi'uc ti oyic ta Tafnese.

¹⁷Jech laj ata un ta scoj ti laj avalopatinun comele, c'alal vu'unun ti Ajvalil Dios avu'une, ti ta jtojobtasot batel ta stamel ti bee.

¹⁸Ava'i un, ¿mi oy c'usi ta xata o yu'un ti ta xabat ta Egipto ta yuch'el ti yuc'umal Niloe? ¿C'usi ta xata o yu'un ti ta xabat ta Asiria ta yuch'el ti yuc'umal Eufratese?

¹⁹Ta scoj no'ox achopolal ta xata tsitsel yu'un, ta scoj ti mu junuc avo'ntone, ta xatoj un. Ts'ijlan ta snopel ava'i, ta xlic avil un ti mu xnel x'ech' ti vocol ta scoj laj avictaun comele, ti mu'yuc laj avich'un ta muq'ue c'alal vu'un ti Ajvalil Dios avu'une. Diosun ti scotol xu' cu'une, mu stselbuj ma' ti jc'op une.

²⁰“Le' xa talel ma' ti lic atoy abaic talel ta jtojole, ti mu xac'anic pasel ta mantal une. Xi laj avalbe abae: ‘laj c'op ma' ti ta xcac' jba ta tunel une.’ Ta scotol ti buyuc no'ox ti toyol vitsetique, ta yolon scotol ti limlim te'tique, lic avac' abaic ta stojol yan.

²¹Bats'i lequil ts'unobil uva ti laj jts'unote, ti stuc xa no'ox yutsil sbec' ti uvae. Le' une, j'ech'el labat ta yoc un ti mu xacojtiquine

²²Manchuc mi ta xajux aba lec ta yi', mi ta xajuxbe aba xabon ti bu xa xal ti avo'ntone, ta jba ta jsat une, staoj yav bonolot yu'un ti mulile. Ti vu'un Diosune, mu stselbuj ma' ti jc'op une.

²³¿Mi xloc' no'ox ta alel avu'un ti xachi ta xaval une: ‘Laj to c'op un quere ma' ti jbonoj jba une, ti jnijanoj jchimanoj jba ta yich'el ta muc' ti diosetic ti mu'yuc c'usi xu' yu'unique’? A'yio ava'i c'u s'elan la'ech' talel ta stenlejaltic. Tuc'ulano avil scotol ti c'u s'elan laj apase, ti co'ol a'elan me' camello ti mu no'ox ta yocuc xbitet ta jujujote.

²⁴Co'ol a'elan me' te'tical burro ti nopem xa'i xpaxpunet ta vitstique, ti natic ta xich' ic' xchi'uc ta sa'el ti c'usi ta sc'ane. C'alal yorail ta xcuchumaje, mu'yuc buch'u stac' spajes. Mi och ta sa'el ti totinome, xi ta xc'ot ta pasel yu'une, nom to c'ot ti lubel yu'une. C'alal yorail ta xcuchumaje, ja' to ti c'uxi laj stae.

²⁵“Israel, altic no'ox ta pis oc xabite ta anil ta syayijesel ti avacane, ti taquijem xa anuc' ta lejlunele. Le' une, xachi laj avale: ‘Mu cha'bel jipbaj tenbaj ta xca'i ti jyanlum diosetique. Ta xbat jnaban jba ta stojol.’ ”

²⁶Xi ta xal ti Diose: “Ti nijil xa ta xcom ta q'uexlal apun ti j'elec' ta xvinaje, jech nijil chimil ta xcom ta q'uexlal apun ti Israele, ti jteclume, ti ajvaliletique, ti banquilaletique, ti paleetique, xchi'uc ti j'alc'opetic yu'une.

²⁷Xi ta xavalbeic ya'i ma' ti jpets te'e: ‘Cajval, jch'ul tot.’ Xi ta xavalbeic ya'i ma' ti jbej tone: ‘Jch'ul me'.’ C'ajomal ta xavac' ta ilel ti apatique. Ma'uc ta xavac' ti ilel ti asatic ta jtojol une. Manchuc mi jech un, c'alal naca to ta xavilic ti uni vocole, xachiic xa liquele: ‘¡La', tic'o aba, pojuncutic un!’

²⁸“Jteclum Judá, ¿bu oy ti adiostac ti laj ameltsan une? Jech yepal avajdiostac jech c'u cha'al ti jteclumetic avu'une. Talicuc un cha'e, vinajuc mi xu' yu'unic ta spojeloxuc c'alal ta xvul ta atojolic ti vocole.

²⁹¿Mi oy c'usi stac' xavalic ta scontrainelun ti c'alal toyobbaoxuc acotolique? Ti vu'un Diosune, mu stselbuj ti jc'ope.

³⁰Mu'yuc xtojobic ti avalab anich'nabic ti laj jtsitsique, mi jutebuc c'ot ta yo'ntonic un. Ti vo'oxuc eque, co'ol a'elanic jech c'u cha'al jti'oval león. Laj amilic ti j'alc'opetic avu'unique.

³¹(Avi tana eque, xchi'uc ti avalab anich'nabic li'e, ts'etano xa achiquin ta ya'yiel slo'il ya'yej ma' ti Dios une.) Israel, ¿mi co'ol j'elan sbajtical banomil laj ava'iun ta avo'nton? ¿Mi co'ol j'elan banomil naca queov laj ava'iun ta avo'nton? Jteclumal, ¿c'u cha'al xachi un cha'e: ‘Colemuncutic, j'ech'el mu xisutcutic talel ta atojol un’?

³²¿Mi ta xch'ay ta yo'nton xana' jun ants ti c'usi toyol stojole, ti c'usi laj xch'al sba xchi'uc c'alal yich' lequele? Ti jteclumale mu jechuc un, le' xa talel ta vo'ne laj xch'ayun ta yo'ntone.

³³Sna'be lec smelol ta stamel ech'el sbelel ti bu ta sta ti xch'ayobil yo'nton une. Banquilal jchanubtasvanejot xava'i aba yu'un ta spasel ti c'usi chopole.

³⁴Ti ac'u'e, bonol ta xch'ich'el me'un mu'nat, xchi'uc ti buch'u ch'abal smule, ti ma'uc ta xch'ich'el ti buch'u yacal ta elec' laj atae.

³⁵Manchuc mi jech scotol taj une, yu'un xachi laj avale: ‘Mu'yuc ma' ti jmul jcolo' une. Mu'yuc capem sjol ma' ti Dios ta jtojol une.’ Lec un cha'e, ti jech ta xaval ti ch'abal amule, ta jchaj ta sa'el ti c'uxi contra xaquile.

³⁶¿C'u cha'al ya'yel asujoj xa aba ta sjeltael ti buch'u ta stic' sba ta apojele? Ti jteclum Egipto xtoque mu stic' sba ta apojel jech c'u cha'al laj spas ti Asiriae.

³⁷Nijil chimilot ta q'uexlal apun ta xasut batel ta Egipto xtoc un. Ti buch'u jun to ox yo'ntonic ta atojole, laj xa jbev loq'uel. Mu'yuc c'usi ta xata yu'un ma' ti jun ajol xchi'uque.”