Read Tzotzil Jeremías 46 Bible Online

Jeremías 46 - Tzotzil bible

Jeremías 46

¹Ti Jeremiase, c'oponat talel yu'un Dios ta sventa sc'oplal ti muc'tiquil lumetique.

²Ti sc'op laj yal talel taje, naca sc'oplal Egipto xchi'uc sc'oplal ec ti c'usi ta xc'ot ta stojolic ta Carquemis ti c'alal oyic ta sts'el uc'um Eufrates xchi'uc yajsoldadoetic ti faraón Necao ajvalil yu'un ti Egiptoe, ti xi s'elan lajic ta tsalel yu'un ti Nabucodonosor ajvalil ta Babilonia ta xchanibal jabil yochel ta ajvalil yu'un Judá ti Joacim xnich'on ti Josiase:

³“Chapano lec ti macobbailetique. Nacauc bituj xachiic liquel ta ac'-leto.

⁴Lapbeic siya ti ca'etique. Nax ti cajxiuc yajvaltaque. Lapic ti abin-jolique, xcholol chol xachol abaic. Juxbeic lec sni' ti lanzaetique. Lapbiluc xa avu'unic ti smac sti' avo'ntonique.

⁵“¿C'usi xal o le' une? Batel c'ot xch'ulelic, mu'yuc xa'i c'uxi sut ta svalopatic. Ti j'ac'-letoetic yu'une lajemic ta xa'iic ti tan puc ta xbatique. Natic no'ox loq'uel yoquic ta anil ti mu xa jutebuc sq'uel sutel ti spatique, yu'un macvanem ta jujujot ma' ti j'ac'-xi'ele. Ti vu'un Ajvalilune, mu lo'iluc no'ox ta xcal.

⁶Laj to ta alel ma' ti jbitel no'ox ta xac'be loq'uel jatobal ti ven x'anilajique; ¡laj to ta alel ma' ti xcol to ya'i ti buch'u jelavem xaq'uic une! Yu'un ta xc'otic ta lomel ta sbosiel yoquic ta sts'el uc'um Eufrates ti oy ta yolon ti yolon xocon sloq'ueb c'ac'ale.

⁷¿Bu loc' talel ti q'ue s'elan yac ta muq'uibel jech c'u cha'al ti uc'um Niloe, ti ja' xchi'il jun uc'um xluchumaj no'ox ti yoque?

⁸Egipto ma' le'e, ¿mi yu'un yan avaloj ti yac' ta xmuq'uib jech c'u cha'al ti uc'um Niloe, ti xluchumaj no'ox ta spas jech c'u cha'al ti muc' ta uc'ume? Yu'un ti Egiptoe xi ta xalbe sbae: ‘Ta jmuq'uibtas jba, ch'ab xi cu'un ti banomil ta smut'iele. Ta jlilin ta j'ech'el ti jteclumetique, ch'ab xi sc'oplal cu'un ti jnaclejetic yu'une.’

⁹“Jipetuc xch'a batel ti epal jcajlejetic ta ca'e, c'uletuc xch'a liquel ti carretaetique. Xi s'elan ti jletovajeletic ti buch'u ta stam batel ti sbeique: ja' ti soldadoetic yu'un ti Etiopiae, xchi'uc ti Libiae, ti chapalic xa xchi'uc ti smacobbailique, ti Lidia soldadoetique xc'abajic lec ta yolob.

¹⁰Taje, muc' ta c'ac'al yu'un ti Ajvalil ti scotol xu' yu'une, sc'ac'alil ta spacbe ti scontrae. Ta x'ech' yo'nton ta ve'el ma' ti espada une, xjobet xa banomil ta yacubel ta xa'i ta yuch'el ti ch'ich'e. Ti Dios ti scotol xu' yu'une, mu albajuc milbail ta xac' c'otuc ta pasel ta sts'el uc'um Eufrates ti oy ta muc' ta lum ta yolon ti yolon xocon sloq'ueb c'ac'ale.

¹¹“Jteclum Egipto, batan avil ta sa'el ti poxiletic ta Galaade. Jaylajun-tosuc ta xatunes ti poxile, mi ja'uc oy c'usi ta sbalin avu'un, yu'un ch'abal poxil ta aventa ma' ti vo'ote.

¹²Ti muc'tiquil lumetique laj xa ya'iic ti pech'bil lac'ot ta teq'uele. Ta scotol banomil, vinaj xa ech'el ti xa'avet ta j'ech'ele. Yu'un jeche' xa no'ox smac-mac sbaic ta be ti j'ac'-letoetique, ti jmoj xbalte-balteic ta banomile.”

¹³Ti j'alc'op Jeremiase, xi c'oponat talel yu'un Dios ti c'alal loc' batel ta stsaquel ta leto muc' ta lum Egipto ti Nabucodonosor ajvalil yu'un ti Babiloniae:

¹⁴“Xi s'elan caj'alic ta stojol ti Egiptoe, ti Migdole, ta Menfise, xchi'uc ti ta Tafnese: ‘Chaplanic me tal un. Ti espadae, ye'bil ta atojol ta jujujot.’

¹⁵¿C'u cha'al jatav xa xana' ti Apis avuni ch'ul vacaxe? ¿C'u cha'al mu teyuc to smala un? Ja' ti li'abolaj laj jip ta lum ti vu'un Diosune.

¹⁶Ti avajsoldadotaque stsuculin xa yacanic ta xyalic ta lum, ti xi ta xalanbe sbaique: ‘Loc'cutic batel li'e, ja' lec sutcutic ech'el ta cosilaltic ta muc' ta lum ti bu lijvoq'ue. Jatavcutic loq'uel ti xi'el xac' ti leto li'e.’

¹⁷“Xi s'elan xavac'be sna'leel ti faraón ajvalil yu'un ti Egiptoe: ‘Xvajet no'ox ma' ti ye une, jeche' ech' ti c'ac'al yu'un une.’

¹⁸Ti Ajvalilun ti jbiinoj Dios ti scotol xu' yu'une, mu queuc no'ox ti xi ta jva'an jba ta yalele: Jech c'u cha'al volibil ta muc' ta te'tic ti vits Tabore, jech c'u cha'al joyobtabil ta nab ti vits Carmeloe, ja' jech ta q'uelel ta xvul ta loq'uel ti jcontrainvanejetique.

¹⁹Jnaclejetic yu'un ti muc' ta lum Egiptoe, chapano aba ava'iic ti bec'bil ta xaloq'uique, yu'un ti Menfise, ta xc'ot ta sbajtical banomil, ti stuc yav ta xcom ti mu'yuc buch'u ta xnaquie.

²⁰Ti muc' ta lum Egiptoe, co'ol s'elan jcot c'upil sba tsebal me' vacax ti ta xlaj ta ti'el ta jcot muc' ta jts'uts'-ch'ich' vov ti ta xlic talel ta yolon ti yolon xocon sloq'ueb c'ac'ale.

²¹Ti yajsoldadotac ti tojbilic talel ta taq'uin yu'une, co'ol s'elan jech c'u cha'al junuc jubemal vacax, ti xbitic no'ox loq'uel ta anil ec un, mu xcuch yu'unic, yu'un sta xa yorail ti svocolique, ti stsitselique.

²²Xbitet no'ox loq'uel ta jatobal ti egipcioetic jech c'u cha'al junuc chon c'alal ta xnopajic talel ti soldadoetic ta stsaqueic ta leto yu'une, ti yebil ti eq'uel ta stojolique, ti co'ol s'elan te' ta xich'ic ts'etele.

²³Ta sts'etbatic un ti yax c'utan no'ox ti te'tic yu'unique. Mu stselbuj jc'op ma' ti vu'un Ajvalilun une. Mu'yuc buch'u xchap yu'un, sbuset yepal ta j'ech'el, mu sta ti c'ulube.

²⁴Lo'il maxiltabil ta xc'ot ma' ti Egipto une, tsalbil ta xc'otic yu'un jteclum ta xliquic talel ta yolon ti yolon xocon sloq'ueb c'ac'ale.”

²⁵Ti Ajvalil ti scotol xu' yu'une, Dios yu'un ti Israele, xi ta xale: “Ta jtsits ya'i ma' ti Amone, ti ja' dios yu'un ti Tebae, ti banomil Egiptoe, ti diosetic yu'une, xchi'uc ti ajvaliletic yu'unique, ti faraone xchi'uc ti buch'utic spatoj yo'nton ta stojole.

²⁶Ta xcac' ochuc ta yoc ta sc'ob ti cuxul jti'oval yajcontrataque, ja' ti Nabucodonosor ajvalil yu'un ti Babiloniae, xchi'uc ti steclumale. Ta x'ech' c'uc sjaliluc un, ta xlic ayanuc jnaclej ta Egipto jech c'u cha'al ta vo'nee. Mu stselbuj jc'op ma' ti vu'un Diosun une.

²⁷“Mu xaxi', steclumal Jacob, ti cajtuneloxuque. Mu xaxi', Israel, ta jpojot xchi'uc ti avalab anich'nab ti bec'bil ta xabatic ta namal banomile. Mu'yuc c'usi xana'ic ta xlic naclanic, jun avo'ntonic mu'yuc buch'u ta sibtasot.

²⁸Mu stselbuj jc'op ma' ti vu'un Ajvalilun ti xi ta xcale: Mu xaxi', steclumal Jacob, cajtuneltac li' jchi'inojoxuque. Ta jtubbe sc'oplal ma' ti muc' ta lumetic ti bu tan puc labatic cu'une. Ti vo'ot une mu'yuc ta jtub ac'oplal. Ta jtuq'uibtasot no'ox ava'i jech c'u cha'al loc' ta sa'el avu'une, ma'uc ma' ti q'uelbil no'ox ta xacom une.”