Read Tzotzil Jeremías 23 Bible Online

Jeremías 23 - Tzotzil bible

Jeremías 23

¹Xi ta xal ta jamal ti Diose: “Mu xa ono'ox cha'bel ti jq'uel-chijetic ti sq'uelojic ti ta xch'ay batel ti tan puc ta xbat yu'un ti jchijtaque.”

²Ti Ajvalile, Dios yu'un ti Israele, xi ta xalbe ti jq'uel-chijetic ti sbainojic ta sventainel ti steclumale: “Tan puc xa bat avu'unic ti jchijtaque, jatav xa batel avu'unic, ti mi ja'uc laj atuc'ulanique. Ta jtuc'ulan lec un c'u s'elan xc'ot o ta stsitseloxuc ti mu'yuc slequil avabtel laj xa apasique. Mu lo'iluc no'ox ta xcal ma' ti Diosun une.

³Ta jva'an jba ta yiq'uel talel scomelal ti jteclumal bu c'alal tan puc batic cu'un ta yan muc'tic lumaltic c'alal laj jatviltas batele. Ta jtsob talel ta lequil yaxaltic bu oy ti sve'ebique yo' jech ta x'epaj liquel ti yolique.

⁴Ta xlic jva'anan jq'uel-chijetic ti q'uelbilic yu'une, yo' mu xa'iic xi'el. Scotolic mu'yuc c'usi sna'ic. Mu lo'iluc no'ox ta xcal ma' ti vu'un Diosun une.”

⁵Xi ta xal ta jamal ti Diose: “Ta xc'ot ta pasel ti oy bu ta xvul ta loq'uel cu'un junuc sbats'i nitilul ti Davide, jun ajvalil ti oy sbijil ta xventainvane, ti xchiquintaj yu'un smelol ti chapanvaneje, ti oy stuq'uilal ta sbainel ti jteclume.

⁶Ti c'u sjalil ta xventainvane, pojbil chabibil ma' ti jteclum Judae, jun yo'ntonic ta xcuxiic ti Israele. Yorail xa un ti xi ta sbiiltasique: ‘Jpojvanej c'ot cu'untic ti Dios une.’ ”

⁷J'ech'el xi ta xal ti Diose: “Oy bu ta xc'ot sc'ac'alil ti mu'yuc xa xi ta xlic sva'an sbaic ta yalele: ‘Ta sventa cuxul ti Dios ti laj sloq'ues talel ta Egipto banomil ti israeletique.’

⁸Le'e, c'ajomal xi ta xlic sva'an sbaic ta yalele: ‘Ta sventa cuxul ti Dios ti laj stsob talel snitilultac ti Israel ti tanijemic batel ta jteclum ti oy ta stuq'uil yolon ti yolon xocon sloq'ueb c'ac'ale, xchi'uc ta yan jteclumetic ti tanijemic batel yu'une.’ Le' tana une, ta xlic nacliuc ta yosil sbanomil stuquic.”

⁹Xi ta xal slo'il ya'yej ti j'alc'opetique: Ta sventa xch'ul c'opojel ti Diose, mu stac' a'yeluc ta xca'i, xch'ayet ma' ti banomil ya'yele. Xnicnun sjunul ma' ti jbec'tal jtacopale, co'ol xa s'elan ti buch'u tsale xa yu'un ti uch'ubajele.

¹⁰Ti jteclume, naca mulil batem ta yo'ntonic. Ti jnaclejetique xbitetic no'ox ta spasel ti c'usi chopole, ti tsatsuneb xa'i sbaic ta ilbajinvaneje. Jech o xal ti Diose laj sbis ta cotol chaval ti banomile, taquij ti banomile. C'oxoxib ta j'ech'el ti yaxaltic ti oy ta sbajtical banomile.

¹¹Xi ta xal ta jamal ti Diose: “Ti paleetic eque, xchi'uc ti j'alc'opetique, ts'i' xa'i sbaic ta j'ech'el; yacalic ta spasel chopol laj quil ta jch'ulna.

¹²Xi s'elan sbeic ti bu stamojic batele: ic'uneb ta j'ech'el, ch'ulul ta j'ech'el, Ta xich'ic tacoltael ya'i cu'un yo' ta xbajic ech'el. C'alal ta jchap jc'op xchi'uque, lamal ta xvul ta stojolic ti vocole. Mu lo'iluc no'ox ta xcal ma' ti vu'un Diosune.

¹³“Xi s'elan quiloj ta spasic ma' ti j'alc'opetic ta lum Samaria ta soquesbelun ti co'ntone: yu'un ta xalic ta sventa Baal ti c'usi ta scaj'alique, ti c'ot ta pasel yu'unic yanijic ta be ti jteclumal Israele.

¹⁴Xi s'elan quiloj mu stac' alel c'usitic chopol ta spasic ti j'alc'opetic yu'un ti lum Jerusalene: naca mulil, lo'lavanej; ta xac'beic yip yo'nton ta spasel c'usi chopol ti buch'u mu'yuc xch'ulel xa'i sbaique, yo' mu xictaic yu'un un. Ti stuquic une xchi'uc ti jnaclejetic ta jteclume, c'otic ta loq'uel jech c'u cha'al ta spasic ti muc' ta lum Sodomae xchi'uc ti Gomorra ta xquil une.

¹⁵“Ti Ajvalilun ti scotol xu' cu'une, jech o xal xi ta xcal ta scontrainelic ti j'alc'opetique: Ch'a ta j'ech'el ma' ti sve'elic ta xcac'beic slajesique, venenoal vo' ta xcac'be yuch'ic. Xchamelic ti j'alc'opetic ta jteclum Jerusalene, tanij xa ta sjunul ti muc' ta lume.”

¹⁶Xi ta xal ti Ajvalil ti scotol xu' yu'une: “Israeletic, mu xatac'beic ti c'usitic ta xalic ti j'alc'opetique. Ti c'usitic ta xalique, naca yesomal sjolic. Laj svules ta sjol stuquic, mu'yuc jc'oponojic.

¹⁷Ti buch'utic ta sten ta sbaj ti jc'ope, xi ta xalbeique: ‘Lec ta xc'ot ta loq'uel avu'unic scotol.’ Ti buch'u ta spucujilic ta sts'acliic ta spasel ti c'usi ta xal ti yo'ntonique, xi ta xalique: ‘Mi jutebuc oy c'usi chopol ta xc'ot ta atojolic un.’ ”

¹⁸Le' une, ¿mi oy la buch'u xojtiquin ti c'usi mucul yu'un ti Diose? ¿Mi oy buch'u ya'yioj, mi xchiquintaoj ti sc'ope? ¿Mi oy la buch'u sts'etanoj lec xchiquin yu'un?

¹⁹Scapemal ti Diose, co'ol s'elan jech c'u cha'al tsots ic' xchi'uc ya'lel, xjuch'et no'ox liquel ta stojol ti buch'u mu'yuc xch'ulel xa'i sbae.

²⁰Ja' to xpaj sc'ac'al yo'nton ti Dios mi c'ot ta pasel yu'un ti c'u s'elan snopoje. Ta xc'ot sc'ac'alil un ti ta xlic anopique, ta xlic ava'iic smelol.

²¹Xi ta xal ti Diose: “Mi jutebuc jtacojic ech'el ti j'alc'opetic taje, mi ja'uc oy bu laj jc'oponic. Le' une, yoquilal xa yu'unic ti xbitetic ta c'opojel ta jventa.

²²Ti lajuc ya'iic c'usi vocol ta a'yiel ta jventae, laj yalic jc'op ta stojol ma' ti jteclumal unbi, laj yicta sba yu'un ti bu chopol stamojic batele, laj yicta sbaic yu'un ta spasel ti c'usi mu lecuc ta q'uelel unbi.”

²³Ti Diose xi ta xale: “Mi nom to, mi nopol no'ox, Diosun ono'ox.

²⁴¿Mi oy buch'u stac' la snac' sbaic ta jba ta jsat? Jnojesoj sjunul vinajel banomil ta cutsil jlequilal. Mu lo'iluc no'ox ta xcal ma' ti vu'un Diosun une. p

²⁵“Ca'binoj c'u s'elan ta sjutic c'op ta xc'opojic ta sventa yalojic ti j'alc'opetic taje, ti ta xalic ti laj jc'oponic ta xvaichique.

²⁶¿C'u to ono'ox sjalil ta xbat ti j'alc'opetic taje, ti oy ono'ox ta ye ta sti'ic ta yalel ti c'usi jeche'e, ti c'alal naca no'ox spat sjol stuquic ti c'usi ta xalique?

²⁷Ti slo'il ya'yejic ti c'usi ta slo'iltabe sbaic ta jujun tale, c'ajomal oy ta yo'ntonic ti c'otuc ta pasel ti ac'o xch'ayicun ta yo'ntonic ti jteclumale, jech c'u cha'al laj spasic ti stot sme'ic ta vo'nee, ti laj xch'ayicun ta yo'ntonic yo' jech ta sts'acliic batel ti Baale.

²⁸Mi oy c'usi laj yil ta xvaich ti j'alc'ope, ac'o yal. Mi ta xch'amunbat ye ta yalel ti jc'ope, ta slequiluc yutsiluc yo'nton, ac'o yal. Yu'un ti jc'ope, mu stac' co'oltasel jech c'u cha'al junuc jol trigo xchi'uc ti yacane.

²⁹Ti jc'ope, co'ol s'elan jech c'u cha'al junuc c'oc', jech c'u cha'al junuc voc'ob-ton ti ta xlilij yu'un ti tone. Mu lo'iluc no'ox ta xcal ti vu'un Diosune.

³⁰“Jech o xal un, ti utsuc xa xalolanic ta jujun tal yilel ti c'alal ta smuquic comel jlom ti jc'ope, jamal ta xcal ti contra ta xquil ti j'alc'opetic taje. Ti vu'un Diosune, mu lo'iluc no'ox ta xcal.

³¹Ti j'alc'opetic taje, jamal xcal ti contra ta xquil ti c'alal utsuc xa sbisbeicun ta jc'opojel ti c'usi liquem no'ox ta spat sjol stuquique.

³²Ti j'alc'opetic taje, contra ta xquil ti naca jutbil ta yesomal sjolic ti utsuc xa xaq'uic ta na'el ti oy c'usi laj xvaichinic yalojique, ti ta xc'ot ta ch'ayel yu'un ti jteclumal ta scoj ti me'inem ta ye sti'ic ti jutbil c'ope. Mu'yuc tacbilic batel cu'un. Mi ja'uc loq'uem ta que ti c'usi ta xalique. Mu'yuc c'usi lec ta staic yu'un ti jteclumale. Ti vu'un Diosune, mu lo'iluc no'ox ta xcal.

³³“Jeremías, mi ja' jun jnaclej yu'un ti jteclume, mi ja' jun j'alc'op, mi ja' jun pale ti xi ta sjac'bote: ‘¿C'usi sbeel yo'nton ti Dios tana li'e?’ xachi xatac'be ya'ie: ‘Jamal ta xal ti Diose, c'otemoxuc ta yicats, ta sjipoxuc yalel.’

³⁴Mi ja' jun j'alc'op, mi ja' jun pale, mi ja' jun jnaclej yu'un ti jteclum ti ta xloc' ta alel yu'une: ‘Icatsil ta j'ech'el ma' ti c'usi sc'ubanoj ti Diose’, ti stuque xchi'uc ti c'u yepal oy ta snae, ta jtsitsic ya'i.

³⁵C'alal mi oy buch'u ta sjac'be sba xchi'uc ti buch'u lec xil sbaic xchi'uque, mi ja' jun yuts' yalal no'ox sbaique, xu' ti xi ta sjaq'ue: ‘¿C'usi oy ta yo'nton ti Dios ta xac' ta na'ele? ¿C'usi ta sc'an?’

³⁶Ja' no'ox un, mu xcha'alic ta yalel ti jbel c'ope: ‘Icatsil ta j'ech'el ma' ti c'usi sc'ubanoj ti Diose.’ Mi oy buch'u jech ta xale, ta xc'ot ta pasel cu'un ti yicatsinoj ta xc'ot ti c'usi laj yale. Ti vo'oxuque laj xa ayanijesbeic sc'opojel ti cuxul Diose, ti Dios avu'unique, ti Ajvalil ti scotol xu yu'une.

³⁷“Jeremías, xi xajac'be ca'itic ti j'alc'opetique: ‘¿C'u s'elan laj stac'boxuc talel ti Diose? ¿C'usi ta xal un?’

³⁸Mi xi ta xalic: ‘Icatsil ta j'ech'el ma' ti c'usi sc'ubanoj ti Diose’, xi xatac'bee: ‘Ti Diose xi ta xale: Ti jech to staoj yav ta xavalilanic ti jbel c'op ti c'alal albil xa sc'oplal ti mu stac' xavalique,

³⁹va'i unbi, ta jlicoxuc batel jech c'u cha'al junuc icatsil ti com to me ca'itic ma' ti alumalic ti bu laj cac'boxuc une, xchi'uc ti laj cac'beic ti amolmuc'totic ta vo'nee, ti nom to votsol ta xac'otic ta jtojole.

⁴⁰Yu'un ta j'ech'el lamal ta xc'ot ta abaic ti pec'tsanbil ac'oplalic yu'un ti quexlal apune, ti mi ja'uc xch'ay ta o'ntonale.’ ”