Read Tzotzil Jeremías 7 Bible Online

Jeremías 7 - Tzotzil bible

Jeremías 7

¹Ti Diose xi c'opoj ta stojol ti Jeremiase:

²“Bat va'ano aba ta ochebal ti' ch'ulna yu'un ti Diose, xi xavac' ta na'el ti c'op li'e: Jnaclejetic yu'un scotol Judá ti ta xa'ochic talel ta ti'naetic ta yich'el ta muc' ti Diose, ts'et chiquintaic ava'iic ti c'op li'e:

³Xi ta xal ti Ajvalil Dios yu'un Israel ti scotol xu' yu'une: ‘Tuq'uibuc ti acuxlejalique xchi'uc ti c'usi ta xapasique. Jech ta to xcac' ch'ian c'opojanic li' ta banomile.

⁴Mu xapat avo'ntonic ta xch'unel ti buch'u xi ta xlo'lavane: Li' oy ma' ti xch'ulna Diose, li' oy ma' ti xch'ulna Diose.

⁵‘Mi ta xtuq'uib ti acuxlejalique, ti c'usi ta xapasique, ti lec tuc' ti c'usi ta xapasbe abaic ta jujun tale,

⁶mi ta xapajes abaic ta yilbajinel ti jyanlumetique, ti me'unetique, ti me'unal antsetique, ti mu xamilic ta jeche' ti buch'u muts'ul sat ti ta xlaj avu'unic ti jnaclejetic li'e, mi ta xapajes abaic ta yich'el ta muc' ti yan diosetic ti ja' no'ox ta xata o avocolic yu'une,

⁷va'i unbi, ta to xcac' ch'ian c'opojanic li' ta banomil ti bu laj cac'beic ta j'ech'el ti atot ame'ic ta vo'nee.

⁸‘Yu'un ti vo'oxuque toj taq'uel ta muc' avu'unic ti naca jutbilal c'opetic ti mu'yuc c'usi lec ta tael yu'une.

⁹Yu'un ta xa'elc'ajic, ta xamilvanic, ta xasa' amulic, naca yeilal no'ox ta xjelav avu'unic ti ta xava'an abaic ta rexticoe. Ta xavac'beic chic'bil pom ti Baale. Ta xanijan abaic ta yich'el ta muc' diosetic ti ma'uc aventaique.

¹⁰Ts'acal to un, ta xatalic ta ch'ulna li'e, ti ja' com ta jventae, yu'un ta xtal ava'an abaic ta jtojol. Avac'toicuc ti lec oyoxuque. Avac'toicuc ti q'uelbiloxuc no'ox ti avac'ojbeic yipal ta spasel ti c'usi mu ts'icbaj ta xca'i yu'une.

¹¹Ti ch'ulna li'e, ti ja' jtaobil ta na'ele, ¿mi yu'un ta xanopic ti ja' snail ch'en j'eleq'uetique? Le'e, quiloj scotol. Ti vu'un Diosune, mu lo'iluc no'ox ta xcal.

¹²Batan avilic ta jch'ulna ti oy ta Siloe, ti t'ujbil cu'un ta sliqueb yo' ta xinaquie. Q'uelo avilic lec c'u s'elan laj jpas ta stojol ta scoj xchopolalic ti jteclumal Israele.

¹³Ac'o mi xivulvun ono'ox ta yalbelot ti c'u a'elan xchi'uc ti achopolale, mi ja'uc laj avaq'uic ta venta. Ech' no'ox ta apat ta axoconic. Ti vu'un Diosune, mu lo'iluc no'ox ta xcal.

¹⁴Jech o xal, ti c'u s'elan laj jpas ta stojol ti ch'ulna ta Siloe, ja' jech ta jpasbe ta stojol ti jtaobil ta na'el ta ch'ulna li'e, ti laj cac'boxuc xchi'uc ti atot ame'ic ta vo'nee, yo' jech oy yip avo'ntonic xchi'uc.

¹⁵Ta jtenoxuc loq'uel ta jtojol jech c'u cha'al laj jtenic loq'uel ta vo'ne ti avinquileltac snitilul ti Efraine.’

¹⁶“Ti vo'ote, Jeremías, mu xac'opoj xati'in yu'un ti jteclum li'e. Mi ja'uc xavocolet xa xaquejelet xa yu'un ta sventaic. Mu xasuj aba, yu'un mi ja'uc ta jtac'bot ti ac'ope.

¹⁷¿Mi yu'un mu xavil ya'yel ti c'usi ta spasbeic ti jteclumetic yu'un ti Judae, xchi'uc ta calleetic yu'un ti jteclum Jerusalene?

¹⁸Ti nich'nabiletique ta stsobic si'. Ti totiletique ta stsanic c'oc'. Ti antsetique ta xchapanic ta svots'el ti muc'tiquil panetic ta smeltsanique, ti ta xac'beic ta smoton ti ch'ul me'il ti sbiinoj Sme' Vinajele. Ma'uc no'ox taje, soquem xa co'nton yu'unic ti ta xac'beic matanal vino ti yan diosetique.

¹⁹Ma'uc no'ox ta soquesbeicun ti co'ntone. Ta sa'be sbaic ti svocol ti ta xjoybij ta xq'uexlal stuquique. Ti vu'un Diosune, mu lo'iluc no'ox ta xcal.

²⁰Jech o xal ti vu'un Diosune, ta j'ech'el ta jloq'ues ti sc'ac'al co'nton ta stojol ti jnaclejetic ta lum li'e, ta stojol ti chon bolometique, ta stojol ti lo'bolal te'tic ti oy ta osile, xchi'uc ta stojol ti ts'unubaletique. Jech ta xc'ot ta pasel jech c'u cha'al junuc colemal c'oc' ti mu stac' maquel ta bee.”

²¹Ti Ajvalil Dios yu'un Israel ti scotol xu' yu'une, xi ta xalbe ti slumale: “Ti bu xa c'alal xal ti avo'ntonique, aq'uic ti chic'bil matanale xchi'uc ti c'usi ta xich' svocol ta milele. Ti'anic ti sbec'tal xtoque.

²²Ja' no'ox un, c'alal laj jloq'uesic talel ta Egipto ti atot ame'ic ta vo'nee, mu'yuc laj calbe ya'iic sc'oplal ti chic'bil matanaletique xchi'uc ti milbil matanaletique.

²³Ti bu laj calbeique, ti ac'o xisch'unbeicun ti c'usi ta jc'ane. Jech Diosun yu'unic unbi. Ti stuquique, ja' jteclumaltac. Laj calbeic ya'iic xtoc, ti ac'o stamic ta spasel jech c'u cha'al laj calbeique yo' jech lec ta xc'ot ta stojolic.

²⁴C'u stu un, mu'yuc xisch'unbeicun. Mi ja'uc laj yaq'uic ta venta. C'ajomal no'ox yac'ojbeic yipal ta spasel ti bu ic'bil yo'ntonic yu'une. C'alal oy sc'oplal ta sutic talel ta jtojole, c'ajomal stoyel ya'iic laj svalopatinicun comel.

²⁵Laj jtacolan talel ti cajtuneltaque, ti caj'alc'optaque ti c'alal loq'uic talel ta Egipto ti atot ame'ic ta vo'nee, ti jech to ta jpasolan ta atojolic avi tana li'e.

²⁶Ti vo'oxuc une, mu'yuc xavich'beicun ta muc'. Mi ja'uc laj avac'beicun ta venta. C'ajomal laj apasic ti jelavem ti atoyobbailique, ti mu xava'ibeic ti xchiquinale, ja' jc'ol to mu sta ti atot ame'ic laj ech'icuc ta vo'nee.

²⁷“Jeremías, ti va'i s'elan ti c'op taje, albo ya'i, avanan xchi'uc, manchuc mi mu xaq'uic ta venta ti ac'ope, manchuc mi mu xaschiquintabot.

²⁸Xi xavalbe ya'iique: ‘Ti muc' ta lum li'e, mu xich'ic ta muc' ti Ajvalil Dios yu'unique. Mu x'ochic ta be yu'un ti tojobtasele. Ch'ay ta ye ta sti'ic ta yalel ti oyuc lec c'usi tuc' ta xich' pasele.’ ”

²⁹Jteclum Jerusalén, loq'uic ti stsotsil ajole, jipo batel xtoc. Chapano aba ta sq'uejintael me'inal q'uejimol ta sts'ijlajan vitstic. yu'un ti Diose ilinem xa xchi'uc ti avinquileltaque, laj xa sten, laj xa sjip comel ta yo'nton.

³⁰Ti Diose xi ta xal ta jamale: “Ti jnaclejetic ta jteclum Judae, oy c'usi xi laj spasic ti mu lecuc ta xca'i yu'une: Yu'un ta ch'ulna ti bu c'otem ta cu'une, laj soquesic, yu'un bat yaq'uic ti j'ac'-ti'ol loc'obbailetic yu'unique. Laj soquesic un.

³¹Ta stenlejal yu'un ti Ben-himone, laj smeltsanic jun altar ta sventa ti Tofete yo' jech ta xchiq'uic ti squerem stsebique, ti mu jutebuc jech calojbeique, ti mu'yuc jech ta jole.

³²Jech o xal ti vu'un Diosune, jamal ta xcal ta xc'ot sc'ac'alil ti ma'uc xa ta sbiin Tofete. mi ja'uc ta sbiin stenlejal Ben-hinom ti bu taje. Yu'un ta xlic sbiin Milobbail stenlejal. Ti ta Tofete, ta smuquic animaetic ta scoj ti mu'yuc xa bu ta stabeic ti yavile.

³³Sbec'talic ti animaetic taje, ta xc'ot ta sve'el ti c'usitic xvilte vilte ta vinajele, xchi'uc ti yan jti'oval chonetique. Mi ja'uc oy buch'u ta sibtas.

³⁴Ti ta jteclumetic yu'un ti Judae, xchi'uc ti ta calleetic yu'un ti Jerusalene, ta jtubbe sc'oplal ti xmuyubajic no'ox ta q'uejimol yu'un ti q'uine, xchi'uc ti q'uejimol c'alal ta spasic ti q'uin lequele. Scotol sts'ijlajan ta xcom jech c'u cha'al junuc sbajtical banomil ti muc' ta lume.”