Read Tzotzil Jeremías 30 Bible Online

Jeremías 30 - Tzotzil bible

Jeremías 30

¹Ti c'op li'e, ja' ti c'u s'elan c'oponat talel yu'un Dios ti Jeremiase. Xi albat une:

²“Ti Ajvalile, Dios yu'un ti Israele, xi ta xale: Ts'ibao ta jpoc vun scotol ti c'usi laj xa calbot ava'ie,

³yu'un ta xc'ot sc'ac'alil ta jelbe yorail ti jlumal Israele xchi'uc ti Judae. Ti vu'un Diosune, mu lo'iluc no'ox ta xcal. Ta xquiq'uic sutel tal ta banomil ti bu laj cac'beic ta xrextoic ti stot sme'ic ta vo'nee.”

⁴Li'e, ja' ti sc'oplal Israel xchi'uc Judá ti laj yal ti Diose.

⁵Yu'un ti Diose xi ta xale: “Ta to xlic yich' a'yiel ti batem xa xch'ulelic x'avlajetic liquel yu'un ti cuxul j'ac'-xi'ele. Tsacbil yu'un xi'el, mu'yuc xcuxet ti banomil ta xa'iique.

⁶Jac'bo abaic ca'itic mi oy bu c'otem ta pasel ta svoq'ues yol ti vinique. ¿C'u cha'al ya'yel un cha'e ti co'ol xa s'elan xc'uxul olol xbalet ta xquil yu'un yipal ti viniquetique? ¿C'u cha'al scotolic xa sac pac'an ti satic un cha'e?

⁷Q'uelel talel sc'ac'alil ti spajeb vocole, ti mu'yuc bu xtaun o jech ti jun c'ac'al taje. Yorail ti mu xnel mu x'ech' ta xa'i svocol steclumal ti Jacobe. Ja' no'ox un, ta jtic' jba ta spojelic.

⁸Ti Ajvalil ti scotol xu' yu'une, xi ta xyale: “Ta jtic' jba ta spojel ti ochemic ta tsots mosovinel ti jteclumale. Laj to sc'oplal xtoc ti mosovinel yu'un ti jyanlumetique.

⁹Ta xac' sbaic ta tunel ta jtojol, ti Ajvalil Diosun yu'unique, xchi'uc ta stojol ti David ti buch'u vu'un ta jchotan ta ajvalile.

¹⁰“Ti vu'un Diosune, mu stselbuj ti xichi ta xcale: Mu xaxi'ic, steclumal cajtunel Jacob, mu xaxi', Israel, yu'un ta jtic' jba ta apojelic xchi'uc ti avalab anich'nabic ti oyoxuc ta muc' ta namal lum ti bu bec'bil labatique. Jun avo'ntonic ta xlic naquianic. Mu'yuc c'usi xana' liquel, laj to ta alel ti oy buch'u ta sibtasote.

¹¹Ti vu'un Diosune, mu stselbuj ti jc'op ti li' oyun ta spojelote. Ta jtubbe sc'oplal scotol ti muc'tiquil lumetic bu tan puc labatic cu'une. Ja'uc ti vo'ote, mu'yuc ta jtub ac'oplal. C'ajomal no'ox ta jtsitsot ava'i ti xi s'elan loc' ta sa'el avu'une: laj ta alel ma' ti mu'yuc atsitsele.”

¹²Ti Diose xi ta xale: “Mu stac' poxtael ti ayayijemale; mu'yuc xpoxil ti vocol lamal ta atojole.

¹³Mu'yuc xa buch'u ta stij yo'nton ta atojol; mu'yuc xa buch'u xu' ta xpoxta ti ayayijemale, mu xa stac' poxtael.

¹⁴Laj xa stenot ta yo'nton ti buch'u lo'labil ajol yu'une, mi ja'uc xa oy bu ta svul yo'nton ta atojol. Lic'ot ta avajcontra yilel ti laj jyayijesote. Tsots laj jtsitsot ta scoj ti yepal no'ox c'usi chopol laj xapase, ti spimil ti amul acolo'e.

¹⁵¿C'u cha'al xa'ijet xa yu'un ti ayayijemal une? Mu'yuc xpoxil ti yipal xc'uxul ta xava'ie, yu'un ja' ta scoj ti yepal no'ox c'usi chopol apasoje. Ti yepal no'ox ta j'ech'el ti amule, jech c'ot ta atojol cu'un.

¹⁶Scotol ti buch'u ta sbalot ta ti'ele, ta xich'ic balel ta ti'el ec. Bec'bil ta xloc' ta slumalic ti buch'u laj sbec'oxuc loq'uele. Ta xcac' que jti' ta xtambatic loq'uel ti c'usitic x'ayan yu'unic ti buch'utic laj stamic loq'uel ti c'usitic x'ayan avu'unique. Ti buch'utic laj yelc'anboxuc ti c'usitic x'ayan avu'unique, jech ta xich' elc'anbel ec.

¹⁷Ta xata liquel ti siquet xa banomil ta xava'ie. Ta jpoxta ti ayayijemale, ac'o mi xi ta xalolanic ti avajcontrae: ‘Jipbil tenbil xa ma' ti jteclum Sione, mu'yuc buch'u ta svul yo'nton ta stojolal.’ Ti vu'un Ajvalilune, mu stselbuj ma' ti jc'op une.”

¹⁸Ti Diose xi ta xale: “Ta jeltabe yorail steclumal ti Jacobe, ta xlic jc'uxubin ti steclumale. Ti bu stuc slilijemal busul com ti jteclumetic yu'une, ta xich' cha'va'anel liquel xtoc un. Ta xcha'ta yaviltac ti muc' ta naetic ti bu lilije.

¹⁹Ti bu taje, ta xlic q'uejinicuc ta sventa ti col albate, ti xmuyubajic liquel ta tse'eje. Mu xc'otic ta jutebajel, yu'un vu'un xcac' epajicuc. Ti mu bajbiluc ta xc'otique, yu'un ta xcaq'uic ta ich'el ta muc'.

²⁰Ti israeletique ta staic yavic jech c'u cha'al oyic ta ba'yele. Ti steclumale, jun sjol yo'ntonic ta jtojol. Ti j'ilbajinvanejetic ta stojolique, ta jtsits ya'iic un.

²¹Ta stojol no'ox stuquic xtoc xi s'elan ta xloc' ti jventainvanej yu'unique: Ta stojol no'ox stuquic ta xloc' ti ajvalil yu'unique. Ta xcac' que jti' ti xu' ta xnopaj ta jtojole. ¿Mi yu'un la buch'uuc no'ox xu' ta xnopaj ta jtojol?

²²Ta xc'otic ta jnich'nab un, Diosun yu'unic un. Ti vu'un Diosune, mu lo'iluc no'ox ta xcal.”

²³Ti sc'ac'al yo'nton ti Diose, sutubaj no'ox ta j'ech'el. Sts'otet no'ox jech c'u cha'al sutub ic' ta xc'ot ta stojol ti buch'utic mu'yuc xch'ulel xa'i sbaique.

²⁴Ti sc'ac'al yo'nton Diose, mu xlamaj ja' to ti c'uxi c'ot ta loq'uel yu'un ti c'u s'elan snopoje. Ta sta sc'ac'alil ta xlic ava'ibeic smelol taje.