Read Tzotzil Jeremías 33 Bible Online

Jeremías 33 - Tzotzil bible

Jeremías 33

¹Ti jech chucul ti Jeremías ta yamaq'uil na bu oy ti jchabivanej soldadoetique, c'oponat talel yu'un Dios xtoc ti xi albate:

²“Ti vu'un Ajvalilun ti laj jmeltsan ti banomile, ti laj cac'be lec yip ta yavil ti bu ta xcome, xi ta xcalbot ava'ie:

³C'oponun ti'inun un, ta jtac'bot ti ac'ope. Oy c'usi ta jcaj'albot ava'i ti muc'tic no'ox ta xc'ot ta pasele, ti chucul ta a'yiel ti mu to xana'e.

⁴Ti Ajvalilune, Dios yu'un ti Israele, laj cal ava'i sc'oplal ta sventa ti naetic yu'un ti lum Jerusalene, xchi'uc ti naetic yu'un ti ajvaliletic ta lum Judae. Ta xich' jipel yalel ta lum ta eq'uel, mi ta yan sjinesobile.

⁵Ti buch'u ta xloq'uic batel xchi'uc espada ta stsaquel ta leto ti caldeoetic ti smeltsanoj xa sbitebic ta svoliel ti jteclume, c'ajomal no'ox xba yac' sjol sbaquilic ti busul no'ox ta xcom ti animaetic yu'unique. Yu'un ta jmilic ya'i ta scapemal sti'emal ti jole. Mu'yuc xa ta xcac' jsat ta stojol ti jteclum li'e ta scoj ti jelav xa ti smul scolo'ic ti laj spasique.

⁶Ta jpoxtaic liquel un. Ta staic liquel ti xlaet no'ox ta xa'iic ti banomile, ti stuquic xa no'ox mu xa buch'u xtaun o ta xa'iic ta sc'upinele, ti stsinanoj sbaic ta j'ech'el mu'yuc c'usi xal ti yo'ntonique.

⁷Ta jeltabe yorail ti lum Judae, xchi'uc ti Israele. Ta jcha'meltsanbe ta ach' jech c'u cha'al ta sliquebe.

⁸Ti yepal xa ti smulic ta scontrainelune, ta jmes ta jtusic. Ta jch'aybeic ti yepal no'ox ti xchopolalic laj spasic ti laj stoy sba xchi'uquic ta jtojole.

⁹Ti Jerusalene, mu'yuc xa buch'u xtaun o ta xca'i yu'un ti ximuyubaje, cutsilal quich'el ta muc' yu'unic ta sba ta sat ti muc'tiquil lumetic ti oy ta banomile. C'alal ta xa'iic ti naca lequilal ta xc'ot ta pasel cu'un ta stojol ti jnaclejetic ta Jerusalene, ti mu'yuc c'usi sna'ique, ta xniquic ta xi'el.”

¹⁰Ti Diose xi ta xale: “Laj avalic ti sts'ijlajan ta xcom li'e, ti mu junuc ti jnaclejetique, ti chon bolometique. Ti beetic yu'un ti Jerusalene, sts'ijlajan ta xcom, ti sts'ijlajan ta xcom ti jteclumetic yu'un ti Judae, ti mu junuc ti jnaclejetique, ti mu junuc xcotlajan ti chon bolometic ti bu taje. Lec un cha'e, ta xlic vinajuc ta a'yiel liquel

¹¹ti q'uejimol sventa q'uine, ti q'uejimol sventa lecomajele. Ta xich' a'yiel ti xi ta xalique: ‘Col lij'albat yu'un ti Ajvalil ti scotol xu' yu'une. Oy slequil ma' ti Dios une. Sbatel osil oy ma' ti syail xc'uxul yo'nton une.’ Ta xich'ic talel matanal ta ch'ulna sventa ti col albate. Melel un, ta jelbe yorailic ti muc' ta lum li'e yo' ta xcha'ta jech c'u cha'al ta sliquebale. Ti vu'un Ajvalilune, mu stselbuj ma' ti jc'op une.”

¹²Ti Ajvalil ti scotol xu' yu'une, xi ta xale: “Ti sts'ijlajan ti jteclum le' tanae, ch'abal ti jnaclejetique, mu junuc ti chon bolometic xcotlajan ta sjunul c'u yepal oy ti jteclumetic yu'une, ta xlic puluc yaxaltic ti bu ta xic' batel xchijic ti jq'uel-chijetique.

¹³Jech ec ti jteclumetic ti oy ta stselej vitstique, ti oy ta stenlejtique, ti ta Négueve, xchi'uc ta yosilal ti Benjamine, ti oy ta sjoyobal ti Jerusalene, xchi'uc ti yan jteclumetic ti oy ta yosilal ti Judae, ta xvinaj liquel un ti xatilan xa liquel xchijic ti jq'uel-chijetique. Jech xcal ma' ti vu'un Ajvalilun une.”

¹⁴Mu stselbuj sc'op ti Dios ti xi ta xale: “Ta sta sc'ac'alil ti ta xc'ot ta pasel cu'un ti laj calbeic ya'iic ti ta jva'an jtec'an jba sventa slequilal ti Jerusalene, xchi'uc ti Judae.

¹⁵C'alal ta xc'ot yorail sc'ac'alil taje, ta xc'ot ta pasel cu'un ta sventa junuc bats'i snitilul ti David ta sliquesel ti lequilal ti tuq'uilal ta muc' ta lume.

¹⁶Ti yorail taj une, mu'yuc c'usi sna'. Mu stsiq'uetuc yo'ntonic ta xcuxiic ti jteclumetic ta Judae, xchi'uc ti Jerusalene. Xi biiltasbil ta xloc' ta alel yu'unique: ‘Jtsalvanej cu'untic ma' ti Dios une.’

¹⁷Ti vu'un Diosune xi ta xcale: Mu stselbuj ti oy jun snitilul ma' ti David ti ta xchoti ta muc' ta chotlebal ta Israele,

¹⁸ti oy ono'ox ma' ti paleetic snitilultac ti Levi ti scotol c'ac'al ta xac'beicun ti chic'bil matanale, ta xchic'belun ti matanal sat ts'unubil jchop o ta trigo sventa quich'el ta muq'ue, xchi'uc ta yac'belun ti yan milbil matanaletique.”

¹⁹Xi albat yu'un Dios ti Jeremiase:

²⁰“Xichi ta xcal ma' ti vu'un Diosune: Jbel sc'oplal un, mu stselbuj ma' ti c'u s'elan laj jchapan ti c'ac'ale xchi'uc ti ac'ubale. Ta xvul no'ox ta loq'uel ti c'ac'ale ti ac'ubal ti c'u s'elan nopbil ono'oxe.

²¹Ja' jech xtoc, ma'uc ma' ti ts'ij xi no'ox sc'oplal ti jtrate laj jpas xchi'uc ti cajtunel Davide, ti ts'ij xi no'ox sc'oplal ti jun snitilul ti mu x'och ta chotlej bu chotiic ta spas mantal ti stuque, ti ts'ij xi no'ox sc'oplal ti jtrate laj jpas xchi'uc cajtunel paleetic snitilultac ti Levie.

²²Snitilultac ti cajtunel Davide, ti caj'abteltaque, ti snitilultac ti Levie, ta xquepajesic ta j'ech'el jech c'u cha'al ti c'analetic ti oy ta vinajele, mi jech c'u cha'al ti yi' ti oy ta sti' ti muc' ta nab ti mu'yuc buch'u xchap yu'une.”

²³Ti Jeremiase, xc'oponat talel yu'un Dios ti xi albate:

²⁴“¿Mi mu'yuc to ava'binoj ti xi ta xalilanic ti jnaclejetic ti jtenoj jipoj xa la ti Jerusalene, xchi'uc ti Judae, ti vu'un laj jt'uj ti cha'chop nitiluletique? ¡Jech o xal un, bajbil tenbil xa ta x'ile ti jteclumale, ti mu'yuc xa ta alel yu'unic ti ja' jun muc' ta lume!

²⁵Ti Ajvalilun une xichi ta xcale: Laj cal jtrate xchi'uc ma' ti c'ac'ale xchi'uc ti ac'ubale. Laj jbejan lec ta sventa oy c'usi jbel tsots albil ta sventainel ti vinajele xchi'uc ti banomile.

²⁶J'ech'el un, mu jip jten snitilultac ti Jacobe, xchi'uc snitilultac ti cajtunel Davide. Staoj yav ta jva'an ta ajvalil junuc yo' ta sventain snitilultac ti Abrahame, ti Isaaque, ti Jacobe. Ta jc'uxubinic, ta xc'ot ta pasel cu'un ta jeltabe ti yorailique.”