Read Tzotzil Jeremías 25 Bible Online

Jeremías 25 - Tzotzil bible

Jeremías 25

¹Ta xchanibal jabil yochel ta ajvalilal ta jteclum Judá ti Joacim xnich'on ti Josiase, ti Diose laj xchapbe tal ya'i Jeremías c'u s'elan sc'oplal scotol ti jnaclejetic yu'un ti jteclum Judae. Taj une, ja' sba sjabilal yochel ta ajvalil ta Babilonia ti Nabucodonosore.

²Ti c'u s'elan chapbat ta sni' xchiquin ti j'alc'op Jeremiase, laj spuc ta scotol jteclumetic yu'un ti Judae, xchi'uc ta scotol ti jnaclejetic ta Jerusalene, ti xi laj yale:

³“Naca to ox ta yoxlajunebal (13) jabil yochel ta ajvalil ta Judá ti Josías xnich'on ti Amone, ti xcaltic tana une, oy xa ta oxib xcha'vinic (23) jabil ti c'alal laj sc'oponun talel ti Diose, ti vu'un ec une, xlic xcaj ono'ox ta jlo'iltaboxuc talel. Ja' no'ox ti mu'yuc ta venta avu'unique.

⁴Ti c'alal jech taje, c'ajomal no'ox sjel stsac sba talel ti j'alc'opetic yu'un ti Diose, ti vo'oxuc mu'yuc stu laj avilique. Mi ja'uc xac'an xats'etan achiquinic ta xch'unbel ti c'usi ta xale.

⁵Yu'un ti stuquique xi laj yalboxuque: ‘Ictaic xa ta spasel ti c'usi mu'yuc smelole, ti c'usitic chopole, ja' to jech xu' xanaquiic ta banomil ti bu laj avich'ic ac'bele, ti ac'bil ono'ox comel yu'un Dios ti atot ame'ic ta vo'nee.

⁶Mu xats'acliic ech'el ti yan diosetique. Mu xanijan xachiman abaic ta sc'oponel ta yich'el ta muc'. Mu xasoquesbeic yo'nton Dios ta snijanel xchimanel abaic ta stojol ti diosetic ti laj ameltsanic ta avoc ta ac'obique. Yipal to c'op ta stacboxuc talel ti c'usi chopol unbi.’

⁷Tana li' une, xi ta xal ti Diose: ‘Ti jech mu xavaq'uicun ta ventae, ti c'ajomal no'ox laj asoquesbeicun co'nton ti jech lic avich'ic ta muc' ti yan diosetic ti laj ameltsanic ta avoc ta ac'ob atuquique, ta acoj atuquic ta xc'ot ta atojolic cu'un ti c'usi chopole.’

⁸“Jech o xal un, ti Dios ti scotol xu' yu'une xi ta xale: ‘Ti jech mu'yuc xavaq'uic ta venta ti bijubtasel laj calboxuque,

⁹va'i un, ta jtac ta iq'uel scotol ti jteclumetic ti oyic ta yolon ti yolon xocon sloq'ueb c'ac'ale, xchi'uc ti cajtunel Nabucodonosor ajvalil yu'un ti Babiloniae, yo' ta stsac ta leto scotol ti jnaclejetic yu'un ti lum li'e, xchi'uc ti c'u yepal joyol ta spat ta xocon ti muc'tiquil lumetique. J'ech'el ta jtsutsesic ya'iic. Stuc slilijemal sicotan ta xcom cu'un ta j'ech'el, ti mu albajuc xi'elal ta xaq'ue.

¹⁰Ta xc'ot ta pasel cu'un ta stojolic ti ts'ij xi liquel ti xvochvun no'ox ti muyubajel ta q'uejimol yu'un ti q'uine, ti q'uejimoletic ta sventa ti lecomajele. Laj ta alel ti mu ch'ayaluc ta xjuch'naj ti mulinoe. Laj ta alel ti xojobin no'ox ti lamparaetique.

¹¹Scotol ti jteclum li'e, ta xc'ot ta pasel cu'un ti stuc slilijemal busul ta xcome. Ti muc' ta lum li'e, ta xc'ot ta pasel ti lajuneb xchanvinic (70) jabil pasbilic ta mantal yu'un ti ajvalil ta Babiloniae.

¹²C'alal mi ts'aqui ti lajuneb xchanvinic (70) jabile, ta xlic quich'be ye sti' yu'un smul ti ajvalil ta Babiloniae, xchi'uc ti muc' ta lum yu'une, steclumal ti caldeoetique. J'ech'el ta jtubbeic sc'oplalic. Ti vu'un Diosune, mu me lo'iluc no'ox ta xcal.

¹³Ti muc' ta lum li'e, ta xcac' c'otuc ta stojol scotol ti xi s'elan caj'albil ti ts'ibabil ta jpoc vu'un li'e: Lamal ta xc'ot ta sbaic scotol ti c'usi laj yal ti Jeremías ti laj scontrain scotol ti muc'tiquil lumetic ta jventae.

¹⁴Va'i ec un, ti stojol xtun o ta xich'ic cu'un ta scoj ti stoyobbailique, abolajuc ya'i ti ac'batuc svocolic yu'un ti yan muc'tiquil lumetique, ti ajvaliletic ti xu' yu'unique.’ ”

¹⁵Ti Ajvalil Dios yu'un ti Israele xi laj yalbune: “Q'uelo avil ti bis ti noj ta vinoe, ja' svinajeb ti sc'ac'al co'ntone. Tsaco, ac'bo yuch'ic scotol ti muc' ta jteclumetic ti bu ta xajtac batele.

¹⁶C'alal mi laj yuch'ique, ta xlic xenicuc xchi'uquic. Ta xlic chuvajicuc xchi'uquic ta scoj ti ta xc'ot ta stojolic ti leto ti vu'un ta jtac talele.”

¹⁷Laj jtsac ti bis oy ta sc'ob ti Diose. Laj cac'be yuch'ic scotol ti muc' ta lumetic ti bu c'alal tacbil libat yu'un ti Diose.

¹⁸Laj cac'be yuch'ic ec ti Jerusalene, xchi'uc ti jteclumetic yu'un ti Judae, jmoj xchi'uc ti ajvaliletic yu'une, ti banquilaletic yu'une, yo' jech ta xc'ot ta lilijel ti stuc sbusulil ta xcom ti mu albajuc xi'elal ta xaq'ue, ti bisbil ta cotol chaval ta xc'otic ec ti buch'utic jech to stamojic tana le'e.

¹⁹Ti laj cac'be yuch'ic xtoque, xi xcholete: ti faraone ajvalil yu'un ti lum Egiptoe, ti yaj'opisialtaque, ti banquilaletic yu'une, scotol ti steclumaltaque, ti ep ta chop sts'unubalic jnaclejetic nacalique, scotol ti ajvaliletic yu'un ti muc' ta lum Uze, scotol ti ajvaliletic ti oyic ta stuq'uil yosil filisteoetique, ti Ascalone, ti Gazae, ti Ecrone, xchi'uc ti c'u yepal comemic ta jteclum Asdode, scotol ti jnaclejetic ti oyic ta jteclum Edome, ti Moabe, xchi'uc ti Amone, scotol ti ajvaliletic yu'un jteclum Tiroe, xchi'uc ti Sidone, scotol ti ajvaliletic ti oy ta lum ti ta ti' nab Mediterráneo sbie, ti lum Temae, ti Buze, xchi'uc ti Dedane, scotol ti jteclumetic xch'uloj loq'uel stsotsil sjolic ta xocon xchiquinique, scotol ti ajvaliletic ti oyic ta jteclum Arabiae, scotol ti ajvaliletic xchopol-chop sts'unubalic nacalic ta sts'ijlajan banomile, scotol ti ajvaliletic yu'un jteclum Zimrie, ti Elame, xchi'uc ti Med(...)

²⁷Xi lic yalbun ti Dios une: “Albo ya'iic, ti Ajvalilun ti xu' cu'un scotole, Diosun yu'un ti Israele, ta xcalbeic ya'iic ti yuch'icuque, ja' to ti c'uxi xyacubique, ti xenicuc xchi'uquique, ti j'ech'el yalicuc ta lum xchi'uc ti mu xa stam sbaic liquel ta scoj ti leto ta jtac talel ta stojolique.

²⁸Mi mu sc'an stsac ti bis ta xavac'be ti ta xuch'ic ti ya'lele, xi xavalbe ya'ie: ‘Ti Dios ti scotol xu' yu'une xi ta xale: Jbel sc'oplal unbi, ta ono'ox xavuch'ic.

²⁹Ta jliques ya'i ma' ti tsitsel ta stojol ti jteclum c'otem ta cu'une. ¿Mi yu'un ta la xanopic ti mu'yuc ta xavich'ic ti tsitsele? Laj to c'op ma' ti q'uelbil ta xacomic une. Ta jtac talel leto ta stojolic scotol ti jnaclejetic ta banomile. Ti vu'un Diosun ti scotol xu' cu'une, mu lo'iluc no'ox ta xcal.

³⁰“Ti vo'ote, Jeremías, caj'albo ya'iic ta jventa scotol taje, ti xi xavale: ‘Ti Diose, xvo'o'et no'ox liquel ti sc'opojel ti ta xlic talel ta toyole, ta xch'ul-avil ti bu to nacale. X'avet no'ox ta scontrainel ti xchijtac jech c'u cha'al ta spasic ti jpits'-uvaetique, xchi'uc ta stojol ti jnaclejetic ta banomile.

³¹Ta xvinaj ti bu xa oy jujuti' banomil ti xvo'o'et ti sc'opojele. Ti Diose ta xlic xchap sc'op ta yich'bel ye sti' ta scontrainel ti muc'tiquil lume. Ta svol ta xchapanel scotol ti sna' xcham xlajique, ta stubbel sc'oplal ta j'ech'el ti buch'u mu'yuc xch'ulel xa'i sbaique. Jbel xc'opoj ma' ti Dios une.’ ”

³²Ti Dios ti scotol xu' yu'une xi ta xale: “Ti cuxul ilbajinel ti ta xvul ta loq'uele, ta xc'ot ta jujun muc'tiquil lum. Xva'et no'ox talel jun ic' xchi'uc ya'lel ti xi'bal sba ta xlic talel ta jujujot ti banomile.”

³³Ti buch'u ta x'aq'ue chamuc yu'un ti Dios ti c'ac'al taje, tusul ta xcomic ta jujujot ti banomile. Mu'yuc xa buch'u x'oq'uic ta stojolic un. Mu'yuc buch'u ta x'abolaj ta stsobbel ti sbec'tal stacopalic ta muquele, co'ol s'elan stso' chon bolometic busul ta xcom ta lumtic.

³⁴Avananic un, jq'uel-chijetic, avananic yu'un ti yipal xc'uxule. Ti abainojic ta stojobtasel ti chijetique, baletanic xa liquel ta banomil un. C'ot xa yorail ma' ti milele. Ta xavich'ic milel jech c'u cha'al ti jubemal chije.

³⁵Mu stac' xjatavic batel ma' ti jq'uel-chijetique. Ti buch'u sbainoj ta stojobtasel ti chije, laj sc'oplal ma' ti stac' spoj sbae.

³⁶X'avetic no'ox liquel ma' ti jq'uel-chije. X'avetic no'ox liquel xchi'uc yipal xc'uxul ma' ti jtojobtasej chije, yu'un lilinbat xa yu'un Dios ti yosil sbanomilique.

³⁷Ti Diose lic xa sc'ac'al yo'nton. Laj soques ti c'upil sba osil yu'une.

³⁸Co'ol s'elan jcot león loc' talel ti bu snac'oj sbae. Ti muc' ta lum yu'unique lilijem com ta j'ech'el. Til sc'ac'al yo'nton ti Diose. Xi'bal sba leto laj stac talel un.