Read Tzotzil Jeremías 40 Bible Online

Jeremías 40 - Tzotzil bible

Jeremías 40

¹Ti Diose bat sc'opon ti Jeremías c'alal loq'uesat ta chuquel ta jteclum Ramá yu'un ti Nabuzaradán ti ja' banquilal jtsobvanej yu'un ti soldadoetic ti ta xchabivanique. Ti Nabuzadarane chucul laj sta ta cadena taq'uin jmoj xchi'uc ti jnaclejetic yu'un ti Jerusalene, xchi'uc ti jnaclejetic yu'un ti Judá ti bec'bil batic ta chuquel c'alal ta Babiloniae.

²Ti banquilal yu'un ti jchabivanej soldadoetique, laj yic' batel slecoj ti Jeremiase, ti xi laj yalbee: “Ti Dios avu'une laj xchapanbe sc'oplal ti banomil li'e ti ta xac'be svocole.

³Tana li' une, c'ot xa ta pasel laj yac'be ti svocole. C'ot ta atojolic ta scoj ti laj ata amulic ta stojol ti Diose. Mi ja'uc laj axi'taic.

⁴Ti jech chuculot ta cadena taq'uine, tana li'e, ta jitunbot loq'uel. Mi xbat achi'inuncutic ta Babiloniae, la' me, ta xajchabiot. Mi mu xac'an xabate, coman, xi s'elan ti oy ta avoc ta ac'ob ta st'ujele. Batan ti bu lec ta xavile.

⁵Mi ja' lec ta xava'i ta xasut batele, sutan ti bu com ti Gedalías xnich'on ti Ahicame, smom ti Safane. Ti ajvalil yu'un ti Babiloniae laj xa sva'an ta its'inal ajvalilal yu'un ti jteclumetic ta Judae. Naclanic jmoj xchi'uc ti ateclumale. T'ujo ti bu lec ta xava'ie.” Laj taj une, ti banquilal yu'un ti jchabivanej soldadoe, laj yac'be smoton ti Jeremiase, xchi'uc ti c'usitic ta xtun yu'une. Laj xch'ac sbaic un.

⁶Ti Jeremiase bat xchi'in ta naclej ti Gedalías ti nacal ta Mizpae. Naqui xchi'uc ti jnaclejetic ti oyic ta muc' ta lume.

⁷Ti ajvalil yu'un ti Babiloniae laj yac' ochuc ta its'inal ajvalil yu'un ti muc' ta lum ti Gedalías xnich'on ti Ahicame. Laj sbain yu'un xtoc ti c'u to yepal mu'yuc xich'ic beq'uel batel ta Babilonia ti viniquetique, ti antsetique, xchi'uc ti ololetic yu'unic ti me'un mu'nat jnaclejetic yu'un ti jteclume. C'alal c'ot ta sni' ta xchiquinic ti banquilal soldadoetique, ti soldado judíoetic ti loq'uemic ta jujuvoq'ue,

⁸xvoletic batel xchi'uc svinictac ta sq'uelel ti Gedalías ti oy ta Mizpae, ti xi s'elan ti buch'utic xchi'ucanoj batele: Ja' ti Ismael xnich'on ti Netaniase, ti Johanán xchi'uc ti Jonatán xnich'nab ti Careae, ti Seraías xnich'on ti Tanhumete, xnich'nab xtoc ti Efai liquem talel ta Netofae, ti Jezanías xnich'on jun vinic ti liquem talel ta Maacate, xchi'uc ti svinictaque.

⁹Jech ec un, ti Gedaliase xi laj sva'an sba ta yalele: “Mu xaxi'ic ti jech pasbil ta mantal ta xac'otic yu'un ti caldeoetique. Comanic ta naclej ta muc' ta lum. Ac'o abaic ta tunel ta stojol ti ajvalil yu'un ti Babiloniae. Lec ta xc'ot ta atojol unbi.

¹⁰Ti vu'une li' ta xicom ta Mizpae. C'alal mi talic ti caldeoetique, li' ta jva'an jba ta spaquel ac'oplalique. Ti vo'oxuque, ochuc yipal avu'unic ta stsobel ti vinoe, ti c'usitic stac' lo'bel ti sate, xchi'uc ti aceitee. Jech jun avo'ntonic xu' xanaquiic ta jteclum bu laj xa avu'ninique.”

¹¹Ma'uc no'ox taje, oy jlom judíoetic ti oyic ta yosilal ti Moabe, ti Amone, ti Edome, xchi'uc ti bu tan puc batemic ta yan jteclume, laj ya'iic ti laj xa yac' ye sti' ti ajvalil yu'un ti Babiloniae, ti xu' ta xcom naquiicuc ta sbanomil stuquic ti jlom judioetique. ti laj sva'an ta its'inal ajvalilal ti Gedaliase yo' jech ta xventainatic yu'une.

¹²Taj une, ti bec'bil to ox loq'uique sutic talel ta Judá. Batic ta stojol ti Guedalías ti oy ta Mizpae. Ti stuquic ec une ochic ta stsobel ti vinoe, ti c'usitic stac' tunel lajesbel ti sate, ti busul no'ox yu'unic ta j'ech'ele.

¹³Ti Johanán xnich'on ti Careae, xchi'uc scotol ti yan banquilal soldadoetic ti comemic ti bu svoloj sbaic ti loq'uemic ta jujuvoq'ue, bat sq'uelic ti Gedalías ti oy ta Mizpae.

¹⁴Xi laj yalbeique: “¿Mi mu xana' ya'luc ti Baalís ajvalil yu'un ti Amone, ti stacoj talel ta smilelot ti Ismael xnich'on ti Netaniase? C'u stu un, ti Gedaliase mu'yuc laj xch'un.”

¹⁵Ti Johanane xi laj yalbe ya'i ta mucul ti Gedaliase: “Ch'an to chian ca'itic, chba jmil ya'i ti Ismaele. Mu sna'ic buch'u abolaj mi laj cu'une. ¿C'u cha'al ya'yel jq'uelojtic no'ox ta smilot ya'ie? Ti judíoetic ti nabal ta atojole, tan puc xbatic. Ja' xa jech c'otic o ta tsutsel ti c'u to yepal vulic ta Judae.”

¹⁶Le' une, xi tac'bat yu'un ti Gedaliase: “Ch'an uto, yu'un mu jechuc ta spas ti va'i s'elan ta xavalbe sc'oplal ti Ismaele.”