Read Tzotzil Jeremías 39 Bible Online

Jeremías 39 - Tzotzil bible

Jeremías 39

¹Ta slajunebal (10) u yu'un ti sbalunebal (9) jabil yochel ta ajvalilal yu'un Judá ti Sedequiase, ja' o laj stam ech'el sbe ti Nabucodonosor xchi'uc scotol ti yajsoldadotac ta scontrainel ti Jerusalene, c'ot svoliic.

²Ta sbalunebal (9) c'ac'al yu'un ti xchanibal (4) ue, ti ja' xa sbuluchibal (11) jabil yochel ta ajvalilal ti Sedequiase, ja' o och ta jteclum ti jcontrainvanej soldadoetique.

³Ti Nergal-sarézere, ti Samgar-neboe, ti Sarsequime, yich'oj tsots yabtelic ta stojol ti ajvalile. Ti yan Nergal-sarezere yich'oj tsots yabtel xtoc ta stojol ti ajvalile. Ti yaj'opisialtac ti ajvalil yu'un ti Babiloniae, scotolic ochic batel, c'ot slaman sbaic ta muc'ul ochebal ti'na.

⁴C'alal laj yil ti ajvalil Sedequías xchi'uc yajsoldadotac ti jech ta xc'ot ta pasele, jatavic loq'uel ta jteclum un. Loq'uic ech'el ta ac'ubaltic un, ech'ic ta sbelel ts'unubal nichimtic yu'un ti ajvalile, ti xc'ot ta jun ti'na ti cacal ta o'lol yu'un ti chib moque. Laj stamic batel be ti xc'ot ta stenlejal yu'un ti Jordane.

⁵C'u stu un, tijlibil batel yu'un ti soldado caldeoetique. Laj staic ta be ti Sedequías ta stenlejal osil yu'un ti Jericoe. Och ta c'abal yu'unic. Yic'ojic batel ta stojol ti ajvalil Nabucodonosor ti oy ta Ribla ta yosilal ti Hamate. Ti bu taj une, xi loc' mantal yu'un ti Nabucodonosore:

⁶Ta sba ta sat ti Sedequías ta Riblae, ti ajvalil yu'un ti Babiloniae, laj yal mantal ti ac'o yich' c'ocbel snuc' xnich'nab ti Sedequiase. Ma'uc no'ox taje, laj yal mantal ti ajvalil yu'un ti Babiloniae, scotol ti buch'utic ich'bil ye sti'ic yu'un ti Judae, yich'uc c'ocbel snuq'uic ec.

⁷Ja'uc ti Sedequiase, ja' no'ox loc' mantal yich'uc pitsbel ti sbec' sate, ti chuc xi ta carina yo' ta xiq'uic ech'el ta Babiloniae.

⁸Ti caldeoetique laj stsanbeic sc'ac'al ti muc' ta na yu'un ti ajvalile, xchi'uc ti naetic yu'un ti jteclume. Laj sjinesic smocal xtoc ti Jerusalene.

⁹Laj taj une, ti Nabuzaradán banquilal jpas-mantal yu'un yajchabivanej soldado yu'un ti ajvalile, laj sbec' ta tsobel batel c'alal to ta Babilonia ti jnaclejetic ti c'u yepal comic ta jteclume, xchi'uc ti c'u yepal jelavemic batel ta stojol ti caldeoetique. C'ot ta pasel ti bat scotol ti jteclume.

¹⁰C'ajomal xa no'ox laj yicta comel ta yosilal Judá jlom ti me'un mu'natetique, ti mu'yuc c'usi x'ayan yu'unique. Ti jech c'ac'al taje, laj yac'be sts'unub uvaic xchi'uc osil yo' ta xabtelanic.

¹¹Ti Nabucodonosor ajvalil yu'un ti Babiloniae laj yalbe ya'i mantal ti Nabuzaradán banquilal jvolvanej yu'un ti jchabivanejetique, ti xi laj yalbe ya'i ta sventa sc'oplal ti Jeremiase:

¹²“Ta jc'ubanbot ta avoc ta ac'ob ti Jeremiase. Mu xavilbajin. Ac'bo scotol ti c'usi ta sc'ane.”

¹³Va'i un, ti Nabuzaradane, jmoj xchi'uc ti Nabusazbane xchi'uc ti Nergal-sarézere, ti chibic yich'oj tsots yabtelic yu'un ti ajvalile, xchi'uc scotol ti yan yaj'opisialtac ti ajvalil yu'un ti Babiloniae,

¹⁴laj yalic mantal ti yich'uc loq'uesel talel ti Jeremías ti tiq'uil ta chuquel ta yamaq'uil na yu'un ti jchabivanejetique. Laj yac'beic xchabi ti Gedalías xnich'on ti Ahicame, smom ti Safane, yo' ta xiq'uic batel ta na. Ja' yu'un un, ti Jeremiase jmoj naqui xchi'uc ti jteclume.

¹⁵C'alal chucul to ox ti Jeremías ta yamaq'uil na yu'un ti jchabivanejetique, tal c'oponatuc yu'un Dios ti xi albate:

¹⁶“Batan, ba q'uelo, xi xavalbe ya'i ti etiope vinic sbiinoj Ebed-meleque: ‘Ti Ajvalil ti scotol xu' yu'une, Dios yu'un ti Israele, xi ta xale: Ti c'usi jcaj'aloj xa ono'oxe, ta xc'ot ta pasel li' ta jteclume, naca svocolic, ma'uc slequilalic. C'alal ta xc'ot ta pasel taje, ta xavil ta aba ta asat.

¹⁷Ta jtic' jba ta apojel un yo' mu xa'och ta yoc ta sc'ob ti jnaclejetic ti ta xaxi' yu'un ta jmeque. Ti vu'un Ajvalilune, mu lo'iluc no'ox ta xcal.

¹⁸Ta jpojot ta yoc ta sc'ob ti milel q'uelel ta atojole. Cuxul xu' ta xajatav batel, yu'un mu'yuc xatsiq'ues avo'nton ta jtojol. Ti vu'un Ajvalilune, mu lo'iluc no'ox ta xcal.’ ”