Read Tzotzil Jeremías 31 Bible Online

Jeremías 31 - Tzotzil bible

Jeremías 31

¹Ti Diose, mu stselbuj ma' ti xi ta xale: “C'alal ta xc'ot yorail taje, scotol snitilultac ti Israele, ta xic'ot ta Dios yu'unic. Jech ti stuquique, calab jnich'nab ta xc'otic.

²Ti ta sbajtical banomile, laj cac' ta ilel yutsil slequil co'nton ta stojol ti jteclum ti colic to loq'uel ti jech jutuc xa mu chamique. C'alal yacal ta sa'ilan bu ta xcux yo'nton ti Israele,

³jech ti vu'un eque, ta nom ono'ox, laj cac' jba iluc ta stojolic. J'ech'el oyot ta co'nton, mu tenbajot ta xca'i. Jech o xal, jech o slequilal co'nton ta atojol.

⁴Ta jcha'va'an slumal ti Israele. Ta xlic ta ach' ti xnic no'ox vulel xchi'uc stampolic ta ac'otajel yu'un ti muyubajele.

⁵Ta xilic to ta satic ti ta sts'unic uvaetic ta stselej vitstic yu'un ti Samariae. Ti buch'u ta sts'un ti uvaetique, xch'i to xa'i ta slo'bel ti sate.

⁶Yu'un ta xc'ot yorail ti xi ta x'avanic talel ti jq'uel-osiletic ti ta vitstic yu'un yosilal ti Efraine: ‘La'ic, batic ta stojol Dios cu'untic ti oy ta jteclum Sione’ ”

⁷Ti Diose xi ta xale: “Cuxetuc banomil xava'iic ta q'uejimol ta sventa steclumal ti Jacobe, ti cajal sc'oplal c'otem yu'unic ti yan muc'tiquil lume. Aq'uic ta a'yiel ti aq'uejimolic ti xiuc xavalique: ‘Ti Diose laj spoj ti c'u to yepal oy ti Israel ti ja' slumale.’

⁸Ti c'u yepal oyic ta muc' ta lum ti oy ta yolon ti yolon xocon sloq'ueb c'ac'ale, ta sutic talel cu'un. Ta jbejel tsob talel ti bu xa ch'icajtic ta sjunul ti banomile. Jmoj ta xtalic xchi'uc ti ma'satetique, ti coxovetique, ti antsetic ti xchi'uc to ti yolique, xchi'uc ti buch'utic laj xa svoq'ues ti yolique. Mu no'ox albajuc yepal xvoletic sutel talel.

⁹Xc'opoj xti'inic xa, x'oq'uic x'avanic xa sutel talel. Ja' jech xtoc un, ta xquiq'uic batel ti bu ta x'ech' ti uc'umetique. Ta x'ech'ic cu'un ta stenlej be ti bu mu stsuculin ti yacanique. Yu'un c'otemun ta totil yu'un ti Israele. Jbanquilal nich'on ta xca'i ma' ti Efraine.

¹⁰“Muc'tiquil lumetic, a'yibeic sc'opojel ti Diose; xi s'elan xavalic ech'el ta stojol ti buch'u oyic ta ti' nabetic ta namal banomile: ‘Ti Diose, tan puc bat yu'un ti Israele. Tana une, ta stsob talel, ta sq'uel lec jech c'u cha'al ta spas ta stojol xchijtac ti jun jq'uel-chije.’

¹¹Ti Diose laj stic' sba ta spojel steclumal ti Jacobe. Col loq'uel talel yu'un ta yoc ta sc'ob ti jun muc' ta lum ti cajal ta spas mantal ta stojolique.

¹²“Ta xtalic, xmuyubajic xa ta xlic q'uejinicuc ta toyol vits yu'un ti jteclum Sione. Ta sc'upinic ti xi s'elan chapanbil yu'un ti Dios ta sventaique: mu xc'ot ta ch'ayel ti oy no'ox ti trigoe, ti vinoe, ti aceitee, ti chijetique, xchi'uc ti vacaxetique. Ta staic ti co'ol s'elan jun yav ts'unubaletic ti lec maltabile, staoj scotol ti c'usi ta xtun yu'une.

¹³Xmuyubaj no'ox ta x'ac'otaj ti tsebetique. Ta x'ac'otajic ec ti jch'iel viniquetique xchi'uc ti moletique. Yu'un xi s'elan ti spatobil yo'ntonic ta xcac'bee: ta joybinbe ta smuyubajel yo'ntonic ti oyic ta oq'uele, xch'ay to xc'uxul vocol ta xa'iic cu'un ti c'alal mu no'ox albajuc yepal ta xcac'beic ti smuyubajel yo'ntonique.

¹⁴Ta xc'ot ta pasel cu'un ta slajesic lec ve'lil ti paleetique; ta sc'upinic ta slajesel ti jteclum c'usitic lec x'ayan cu'un ta j'ech'ele. Ti vu'un Diosune, mu lo'iluc no'ox ta xcal.”

¹⁵Ti Diose xi ta xale: “Yu'un ti ta jteclum Ramae, ta xvinaj ti oy buch'u ta smil sba ta oq'uel ta j'ech'ele. Ja' ti Raquel ta x'oc' ta scoj ti yalabtaque, mi ja'uc jutebuc sc'an patbel yo'nton ti laj xa chamuc ti yalabe.”

¹⁶Ti Dios une xi ta xale: “Mu xa xa'oc', Raquel, mu xa xamal ti ya'lel asate. Ti oyot ta at-o'ntone, xi s'elan ta xatabe ti stojole: ti avalabtaque ta xcolic loq'uel talel ti oyic ta c'abal ta slumal ti yajcontraique. Ti vu'un Diosune, mu lo'iluc no'ox ta xcal.

¹⁷Xi s'elan ma' ti xu' xapat avo'nton ti c'uxi ta xata ta ts'acale: ta sutic talel ta slumalic ti avalab anich'nabtaque. Ti vu'un Diosune, mu lo'iluc no'ox ta xcal.

¹⁸Ti steclumal Efraine, laj ca'i ti mu'yuc spajeb ti xi s'elan x'ajetique: ‘Co'ol to ox j'elan tot vacax ti mu otesbajun ta bee. Tana une, li'och ta be avu'un. Sutcun talel avu'un ta atojol un, vo'ot ti Ajvalilote, ti Diosot cu'une.

¹⁹Oy bu laj jch'ac jba ta atojol, tana li' une, laj jna' jba sutel tal. Laj ca'i jba ti oy jmule, utsuc xa jt'en jba ta majel, ti spajeb nijil chimil licom ta q'uexlal apun ta scoj ti jmul jcolo' lic talel ta jch'iebale.’

²⁰“Steclumal ti Efraine, ja' jun jnich'on ta xca'i ti c'ux ta co'ntone, nich'onil ti jelavem xc'uxubinel cu'une. C'alal ta jajantae, mu ono'ox tenbaj ta xca'i, ta ono'ox jvul co'nton yu'un. Ta xca'i ti mu'yuc spajeb ti xc'uxul co'nton ta stojole. Ti vu'un Diosune, mu lo'iluc no'ox ta xcal.

²¹“Israel, ac'bo senyail ti be ti bu ta xa'ech'e yo' jech mu vocoluc ta xata ta sa'el. Tuc'ulano lec ti be ti bu la'ech' xanavane. Sutan talel, jteclum Israel, sutan talel ta ateclumaltac.

²²¿C'usi to ora ta x'ech' avo'nton ti xatal xabat ta jujujot jech c'u cha'al junuc antsil nich'onil ti joviem ti sjole? Ti vu'un Ajvalilune, oy c'usi ach' q'uelel talel cu'un ti ta xc'ot ta pasel li' ta banomile: Ti antse snaban xa sba ta sc'anel spojel ta stojol vinic.”

²³Ti Ajvalil ti scotol xu' yu'une, Dios yu'un ti Israele, xi ta xale: “C'alal ta xlic jelbe yorail ti jnaclejetic ta Judae, c'alal li' xa oyic ta ach' ta yosil sbanomilique, xi ta xlic yalique: ‘Sva'anuc sba ti Dios ta stojol ti ch'ul vits li'e, bu vul ta bajel ti lequilale.’

²⁴Ta xnaquiic liquel un ti j'abteletic ta osil banomile, ti jq'uel-chijetique, xchi'uc ti c'u yepal jnaclejetic ta Judae, ti bic'tal lumetic yu'une.

²⁵Yu'un ti buch'u lubtsajemic ti ch'abal xa yipique, ta staic lec cu'un ti ta xcac'be ti sve'el yuch'omique.”

²⁶Lijulav yu'un, jviq'uel c'ot jsat xchi'uc. Ximuyubaj to yu'un ma' ti jvaiche.

²⁷Mu stselbuj ti xi laj yal ti Diose: “Ta xc'ot ta pasel cu'un jun c'ac'al ti ta x'epajic liquel ti viniquetique, ti chon bolometic li' ta jteclum Israele xchi'uc ta jteclum Judae.

²⁸Jech c'u cha'al ti jbel co'nton laj jtenic loq'uele, ti laj jlilin ta soquesel ti lume, ti stuc slilijemal busul come, ti c'otic ta tsutsel yu'un ti vocole, ja' no'ox jech ta jva'an jba yu'unic xtoc ta sva'anel ti lume, xchi'uc ti c'usitic xlic xcaj ta ts'unele. Ti vu'un Diosune, mu stselbuj ti jc'ope.

²⁹“C'alal mi c'ot yorail taje, laj to ta alel yu'unic ma' ti xi ta xalique: ‘Ti totil me'iletique naca pajal uva ta slo'ic. Ti ololetic eque ta stsiq'uesbat yeic yu'un ta j'ech'el.’

³⁰Yu'un ti buch'u ta slo' ti pajal uvae, ta xlic vuyuc ti stanal yee. Ta jujun tal ta xc'otic ta chamel ta scoj ti smulique.”

³¹Ti Diose, mu stselbuj ti xi ta xale: “Oy bu jun c'ac'al ta xc'ot ta pasel ta xlic ach'ubuc cu'un ti jtrate ta stojol ti Israele xchi'uc ti Judae.

³²Ti jtrate taje, mu xa jechuc ta xc'ot ta pasel ta stojolic jech c'u cha'al laj jpas ta stojol ti stot sme'ic ta vo'ne c'alal laj jnitbeic talel ta sc'obic ti laj jloq'ues talel ta jteclum Egiptoe. Ac'o mi jbisojic ta cu'un un, stselbunic no'ox ti jtratee. Mu lo'iluc xcal ma' ti vu'un Diosune.

³³C'alal mi sta yoraile, xi s'elan ti jtrate ta jpas ta stojolic ti Israele: Ta jbejanbe ta yo'nton, xchi'uc ti jts'ibabe ta sjol ti c'usi jbel tsots albil cu'une. Ta xic'ot ta Dios yu'unic. Calab jnich'nab ta xc'otic ti stuquique. Ti vu'un Diosune, mu lo'iluc no'ox ta xcal.

³⁴Yo' ta xlic yojtiquinicune, ma'uc xa ma' ti talel batel ta stojobtas sbaic ta jujun tal xchi'uc ti buch'u lec xil sbaique, xchi'uc ti yuts' yalal sbaique. Mu'yuc ta alel mi oy sbijilic mi mu'yuc sbijilic, scotolic ta xlic yojtiquinicun. J'ech'el ta jch'aybe ta co'nton ti xchopolalique. Mi ja'uc xa ta jvules ta jol ti smul scolo'ique. Ti vu'un Diosune, mu lo'iluc no'ox ta xcal.”

³⁵Ti Diose laj yac' ti c'ac'al yo' ta sacub ti osile. Laj yac' ti ue, ti c'analetique yo' sac jaman ti ac'ubaltique. Laj yac' ti xyuc'uq'uet ti muc' ta nabe, ti natic no'ox xva'i xcoti ti syuc'benale. Ti albil sc'oplal Dios ti scotol xu' yu'un xi sc'oplale, xi ta xale:

³⁶“Mi oy bu ta xc'ot sc'ac'alil ta stselbuj ti c'usi chapal caloje, ti jech c'ac'al taj une, laj ta alel ti c'otem ta jteclumal ti Israele. Ti vu'un Diosune, mu stselbuj ma' ti jc'op une.

³⁷Mi oy bu ta xc'ot sc'ac'alil ti oy buch'u ta sta ta bisel bu c'alal c'otem spajeb ti toyol vinajele, xchi'uc mi laj yich' ojtiquinel xchajel ta q'uelel bu sliqueb stsacleb ti banomile, ja' o yorail jipbil tenbil ta xcom cu'un ti Israel ta scoj scotol ti c'usi laj spase. Ti vu'un Diosune, mu me lo'iluc no'ox ta xcal.”

³⁸Ti Diose xi ta xal ti mu stselbuje: “Ta sta sc'ac'alil ta xich' cha'meltsanel ti jteclumale. Ta xlic talel ta q'uelob osil ti sbiinoj Hanameele, ta xc'ot c'alal to ta ochebal ti'na ti sbiinoj Xuc'ave.

³⁹Ti sts'aquiltac ta stame, tuc' ta xc'ot ta loq'uel. Ti bu taje, ta xc'ot ta vitstic yu'un Gareb, ta xotbinic ech'el un ta stuq'uil Goae.

⁴⁰Scotol ti stenlejal bu ta xich' muquel ti animaetique, bu ta xich' jipel ti tane, xchi'uc scotol ti osil ti oy ta yac'ol uc'um yu'un Cedrone, c'alal to ta xuc'av sbiinoj Ochebal yu'un ti Ca'etique, ti oy ta yeloval sloq'ueb c'ac'ale, c'otem ta jventa. J'ech'el mi jutebuc ta xich' jinesel scotol ma' taj une.”