Read Tzotzil Jeremías 32 Bible Online

Jeremías 32 - Tzotzil bible

Jeremías 32

¹C'alal slajunebal (10) xa jabil yochel ta ajvalilal ti Sedequías ta lum Judae, ti ja' o xa xvaxaclajunebal (18) jabil xtoc yochel ta ajvalilal ti Nabucodonosore, c'oponat talel yu'un Dios ti Jeremiase.

²Ta yorail taje, yajsoldadotac ti ajvalil yu'un ti Babiloniae, ja' o yacal ta stsac ta leto ti Jerusalene. Tiq'uil ec un ta chuquel ti j'alc'op Jeremiase ta amac' bu oy ti soldadoetic sbainoj ta xchabiel ti muc' ta na yu'un ti ajvalile.

³Ta smantal ti ajvalil Sedequiase yich'uc bajel ta chuquel ta scoj ti xi ta xalolan ti Jeremiase: “Xi ta xal ti Diose: ‘Ti lum li'e, ta xcac' que jti' ti ochuc ta sc'ob ti ajvalil yu'un ti muc' ta lum Babiloniae.

⁴Ta stsaquic yu'un caldeoetic ma' ti ajvalil Sedequiase. Ta j'ech'el ta x'och ta sc'ob ti ajvalil ta lum Babilonia ti ta xbat sva'an sba ta stojole.

⁵Ti Sedequiase, ta x'iq'ue batel yu'un ti Nabucodonosor ta Babiloniae. Com o to un, ja' to mi vul ta co'nton ta sbainele. Ac'o mi utsuc xa ta xatsal ava'iic ta leto ma' ti caldeoetic une, mu xachanbeic yip. Jbel xic'opoj ma' ti vu'un Diosune.’ ”

⁶Ti Jeremiase xi laj yale: “Ti Diose xi laj yalbun ti laj sc'oponun talele:

⁷‘A'yio ava'i, ti anamtal its'in Hanameel xnich'on ti ajuntot Salume, ta xtal yalbot ava'i ti amanbuc la ti jsep yosil ti oy ta jteclum Anatote. C'otem ta aventa ta smanel un, yu'un mu yanucoxuc xchi'uc.’

⁸Jech no'ox c'ot ta pasel jech c'u cha'al laj yal ti Diose. Ti jnamtal its'in Hanameele tal sq'uelun ti oyun ta yamaq'uil na bu oy ti jchabivanej soldadoetique. Tal yalbun ti jmanbuc jsepuc yosil ti oy ta Anatote ta yosilal snitilultac ti Benjamine. C'otem ta jba ta smanel ti ta xc'ot ta cu'une ta sventa ti mu yanucun xchi'uque. Ti jech oy ta yo'nton Dios laj quile,

⁹laj jmanbe yosil ma' ti jnamtal its'in Hanameel xnich'on ti juntot une, ti oy ta Anatote. Lic jchapan taq'uin, sts'inlajet no'ox vuclajuneb (17) ta sep plata taq'uin laj cac'be jelavele.

¹⁰Laj jmeltsanbe svunal. Laj cac'be seyoal xchi'uc spirma ti rexticoetic ti laj sva'an sbaique.

¹¹Laj quich' ti cha'lic sloc'ol vun ti bu ta xalbe sc'oplal ti laj yich' manele, ti bajal yich'oj seyoe, xchi'uc ti jamal mu'yuc yich'oj seyoe.

¹²Ta sba ta sat ti jnamtal its'in Hanameele, ti rexticoetic ti laj yac' spirmaic ta sventa ti smanele, ta sba ta sat scotol ti israeletic ti chotolic ta amac' ti bu oy ti jchabivanej soldadoetique, laj cac'be jelavel ti Baruc xnich'on ti Neriase, smom ti Maaseiase.

¹³Ta sba ta satic un, xi laj calbe ya'i ti Baruque:

¹⁴‘Ti Ajvalil ti scotol xu' yu'une, Dios yu'un ti Israele, xi ta xale: Tsaco, ich'o xcha'lical svunal ti trate ti jlic ti yich'oj ti seyoe, xchi'uc ti jlic mu'yuc yich'oj ti seyoe. Tic'o ochel ta jbej bin yo' ta xjalij ta q'uejel.

¹⁵Ti Ajvalil ti scotol xu' yu'une, Dios yu'un ti Israele, xi ta xale: Ti li' ta banomile, ta xlic yich' manel naetic, osiletic, yav ts'unubaletic.’

¹⁶“C'alal laj cac'be jelavel svunal sventa smanobil osil ti Baruc xnich'on ti Neriase, xi lic c'opoj ti'incun ta stojol ti Diose:

¹⁷‘Cajval, ti ta sjunul amuc'ul atsatsal laj ameltsan ti vinajele ti banomile. Ma'uc ma' ti mu'yuc c'usi ta xc'ot ta pasel avu'une.

¹⁸Ta xavac' ta q'uelel syail xc'uxul avo'nton ta stojol ti yepal no'ox ta voc' ta x'ech'ique. Ta xatsits xtoc un ti buch'uuc no'ox ta scoj smul ti stot sme'ique. Jelavem amuc'ul un, Dios, cajal c'otem ma' ti ac'oplal une, Dios.

¹⁹Jelavem no'ox smuc'tiquil ma' ti c'usitic ta xanope. Mu albajuc smuc'tiquil ma' ti avabtel une. Ti c'usitic ta spasic ti buch'uuc no'oxe, chajal lec ta aba ta asat. Ta jujun, ta xavac'be stoj ti yabtelique.

²⁰Ch'ayal c'ot o'ntonal yu'un, yan senyailetic c'usitic laj apas ta muc' ta lum Egiptoe, ti jech to ta xavac' iluc ta stojol ti israeletique, xchi'uc ta sba ta satic scotol ti jnaclejetique. Cajal c'ot ti ac'oplal yu'un une.

²¹Ti amuc'ul atsatsale, laj alamanbe ta sbaic ti muc' ta lum Egipto c'alal laj aloq'ues talel ti ateclumal Israele. Laj avac' ta ilel ti ch'ayal ta xc'ot o'ntonal yu'une, xchi'uc senyailetic ti scotolic bat xch'ulelic ta xi'el avu'une.

²²Laj avac'be yich' banomil ti israeletic ti bu co'ol s'elan vo' ta xbein ti chu' vacaxe, xchi'uc ti ajapome jech c'u cha'al laj ono'ox avalbe ya'iic ti stot sme'ic ta vo'nee.

²³C'alal ochic talel ta jteclum li' une, laj yu'ninic un. Mu'yuc laj yaq'uicot ta venta. Mi ja'uc laj xch'unic ta spasel ti c'u s'elan laj atojobtase, mi ja'uc ti c'u s'elan laj avalbe ya'iique. Jech o xal un, laj atacbe talel ta stojol ti cuxul j'ilbajinvanej vocole.

²⁴‘Ti caldeoetic tana le' une laj xa smeltsan sbitebic ta svoliel ti lume. Ti q'uelel ti letoe, ti vi'nale, ti tsots chamele, ta xc'ot ta pasel ti ta x'och ta c'abal yu'un yajcontratac ti lume. Cajval, aviloj xa ti ta xa xc'ot ta pasel ti c'usi laj avale.

²⁵Le' une, Cajval, laj avalbun mantal jmanuc ti banomile, ti jtojuc ta sba ta sat ti rexticoetique, ac'o mi ta x'och ta sc'obic caldeoetic ti jteclum li'e.’ ”

²⁶Va'i un, ti Diose xi laj stac'be ti Jeremiase:

²⁷“Vu'un Ajvalilun, Diosun yu'un scotol ti c'usi cuxulique. Mu'yuc ma' ti c'usi mu xc'ot ta pasel cu'une.

²⁸Jech o xal xichi laj calbot une: Ta xc'ot ta pasel cu'un, ti jteclum li'e, ta x'och ta yoc ta sc'ob ti Nabucodonosor ajvalil yu'un ti Babiloniae, xchi'uc ti caldeo soldadoetic yu'une.

²⁹Ti caldeoetic ti yacalic xa ta snet'el ti jteclume, ta x'ochic talel un. Ta stsanbeic sc'ac'al jmoj xchi'uc ti xcha'cojal naetic ti bu yac'ojbeic chic'bil pom ti Baale, xchi'uc matanal vino ti yan diosetique, ti laj soquesbeicun ti co'nton ta j'ech'ele.

³⁰Ta sliquebal ono'ox ti lum Israele, xchi'uc ti Judae, yac'ojbeic yipal ta spasel ti c'usi mu lecuc ta xquil. Mu'yuc yictaoj sbaic ti israeletic ta soquesel co'nton yu'un ti loc'obbailetic ti laj smeltsanic ta sc'obique. Jech xcal ma' ti vu'un Diosun une.

³¹C'alal meltsaj talel ti jteclum li'e, laj ono'ox sliquesic talel ti scapemal sti'emal jole, ti jech to xyaquetic ti c'ac'al tana li'e. Jech o xal j'ech'el ta jtubbe ti sc'oplal ya'iique,

³²ta scoj ti laj xa soquesbeicun co'nton yu'un ti c'usitic chopol yabtel ta spasic ti lum Israele, xchi'uc ti jteclum Judae, jech c'u cha'al ti ajvaliletique, ti paleetique, ti j'alc'opetic yu'unique, xchi'uc scotol ti jnaclejetic yu'un ti Israele xchi'uc ti jteclum Judae.

³³Laj svalopatinicun comel. Ma'uc ta xac' satic ta jtojol. C'alal mi jutebuc quictaoj jliqueluc ta stojobtaselique, mi ja'uc xaq'uicun ta venta. Mi ja'uc stsaquic ma' ti tuq'uibtasel ta xcac'beique.

³⁴C'ot ta pasel yu'unic un, laj soquesbeicun ti jch'ulna ti c'otem ta jventae. C'ot xa ta sva'anobil loc'obbailetic yu'unic ti mu jutebuc lec ta xquile.

³⁵Laj sva'anic altaretic xtoc ta sventa Baal ta stenlejal ti Ben-hinome, yo' ta xchic' squerem stsebic ti ta xich' milel ta sventa smoton ti Moloque. Taje, ta sta smul yu'unic ti Judae, ti jelavem xchopolal ta xquil ti mu'yuc calojbeic ya'iique, ti mi ja'uc jutebuc jnopoje.

³⁶“Ti vu'un Ajvalilune, Diosun yu'un ti Israele, xichi laj calbot ava'i sc'oplal ti jteclum li'e, ti laj aval ta x'och ta sc'ob ti ajvalil yu'un ti muc' ta lum Babiloniae, ta scoj ti letoe, ti vi'nale, ti tsots chamele:

³⁷Ta jtsob talel yajvaltac ti banomil ta scotol ti muc' ta lumetic ti bu tan puc bat cu'un ti c'alal mu stac' ts'iquel ca'i ti soquemal scapemal jol ti yan sba xi'elal ta xaq'ue. Ta xquic' sutel talel li' ta banomile yo' jech jun yo'nton ta xnaquiic.

³⁸Ta xc'otic ta jteclumal, ta xic'ot ta Dios yu'unic un.

³⁹Ta jtijbe yo'ntonic ti c'ajomaluc c'otuc ta pasel yu'unic ti yich'icun ta muc' ti c'u sjalil cuxulique, sventa slequilal yutsilal ti stuquique xchi'uc ti snitilulique.

⁴⁰J'ech'el xi s'elan ta jpas ti jtrate ta stojolique: Ta jva'an jtec'an jba ti mu xquicta jba ta spasel ti c'usi lec ta stojolique. Vu'un ta jventa ti loc'uc ayanuc ta yo'ntonic ti c'ajomaluc no'ox yich'icun ta muq'ue, ti mu xch'ac sbaic ta jtojole.

⁴¹Ximuyubaj no'ox ta spasbelic ti c'usi lec ta stojolique. Melel, sjunul co'nton ta xcac' naquiicuc li' ta muc' ta lume.”

⁴²Ti Diose xi to laj sts'ac ech'el ta yalilanele: “Ti laj jtac talel ti muc'ul j'ilbajinvanej jtsutsesvanej ta muc' ta lum li'e, jech ta jtacbe talel xtoc slequilalic jech c'u cha'al caloj ono'oxe.

⁴³Ti laj xa avalbe sc'oplal ti muc' ta lum li'e, ti sts'ijlajan ta xcome, ti mu junuc xvinaj ti jnaclejetique, ti chon bolometique, ti ta x'och ta yoc ta sc'obic ti caldeoetique, oy bu ta smanic liquel ti banomile.

⁴⁴Ta xlic yich' manel un, bejel ta xcom ta vun ti manbile, ti ac'bil seyoe, xchi'uc spirmaic ti rexticoetique. Taj une, ta xc'ot ta pasel ta sbanomil ti Benjamine, ta sjoylej yosilal ti Jerusalene, xchi'uc ti jteclumetic yu'un ti Judae. Jech ec ti oy ta vitstique, ti oy ta stenlejtique, xchi'uc ti jteclumetic ti oy ta Négueve, ta xc'ot ta pasel cu'un ta jelbe ti yorailique. Ti vu'un Diosune, mu stselbuj ma' ti jc'op une.”