Read Tzotzil Jeremías 21 Bible Online

Jeremías 21 - Tzotzil bible

Jeremías 21

¹Ti ajvalil Sedequiase laj stac batel ta stojol Jeremías ti Pasur xnich'on ti Malaquiase, xchi'uc ti pale Sofonías xnich'on ti Maaseiase, yo' xi ta xalbeic ya'i ti Jeremiase:

²“Avocoluc jac'uncutic ta stojol ti Diose, yu'un ti Nabucodonosor ajvalil yu'un ti jteclum Babiloniae, tal xa stsacuncutic ta leto. Oyuc to la c'uxi xu' yac'uc iluc jtosuc ti Dios ti ch'ayal ta xc'ot o'ntonal yu'une yo' jech ta sq'uej sba loq'uel ta jtojoltic ti Nabucodonosore.” Va'i ti Dios une c'opoj talel ta stojol ti Jeremiase.

³Xi laj yalbe ya'i ec ti buch'utic tacbilic batel yu'un ti Sedequiase: “Xi xavalbe ya'i ec un ti Sedequiase:

⁴‘Ti Ajvalil Dios yu'un ti Israele, xi ta xale: Ta xcac' tunuc ta sjolic yabtejebtac avajsoldadotac ti ta stsac sbaic ta leto xchi'uc ti caldeoetic ti oyic ta pat moque, yajsoldadotac yu'un ti ajvalil ta Babiloniae. Ta jtsobic ochel talel li' ta jteclume.

⁵Ti bu xa c'alal ti stilemal sc'ac'al co'ntone, lamal ta xc'ot ta atojolic cu'un ta scontraineloxuc.

⁶Ta jmil scotol ti jnaclejetic yu'un ti jteclum li'e, ti viniquetique, xchi'uc ti chon bolometique, ta xchamic ta xi'bal chamel.

⁷Ts'acal to un, ti Sedequías ajvalil yu'un ti jteclum Judae, ti yaj'opisialtaque, ti yaj'ac'-letotaque, ti c'u to yepal cuxul comic ta jteclum ti mu'yuc xchamic ta tsots chamele, ti mu'yuc xlajic ta letoe, xchi'uc ti mu'yuc xlajic ta vi'nale, ta xcac' ochuc ta yoc ta sc'ob ti Nabucodonosore, xchi'uc ta stojol yan yajcontra ti j'ech'el ta stsutsesvane. Ta jpas ta stojolic ti mu jutebuc oy syail xc'uxul o'ntonal ti espada xve' yu'unique. Ti vu'un Diosune, mu stselbuj ti jc'ope.

⁸‘Albo ya'i ti jteclum ti xichi ta xcal ti vu'un Diosune: Ta xcac'bot at'uj mi ja' ta xac'an ti ta to xatec' ti banomile, mi ja' ti ta xapalch'uj ech'ele.

⁹Ti buch'u li' ta xcom ta jteclume, ta xcham ta leto, mi ta vi'nal, mi ta jun muc' ta chamel. Ja'uc ti buch'u ta xbat snaban sba ta stojol ti caldeoetic ti yacal xa ta stsac ta leto ti jteclume, mu xchamic, ta to xc'ot ta pojel.

¹⁰Loc' ayan xa ta co'nton ta joybij ta chopol ti oy ox c'usi lec ta sta ti jteclum li'e. Ta xcac'be ta yoc ta sc'ob ti ajvalil yu'un jteclum Babilonia ti ac'o sbain ta spajbel ti sc'ac'ale. Ti vu'un Diosune, mu stselbuj ti jc'ope.

¹¹‘A'yio la ava'i sc'opojel ti Diose, xavut ya'i ti buch'utic smacojic ta sventainel ti Judae, sts'unubal ti Davide. Xachi xavalbe ya'iique: Scotoluc c'ac'al va'ano aba ta pojvanej. Tic'o aba ta spojel ti buch'u mu x'ech' svocolic yu'un ti j'ilbajinvaneje, naca mi ta scojuc xchopolil ajol avo'nton xu' ta xlic tiluc sc'ac'al co'nton jech c'u cha'al junuc c'oc' ti mu'yuc buch'u xtub yu'une.

¹³‘Jteclum, ti avu'ninoj sjunul ti stenlejal ti co'ol a'elan sac ch'ijan tonetic ta q'uelele, ti vu'un Diosune, jamal xcal ta xlic jcontrainot. Yu'un xachi ta xavalique: ¿Buch'u la xu' yu'un ta stsacotic ta leto? ¿Buch'u la xu' yu'un ta x'och ta jnac'obbailtic?

¹⁴Ta xcac' atojic ava'iic ti c'u s'elan sta o ta scoj ti bu c'alal pajemoxuc xchi'uc ti achopolalique. Ta jtilesbe sc'ac'al ti muc'tic te'tic avu'une, c'oc' xve' yu'un ti c'u yepal joyol ta spat ta xocone. Ti vu'un Diosune, mu stselbuj ti jc'ope.’ ”