Read Tzotzil Jeremías 20 Bible Online

Jeremías 20 - Tzotzil bible

Jeremías 20

¹Ti pale Pasur xnich'on ti Imer ti yich'oj tsots yabtel ta ch'ulnae, c'alal laj ya'i ti va'i s'elan laj scaj'al ti Jeremiase,

²laj yal mantal ti yich'uc majele, ti yich'uc xojbel yacan ta jun lots'om te' ta ti'na yu'un Benjamín ti xjelav staylej ti oy ta sts'el ti ch'ulnae.

³Jun c'ac'al yech'el un, laj yal mantal ti yich'uc loq'uesel ti Jeremías ti chucul ta lots'om te'e. Va'i un, xi albat yu'un ti Jeremiase: “Ti Pasur abi to oxe, laj xa sjelbot ti Diose. Laj abiin xa yu'un, Magor-misabib.

⁴Yu'un ti Diose xi ta xale: ‘Ta xc'ot ta pasel cu'un ti atuc no'ox ta xasibtas abae, xchi'uc ti ta xi'ic avu'un ti buch'utic lec xavil aba xchi'uque. Ta aba ta asat, ta xavil ta xlajic ta milel yu'un scontraic ti buch'utic lec xavil aba xchi'uque. Scotol ti jnaclejetic yu'un ti jteclum Judae, ta xcac' ech'el ta yoc ta sc'ob ti ajvalil yu'un ti Babiloniae yo' jech bec'bil ta xbatic ta Babilonia, mi mo'oje, espada xve' yu'unic.

⁵Scotol ti c'usitic toyol stojol ti oy yu'un ti jteclume, xchi'uc scotol sc'ulejal ti ajvaliletic yu'un ti Judae, ta xcac' ech'el ta yoc ta sc'obic ti jcontrainvanejetique yo' jech ta xich'ic batel ta Babilonia un.

⁶Ti vo'ote, Pasur, bec'bil ta xabat ta Babilonia ec un jmoj xchi'uc ti c'u yepal oy ta anae. Ti bu taj une, ta xc'ot chaman un. Ta xavich' muquel jmoj xchi'uc scotol ti buch'utic lec xavil abaic ti naca jutbil ti c'usitic laj acaj'alilanbee.’ ”

⁷Laj alo'laun, Dios, jq'ueloj jba lilaj ta lo'lael ec un. Jelavem cuchem avu'un, tsalbil lic'ot ec. Scotol ora, tse'intabilun, labanbilun yu'un scotolic.

⁸Ti oy ta que ta jti' ta yalele, naca sc'oplal ilbajinel, tsutsesel. Iltabilun, labanbilun ta j'ech'el ta sventa ti ta xcal ti ac'ope.

⁹Mi xichi ta xcale: “Altic xa ta jvul co'nton yu'un ti Diose, j'ech'el mu'yuc ta xic'opoj ta sventa”, ti ac'opojel ta yut co'nton une, co'ol s'elan c'oc' ta xtil, ta xcoquij yu'un ti jbaquiltaque. Jpajesuc xa jba ca'i un, mu cha'bel xu'.

¹⁰Ca'binoj ma' ti xi xbet'bun ye ta xalic ti jnaclejetique: “Buyuc no'ox, xi'bal sba ta j'ech'el.” Xi ta xalic une: “La'ic quere, la' jtic'betic smul ya'i.” Ma'uc no'ox taje, ti buch'utic lec xquil jba xchi'uque, smalaic xa yilic ti bu ta xipiltsuje. Xi ta xalic une: “Stac' nan lo'lael ma' le'e, tsalbil ta xc'ot cu'untic unbi. Ta jpacbetic ya'i sutel ma' ti c'usi laj xa yalbotic un.”

¹¹Le' une, Cajval, co'ol a'elan jun j'ac'-leto mu tsalbaj ti li' achi'inojune. Ta staic ec un ma' ti buch'utic ta xiyilbajinique, mu xistsalic un. Mu xc'ot ta pasel, yu'un jeche' lo'il maxiltabil ta xc'otic. J'ech'el lamal ta xc'ot ta sbaic ti soquem sc'oplalique.

¹²Cajval, ti scotol xu' avu'une, ti oy alequilal avutsilale, aviloj bu c'alal oy sjol yo'nton ti vinique, quiluc ta jba ta jsat ti tsitsel ta xavac'be ti jnaclejetic une, yu'un cac'ojbot ta avoc ta ac'ob ti yatel co'ntone.

¹³Q'uejintaic ti Dios une, lequil c'optabiluc ma' ti Dios une. Yu'un ta stic' sba ta spojel ti buch'u ilbajinbil yu'un ti buch'u mu'yuc xch'ulel xa'i sbaique.

¹⁴Smu c'anel xa jech o ti sc'ac'alil ti li'ayane. Smu c'anel xa jech o ti sc'ac'alil c'alal livoc' yu'un jme' ti mu'yuc c'usi lec c'ot ta loq'uele.

¹⁵Smu c'anel xa jech o ti buch'u laj smuyubtasbe yo'nton ti jtot ti c'alal laj yalbe ya'i ti ayan xa jun squereme.

¹⁶Ti vinic taje, c'otuc ta stojol jech c'u cha'al ti jteclumetic ti j'ech'el ta slilin ti Diose. Ac'o ya'iuc ec un ti oy buch'u sob xa x'avet xchi'uc yipal xc'uxule, ti ta o'loluc c'ac'ale, yiluc ta sat ti yacal xa ti letovajele,

¹⁷¿C'u no'ox cha'al mu'yuc licham ta xch'ut jme' ti c'alal mu'yuc to ox voq'emune? c'ot ta jmuquinal ma' ti xch'ut jme' jechuque. Le' une, livoc' talel yu'un ti Diose.

¹⁸¿C'u cha'al laj quil ti saquilal osil yu'une, ti naca tal quil jvocol ta vul-o'ntone, ti q'uexlal sba ta j'ech'el ta xic'ot ta tsutsele?