Read Tzotzil Ezequiel 1 Bible Online

Ezequiel 1 - Tzotzil bible

Ezequiel 1

¹Ta yo'obal (5) c'ac'al yu'un ti xchanibal (4) u ta slajunebal xcha'vinic (30) jabile, chotolun ta ti' uc'um Quebar jmoj xchi'uc ti buch'utic bec'bil loq'uique. Ta jech yepal un, jam ti jba jsat ti laj quil jamal ti vinajele, c'ot ta jsat ti Dios une.

²Taje, ta yo'obal (5) xa sjabilal xchi'uc yo'obal (5) c'ac'al yu'al ti bec'bil loc' ti ajvalil Joaquine.

³C'alal oyun ta ti' uc'um Quebar ta yosilal ti caldeoetique, ti Diose laj scajan sc'ob ta jtojolal ti pale Ezequiel xnich'onun ti Buzie.

⁴Va'i un, laj quil ti sutubaj no'ox talel ic' ti lic talel ta yolon ti yolon xocon sloq'ueb c'ac'ale, ti co'ol s'elan sac tsel xjaplajet no'ox sc'ac'al ta xloc' talel ta epal voletel toque, ti sac jaman no'ox ta j'ech'el ta sjoylej ti xocone. Ta o'lol bu xloclun ti c'oq'ue, sts'ayayet ta xvinaj jech c'u cha'al junuc c'anal taq'uin cusbil ta xac' xojobale.

⁵Ta o'lol taj une, oy c'usi chanib cuxul ta xvinaj yilel, ti co'ol s'elan vinic ta q'uelele.

⁶Ti jujunic taj une, chanib sat yelovic, xchi'uc oy chanib xiq'uic.

⁷Lec tuc' xiq'uilic ti yoquique. Ti svoyique jech c'u cha'al svoy ch'in tot vacax ti c'on-c'ontic ta xac' xojobal jech c'u cha'al ti c'anal taq'uin cusbil leque.

⁸Ti oy ta xchanjotal xocon ta yolon ti xiq'uique, sc'ob viniquetic yilel. Oy sat yelovic ta xiq'uic ta xchanibal xoconic.

⁹Snupojan sba ti sba ba xiq'uic ta jujun tale. C'alal ta xanavique, mu sq'uel spatic, stoyoj lec satic.

¹⁰Ti sat yelov ti c'usi chanib cuxul ta xvinaje, xi s'elane: Ti jelavem ta jba'bee, yelov vinic ta q'uelel. Ti oy ta xocon bats'i c'obile, sat león ta q'uelel yilel. Ti oy ta ts'et c'obile, sat tot vacax ta q'uelel yilel. Ti oy ta patile, sat muc' ta xic ta q'uelel yilel.

¹¹Ti xiq'uic une lich'il muyel ta toyol. Snupojan sba yu'unic ti sba sni'ni'tac ti chib xiq'uique. Ta smac o sba xchi'uquic ma' ti chib xiq'uique.

¹²Stoyoj lec sat ta xanavic batel scotolic, mu sq'uel spatic. Tuc' stamojic ech'el bu ta x'ic'atic batel yu'un smuc'ul stsatsal ti Diose.

¹³Co'ol s'elan tilemal ac'al x'ubet no'ox ta q'uelel ma' ti c'usi cuxule, mi co'ol s'elan jch'obuc toj xtal xbat no'ox ta o'lol yu'unic. Xojobin no'ox ta q'uelel ma' ti c'oq'ue. Xjaplajet ta xloc' tal sac tsel ti bu taje.

¹⁴Xtal xbatic no'ox ta jujujot ma' ti c'usi cuxulique, co'ol s'elanic sac tsel yilel.

¹⁵C'alal jq'ueloj batel ti c'usi cuxulique, laj quil ta banomil ta jujujot xoconic oy scarosalic.

¹⁶Co'ol s'elan xchanibal ti carosetique. Sts'aylajet no'ox yutsil ta xac' xojobal ma' ti c'u s'elan meltsanbile, co'ol s'elan sac vayan c'anal bax-ton. Co'ol s'elan oy to yan carosetic ta yut yilel ti jujun carosetique.

¹⁷Mi ja'uc ta sq'uel spatic ma' ti buyuc no'ox baticuc ta xchanjotal bu sq'uelojic batele.

¹⁸Laj quil ti yich'oj xot-xot taq'uinetic ti chanib carosetique, sts'aylajet no'ox xojobal ta jujujot xocon.

¹⁹C'alal ta xlic xanavicuc ti c'usi cuxule, setet no'ox batel ti carosetique. C'alal ta xchech sbaic muyel ti c'usi cuxule, ta xchech sba muyel ti carosetique.

²⁰Ti buyuc no'ox ta xbatic ti c'usi cuxulique, ic'bil ta xbatic ta sventa smuc'ul stsatsal Dios ta xtaqueic batele, jmoj stselet batel ta xanobal xchi'uc ti carosetique. Ti carosetique yich'ojbeic xcuxlejal ti c'usi cuxulique.

²¹C'alal ta xlic baq'uicuc ti c'usi cuxulique, ta xlic bac'uc ti carosetique. C'alal mi ta spajes sbaique, ta spajes sba ti carosetique. Mi ta xchech sba muyel ta banomil ti c'usi cuxulique, ta xchech sba muyel ti carosetique. Ti carosetique yich'ojbeic xcuxlejal ti c'usi cuxulique.

²²Ta yac'ol stuq'uil ti sjolique, oy c'usi pujul xvinaj ta q'uelel muyel ti sts'ayet no'ox jech c'u cha'al ti nene.

²³Ta stuq'uil yolon ti c'usi pujul xmuy batele, tuc' xlich'anoj xiq'uic ti c'usi cuxulique, ti snupojan sba ti sba ba xiq'uic ta jujun tale. Smacoj sbaic xchi'uquic ma' ti chib xiq'uique.

²⁴Xi s'elan laj ca'i ma' ti xvo'o'et no'ox ta spas xiq'uic c'alal ta xanavique: co'ol s'elan ya'yel jun nojemal uc'um xvo'o'et no'ox ti yech'omale, co'ol s'elan sc'opojel ti Buch'u scotol xu' yu'une, co'ol s'elan epal soldadoetic xnic no'ox yu'unic banomil c'alal ta xanavique. C'alal ta xvechan sbaique, ta syales ti xiq'uique.

²⁵Ta stuq'uil sjolic ti bu pujul xmuy batele, oy c'usi tsots xvo'o'et vinaj talel.

²⁶Ta yac'ol ti bu pujul xmuy batele, co'oltic s'elan laj quil jech c'u cha'al jun muc' ta chotlebal yax'elan jech c'u cha'al ti baxton yilele. Ti bu oy co'ol s'elan jun muc' ta chotlebal yilele, co'ol s'elan jun vinic chotol un.

²⁷Ti c'u s'elan c'otem ti liquem muyel ta xchucbenal laj quile, co'ol s'elan xojobal c'oc' ti sts'aylajet no'ox ta xc'ot ta c'anal taq'uine. Ti xyal batel ta yolon xchucbenal une, co'ol s'elan joyobtabil ta c'oc' ta xac' xojobal laj quil. Ta joyob ti bu oye, sac jaman no'ox ma' ti xojobal ta j'ech'ele,

²⁸co'ol s'elan vacnac'obal ti ta xvinaj ta toc mi ta xac' ti vo'e. Ja' jech laj yac' iluc yutsilal slequilal ti Dios ta jtojole. C'alal laj quile, jnupilan xa banomil laj jpatan jba ta lumtic.