Read Tzotzil Jeremías 41 Bible Online

Jeremías 41 - Tzotzil bible

Jeremías 41

¹Ti Ismael xnich'on ti Netaniase, smom ti Elisamae, ti ja' snitilultac ti ajvaliletique, ta yucubal u, bat ta Mizpa ta xchapel slo'ilic xchi'uc ti Gedaliase, chi'inbil batel yu'un lajunvo' (10) viniquetic. C'alal jmoj vololic ta ve'el uch' vo' ta Mizpae,

²ta jech to yepal, ti Ismaele va' xi xchi'uc ti lajunvo' (10) viniquetic ti xchi'inojan batele. Mu ta sc'obuc ya'i laj smilic ta espada ti Gedaliase, ti ja' va'anat yu'un ajvalil ta Babilonia ti c'ot ta its'inal ajvalil yu'un ti Judae.

³Ti Ismaele laj smil scotol xtoc ti judioetique, xchi'uc ti caldeo soldadoetic ti jmoj oyic xchi'uc ti Gedalías ta Mizpae.

⁴Ta yan c'ac'al un, c'alal lajem xa ox ta milel ti Gedaliase, c'alal mu'yuc to buch'u ya'binoj ti c'usi c'ot ta pasele,

⁵c'otic chanvinic (80) ta vo' viniquetic ti liquemic ech'el ta jteclum Siqueme, ti ta Siloe, xchi'uc ti ta Samariae. Xch'uloj ta loq'uel yisimic. Jatantic xa talel ti sc'u'ique, ti mu'yuc xa bu xocol ti sbec'talic ta yayijesel yu'unique. Yu'un yich'ojic c'otel sat ts'unubiletic xchi'uc pom yo' ta xaq'uic ta stojol ti Dios ta ch'ulna une.

⁶Va'i un, ti Ismaele loc' batel ta Mizpa un. X'oc' xa batel, bat snupan ta be. Mu to ta snup sbaic lec ta be ti xi laj yal ta anile: “La', q'uelo avilic ti Gedalías xnich'on ti Ahicame.”

⁷Naca to c'u cha'al ta xc'otic ta yutil ti jteclume, ti Ismaele xchi'uc ti svinictaque, ta jech yepal mil xutic ti viniquetique. Laj sjipic yalel ta jun joc'.

⁸Manchuc mi jech un, oy to lajunvo' (10) ti c'u yepalique, ti xi laj yalique: “Mu xamiluncutic. Ti vu'uncutique, nac'al cu'uncutic ta osiltic ti trigoe, ti jchop o ta trigoe, ti aceite, xchi'uc ti ajapome.” Ti jech taj une, ti Ismaele mu'yuc laj smil jech c'u cha'al laj yich' yu'un ti yan xchi'ilique.

⁹Ti joc' bu laj sjip yalel scotol animaetic laj smil ti Ismaele, ja' o no'ox ti joc' laj yac' ta meltsanel ti ajvalil Asa yo' spoj sba ta yoc ta sc'ob ti Baasa ajvalil yu'un ti Israele. Ac'o mi muc' ta j'ech'el ti joq'ue, noj com ta anima ti laj smil ti Ismaele.

¹⁰Ma'uc no'ox taje, ti Ismaele laj stsac ta chuquel yantsil nich'nabtac ti ajvalile, xchi'uc ti jnaclejetic ta Mizpa ti cuxul to comic ti buch'utic ac'bat sventain ti Gedalías ti albat yu'un ti Nabuzadarán banquilal jpas-mantal yu'un ti jchabivanej soldadoe. Ti Ismaele laj stsac ta chuquel, yu'un oy ta yo'nton ta xjelav batel ta yosilal Amón xchi'uc.

¹¹Ti Johanán xnich'on ti Careae, xchi'uc ti jtsobvanejetic yu'un ti soldadoetic ti jujuvoc' oyic ta osiltique, laj ya'ibeic sc'oplal ti c'ot xa ta jun jmilvanej ti Ismaele.

¹²Laj stsob scotol ti svinictaque, bat stsaquic ta leto. Ta sts'el muc' ta ts'anleb vo' ta Gabaon c'ot staic.

¹³Va'i un, ti buch'utic chucbilic batel yu'un ti Ismaele, c'alal laj yilic ti Johanane xchi'uc scotol ti jtsobvanejetic yu'un ti soldadoetic ti xchi'inojan batele, sacub to ti osil banomil laj ya'iic.

¹⁴Mu ta yocuc ya'iic jelavic ta svolel sbaic xchi'uc ti Johanane.

¹⁵Ja'uc ti Ismaele, xchi'uc ti vaxacvo' (8) svinictaque, cuch yu'un jatobal ti mu'yuc x'ochic ta c'abal yu'un ti Johanane. Batic c'alal to muc' ta lum yu'un ti Amone.

¹⁶Ti Johanán une, xchi'uc ti banquilal jtsobvanejetic yu'un ti soldadoetic ti xchi'inojane, ti soldadoetique, laj yac'beic sbainic ta xchabiel ti antsetique, ti ololetique, xchi'uc ti buch'utic yich'oj tsots yabtelic ti laj xchuc batel ti Ismael ta Mizpa ti c'alal laj xa ox smil ti Gedaliase, ja'ic ti buch'utic ta Gabaon to laj sta talel ta pojel ti Johanane.

¹⁷Lic stam batel sbeic un, ja' to ti c'uxi c'otic ta Guerut-quimam ta sts'el Belene yo' ta xich'beic jutebuc yipal un. Yu'un oy ta yo'nton ti ta stam batel sbeic c'alal to Egipto

¹⁸yo' mu x'ochic ta c'abal yu'un ti caldeoetique, yu'un oy xi'el ta xa'iic ti laj xa ta milel ti Gedalías yu'un ti Ismaele, ti c'alal va'anbil yu'un ajvalil ta Babilonia ti c'ot ta its'inal ajvalil yu'un ti muc' ta lume.