Read Tzotzil Jeremías 52 Bible Online

Jeremías 52 - Tzotzil bible

Jeremías 52

¹Yich'oj xa ox jun xcha'vinic (21) jabil ti c'alal lic ochuc ta ajvalilal ti Sedequiase. Buluchib (11) jabil ech' ta ajvalilal ta jteclum Jerusalén. Hamutal sbi ti sme'e, ti ja' yantsil nich'on ti Jeremías ti liquem talel ta Libnae.

²Ti c'usitic lic spas une, toj chopol laj yil ta sba ta sat ti Diose. Yu'un co'ol laj spas jech c'u cha'al laj spas ti Joacime.

³Jech o xal ti Diose lic sc'ac'al yo'nton ta stojol ti jteclum Jerusalene, xchi'uc ti jteclum Judae. Laj sten loq'uel ta stojol. Ts'acal to un, ti Sedequiase lic stoy sba ta stojol ti ajvalil yu'un ti jteclum Babiloniae.

⁴Ta slajunebal (10) c'ac'al yu'un ti slajunebal (10) ue, ti ja' xa ta sbalunebal (9) jabil yochel ta ajvalilal ti Sedequiase, ja' o laj stam batel sbe ti ajvalil Nabucodonosor xchi'uc scotol ti yajsoldadotac ta scontrainel ti jteclum Jerusalene. C'ot sjoyobtaic ta maquel. Lic slaman sbaic ta yeloval. Lic spas sbitebic ta joyob yo' ta xlic stsaquic ta leto.

⁵Joyobtabil o ti jteclum ti c'alal sta sbuluchibal (11) jabil yochel ta ajvalilal ti Sedequiase.

⁶Ta sbalunebal (9) c'ac'al ti ta xchanibal (4) u ti jech jabil taje, tsatsub ti vi'nal ti ta jteclume. Yu'un mu'yuc xa c'usi ta slajesic ti jnaclejetic teye.

⁷Ja' yu'un un, lic sjomic smocal ti jteclume. Ac'o mi joyobtabil lec yu'unic ti caldeoetique, ti ajvalile xchi'uc scotol ti yajsoldadotaque, jatavic loq'uel ta jteclum. Xanavic sjunul ac'ubal. Loq'uic ech'el ta ti'na ti oy ta o'lol chib spac'bale, ti ta x'ech' ta sbelel sts'unbil nichim ti ajvalile. Laj st'unic batel ti be ti ta xc'ot ta stenlejal yu'un ti Jordane.

⁸Ti soldado caldeoetic une snutsojic batel ti ajvalil Sedequiase. Sloc'obinojic c'ot ta stenlejal yu'un Jericó. Stuc comtsanat yu'un ti yajsoldadotaque. Tan puc bat scotolic.

⁹C'alal laj staic ta stsaquel ti ajvalile, ti caldeoetique laj yiq'uic batel ta stojol ti ajvalil yu'un ti jteclum Babilonia ti oy ta jteclum Riblae, ta yosilal ti Hamate. Ti bu taje, chapbat sc'oplal ti Sedequías yu'un ti Nabucodonosore.

¹⁰Yu'un yiloj ta sba ta sat stuc ti loc' mantal yu'un ti Nabucodonosore ti yich'uc c'ocbel snuc' ti xnich'nabe, xchi'uc scotol ti buch'utic ich'bil ye sti'ic yu'un ti jteclum Judae.

¹¹Ja'uc sc'oplal ti Sedequiase, loc' mantal yu'un xtoc ti ajvalile ti yich'uc pitsbel ti sbec' sate, xchi'uc ti yich'uc chuquel ta cadena taq'uine, yo' jech ta xich' iq'uel batel ta jteclum Babilonia, ti bu chucul com o ja' to ti c'uxi chame.

¹²Ti ta slajunebal (10) c'ac'al yu'un ti yo'obal (5) ue, ti ja' xa sbalunlajunebal (19) jabil yochel ta ajvalilal ti Nabucodonosor ajvalil yu'un jteclum Babiloniae, ja' o c'ot ta Jerusalén ti Nabuzadarán yajtunel ti ajvalile, ti c'otem ta banquilal yu'un jvoc' soldado yajchabivanej stuc ti ajvalile.

¹³Va'i un, lic stic'be sc'ac'al ti ch'ulnae, ti muc' ta na yu'un ti ajvalile, xchi'uc ti naetic yu'un ti jteclume, ti xcaltique, ja' snaic scotol ti buch'utic ich'bil ye sti'ique.

¹⁴Ja' Jech xtoc ti caldeo soldadoetic ti xchi'inojan batele, laj sjipic yalel ta lum ti moc ti sjoyobtaoj sjunul ti jteclum Jerusalene.

¹⁵Laj taj une, jech ti Nabuzaradane laj sbec' batel c'alal to jteclum Babilonia ti c'u to yepal comem ta jteclume, xchi'uc ti buch'utic laj sco'oltas sjolic xchi'uc ti ajvalil yu'un ti jteclum Babiloniae, xchi'uc ti c'u to yepal com ti sna'ic spasel ti c'usitic yan abtele.

¹⁶C'ajomal xa no'ox laj yictaan comel ti buch'utic me'un mu'nat ta j'ech'ele, yo' jech ta xabtelanic ti banomile, xchi'uc ta sts'unel ti uvae.

¹⁷Yu'un xi s'elan c'ot ta pasele: Ti caldeoetique laj slilinic laj xpuchq'uinic ta soquesel ti c'usitic pasbilic ta c'anal taq'uin ti x'ayan ta ch'ulnae. Ja' jech xtoc ti bal-bal c'anal taq'uine, ti yictaque, xchi'uc ti muc' ta pila ti ja' yavil vo'e, scotol laj yich'ic batel c'alal to jteclum Babilonia.

¹⁸Ja' jech xtoc, laj yich'ic batel ti yav tanetique, ti xulobiltaque, ti sloq'uesobil stanil xmechaile, ti muc'tiquil tazaetique, ti muc'tiquil lechetique, xchi'uc scotol ti c'usitic meltsanbil ta c'anal taq'uinetic ti ta xtun ta sventa yich'el ta muc' ti Diose.

¹⁹Xi s'elan ti co'ol laj spas ec ti banquilal soldado yu'un ti jchabivaneje, laj yich' batel scotol ti c'usitic meltsanbil ta oroe, ta platae: ti muc'tic lech-lech taq'uine, ti yav ac'aletique, ti tazaetique, ti yav tanetique, ti co'ol s'elan yav pajleb cantilae, ti muc'tiquil leche, ti bisetic ti ja' xch'amobil ti matanal vinoe.

²⁰Ti sc'oplal xcaltic ti chib bal-bal c'anal taq'uine, ti muc' ta pila ti ja' yavil vo'e, ti lajcha'cot sloc'obbail vacax ti pasbil ta c'anal taq'uin ti ja' c'otem ta yique, ti yan yictac ti laj yal to ox mantal ti ajvalil Salomón ti ac'o yich' meltsanel ta sventa ta xtun ta ch'ulnae, yu'un mu stac' na'el c'u yepal ti yalale.

²¹Ti jujun bal-bal taq'uine, x'ech' jutuc ta vaxaquib (8) metro ti snatile. Ja' x'ech' jutuc xtoc ta vo'ob (5) metro ti sbalej ta joyobe. Ja' no'ox un, pujul xmuy ta o'lol un, yich'oj chanib ni' c'ob (7 cm.) spimil ti c'anal taq'uine.

²²Ti jujun bal-bal c'anal taq'uine, yich'oj ti ta sjole, jun sronail ti x'ech' jutuc ta chib (2) metro ti stayleje. Yich'oj xtoc chaj-chaj c'anal taq'uin ti ta joyobe, ti nichimtasbil ta loc'tabil sat granadae.

²³Ti jujun sronail ti yich'oj chaj-chaj taq'uine, yich'oj vo'vinic (100) ta bej loc'tabil sat granada. Ja' vaclajuneb yo'vinic (96) ti xvinaj lec ta q'uelele, chanib (4) ti mu xvinaj lec ta q'uelele.

²⁴Ti banquilal jpas-mantal yu'un ti jchabivanej soldadoe, laj stsac ta chuquel xtoc ti Seraías ti ja' banquilal palee, ti Sofonías ti ja' pale xtoc ti mu yanuc ti yabtelique, xchi'uc yan oxib jchabiej ti' ch'ulnae.

²⁵Ta scotol ti jnaclejetic ta jteclume, laj yich' tsaquel ti j'opisial ti ta spas ta mantal ti soldadoetique, xchi'uc yan vucub (7) viniquetic ti ja' yajtuneltac stuc ti ajvalil ti oyic ta jteclume, ti buch'u tsots yabtel yich'oj ta soldadoil ti ta xchanubtas ti viniquetic yo' ta xac' sbaic ta tunele, xchi'uc yan oxvinic (60) ta vo' viniquetic ti ich'bil tsots ye sti'ic ti oyic ta jteclume.

²⁶Scotolic taje, ic'bil batel yu'un ti Nabuzadarán ta stojol ti ajvalil yu'un ti jteclum Babilonia ti oy ta Ribla ta yosilal ti Hamate.

²⁷Ti bu taje, laj yal mantal ti ajvalil yu'un ti jteclum Babiloniae ti yich'icuc milele. Ja' jech c'ot ta pasel ti jteclum Judá ti bec'bil loc' batel ta slumalique.

²⁸Ti jnaclejetic ti bec'bil loc' batel yu'un ti Nabucodonosore, ja' jech yepal jech c'u cha'al li'e: Ja' laj sbec' loq'uel oxmil xchi'uc oxib xcha'vinic (3,023) jnaclejetic yu'un Judá ti c'alal yucubal (7) jabil yochel ta ajvalilale.

²⁹Laj sbec' loq'uel xtoc jnaclejetic yu'un jteclum Jerusalén, vaxaquib ciento xchi'uc lajcheb xcha'vinic (832) ta vo' ti c'alal yich'oj xa xvaxaclajunebal (18) jabil yochel ta yabtele.

³⁰C'alal yich'oj xa oxib xcha'vinic (23) jabil yochel ta yabtele, jech xtoc ti Nabuzadarane laj to sbec' loq'uel vucub ciento xchi'uc volajuneb yoxvinic (745) ta vo' jnaclejetic yu'un ti jteclum Judae. Ti c'ot ta scotol ti bec'bil loq'uique, ja' chanmil xchi'uc vaquib ciento (4,600) ta vo'.

³¹Ti ta yo'obal xcha'vinic (25) c'ac'al ti ja' xa xlajchebal (12) ue, ti ja' xa yuclajunebal xcha'vinic (37) jabil ti bec'bil loc' ta slumal ti Joaquin ajvalil yu'un ti jteclum Judae, ja' o lic ochuc ta ajvalilal yu'un ti jteclum Babilonia ti Evil-merodaque. Laj yac' ta ilel ti oy syail xc'uxul yo'nton ta stojol ti Joaquine. Laj sloq'ues ta chuquel un.

³²Lec laj spas sba ta stojolal. Laj yac'be yabtel ta sbainel yan ajvaliletic ti oy ta stojol ta jteclum Babiloniae.

³³Ti jech taj une, ja' to jech laj sloc' sc'u' ti Joaquin ti ta stunes to ox ta chuquinabe. Jmoj ve' xchi'uc ti ajvalil ti c'u sjalil to cuxi batele.

³⁴Ma'uc no'ox taje, yu'un ti c'u sjalil cuxi batel ti Joaquine, ta xich'olan coltael yu'un ti ajvalil ta jteclum Babiloniae.