Read Tzotzil Jeremías 3 Bible Online

Jeremías 3 - Tzotzil bible

Jeremías 3

¹Ti Diose xi ta xale: “Mi oy jun vinic ta sutes ti yajnile, mi malij ta yan ti ants laj sbaje, ti sba vinique mu xu' ta xcha'ic'. Ti jech taje, mu ts'icbaj lec ta xa'iic ti jteclume. Ja'uc ti vo'ot une, Israel, xloc' x'och ti avajval yu'unic ta c'upinele. Tana une, ta to xasut ava'i talel ta jtojol un. Ti vu'un Diosune, mu lo'iluc no'ox ma' taje.

²Q'uelo batel avil ti c'an t'ajan stselejtique, xi xatuc'ulan quic leque: ¿Mi oy to xana' ti mu'yuc c'otemot ta spasel abolil teye? Xachotet ta be ta xamala ti buch'u ta xavac' aba ta c'upinel xchi'uque, co'ol s'elan jech c'u cha'al jun árabe vinic ti chotol ta sbajtical banomil ta xpa'ivane. Laj xa ats'ile ti jteclum ti laj avac' aba ta c'upinele, xchi'uc ti yan ti c'usi chopol ta xapase.

³Jech o xal un, ta acoj mu xtal ti vo' ta yorail sique, xchi'uc ta yorail corixmae. Avich'ojbe spimil sat ti jchonbail antse, q'uexavan ti jech a'elane.

⁴“Yu'un le'tic to no'ox xachi ta jtojole: ‘Ta cach'il to oxe, lec xavilun, Tot,

⁵¿mi staoj yav ti ilinemote? ¿mi ta xjalij ta j'ech'el ti sc'ac'al avo'ntone?’ C'alal yacalot ta yalel ti va'i s'elan taje, ja' o ochem yipal avu'un ti bu xa c'alal xu' avu'un ta spasel scotol ti chopole.”

⁶C'alal yorail ochem ta ajvalilal ti Josiase, xi laj yalbun ti Diose: “¿Mi laj xa avil c'usi laj spas ti toyobba Israele? Bat xa yac'beic yipal ta spasel smulic ta jujun toyol vits xchi'uc ta yolon limlim te'etic.

⁷Ti vu'une laj jnop ti ta ts'acal ta sut talel ta jtojol c'alal mi ech' yo'nton scotol ti vi s'elan ta spase. Le' une, mu'yuc sut talel. Ti va'i s'elan taje, laj yil ec ti jovil-jol jteclum Judá ti ja' yuni chi'il ta voq'uel xa'i sbaique.

⁸Laj yil xtoc ti laj jbaj loq'uel ti toyobba Israele, ti laj jsutes ta scoj ti laj yac' sba ta c'upinel ta yane. Ti jovil-jol jteclum Judá ti ja' yuni chi'il ta voq'uel xa'i sbaic xchi'uc ti Israele, mi ja'uc laj sibtas sba. C'ajomal no'ox lic xchan ta yac'bel yipal sbolomalinel sba.

⁹Mu ta vocoluc c'ot ta pasel ti lic socuc yu'un ti muc' ta lume. Yu'un yanij ta j'ech'el ti sjol yo'ntone. Lic snijan xchiman sba ta yich'el ta muc' ti loc'tabil tonetique, xchi'uc ti buyuc no'ox tec'ajtic ti te'etique.

¹⁰Ti jech laj xa spas scotol ti va'i s'elan taje, mi ja'uc xa ta sjunul yo'nton sut talel ta jtojol ti jchuvaj jol jteclum Judae. Yu'un c'ajomal no'ox laj slo'laun. Ti vu'un Diosune, mu lo'iluc no'ox ta xcal.”

¹¹Ti Diose xi laj yalbune: “Ti toyobba Israele, jc'ol mu sta ti smule, ja' xjelav smul ti jchuvaj jol jteclum Judae.

¹²Batan, xi xc'ot avalbe ya'i ti lo'il a'yej jech c'u cha'al li'e, ti xi aq'ueloj batel ta stuq'uil ti yolon ti yolon xocon sloq'ueb c'ac'ale: ‘Ti Diose xi ta xale: Sutan talel ta jtojol, toyobba Israel. Mu xanop ti yanijem jol co'nton mi ta xasut talel ta jtojole. Mu xanop ti ilinemun ta j'ech'ele. Yu'un oy yutsil slequil co'nton. Yu'un vu'un ti Diosune, mu stselbuj ti jc'ope.

¹³Ja' no'ox un, ojtiquino ti achopolale, xchi'uc ti toyobbaot ta stojol ti Ajvalil Dios avu'une, ti yoquilal avu'un ta sa'el ti xch'ayobil ajol ti mu xavojtiquinan ti ta xata ta scotol ta yolon ti limlim te'tique, xchi'uc ti mu xa xavich' ta muc' ti c'usitic albil cu'une. Ti vu'un Diosune, mu lo'iluc ta xcal.’ ”

¹⁴Ti Diose xi ta xale: “Sutanic talel, toyobba nich'nabiletic, yu'un cu'unoxuc. Ta xquic' ta jtojol jun ta jujun jteclum. Ta xquic' ta jtojol cha'vo' ta jujuchop nitiluletic ti ta xcac' suticuc ta jteclum Sione.

¹⁵Ta x'ochic cu'un ta jpas-mantaletic ti buch'u lec ta xquile. Va'i un, oy sbijilic xtojobic ta xaspasoxuc ta mantal.

¹⁶C'alal mi labolic xa ta j'ech'el ti ta jteclume, ti yepal xa ta j'ech'el ti avalab anich'nabique, ta xch'ay sc'oplal ta yalel xcaxail strate ti Diose. Mu'yuc xa buch'u ta svules ta sjol. Mi ja'uc xa ti oy to buch'u xvulvun xchi'uque, yu'un ma'uc xa tsots sc'oplal. Mi ja'uc ta to xich' pasel ta ach'. Ti vu'un Diosune, mu stselbuj ti jc'ope.

¹⁷Jech o xal un, ti Jerusalene ta xlic yich' biiltasel ta spasob mantal ti Diose. Ta xtal scotol ti muc'tiquil jteclumetique yo' jech ta xlic yich'icun ta muc'. Yu'un mi ja'uc xa ta xc'ot ta pasel ti pochan no'ox xa'i sbaique, ti yan ti yo'ntonic ti bu xba snijan xchiman sbaique.

¹⁸“C'alal ta xc'ot ta pasel sc'ac'alil taje, ti jteclum Judae ta xlic sco'oltas yo'ntonic xchi'uc ti jteclum Israele. Jmoj xvoletic ta sutic batel ta muc' ta lum ti oy ta yolon ti yolon xocon sloq'ueb c'ac'al ta banomil ti calojbeic ta xcac'beic ta xrextoic amolmuc'totic laj ech'uc ta vo'nee.

¹⁹“Israel, loc' ayan ta co'nton ti laj jbisot ta jnich'one, ti ta xcac'bot ti banomil ti stuc no'ox jun yutsil ta scotole, ti juteb ta o'ntonal yu'unique. Laj jnop ti ta xabisun ta atote, ti j'ech'el mu ta xach'ac aba ta jtojole.

²⁰“Ja'uc le' une, yan ajolic ta jtojol, co'ol a'elanic junuc ants ti ta smucul sati ti smalale. Ti vu'un Diosune, mu lo'iluc no'ox ta xcal.

²¹Xi s'elan xvinaj ti xvochetic no'ox ta jujun stselej sbajtical banomile: Ja'ic la ma' ti israeletic une, ti x'oc' x'avanic ta sc'anic ti c'uxubinele. Laj svalopatinic comel ti tuq'uil bee. Laj stenicun ta o'ntonal ti Ajvalil Diosun yu'unique.

²²Sutanic talel ta jtojol, toyobba nich'nabiletic, yu'un ta jpoxtaot ti vi a'elan yu'un ti atoyobbaile.” Ti israeletique xi ta xalique: “Li' xa oyuncutique, litalcutic xa ta atojol, yu'un ti vo'ote, Diosot cu'uncutic.

²³Mu'yuc c'usi bal ta j'ech'el ti ta xbat avlajetuncutic ta jujun stseleje, mi ja' ti ta toyol vitstique. Ti coltael yu'un ti Israele, ja' no'ox ta xich' tael ta atojol ti vo'ot Ajvalil Diosot cu'uncutique.

²⁴Xi s'elan laj quilcutic laj staic ti jmolmuc'totcutic c'alal biq'uituncutic to oxe: Oy no'ox ti xchijique, ti xvacaxique, ti stseb squeremique. Ti vu'uncutic une, c'ot ta ch'ayel cu'uncutic ta scoj ti liyanijcutic yu'un ti j'ac'vanej ta q'uexlal loc'obbaile.

²⁵Nijanun chimanuncutic, yu'un q'uexlal sba vinaj ti bu xa c'alal ti jtoyobbailcutique. Ta jbic'talcutic ono'ox, jech o j'elancutic talel ti laj jsa'ilan ti jmulcutic ta atojol ti vo'ot Ajvalil Diosot cu'uncutic ti mu'yuc laj jch'unbecutic ti c'usi ta xacane, jech c'u cha'al laj ech'uc ti jmolmuc'totcutic ta vo'nee.”