Read Tzotzil Jeremías 22 Bible Online

Jeremías 22 - Tzotzil bible

Jeremías 22

¹Ti Diose xi laj yalbune: “Batan ta na yu'un ti ajvalile, chapbo ya'i lo'il a'yej ta stojol ti ajvalil yu'un ti jteclum Judae, ti chotol ta spasob mantal ti Davide, ta stojol ti yaj'opisialtaque, xchi'uc ta stojol ti jnaclejetic yu'un ti jteclume, ti xi xavalbe ya'iique: ‘Chiquintaic ava'iic sc'opojel ti Diose.

³Li' ti bu nacaloxuque, liquesic ta yabtelanel ti pojele, ti c'usi lec ta pasele. Tic'o abaic ta spojel ti buch'u ilbajinbilic yu'un ti j'ilbajinvaneje. Mu xavilbajinic ti nijil ta xcom ta q'uexlal avu'unic ti jyanlumetique, ti buch'u mu'yuc buch'u x'ayan yu'unique, xchi'uc ti me'unal antsetique. Mu xamilic ti buch'u jeche' cuch c'op no'ox ta stae.

⁴Mi ta xlic apasic ta melel ti va'i s'elan laj calboxuque, mu xch'ay ta be ti oy sc'oplal ta x'ech'ic ta pas mantal ti ajvaliletic ti bu ech' chotluc ta ajvalil ti Davide, ti buch'utic cajalic ta carretaetic xchi'uc ta ca'etic ti chi'inbilic ta xtalic yu'un ti yajtuneltaque, xchi'uc ti jteclum c'alal ta x'ochic talel ta ti'naetic yu'un ti muc' ta na li'e.

⁵Yan mi mu xavaq'uic ta venta ti va'i s'elan laj jcaj-t'amboxuque, jech ti muc' ta na li'e, ta j'ech'el ta xlilij. Ti vu'un Diosune, mu stselbuj ti jc'ope.’ ”

⁶Yu'un ti Diose xi ta xalbe sc'oplal ti muc' ta na yu'un ti ajvalil ta Judae: “Ti vo'ote, co'ol a'elan toyol vitsot yu'un Galaad, co'ol a'elan muc' ta vitsot yu'un Líbano ta xca'i. Tana une, ta jva'an jba ta yalel ti ta xac'ot cu'un ta sbajtical banomile, ti mu'yuc junuc jnaclej ta xcom ta atojole.

⁷Ta jtac talel acontrainel ti jel-ts'ac xchi'uc yabtejebic ta xtal ta atojole, ti tijbil talel sjolic ta stsutseselote. Ta xtuch'ic yalel ta c'oquel ti c'upil sba ch'ut te' ti muc'tiquil oyetic avu'une, ta spajbeic sc'ac'al un.

⁸“Ta ts'acal to un, yepal ti muc'tiquil lumetic ta x'ech'ic ta sts'el ti jteclum li'e, ti xi ta sjac'be sbaique: ‘¿C'u cha'al ti Diose jech laj spasbe ti muc' ta lum li'e?’

⁹Xi ta stac'be sbaic une: ‘Yu'un mu'yuc la laj yaq'uic ta venta strate ti Ajvalil Dios yu'unic ti laj spas ta stojolique, yu'un lic la snijan xchiman sbaic ta yich'el ta muc' ti yan diosetique.’ ”

¹⁰Mu xa'oq'uic ta sventa ti ajvalil Josiase. Mu xa'oq'uic yu'un ti jech chamem xae. Oc'anic ta sventa ti Salum ti ja' xnich'one. Mu xa sut talel ti jech palch'uj batele. Laj ta alel ma' ti ta xtal stec' xani ti banomil ti bu voq'ue.

¹¹Ti Salum xnich'on ti Josiase, ajvalil yu'un ti jteclum Judá ti och chotluc ta spasob mantal stot ti laj xcuchbe comel ti yabtel c'alal loc' batel li' ti bu oyotique, xi albat sc'oplal yu'un ti Diose: “J'ech'el laj stam batel sbe.

¹²Ta xc'ot ta palch'ujel yu'un ti lum ach'el yu'un ta muc' ta lum ti bu bec'bil bate. J'ech'el ch'ay o comel ta sat ti muc' ta lum li'e.

¹³Xi ta xal ti Diose: “Mu xa ono'ox cha'belucot un, ti naca ta chopol ta ilbajinvanej xana' ti c'alal lic meltsajuc ti mu albajuc yutsil ti muc' ta na avu'une, xchi'uc ti oy ta xcha'cajale, ti jeche' ech' svocolic avu'un ti abteletique, ti mu'yuc jutebuc laj atojbe ti sc'ac'alique.

¹⁴Yu'un xachie: ‘Ta jmeltsan jun muc' ta na ta jventa ti pujul lec yut ta xcom ti oy ta xcha'cajale.’ Yu'un cholol no'ox ti sventanailtac ta xavac'bee, ti naca ta ch'ut te' tenel-te' ta xachac'alta ti spac'baliltaque, ti utsuc xa xavac'be tsoj ti sbone.

¹⁵¿Mi yu'un xavac'touc ta xac'ot ta jun lequil ajvalil ta sventa ti naca ch'ut te' meltsanbil ta joyob ti bu ta xanaquie? Ti atote laj sc'upin lec ti ch'iel c'opojele, yu'un laj yabtelan ta spasel ti naca tuc' bat yu'un ti pojel c'uxubinele, jech o xal lec c'ot ta loq'uel yu'un un.

¹⁶Laj stic' sba ta spojel ti c'usitic oy sc'oplal ta xtun yu'un ti buch'utic me'un mu'natetique, xchi'uc ti buch'utic ilbajinbilique, jech o xal lec c'ot ta loq'uel yu'un un. Taje, sbiinoj xiyojtiquinun, xi smelol. Ti vu'un Diosune, mu stselbuj ti jc'ope.

¹⁷“Le' une, ma'uc ta achic' ta ava'lel ti avac'ojbe yipal ta stael ti c'usitic ta xtun avu'une. Muts'ul sba sat laj avac' ta milel ti buch'u ch'abal smule. Laj avilbe svocol ti smeyoj yoc sc'ob ta xcom avu'un ti ateclumale.”

¹⁸Ti Diose xi ta xalbe sc'oplal ti Joacim xnich'on ti Josías ajvalil yu'un ti Judae: “Mu'yuc buch'u ma' ti x'oq'uic xa ti jech ta xchame. Mu'yuc buch'u ma' ti x'oc'olet xa ti xi ta xale: ‘Mu xa ono'ox cha'bel un, jchi'il ta voq'uel. Mu xa ono'ox cha'bel un, jchapalul. Mu xa ono'ox cha'bel un, ajvalil. Mu xa ono'ox cha'bel un, Jcuch abtel.’

¹⁹Yu'un xi s'elan ta xc'ot ta pasel c'alal ta smuquique: Quiil xi no'ox loq'uel yajval c'alal to spat jteclum Jerusalén jech c'u cha'al junuc burro.”

²⁰“Judá, muyan batel ta vits Líbano, lic avanan un. Tsots avetan liquel ta vitstic yu'un ti Basane. Ta vitsuc to yu'un Abarim, avanan talel, yu'un tsalatic xa scotol ti buch'utic co'ol laj yac' ajolic xchi'uque.

²¹Laj ono'ox calbot ava'i c'alal yorail mu'yuc to ox c'usi xana'e, mi ja'uc laj achiquintabun un. Xi no'ox s'elan avuni abtel ta ach'iebal talele: Mu ono'ox xac'an xava'ibun ti jc'ope.

²²Ti banquilaletic avu'une, bec'bil ta xbatic ta ic' scotolic. Ti buch'utic co'ol laj yac' ajolic xchi'uque, bec'bil ta xloc' ta slumalic ec. Nijil chimil ta xacom ta q'uexlal apun ta scoj ti c'usitic chopol laj apas scotole.

²³Tana le'e, jun to avo'nton oyot ta avayeb ta ch'ut te'etic ti ich'bil talel ta vits Líbanoe. Le'e, q'uelel ta atojol ti mu x'ech' yipal ti avocole. ¡Mu yanuc xc'uxul jech c'u cha'al ta xvoc' ti olole!”

²⁴Ti Diose xi ta xalbe ti Jeconías xnich'on ti Joacim ajvalil yu'un ti Judae: “Xichi laj jva'an jba ta yalele: Manchuc mi jech a'elan jech c'u cha'al junuc ixtolal ni' c'abal ta xtun ta sventa ti seyo tiq'uil ta sni' ti jbats'i c'obe, ta xajpitsot loq'uel.

²⁵Jech o xal un, ta xcac'ot ech'el ta yoc ta sc'ob avajcontratac ti j'ech'el ta stsutsesot ti xi'emot yu'un avaloje. Ta xcac'ot ech'el ta yoc ta sc'ob ti ajvalil Nabucodonosor yu'un ti jteclum Babiloniae, xchi'uc ta yoc ta sc'obic ti caldeoetique.

²⁶Ta jtenot batel ava'i xchi'uc ame' ta banomil ti ma'uc laj yilot lavoq'ue. Achibalic ta xlaj ta xcham ti lum ach'el avu'unic ti bu taje.

²⁷Le' une, laj ta alel ti ta to xasutic talel ta banomil ti bu juteb ta avo'nton ta xaq'uel ava'i une.”

²⁸¿Mi co'ol xa s'elan jun xet'emal pulpul taq'uin? ¿Mi mu jtosuc xa ta xtun ta x'ile ti Jeconiase? ¿C'u cha'al ya'yel jipbil ta xbat xchi'uc xnich'nab ta jun banomil ti ch'ayel xa xale?

²⁹Banomil lacom un, banomil lacom un, lacom un banomil, chiquintao ava'i sc'opojel ti Diose.

³⁰Xi ta xal ti Diose: “Tic'bo ta vun sc'oplal ti vinic li'e, jun vinic ch'abal ti xnich'nabe, jun vinic ti c'ot no'ox ta tubbel ti yuni ts'unubale. Mi junuc snitilultac ta xilbe sat ta x'och ta pas mantal bu ech' chotluc ta pas mantal ti Davide, ti ta xlic ochuc ta ajvalilal ta jteclum Judae.”