Read Tzotzil Jeremías 37 Bible Online

Jeremías 37 - Tzotzil bible

Jeremías 37

¹Ti Nabucodonosor ajvalil yu'un ti Babiloniae, lic sva'an ta ajvalilal yu'un Judá ti Sedequías xnich'on ti Josías yo' ta xcuchbe comel yabtel ti Jeconías xnich'on ti Joacime.

²Ti Sedequiase, ti yaj'abteltaque, xchi'uc scotol ti jteclume, mi ja'uc laj xchiquintaic ti c'u s'elan c'opoj ti Dios ta sventa ti j'alc'op Jeremiase.

³Ti ajvalil Sedequiase laj stac batel ti Jucal xnich'on ti Selemiase, xchi'uc ti pale Sofonías xnich'on ti Maaseías ta sq'uelel ti j'alc'op Jeremiase, ti xi bat yalbeique: “C'oponbuncutic ti Cajvaltique, ti Dios cu'untique.”

⁴Ti Jeremiase mu'yuc to ox ochem ta chuquel, xu' no'ox ti buyuc batuc ta jteclume.

⁵Taj une, ja' xa laj stam loq'uel talel sbeic yajsoldadotac ti faraón ta Egiptoe. C'alal ya'iic ti caldeotic jech taje, mu ya'iic laj yictaic comel ta stsaquel ta leto ti Jerusalene, loq'uic ta anil.

⁶Va'i un, ti Diose c'opoj ta stojol ti j'alc'op Jeremiase, ti laj yalbe ya'i

⁷ti xi ac'o sva'an sba ta yalel ta sventa ti jtaqueletique: “Albeic ya'i ti ajvalil yu'un Judae, ti laj stac talel svinic ta sjaq'uel sba ta jtojole, ti sutic xa batel ta Egipto ti soldadoetic yu'un faraón ti talic xa ox ta spojeloxuque.

⁸Ti caldeoetic une ta sutic talel ta stsaquel ta leto ti Jerusalene. Ta x'och ta sc'obic. Ta xlic stsanbeic sc'ac'al.

⁹Xi ta jcaj-t'amboxuc ava'iic ma' ti vu'un Diosune: Mu xanopic ma' ti yu'un loc' xa o batel avalojic ti caldeotique, yu'un mu jechuc ta xc'ot ta pasel.

¹⁰Ti vo'oxuc une, manchuc mi ta xatsalic scotol ti soldado caldeoetic ti svoloj sbaic ta atojolique, ti jun chib yayijemic ti oyic ta axibal nae, ta xlic stam sbaic ta stsanbeic sc'ac'al ti jteclume.’ ”

¹¹Laj xa yicta comel ta stsaquel ta leto Jerusalén ti soldado caldeotique, yu'un laj ya'iic ti tal xa ta stojolic yajsoldadotac ti faraone.

¹²Ti Jeremías eque, ja' o loc' ech'el ta jteclum. Laj stam batel sbe ta yosilal Benjamín ta yich'el rextoil ti yacal ta xich' ch'aquel ta yosilale.

¹³Ja' no'ox un, c'alal c'ot ta ti'na ti bu sbiinoj Benjamine, ch'ambil c'ot ta be yu'un jun vinic sbiinoj Irías xnich'on ti Selemiase, smom ti Hananiase, ti ja' jun banquilal yu'unic ti jchabivaneje, ti xi laj yalbe ti laj smac ta be ti Jeremiase: “Le'e, ta xbat achi'in ti caldeoetique.”

¹⁴Ti Jeremiase xi laj staq'ue: “Mu jechuc, mu'yuc ta xbat jchi'in ti caldeoetique.” Ti Irías une, mu'yuc laj ya'ibe xchiquinal. C'ajomal no'ox joch xut batel ta stojol ti j'opisialetique.

¹⁵Cap sjolic ta stojol ti Jeremiase. Laj yalic mantal ti ac'o yich' yu'unic majele, ti stiq'uicuc ta chuquel ta sna ti Jonatán ti buch'u sbainoj ta yalel ti c'usitic chlaj c'otanuc ta pasele, ti c'otem ta jun chuquinabe.

¹⁶Jech ti Jeremiase, c'alal to yutil chuquinab c'ot ti bu jalije.

¹⁷Ti ajvalil Sedequiase laj yal mantal ti yich'uc iq'uel batel ta muc' ta na ti Jeremiase. C'alal ic'bil bat ti Jeremías ta stojol ti ajvalile, xi lic sjac'be ta mucule: “¿Mi oy c'usi yalojbot ti Diose?” Ti Jeremiase xi laj staq'ue: “Oy, xi s'elan ta xal li'e: Ti Jcuch abtelote, ta xa'och ta yoc ta sc'ob ti ajvalil yu'un ti Babiloniae.”

¹⁸Ti Jeremías ec une xi laj sjac'be ti ajvalil Sedequiase: “¿C'usi c'osol sjol cu'un ta atojol, ajvalil? ¿Mi yu'un laj jta jmul ta stojol ti avaj'opisialtaque? ¿Mi yu'un laj jta jmul ta stojol ti jteclum yo' jech laj stiq'uicun ta chuquele?

¹⁹¿Bu oyic ya'yel ti j'alc'opetic ti ta jbel sc'oplal laj yalic ti mu xtal ti ajvalil yu'un ti Babilonia ta stsaquel ta c'op ti jteclum li'e?

²⁰Ts'etanbun ava'i ani' achiquin ta ya'yiel li'e, Jcuch abtel: Mu xavac' ave ati' ti ta xiq'uicun batel ta sna ti Jonatán ti buch'u sbainoj ta yalel ti c'usitic ta xc'ot ta pasele, naca mi chamcun.”

²¹Ja' yu'un un, ti ajvalil Sedequiase laj yal mantal ti ta xich' chuquel ti Jeremías ti oy no'ox ta yamaq'uil na yu'un ti jchabivanejetique, ti ich'batuc batel jbej pan jujun c'ac'al ti ta xaq'uic ti jmeltsanej panetic ta callee. Jech c'ot ta pasel un, ja' ti oy to ox ti ve'lil ta jteclume. C'ot ta pasel un, chucul com ti Jeremías ta yamaq'uil na yu'un ti jchabivaneje.