Read Tzotzil Jeremías 24 Bible Online

Jeremías 24 - Tzotzil bible

Jeremías 24

¹Ta ts'acal to, c'alal bec'bil xa ox batic ta chuquel yu'un Nabucodonosor ajvalil yu'un ti Babiloniae, ti Jeconías xnich'on ti Joacim ajvalil yu'un ti Judae, ti jmoj volbil loq'uic xchi'uc ti banquilaletic yu'un ti Judae, ti buch'utic sna' xabtelanic ep ta tos abtele, xchi'uc ti jten-taq'uinetique, ja' ti Dios une laj yac'bun quil noj ta icux chib mochetic ti oy ta ch'ulnae.

²Ti jun moche, lequil sat icux tiq'uil ti yich'oj xa lec sta'ajemale. Yan ti june, naca chopol icuxetic tiq'uil, spajeb chopol, mi ja'uc xal o'ntonal ta slajesel.

³Va'i un, ti Diose xi laj sjac'bune: “Jeremías, ¿c'usi laj avil?” Xichi laj jtac'bee: “Icux ta xquil. Ti bu lequique, jun yutsil ta j'ech'el. Yan ti xchopolile, spajeb mu'yuc lec, mi ja'uc xal o'ntonal ta lajesel.”

⁴Va'i un, ti Diose xi lic yalbune:

⁵“Ti vu'un Ajvalilune, Diosun yu'un ti Israele, xi ta xcal ava'ie: Jech c'u cha'al jun lequil sat icux ta xquil steclumal ti Judae, ti laj cal mantal ti bec'bil loq'uicuc ti bat c'alal to muc' ta lum yu'un ti caldeoetique. Staojic ti lec xquilique.

⁶Jbainojic ta spojel, ta sutic talel cu'un xtoc li' ta jteclume. Va'i un, mu'yuc c'usi sna'ic liquel cu'un. Mi ja'uc xa ta jtubbeic ti sc'oplalique. Ta jts'unic o ta j'ech'el. Mi ja'uc xa bec'bil ta xloq'uic cu'un.

⁷Ta xcac'be lec snopbenal yu'unic yo' jech ta xiyojtiquinic ti vu'un Ajvalilune. Ti stuquique ta xc'otic ta jteclumal, ta xic'ot ta Dios yu'unic un, ja' ti sjunul xa yo'ntonic ta sutic talel ta jtojole.

⁸“Ja'uc ti Sedequías ajvalil yu'un ti jteclum Judae, xchi'uc ti banquilaletique, xchi'uc ti jlom jnaclejetic ta Jerusalén ti comic ta lum li'e, xchi'uc ti buch'utic laj yac' sjolic naquiic ta Egiptoe, ja' jech ta xquilic jech c'u cha'al ti chopol sat icux ti mu stac' lo'el ta scoj ti mu'yuc leque.

⁹Ta xcac' c'otuc ta stojolic ti ta xbat xa xch'ulelic ta xi'el scotol ti yan muc'tiquil lumetic oy ta banomile. Ti bu tan puc ta xbatic cu'une, xvic' to satil yu'unic ti nijil chimilic ta q'uexlale, ti bajbil tenbile, ti bisbilic ta cotol chavale.

¹⁰Ta banomil ti bu laj cac'beique, ti cac'ojbeic no'ox ti stot sme'ic ta vo'nee, ta xcac' taluc ti letoe, ti vi'nale, ti chamele, ja' to ti c'uxi mu junuc ta xcomic ta muc' ta lume.”