Read Tzotzil Jeremías 6 Bible Online

Jeremías 6 - Tzotzil bible

Jeremías 6

¹Jnaclejetic ta yosilal Benjamín, sa'ic ti bu xu' ta xanac' abaique. Jatavanic loq'uel ti ta jteclum Jerusalene. Oq'uisanic ti oq'ues ta jteclum Tecoae. Va'anic senyail ta Bet-haquereme, yu'un ta yolon to ti yolon xocon sloq'ueb c'ac'ale, ta xlic talel ti cuxul j'ilbajinvanej ti mu albajuc ta xac' ti vocole.

²Ti jteclum Sione, c'upil sba jech c'u cha'al ti jach'-jach' yaxaltique.

³Yu'un ti bu taje, ta xbat sq'uel xchijic ti jq'uel-chijetique, yu'un xlamet ech'el xchi'uc xchijic ta xaniel. Ti chijetique xc'ulet ta sa' ech'el ti sve'elic ta spat xocone.

⁴Va'i un, ti scontraique xi ta xalique: “Chapano abaic yo' ta jtsactic ta leto. ¡La'ic, ta o'lol c'ac'al, ba jtsactic ta leto. Yan che, bat xa c'ac'al! yu'un xqueovin xa talel ti banomile.

⁵Ja' lec un cha'e jtsactic ta leto ta ac'ubaltic Jlilintic ti toyol luchlebaletic yu'unique.”

⁶Ti Dios ti scotol xu' yu'une xi s'elan loc' ti mantal yu'une: “Lomesic ti te'tique, meltsanic jun muyebal yo' jech ta xich' tsaquel ta leto ti Jerusalene. Yu'un chapal xa sc'oplal ta xich' tsitsel ti jteclum ta scoj ti naca j'ilbajinvanejetic teye.

⁷Ti yabtel mulil colo'ile, co'ol s'elan ya'lel joc' ta xlic t'omuc li' ta Jerusalene. Malo xa no'ox ava'i ma' ti spajeb ilbajinel ti mu xa stac' a'yeluc bu ta xijbat yu'un une, ja' xa no'ox xna'un ma' ti yayijesele, ti oq'uel avanele.

⁸Yu'un mi mu jechuque, Jerusalén, a'yio ava'i, yanijem xa jol co'nton ta jch'ac jba loq'uel ta atojol. Ta xajoybinot ta sbajtical banomil. Mi junuc jnaclej ta xquicta comel ta atojol.”

⁹Ti Dios ti scotol xu' yu'une xi ta xale: “Ti c'u yepal ta xcomic ti israeletique, ta xich'ic chajel ta sa'el ti bu xa oyique, jech c'u cha'al ta xich' c'uxc'ultael ta sa'el ti uva ti oy ta sc'ob c'obtaque, ja' to ti c'uxi mu xa jbejuc ta xcome.”

¹⁰Ti vu'une xichi laj jtac'bee: “¿Mi yu'un oy buch'u sc'an ta xa'i mi ta jlo'iltabeic ti a'yej taje? Mu xa'iic un, Cajval, yu'un macal ta j'ech'el ti xchiquinique. C'ajomal no'ox ta xlabajic xchi'uquic ti ac'ope. Mi ja'uc oy stu ta xa'iic.

¹¹Sujbilun xa yu'un ta j'ech'el ti sc'ac'al avo'ntone, Dios, mu xa ts'icbaj ta xca'i.” Ti Dios une xi laj yalbune: “Lamanbo ya'i ta sbaic ti jva'lej viniquetic ti oyic ta callee, ta stojol ti buyuc no'ox xvolet ti jva'lej queremetique. Jmoj chucbil ta xbatic xchi'uc yajnilic ti viniquetique, xchi'uc ti moletic ti ch'iem c'opojemic xae.

¹²Yu'un ti snaique, ti yosilique, ti yajnilique, ta xjel yajval. Yu'un ta jyales coc jc'ob ta stsitselic ya'i ti buch'utic nacalic ta jteclum taje.” Ti vu'un Diosune, mu lo'iluc no'ox ta xcal.

¹³“Yu'un scotolic, manchuc mi ich'bil ye sti'ic, mi mu'yuc, c'ajomal no'ox batem yo'ntonic ta stsobel ti oyuc no'ox c'usi x'ayan yu'unic ti mu'yuc laj ya'iic c'uxi ta tojele. Yu'un ti j'alc'opetique xchi'uc ti paleetique, naca j'eleq'uetic scotolic.

¹⁴Xaval yilele, co'ol s'elan xa'ibeic yipal xc'uxul syayijemal ti jteclumale. Yaleluc xa yu'un ti lec oy scotole c'alal mu jechuque.

¹⁵Ti Jechuque, q'uexavicuc jutuc ma' ti vi s'elan ta spasic ti mu xa sts'ic cu'une. Le' une, laj to ta alel ma' ti sna' xa'iic ti q'uexlale, ti ts'i'ub satic xchi'uc ma' ti q'uexlale. Jech o xal un, c'alal ta jtsitsic ya'iique, sbosian xa yacanic ta xyalic ta lum jech c'u cha'al ti yane. Ti vu'un Diosune jamal xcal.”

¹⁶Ti Diose xi ta xalbe ti steclumale: “Va' chianic, q'uelic ti beetique, ti vo'neal beetic ti bu xpolte poltee. Jac'beic bu junucal ti lec ta tamel batele. T'unic batel un, ta xataic ti xcuxubil avo'ntonique.” Ti stuquic une xi laj staq'uique: “Mo'oj unbi, mu jc'an jtamcutic batel.”

¹⁷Ti Diose laj sva'anan jchabiej-q'uel-osiletic ti xi laj yalbe ti jteclume: “Ts'et-chiquintaic ti mu xa slequiluc mi oy c'usi ta xbac' talele.” Ti jteclum une xi laj staq'uique: “Quere, laj to c'op ma' ti ta jts'etan jchiquincutic yu'une.”

¹⁸Ja' yu'un un, ti Diose xi laj yale: “Muc'tiquil lumetic, a'yio ava'iic li'e yo' jech mu ch'ayaluc ta staoxuc ti c'usi ta xc'ot ta pasel ta stojol ti jteclumale.

¹⁹Banomil, a'yio ava'i ti xi ta xcale: Ti jteclum li'e, ta jtacbe talel svocol ta scoj ti bat yo'nton ta spasel ti chopole, yu'un mu'yuc laj yac'beicun ta venta ti jc'ope. C'ajomal no'ox bajbil c'ot yu'unic ti chanubtasel cu'une.

²⁰¿C'u cha'al yich'eluc talel avu'unic ti pom ti ta xlic talel ta lum Sabae, xchi'uc ti muil poxiletic ti ta xlic talel ta muc'tiquil lumetic ta namal banomile? Ti chic'bil matanaletic avu'unique, mu xal co'nton ta stsaquel yich'el, mi ja'uc ti c'usitic yan ta xich' svocol ta matanale.”

²¹Jech o xal ti Diose xi laj yale: “Ti jteclum li'e, ta jpas ta stojolic ti lomicuc ta lum ti ta stsuculin ti yoquique. Scotolic ta xchamic, mi totiletic, mi nich'nabiletic, mi yuts' yalal sbaic, mi lec xil sbaic.”

²²Ti Diose xi ta xale: “Ta namal banomil to ti oy ta yolon ti yolon xocon sloq'ueb c'ac'ale, yacal xa ta xchapan sba talel ti jun muc' ta lum ti jelavem xu' yu'une.

²³Chapalic ta j'ech'el xchi'uc syolobic xchi'uc slanzaic, banquilal jlo'-ch'ich'etic ti mu'yuc xc'uxul yo'ntonique, co'ol s'elan yech'omal syuc'benal nab ti x'avlajetique, ti naca cajajtic ta ca'e. Chapalic lec ta stsaquel ta leto ti jteclum Sione.”

²⁴Ti jnaclejetic ta Jerusalene xi ta xalique: “Laj ca'icutic vul talel ti lo'ile. Mu xa ta banomiluc oyuncutic yu'un ti xi'ele. C'ot ta jtojolcutic ti mu ech'baj ti vocole, ti mu yanuc yipal jech c'u cha'al ta xa'i ti ants c'alal ta svoq'ues ti yole.

²⁵Laj to ta alel sq'uelel ti abtelal ta osile, ti buyuc no'ox va'vunel ta beetique. Chapal xchi'uc yabtejebic ti jcontratique. Mu ech'baj xi'elal ti macbilotic yu'un ta jujujote.”

²⁶Jteclumal, svinajeb ti mu x'ech' ta xava'i ti yipale, lapo ti lajemal c'u'ile. Balalino aba ta spucuquil ti stanil c'oq'ue. Ac'o ta ilel ti oyot ta me'inale. Milo aba ta oq'uel jech c'u cha'al ta xcham ti c'ajomal yo jcot ti nich'onile, yu'un mu xa jaluc ta xvul talel ta jtojoltic ti buch'u ta xistsutsesotique.

²⁷Ti Diose xi laj yalbune: “Ta jva'anot ta yalbel c'u s'elan ta xc'ot ta yo'nton avu'un ti jteclumale. Chajbo ya'i ta yalbel yo' ta xvinaj bu c'alal pajem xchi'uc ti stalelique.”

²⁸Cajval, scotolic toyobba xa'i sbaic, ja' jun jnaclejetic yanijem sjolic ti mu'yuc spajeb ti ye sti'ique. C'otemic jech c'u cha'al ti c'anal taq'uine, mi ja' ti tsatsal taq'uine.

²⁹C'alal yipal xvuch'uch'et yu'unic ti sjubobil c'oq'ue, ta x'unij ti c'unil taq'uine. Mu'yuc c'usi xtun o ti ta sloq'uesbeic ti yic'obale, yu'un mu j'ech'eluc ta xtub o sc'oplal ti buch'u mu'yuc xch'ulel xa'i sbaique.

³⁰C'ajomal xloc' venta ti ac'o albatuc sc'oplal ti c'ot ta jipbilal platae, yu'un ti vo'ote, Dios, laj xa ajip loq'uel.