Read Tzotzil Lamentaciones 5 Bible Online

Lamentaciones 5 - Tzotzil bible

Lamentaciones 5

¹Vulesuncutic ta avo'nton un, Dios, ti vi s'elan c'ot ta jtojolcutique. Ac'o talel asat un, ti q'ue s'elan ta xilic ti jvocolcutique.

²Scotol ti c'usi x'ayan cu'uncutique och xa ta yoc ta sc'ob ti jyanlumetique. Ti jnacutic une c'ot ta snaic ti jnaclejetique.

³Lic'otcutic ta me'un olol, ch'abal ti jtotcutique, co'ol s'elan junuc me'unal ants com ti jme'cutique.

⁴Ta jmancutic ma' ti vo' ti cu'uncutic to oxe. Ti bu ta jsa'cutic si' ti cu'uncutic to oxe, ta jtojcutic yo' ta jsi'incutic.

⁵Tsots ta j'ech'el ti ta xi'abtejcutic yu'unique. Xilubcutic xa ta j'ech'el, mi jutebuc xac' jcux co'ntoncutic.

⁶Yo' ta jta ti jve'elcutique, ta jchon coc jc'obcutic ta stojol ti egipcioetique xchi'uc ti asirioetique.

⁷Mu'yuc xa cuxul ti jtot jme'cutic laj sa' ti smulique. Tana une, jcuchojcutic com ti bu jelavique.

⁸Tana une, li'ochcutic ta mosovinel. Mu'yuc buch'u junuc xispojuncutic loq'uel ta yoc ta sc'obic.

⁹C'alal ta jsa' ti jve'elcutique, jujuti' xa mu ta xcac' o jol jbaquilcutic yu'un ta scoj ti j'ac'-letoetic ti oy ta sbajtical banomile.

¹⁰Ta scoj xmich'mun ta xac' ti vi'nale, ic'al c'abinuncutic ta q'uelel ta scoj ti sc'ac'al sicale.

¹¹Ti ta Sione xchi'uc ti ta jteclumetic yu'un ti Judae, c'alal ta antsetic, ta uni tsebetic, laj yich'ic ilbajinel.

¹²Ti banquilaletic cu'uncutique, chucul sc'obic joc'ajtic laj lajuc yu'unic; ti moletique mu'yuc xa stu ilatic.

¹³Tiq'ueic ta sjoyoyinel sjuch'el sat ts'unubil ti viniquetic ti oy lec yipique; ti jva'lej viniquetic une, ac'bat xcuchic si' ti bu xa c'alal xlic yu'unique.

¹⁴Ti moletic ich'bil ye sti'ique, ch'abal xa vololic ta ochebal sti'tac ti jteclume; ts'ij xi ma' ti xvochetic no'ox ta q'uejimol ti jva'lej viniquetique.

¹⁵Mu'yuc xa xmuyubaj ti co'ntoncutique; joybij ta at-o'nton ti xibitcutic to ox ta ac'otajel yu'un ti muyubajele.

¹⁶Na'tic to bu c'alal ts'e'el c'ot ti cutsilal jlequilalcutique. C'u no'ox cha'al jech libatcutic ta scoj laj jsa' ti jmulcutique.

¹⁷Jech o xal xtuch'et ti co'ntoncutic ta scoj une, ti ic'uneb ti osil banomil ta xca'icutic yu'une.

¹⁸Ti vits Sione, stuc xa slilijemal busul; ti bu taje, xloc' x'och no'ox ti vetetique.

¹⁹Ti vo'ot une, Dios, sbatel osil Ajvalilot, j'ech'el chotolot o ta apasob mantal.

²⁰¿C'u cha'al j'ech'el laj atenuncutic comel ta avo'nton? ¿C'u cha'al ech'em no'ox sjalil jipbil tenbiluncutic avu'un un?

²¹Joybinuncutic talel ta atojol un, Cajval, ta xisutcutic talel. C'otuc to ta jtojolcutic avu'un un jech c'u cha'al jcuxlejalcutic to ox ta ba'yele.

²²Le' une, j'ech'el bajbil tenbil lic'otcutic avu'un; yepal no'ox ti sc'ac'al avo'nton lamal vul ta jtojolcutique.