Read Tzotzil Jeremías 9 Bible Online

Jeremías 9 - Tzotzil bible

Jeremías 9

¹Ti jechuc la s'elan ti co'oluc s'elan sat vo' xtuctun ta xloc' ti ya'lel jsate, c'ac'al ac'ubal unbi ta xi'oc' ta scoj ti animaetic yu'un ti jteclumale.

²Oc no'ox la ta alel oyucun ta sbajtical banomil yo' xu' ta xinaquie, yo' nom ta xquicta comel ti jlumale. Yu'un scotolic mu'yuc stuq'uil ti yo'ntonique. Scotolic naca j'ac'vanejetic ta milel.

³Yu'un chapalic ta ye ta sti'ic ti jutbil c'ope, jech c'u cha'al chapalic ta xach'el sni' syolobic ta yalcuale. Me'inem xa ma' ti jut c'op li' ta jteclume. Laj to sc'oplal ma' ti melel ta xalique. Soquel soquel sq'ueloj batel ma' ti bu stamojique. Xi ta xal stuc ti Diose: “Laj to sc'oplal ma' ti ta sc'an xiyojtiquinique.”

⁴Laj to c'op ti ta xich'be ta muc' sc'op ma' ti buch'u lec xil sbaic xchi'uque, mi ja'uc ta xich'be ta muc' sc'op ti xchi'il ta voq'uele, yu'un naca jlo'lavanejetic ta j'ech'el ma' ti xchi'il ta voq'uele. Ta sa'ilanbe sba smulic ti buch'utic lec xil sbaic xchi'uque.

⁵Laj sc'oplal ta yalel yu'unic ma' ti melele, jujunic ta slabanic ti yane, nopem xa'iic ta sjutel ti c'ope. Mu albajuc xchopolal ti c'usi ta spasique, mu'yuc xa c'usi xut sjel ti sjolilal yu'unique.

⁶Yu'un xi ta xal ta jamal ti Diose: “Naca lo'lavanej me'inem xa'iic, nopem xa'iic ti lo'lavaneje. Laj sc'oplal ti xiyojtiquinic ti jteclumale.

⁷Jech o xal ti vu'un Diosun ti scotol xu' cu'une, xi ta xcale: ¿Mi oy to la c'usi stac' ta jpas ta stojol ti jteclumal li' une, ja' xa xna'un xa'iic ta jtiq'uic ochel ta c'oc' yo' ta xtuq'uibique?

⁸Yu'un ti c'usi ta xloc' ta yeique, co'ol s'elan sni' yolob ti ta xmilvane. Yu'un ja' oyic ta yalel ti naca jutbil ti c'usi ta xalique. Jun xa yutsil ye sti'ic ta sc'oponic yilel ti buch'utic lec xil sbaic xchi'uque. C'u stu un, ja' no'ox yacal ta stiq'uic ochel ta pets'.

⁹¿Mi mu'yuc ta jtsitsic yu'un ti va'i s'elan ta spasic taje? ¿Mi mu'yuc ta xcac'be stojic ti jteclum ti va'i s'elan taje? Ti vu'un Diosune jech xcal ta melel.

¹⁰“Oc'anic, ajetanic yu'un svocol ti muc' ta vitstique. Liquesic me'inal q'uejimol yu'un ti xpach'alul stselejtique. Mu'yuc xa buch'u ta x'ech' ti bu taje, yu'un ve' xa c'oc' yu'unic. Mu'yuc xa bu xava'i ti oy to xmu'et ti vacaxe, yu'un c'alal ta mutetic xchi'uc te'tical chon bolometic, jatavic xa loq'uel.

¹¹“Yu'un ta joybin ta jun busul ton ti Jerusalene, yu'un ta xc'ot ta xch'en oq'uiletic. Ta joybin ta sts'ijlajan banomil ti jteclumetic yu'un ti Judae, mi junuc jnaclej ta xcom.”

¹²¿Buch'u xa ono'ox la ti jelavem sbijil ta ya'yibel smelol ti va'i s'elan taje? ¿Mi yu'un oy buch'u ac'bat sna' yu'un Dios ti va'i s'elan taje yo' jech xu ta xalbe ya'i smelol ti yane? ¿C'u cha'al c'ot ta lilijel ti jteclume? ¿C'u cha'al ti c'ot ta taqui banomil ta j'ech'el jech c'u cha'al junuc sbajtical banomil ti mu ja'uc xa oy buch'u ta x'ech' teye?

¹³Xi laj stac' ti Diose: “Ti jech c'ot ta pasel scotol taje, ti chanubtasel laj cac'beic ti israeletique, c'ajomal no'ox laj svalopatinbeicun comel. Mi jutebuc laj yac' yo'ntonic ta spasel ti c'usi ta xale.

¹⁴Yu'un pucujibemic ti batem yo'nton xchi'uquic ta spasbel stoyel xi'el ti loc'tabil diosetic jech c'u cha'al ac'bat yilic comel yu'un ti stot sme'ique.

¹⁵Jech o xal un, ti vu'un Ajvalilun ti scotol xu' cu'une, Dios yu'un ti Israele, xi ta xcale: Jun xch'ail ti c'usi ta xcac'be sve'elinique, venenoal vo' ti ta xcac'be yuch'ique.

¹⁶Yu'un ta xa jtaniic batel ta yan muc'tiquil lumetic ti mu ja'uc xojtiquinique, ti mu ja'uc laj yojtiquinic ti stot sme'ique. Yu'un tsacbil yespadailic ti nutsbil ta xloq'uique, ja' to ti c'uxi mi junuc xa ta xcome.”

¹⁷Ti Dios ti scotol xu' yu'une, xi ta xale: “Chiquinta o ava'iic li'e. Taquic talel ta iq'uel ti antsetic ti ja' yabtelic o ta x'oq'uic yu'un ti me'inale.”

¹⁸Ja' jech sta o, talicuc ta anil ti me'inal oq'uicuc ta jventatique, ti malajetuc xa liquel ta vo' ti jsatic yu'unique, ti mu xa ta banomilucotic yu'un ti oq'uele.

¹⁹Ti mu ech'baj ti vocole, c'alal to jteclum Sión ti xi ta xc'ot ta jni' ta jchiquintique: Mu xa ono'ox cha'belotic un, yac' ta j'ech'el ma' li' une. Spajeb xa ti vocol oyotic ta q'uexlal yu'une. Lilij xa ti jna' jc'ulebcutique. Ti jlumaltique, jipbil tenbil ta xcom cu'uncutic.

²⁰Antsetic, ts'etano achiquinic yu'un sc'opojel ti Diose, a'yiic lec ti c'usi ta xal talele. Ti avantsil olique, ac'beic yil ti oq'uel avanele, xchi'uc xi, ac'o me'inal oq'uicuc ti buch'u lec xil sbaic xchi'uque:

²¹Ti lajel tubele och talel ti bu nacalotique. Vul xa ta loq'uel ta jna jc'ulebtic, ti ta jbetique, naca smilic no'ox ti ololetic cu'untique, naca xlaj no'ox ti jva'lej viniquetic ti bu xvolvun ti jnaclejetique.

²²Co'ol s'elan stso' chon bolometic busul com ta osiltic ti animaetique, jech c'u cha'al ti jol trigo ta xbaj yu'un ti jtuch'-trigoe.” Ti Diose, mu stselbuj ti sc'ope.

²³Ti Diose xi ta xale: “Mu snop ti cajal xa xa'i sba xchi'uc sbijil ti buch'u oy sbijile. Mu snop ti cuchem xa yu'un ti buch'u jelavem xu' yu'une. Ti jc'uleje mu snop ti ja' ta xpojvan ti sc'ulejale.

²⁴Mi oy buch'u ta stoyes ya'i ti sc'oplale, ac'o stoyes sc'oplal ta yojtiquinelun, ta sna'el ti vu'un Diosune, ti ta xc'uxul co'nton oy jtuq'uil cutsilal ta jventain ti banomile, ja' jech ti oy ta co'ntone. Ti vu'un Diosune, mu stselbuj ti jc'ope.”

²⁵Ti Diose xi ta xal ta jamale: “Ta xc'ot sc'ac'alil cu'un ta jtsits scotol ti xi s'elan ti jteclumetic ti ta sbec'tal no'ox yich'ojic ti circuncísione:

²⁶ti jteclum Egiptoe, ti jteclum Judae, ti jteclum Edome, ti jteclum Amone, ti jteclum Moabe, xchi'uc scotol ti buch'utic nacal ta sbajtical banomil ti xch'ulojic lec ta loq'uel ti stsotsil sjolic ta xocon xchiquinique. Yu'un scotol ti jteclumetic taje, xchi'uc scotol ti jteclum Israele, laj xa xchanbeic yo'nton ta j'ech'el ti jyanlumetique.”