Read Tzotzil Jeremías 35 Bible Online

Jeremías 35 - Tzotzil bible

Jeremías 35

¹Yorail ti c'alal ochem ta ajvalilal yu'un Judá ti Joacim xnich'on ti Josiase, ti Diose tal sc'oponun ti xi laj yalbune:

²“Batan bu nacalic ti recabitaetique, c'oponano. Mi laj une, ic'o batel ta jc'oluc ti na ti oy ta ch'ulnae. Ac'bo yuch' ti vinoe.”

³Ti vu'un Jeremiase bat jsa' ti Jaazaniase (xnich'on ti yan Jeremiase, smom ti Habasiniase), ti xchi'iltac ta voq'uele, ti yalab xnich'nabe, xchi'uc scotol ti jnaclej recabitaetique.

⁴Va'i un, laj quiq'uic batel ta ch'ulna ta jc'ol na ti ja' yu'unic xnich'nab ti Hanan xnich'on ti Igdaliase, jun vinic ti ta xtun yu'un ti Diose. Ti jc'ol na taje, nopol no'ox yiloj sba xchi'uc ti bu oyic ti banquilaletic ti sbainojic ta sq'uelel ti ch'ulnae. Nopol yiloj xtoc ta sba ti jc'ol na yu'un ti Maaseías xnich'on ti Salume, ti sbainoj ta xchabiel ochebal sti' ti ch'ulnae.

⁵Ti bu taje, laj jtsac jarruetic xchi'uc bisetic ti nojic ta vinoe. Xi laj calbe ya'iic ti recabitaetique: “Uch'anic jutebuc ti vino li'e.”

⁶Xi laj staq'uic une: “Ti vu'uncutique, mi ja'uc jutebuc ta xcuch'cutic ti vino le'e. Yu'un ti Jonadab xnich'on ti Recabe, ti ja' jtot jme'cutic ta vo'nee, laj yal ta jamal ti j'ech'el mu ja'uc jset'uc xcuch'cutic vino xchi'uc ti jnitilulcutique.

⁷Ma'uc no'ox taje, laj yal ta jamal ti mu stac' ta jmeltsan ti jnacutique, mi ja'uc ti c'usi xu' ta jts'uncutic ta osile. Mi ja'uc xu' ta jsa'becutic yosilal ti uva yo' ta jts'uncutique. Yu'un laj yalbuncutic mantal ti c'ajomal no'ox ac'o naquicuncutic ta uni axibalnaetic yo' jech jal ta xinaquicutic li' ta banomil ti bu co'ol s'elan jyanlum ta xi'ech'cutique.

⁸Ti vu'uncutique ta jch'uncutic ti c'u s'elan laj yalbuncutic comel mantal ti jmolmuc'totcutic Jonadab ta vo'nee, ti j'ech'el mu xcuch'cutic vino ti vu'uncutic vinicuncutique, ti cantsilelcutique, ti calab jnich'nabcutique.

⁹Mi ja'uc ta jva'an jnacutic bu ta xinaquicutic, mi ja'uc ti oy xa j'uvacutique, mi ja'uc ti ts'unul xa sbeel cosil jbanomilcutique.

¹⁰Ta uni axibalna xinaquetcutic. Jch'unojcutic ta spasel scotol ti c'u s'elan laj yalbuncutic comel mantal ti jmolmuc'totcutic Jonadab ta vo'nee.

¹¹Ti jteclum taje, c'alal och ta yu'ninel ti Nabucodonosor ajvalil yu'un ti Babiloniae, loc' ayan ta co'ntoncutic litalcutic li' ta Jerusalene, yo' ta jpoj jbacutic ta yoc ta sc'ob ti soldado caldeoetique, xchi'uc ti sirioetique. Jech o xal li' nacaluncutic ta Jerusalén.”

¹²Va'i un, ti Diose bat sc'opon ti Jeremías ti xi laj yalbee:

¹³“Ti Ajvalilun ti scotol xu' cu'une, Diosun yu'un ti Israele, ta xcalbot ava'i ti xi chba avalbe ya'i ti jnaclejetic ta Judae, xchi'uc ti ta Jerusalene: ‘C'otuc ta avo'ntonic ti c'u s'elan laj cac' avilique. Ch'unic ta spasel ti c'u s'elan laj cale. Ta xcal ava'i ti vu'un Ajvalilune,

¹⁴ti snitilultac ti Jonadab xnich'on ti Recabe, c'otem ta pasel yu'unic ti mantal ti albatic ti mu xuch'ic ti vinoe. Jech o staoj yav tana li'e ti mu'yuc ta xuch'ique, yu'un xch'unojbeic ti c'usi yalojic comel ti stot sme'ic ta vo'nee. Ep xa ta coj laj calboxuc ava'iic ti jmantaltaque, mu'yuc ach'unojic un.

¹⁵Yu'un ta ono'ox jtaquilan talel ta atojolic scotol ti cajtunel j'alc'optac ti xi ta xalboxuque: Ictaic comel ti chopol avo'ntonique, ti chopol ti c'usi ta xapasique. Mu xanijan xachiman abaic ta sts'acliel ti yan diosetique yo' mu'yuc c'usi xana'ic ta naclej ta banomil ti laj cac'boxuque, ti laj cac'beic ti atot ame'ic ta vo'nee. Mi ja'uc laj avaq'uicun ta venta. Mi ja'uc laj ach'unbeicun un.

¹⁶Yan ti snitilultac ti Jonadab xnich'on ti Recabe, c'otem ta pasel yu'unic ti c'u s'elan albatic comel mantal yu'un ti stot sme'ic ta vo'nee. Yan ti jteclum Israele, mi ja'uc sc'an xch'unic ta spasel.

¹⁷Jech o xal ti vu'un Ajvalilun ti scotol xu' cu'une, Diosun yu'un ti Israele, xi ta xcale: Ti cuxul j'ilbajinvanej vocol ti laj calboxuc ava'iic sc'oplale, lamal ta xc'ot ta sbaic ti jnaclejetic ta Judae, ti ta Jerusalene. Lic'opoj ta atojolic, mi ja'uc laj avac'beicun ta venta. Ma'uc no'ox ac'oplalic ta xava'iic ti ic'biloxuc cu'une.’ ”

¹⁸Ti Jeremiase xi laj yalbe xtoc ti recabitaetique: “Ti Ajvalil Dios yu'un Israel ti scotol xu' yu'une, xi ta xale: ‘Ti vo'oxuque ach'unojbeic smantal ti Jonadab ti ja' atot ame'ic ta vo'nee. Laj atuc'ulanic lec ti bijubtasel yu'une. Scotol c'otem ta pasel avu'unic ti c'u s'elan laj yal comele.

¹⁹Jech o xal un, ti vu'un Ajvalilun ti scotol xu' cu'une, Diosun yu'un ti Israele, j'ech'el mu xch'ay ta be ta x'och ta cajtunel snitilultac ti Jonadabe.’ ”