Read Tzotzil Jeremías 28 Bible Online

Jeremías 28 - Tzotzil bible

Jeremías 28

¹Ta yo'obal u ti ja' ono'ox sjabilale, ti xcaltique, xchanibal xa jabil yochel ta ajvalilal ti Sedequías ta jteclum Judae, ti j'alc'op Hananías xnich'on ti Azur ti liquem talel ta jteclum Gabaone, xi bat yalbe ya'i ti Jeremías ti oy ta ch'ulna ta sba ta sat ti paleetique, xchi'uc ta scotol ti jteclume:

²“Ti Ajvalil ti scotol xu' yu'une, Dios yu'un ti Israele, xi ta xale: ‘Ti jech tsots ta spasvan ta mantal ti ajvalil yu'un ti Babiloniae, ta jtubbe sc'oplal.

³Le' ta chib jabile, ta xc'ot ta pasel cu'un ti ta sut talel li' ta jteclum ti c'usitic jtunel yu'un ti ch'ulna ti laj yich' batel ta Babilonia ti ajvalil Nabucodonosore.

⁴Ja' jech xtoc, ta xc'ot ta pasel cu'un ti ta sut talel li' ta jteclum ti Jeconías ajvalil yu'un Judá, xnich'on ti Joacime, xchi'uc scotol ti jnaclejetic ta Judá ti bec'bil batic ta Babiloniae. Ti vu'un Diosune, mu lo'iluc no'ox ta xcal ti ta jtubbe sc'oplal ti tsots ta spasvan ta mantal ti ajvalil yu'un ti Babiloniae.’ ”

⁵Ti j'alc'op Jeremiase xi lic stac'be sutel sc'op ti j'alc'op Hananías ta sba ta sat ti paleetique, xchi'uc ta stojol scotol ti jteclum ti c'u yepal oyic ta ch'ulnae:

⁶“Calticuc ti ja' xa Dios ta stic' sba ta spasel ya'yel ma' taj une. Bal to xca'itic ti c'otuc la ta pasel yu'un Dios ti avuni c'op ti va'i s'elan laj avale, ti teyuc xa la ta ch'ulna ti c'usitic toj jtunele, ti comuc xa la ca'itic yu'un Babilonia ti buch'utic bec'bil loq'uique.

⁷Ti vo'ot le'e, xchi'uc scotol ti jteclume, ts'et chiquintao ava'i ti xi ta xcale:

⁸Ti ba'yel j'alc'opetic laj ech'uc ta vo'ne ti c'alal mu'yuc to ox voq'uemotique, laj ono'ox scaj'albeic sc'oplal ti letoe, ti cuxul j'ilbajinvaneje, ti ta xtal tsots chamel ta stojolic ti epal muc'tiquil lumetique, ti ta xtal ta stojol ti ajvaliletic ti cajal xu' yu'unique.

⁹Ti j'alc'ope c'alal ta scaj'alilanbe sc'oplal ti naca lequilal ta xvul ta loq'uele, ja' to ta xvinaj unbi ti ja' tacbil talel yu'un Dios ti mi ta xc'ot ta pasel ti c'usi ta xalilanbe sc'oplale.”

¹⁰Va'i ti Hananías une laj sloq'uesbe ti sloc'obbail yabtejeb vacax yuinoj ti Jeremiase, laj xch'uch'ulta ta voq'uel,

¹¹ti xi xvulvun liquel ta sba ta sat scotol ti jteclume: “Xi ta xal ma' ti Diose: ‘Le' c'alal ta chib jabile, jech ta jlilin ti yaq'uilic chucul ta snuq'uic ti muc'tiquil lumetic ta scoj ti tsots pasbilic ta mantal yu'un ti Nabucodonosore, ajvalil yu'un ti Babiloniae.’ ” Ti Jeremías une loc' batel.

¹²Ech' c'uc sjaliluc ti c'alal loq'uesbat yu'un Hananías ti sloc'obbail yabtejeb vacax ti yuinoj ti Jeremías ti lilinbate, ti Diose xi laj yal ti c'oponat talel ti j'alc'op Jeremiase:

¹³“Batan, ba albo ya'i ti Hananiase ti xi ta xcal ti vu'un Diosune: Laj alilin ta voq'uel ti yabtejeb vacax loc'tabil ta te'e. Ja'uc ti vu'une laj xa jmeltsan ta taq'uin jun yabtejeb vacax ti ta xavuin eque.

¹⁴Ti vu'un Ajvalilun ti scotol xu' cu'une, Dios yu'un ti Israele, xi ta xcale: Ti yabtejeb vacax meltsanbil ta taq'uine, c'ot xa ta sbaic ta yuinel scotol ti muc'tiquil lumetique. Ta xac' sbaic ta tunel ta mosovil yu'un ti Nabucodonosor ajvalil ta Babiloniae. Yu'un laj xa cac'be ta yoc ta sc'ob c'alal ta te'tical jti'oval chon bolometic.”

¹⁵Va'i un, ti Jeremiase xi laj yalbe ya'i ti Hananiase: “A'yio ava'i, Hananías, ma'uc tacbilot talel yu'un ti Diose. Ti vo'ote, naca mu lo'lael patob o'ntonal ti c'usi ta xavalbe ti jteclume.

¹⁶Jech o xal xi ta xa'albat yu'un ti Diose: ‘Ta xatam batel abe cu'un. Jech un, ja' ti lach'ay o ta satilal li' ta banomile. Yu'un ti jabil li'e, ta xacham ta scoj ti c'usi laj avalilan ta stojol ti jteclum yo' yac' sjolic ta scontrainelun avu'une.’ ”

¹⁷Jech ti j'alc'op Hananiase cham ta yucubal yual ta sjabilal taje.