Read Tzotzil Jeremías 49 Bible Online

Jeremías 49 - Tzotzil bible

Jeremías 49

¹Ti Diose xi ta xalbe sc'oplal ti Amone: “¿Bu bat ya'yel yalab xnich'nab ti Israele? ¿Bu bat ya'yel ti yajval rextoiletique? ¿C'u cha'al ya'yel ti dios Milcom ti ja' xa sbisoj sba ta yajval ti yosilal Gade? ¿C'u cha'al ya'yel ti naca amonitaetic ochem ta naclej ta jteclumetic yu'unique?

²Lec un cha'e, ti vu'un Diosune xi ta jva'an jba ta yalele: Ta xc'ot yorail ti ta jpas ta stojol ti jteclum yu'un amonitaetic ti oy ta Rabae, ti naca xa sc'oplal leto x'avet xa ta xich' alele. Stuc xa slilijemal busul ta xcom cac'tic un. Natic no'ox sleb ta xtil ti bic'tal lumetic yu'une. Va'i un, ti Israele ta xlic xcha'u'ninic ti jteclumetic yu'unique. Ti vu'un Diosune, mu lo'iluc no'ox ta xcal.

³Me'inal oq'uitao aba, Hesbón, yu'un ti jteclum Haie ta xlilij xa. Me'inajuc banomil ta tuch'etel ti avo'ntonique, antsetic ta jteclum Raba. Lapic xa lajemal c'u'il, majilanic ti sti' avo'ntonique. Bitetanic ta anil jech c'u cha'al junuc me' chuvajetic, yayijeso aba. Yu'un ti dios Milcome ta xpoye batel ec un jmoj ti bec'bil ta xbat xchi'uc ti yajpaletaque, xchi'uc ti buch'utic ich'bil ye sti'ique.

⁴¿C'u cha'al toj cajal xava'i aba xchi'uc ti oy yipal avu'une? Ti yipal avu'une, laj to sc'oplal, toyobba jteclum, ti tsots avo'nton xava'i aba xchi'uc ti ac'ulejal laj ata ta tsobele, ti xachi ta xaval une: ‘¿Buch'u la ta xistsalotic ta leto?’

⁵Lec oy un cha'e, jambo yav ti buyuc no'ox ta xlic talel ta jujujot ti cuxul j'ac'-xi'el ta jtac talel ta atojole. Ti Ajvalilun ti scotol xu' cu'une, mu lo'iluc no'ox ta xcal. Ti jujunoxuque mu xa aventaicuc bu ta xac'otic ta loq'uel ti natic no'ox ech'el avacanic ta anile. Laj ta alel ti oy buch'u ta stsoboxuc sutel talele.

⁶“Ta ts'acal to un, ta xlic jelbe yorail ti amonitaetique. Ti vu'un Diosune, mu stselbuj ti jc'ope.”

⁷Ti Dios ti scotol xu' yu'une xi laj yalbe sc'oplal ti Edome: “¿Mi tub ya'yel ti bijilil ta jteclum Temane? ¿Mi valc'uj xa no'ox sjolic ya'yel ti bijil viniquetique? ¿Mi sac ch'ay ech'el ya'yel ti sbijilique?

⁸Loc'anic talel ta anil, jnaclejetic ta Dedán, bat nac'o abaic. Yu'un ta jtsutsesbe sc'oplal steclumal ti Esaue. Sta xa yorail ta jtsits ya'i un.

⁹C'alal ta xich' tuch'el ti uvae, oy to svojoquil ta xich' ictael comel. C'alal ta xvul ta loq'uel ti j'eleq'uetic ta ac'ubale, ja' no'ox ta xtuch'ic batel ti c'u yepal ta xtun yu'unique.

¹⁰Ja'uc ti steclumal ti Esaue, mi jutebuc ta xquictaic comel. Quilojbe xa ti snac'obbailique, mu xa c'usi xut ti mu xac' sbaic iluque. Ti yalab xnich'nabique, ti yuts' yalal sbaique, ti slac'naique, ta stsuts sc'oplal scotol. Mi junuc xa com ma' ti oy buch'u xi ta xale:

¹¹‘Ac'bun jtunes ti uni me'un ololetic avu'une, ta jtuc'ulan un. Xu' ta xcom ta jnabel ta jtojol ti me'unal antsetic avu'une.’ ”

¹²Ti Diose xi ta xale: “Ti buch'utic ma'uc c'otem ta sventa jutebuc ti c'u s'elan sbisol ti tsitsele, lamal c'ot ta stojolic une, ma'uc ma' ti mu lamaluc xc'ot ta abae. Mu no'ox stselbuj ti ta x'ech' ta atojole.

¹³Xichi ta jva'an jba ta yalel ma' ti vu'un Diosun une: Ta xc'ot ta pasel ti ta xjoybij ta sts'ijlajan banomil cu'un ti jteclum Borsae. Lilijem ta xcom, ti xvic' to satil yu'un ti spajebal bisbil ta xc'ot ta cotol chavale. J'ech'el stuc slilijemal ta xcom ti yan jteclumetic xtoque.”

¹⁴Yu'un vul jbel a'yej ta jtojol ta sventa ti Diose, ti xi xvulvun ta yalbel sc'oplal ti muc'tiquil lumetic ti jun j'al-mantal j'ich'-c'ope: “Tsobo abaic, voletanic batel ta stsaquel ta leto ti Edome. Chapano lec abaic ta sventa ti ac'-letoe.

¹⁵Ta xc'ot ta atojol cu'un ti xi avuni muc'ul ta xayilot ti jteclumetique, ti slajeb bajbil tenbil ta xac'ot yu'un ti jnaclejetique.

¹⁶Ta scoj atoyobbail, lalaj ta lo'lael yu'un, yu'un laj abis aba ta j'ac'-xi'el xava'i aba. Yu'un anainoj ti c'al toyol ch'entique, ti joc'olot lec ta ch'amlej ta toyol vitstique. Ac'o mi ta toyol to ta xavac' ti atas jech c'u cha'al ti muc' ta xique, ti bu taje, ta jipot yalel ava'i. Ti vu'un Diosune, mu lo'iluc no'ox ta xcal.

¹⁷“Ti jech ta xlilij ti jteclum Edome, mu no'ox albajuc ta j'ech'el ta xac' ti xi'elale. Scotol ti buch'u nopol ta x'ech' une, ta xi' ta j'ech'el ti c'alal ta xil ti mu no'ox albajuc ti tsitsel c'ot ta stojole.

¹⁸Yu'un mu yanuc jech ta xcom jech c'u cha'al c'ot ta stojol ti jteclum Sodomae, ti Gomorrae, xchi'uc ti jteclumetic ti joyol ta spat ta xocon ti lilijem com ta j'ech'ele. Laj ta alel ti oy buch'u ta xlic naquiuc teye. Mi ja'uc ti j'ech'el no'ox ta x'ech'e. Jech xcal ma' ti vu'un Diosune.

¹⁹Nax to ti jap xichi talel jech c'u cha'al junuc león ti ta xloc' talel ta pimilal pujtic yu'un ti uc'um Jordane, ti xbitet batel ta anil ta uninal ve'ebal yaxaltique, ti xbitic no'ox loq'uel ta jatobal cu'un ti jnaclejetic yu'un ti Edome. Ta xcac' ochuc ta pas mantal ti buch'u ta jt'uje. Ja' yu'un un cha'e, ¿Buch'u xco'olaj xu' yu'un jech c'u cha'al ti vu'une? ¿Mi oy buch'u xu' yu'un ta stsalelun? ¿Mi oy jun jq'uel-chij xu' yu'un xch'amelun ta be?

²⁰A'yio ava'iic, ti vu'un Ajvalilune xi s'elan nopbil xa cu'un sc'oplal ta scontrainel ti jteclum Edome, ti c'u s'elan chapal xa cu'un ta scontrainel ti jnaclejetic yu'un ti jteclum Temane: Yu'un ti uni ch'iom chijetique bec'bil ta xbatic. Ti jach'al yaxaltique ta xich' soquesel ta j'ech'el.

²¹Xvo'o'et no'ox ta j'ech'el ti c'alal ta xyal ta lum ti jteclum Edome. Xnicnun no'ox ta j'ech'el yu'un ti banomile. X'avet no'ox ta j'ech'el ta sc'an ti pojele, ti xvinaj to batel c'alal Tsajal Nabe.

²²Ti jcontrainvaneje, co'ol s'elan junuc muc' ta xic ti xlich'oj talel xic xjipet vulel ta stojol ti jteclum Borsae. Ti ta yorail taje, xniclajetic liquel ta xi'el ti j'ac'-letoetic yu'un Edom jech c'u cha'al junuc ants xnicnun xa ta xa'ibe xi'elal ti yol ta svoq'uese.”

²³Xi ta x'albat sc'oplal ti Damascoe: “Ti jnaclejetic ta Hamate xchi'uc ta Arfade, nijilic c'otic ta ic'al q'uexlal, yu'un xi'el yaloj ti lo'il a'yej c'ot ta stojolique. Bat xch'ulelic yu'un ti xi'ele. Nom c'ot ti mu'yuc c'usi sna'ique.

²⁴Ti jnaclejetic ta Damascoe laj yipal yu'un. C'ajomal xa no'ox q'uelel ti bu ta xjatav batele. U'ninat xa yu'un ti xi'ele, ti vocole, xchi'uc ti c'usi mu ts'icbaj yipal jech c'u cha'al ta svoq'ues yol ti antse.

²⁵Ti jteclum na'bil puquem sc'oplale, ti ja' jun jteclum ti mu'yuc c'usi to ox sna'e, ts'ijil xa com.

²⁶Ta yorail taje, tusul ta xcom ta calleetic ti jva'lej viniquetic yu'une. Ti jletovajeletic yu'une ta xchamic scotol. Ti Ajvalilun ti scotol xu' cu'une, mu lo'iluc no'ox ta xcal.

²⁷Ti moquetic yu'un ti jteclum Damascoe, ta jtilesbe sc'ac'al. Ti c'oc' taje ta slilin ta chiq'uel ti muc' ta naetic yu'un ti Ben-adade.”

²⁸Xi ta xal Dios ti laj yalbe sc'oplal ti jvoc' nitilulil ta Cedare, xchi'uc ti banquilaletic yu'un Azor ti tsalatic yu'un Nabucodonosor ajvalil yu'un ti Babiloniae: “Mu me xavicta abaic, tsaquic ta c'op ya'i ti Cedare. Tubic sc'oplal ti jvoc' nitilul ti oyic ta stuq'uil sloq'ueb c'ac'ale.

²⁹Uninbeic ya'i ti snaique, ti xchijique, ti yaxib snaique, xchi'uc scotol ti c'usitic ta xtun yu'unique. Pojbeic ya'i ti scamelloique, ti xi xavavtaique: ‘Oy xi'el ta jujujot.’

³⁰“Bitanic loq'uel ta anil, jnaclejetic yu'un Hazor. Ba nac'o abaic. Yu'un vu'un ta xcal ti Ajvalilune. Yu'un ti Nabucodonosor ajvalil yu'un ti Babiloniae, laj xa xchapan sba c'u s'elan xu' ta spas ta atojolic.

³¹Xi ta xcal ti vu'un Ajvalilune: Voletanic batel xch'a ta stsaquel ta leto ti jteclum le'e, ti mu'yuc c'usi sna'ic ch'abal xi'el ta xa'iique, ti mu'yuc ti'naetic yu'unique, mi ja'uc ti syavialtaque, ti solel xch'ul tuc comeme.

³²“Elc'anbeic ya'i batel ti scamelloique, xchi'uc scotol ti xvacaxique. Tan puc ta xbat ya'i scotol cu'un ti jnaclejetic ti xch'uloj lec stsotsil sjolic ta xocon xchiquinique. Buyuc no'ox ta xbatic ta jujujot q'uelel cu'un ya'i ti stsutseselique. Ti vu'un Diosune, mu lo'iluc no'ox ta xcal.

³³Ti jteclum Hazore, j'ech'el sts'ijlajan ta xcom. Ta xlic pasuc ta snail jti'oval oq'uiletic. Mi ja'uc xa oy buch'u ta xlic naquiicuc un. Laj c'op ti oy buch'u ta x'ech' xanie.”

³⁴C'alal lic ochuc ta ajvalilal yu'un Judá ti Sedequiase, xi c'oponat talel yu'un Dios ti Jeremías sc'oplal ti lum Elame:

³⁵“Ti vu'un Ajvalilun ti scotol xu' cu'une, mu stselbuj ti xi ta xcale: Ta jlilinbe ta c'asel syolobtac ti lum Elame, ti ja' yabtejeb sbeelinoj yoc sc'obe.

³⁶Ta xchanjotal vinajel banomil, ta xcac' taluc ic' ta stojol ti jteclum li'e, ti tan puc bu bec'bil ta xbatic yu'une. Mu'yuc xa junuc muc'tiquil lumetic ma' ti mu xc'ot ti jnutseletic ta stojole.

³⁷Ta xcac' nicuc ma' ti jteclum Elam c'alal tsacbilic yu'un ti cuxul jti'oval yajcontrataque. Ta jtac talel ti cuxul j'ilbajinvanej vocol ti tsutsesaticuc ya'i yu'un ti sc'ac'al co'ntone. Ta jtac talel leto ta stojol ti tubatuc ya'i sc'oplale. Ti vu'un Diosune, mu me lo'iluc no'ox ta xcal.

³⁸Ta jchotan jpasob mantal ti ta jteclum Elame. Ta xcac' chamuc lajicuc ya'i ti ajvaliletic yu'une, xchi'uc ti banquilaletic yu'une. Ti vu'un Diosune, mu lo'iluc no'ox ta xcal.

³⁹Ta ts'acal to un, ta xlic jelbe yorail ti jteclum Elame. Ti vu'un Diosune, mu lo'iluc no'ox ta xcal.”