Read Tzotzil Lamentaciones 4 Bible Online

Lamentaciones 4 - Tzotzil bible

Lamentaciones 4

¹C'ot to ta sac vaytajel ma' ti oro une. C'ot to ta ch'ayel ta ts'ayetel xojobal ti lequil oroe. Stanaltac ti ch'ulnae tanij batel slilijemal ta bebetic.

²Ti jnaclejetic yu'un Sión ti cajal to ox sc'oplalique, ti c'otem to ox sc'oplalic jech c'u cha'al ti oroe, co'ol s'elan ta x'ilatic jech c'u cha'al lumal bin meltsanbil yu'un ti jpotobe.

³Ja'uc ti me' oq'uile ta to xac' xchu' yo' ta xchu'iltas ti yalabtaque, yan ti jnaclejetic yu'un ti jlumale, jti'oval ta j'ech'el, co'ol s'elan jech c'u cha'al spucujil ti j'anilajel-mut ti oy ta sbajtical banomile.

⁴Mu x'ech' taqui ti'il ta xa'iic ti jchu'nel ololetique, spac'oj xa sba ti yoq'uic ta spac'obique. Yo'ntonuc ve'icuc ya'iic ti ololetique, mu'yuc buch'u ta x'ac'bun un.

⁵Ti buch'u oy to ox ta ye ta sti'ic ti sve'el yuch'omique, tana une, javajtic ta be ta xlajic ta vi'nal. Ti spajebal to ox yutsil ti bu ch'iic talele, tana une, ta yavil c'a'eptic nacalic.

⁶Smul scolo' ti muc' ta lum yu'un ti jteclumale, jc'ol to mu sta smul scolo'ic ti Sodomae, ti ta jech to yepal ta jliquel lilijem com ti mu'yuc buch'u tsacun ta leto yu'une.

⁷X'ech' to ox sts'aytsun saquil yutsilic jech c'u cha'al bot ti viniquetic ti buch'u laj yich'ic t'ujele. Xjelav to ox saquil jech c'u cha'al ti chu' vacaxe. Xjelav to ox stsajal xch'ich'elic jech c'u cha'al ti coral tone. Yaxts'ijan no'ox ti sbec' satic jech c'u cha'al ti zafiro tone.

⁸Avi tana li' une, ic'al c'abin xa ta j'ech'el, jc'ol to mu sta com ti yic'ubel osile. Mu x'ojtiquinatic buch'uic ti bu ta xanavic ta beetique. Pac'al ta j'ech'el ti snuculilic ta sbaquilique, taqui xotan ta j'ech'el jech c'u cha'al junuc si'.

⁹Ti buch'u cham lajic ta letoe, ech' xa ti svocolique. Ti buch'u ta xchamic ta vi'nale, mu x'ech' ta xa'i ti svocolique, yu'un naca xcham ta scoj ti mu'yuc c'usi staic ta lajesel ti c'usi x'ayan ta banomile.

¹⁰Ti antsetic ti oy slequil yo'ntonique, ta jech yepal lic slacan ti yolique. Laj stunesic ta ve'lil ma' ti yolic ti yacalic ta vi'nal ti muc' ta lum yu'un ti jteclumale.

¹¹Ti mu xa c'usi x'ech' o ta xa'i sc'ac'al yo'nton ti Diose, laj sbusan talel scotol ti sti'emal sjole. Laj stsanbe sc'ac'al ti Sione; laj slilinbe c'alal to sliqueb ti yoctaque.

¹²Mi jutebuc laj sjolinic ti ajvaliletic li' ta banomile, xchi'uc scotol ti sventainojic ta spasel mantal ta banomile ti xc'ulet ochel ta ti'naetic yu'un Jerusalén ti contrainvanej j'ac'-vocole.

¹³Scotol taje, scoj smulic ti j'alc'opetique, ti paleetic ti mu albajuc chopol c'usitic laj spasique. Ta yutil jteclum laj smalbeic xch'ich'el ti buch'u jeche' muts'ul sba sat laj smilique.

¹⁴Ma'satetic s'elan, xcuclajet ta xanavic ta beetic yu'un ti lume. Bonolic ta ch'ich', mi junuc sc'an spicbe ti sc'u'ique.

¹⁵“Mu xbat anopic, mu xanopic, jsoquesvanejetic, mu stac' nopel, ch'aco abaic ta stojol”, xi x'avet sc'oplal. “Jatvil, j'ech'el-beetic, mu stac' xcomic ta naclej li'e”, xi sc'oplal ta x'albat yu'un ti buch'u yan yajvalique.

¹⁶Ti Diose laj stenan loq'uel ta stojol, mi jutebuc laj sjoybin talel sat ta stojolic. Mu'yuc x'aq'ueic ta venta ti paleetique, mi jutebuc xc'uxubaj o'ntonal ta stojol ti moletique.

¹⁷Xlub xa ta j'ech'el jsatcutic ti ts'ijiluncutic ta smalael ti coltael ti jeche' ech' ti vocole. Jpatoj xa ox co'ntoncutic ta xvul ta loq'uel jun jteclum ti c'alal mu'yuc c'usi xu' yu'un ta xpojvane.

¹⁸Pa'ibiluncutic ta j'ech'el bu ta xixanavcutic, mi ja'uc stac' xiloc'cutic batel ta be. Ta xa sta yorail ta xic'otcutic ta tsutsel, c'ot xa yorail ta xquich'cutic un. Sta xa yorail un, mu xa cha'bel.

¹⁹Ti jcontracutique xvilic no'ox ta snutseluncutic ta jujun vitstic, ja' mu sta xvil ma' ti xique. Cotajtic no'ox jpets'alcutic yu'unic ta sbajtical banomil.

²⁰Tsaque xa ta chuquel ti buch'u t'ujbil yu'un ti Diose, ti sac jaman to ti banomil ta xca'icutic yu'une, ja' ti ajvalil ti xi laj calcutic ta stojole: “Ta yolon aqueoval avaxinal capaluncutic ta naclej xchi'uc ti jteclumetique.”

²¹Tse'inan, muyubajan xch'a un, muc' ta lum Edom, ti aventainojbe yosilal ti Uze. Mu no'ox xacol ec un, ta xac'upin ava'i ti mu x'ech' xjelav ti vocole, ti co'ol s'elan jyacubel t'anal ta xacom yu'une.

²²Ti atsitsele, Sión, c'ot ta tsutsel, mu'yuc xa ta xacha'beq'ue loq'uel yu'un Dios ta avosilal. Ta stsitsot ava'i ec un, ta scoj ti mu albajuc chopol laj apase, muc' ta lum Edom, ta svinajesbot ava'i ti amule.