Read Tzotzil Ezequiel 10 Bible Online

Ezequiel 10 - Tzotzil bible

Ezequiel 10

¹Ts'acal to un, ti ta toyol ti bu pujul xmuy batele, ta yac'ol sjolic ti c'usitic oy xiq'uique, laj quil ti co'ol s'elan jun chotlebal ti meltsanbil ta jun yax tsijan bax-tone.

²Ti Diose xi laj yalbe ti vinic ti buch'u slapoj ti saquil xela c'u'ile: “Ochan batel ti bu oy ti carosetique, ta yolon ti c'usitic oy xiq'uique. Lucho talel jopuc chacloman ac'al ti oy ta o'lol yu'unic ti c'usitic oy xiq'uique. Tanio batel ta sba ti jteclume.” Laj quil ti och batel ti vinique.

³Ti jech taj une, ta jech to yepal, laj quil ti c'usitic oy xiq'uique, oyic ta stuq'uil yolon ti yac'ol xocon sloq'ueb c'ac'al yu'un ti ch'ulnae. Tal jun pimil lumal toc ti noj vul ta yut yamaq'uil ochebal yu'un ti ch'ulnae.

⁴Jech ti yutsilal slequilal ti Diose, tots loq'uel ti oy to ox ta yac'ol sjolic ti c'usitic oy xiq'uique. Laj stam loq'uel ti ochebal sti' ti ch'ulnae. Noj ta toc ti ch'ulnae. Ja'uc ti yamaq'uile, xojobin no'ox ta yutsilal slequilal ti Diose.

⁵Ti yech'omal xiq'uic ti c'usitic oy xiq'uique, xvinaj c'alal to ta loq'ueltic yu'un ti amaq'ue, ti co'ol xa s'elan ya'yeluc ti ja' ta xc'opoj talel stuc ti Dios ti scotol xu' yu'une.

⁶Jech ti Dios une laj yalbe ti vinic ti buch'u slapoj ti saquil xela c'u'ile, ti ac'o stsac ti c'oc' ti oy ta sts'el ti carosetic ta o'lol yu'unic ti c'usitic oy xiq'uique. Ti vinique bat ti bu oy ti carosetique.

⁷Ti jun ti c'usi oy xiq'ue, laj xach' batel sc'ob ti bu oy ti c'oc' ti oy ta o'lol yu'unic ti yan c'usitic oy xiq'uique. Laj stam loq'uel tal. Laj yac'be jelavel ta sc'ob ti vinic ti buch'u slapoj ti saquil xela c'u'ile. C'alal jech laj stsaque, loc' talel.

⁸Jech ti c'usitic oy xiq'uique, co'ol s'elan jun c'obal vul ta loq'uel ta yolonic.

⁹Ti bu oyic ti c'usitic oy xiq'uique, laj quil ti oy chanib carosetique, jujun scarosal ti jujune. Ti carosetique sts'ayayet no'ox ta q'uelel jech c'u cha'al ti c'anal bax-tone.

¹⁰Ti carosetique, co'ol staylej, ti oy to yan tiq'uil ta yut ti jujune.

¹¹C'alal ta stam batel sbeic ti bu jotucal ta xbatic ta xchanjotal ti c'usitic oy xiq'uique, ma'uc to sc'an ta xjoybijic, tuc' ta stam ech'el ti bu sq'ueloj batele.

¹²Ti c'u s'elan oye, ti spatique, ti sc'obique, ti xiq'uique, xtixet no'ox xojobal ta sjunulic. Ja' jech xtixet no'ox xojobalic ec ti chanib carosetique.

¹³Yu'un laj ca'i xtoc ti “carro” sbi yu'unic ti carosetique.

¹⁴Jujunic ti c'usi oy xiq'uique, oy chantos ta q'uelel ti sat yelovique: Ti jun ta sliquebe, co'ol s'elan sat vacax yilel. Ti xchibale, co'ol s'elan sat vinic yilel. Ti yoxibale, co'ol s'elan sat león yilel. Ti xchanibale, co'ol s'elan sat xic yilel.

¹⁵Ti c'usitic oy xiq'uic taje, ja'ic ono'ox ti laj quil ti tey ta sts'el uc'um Quebare. Lic bac'uc ti c'usitic oy xiq'uique.

¹⁶Yu'un c'alal ta xliquic ta xanobale, ta xlic ta xanobal ti carosetique. C'alal ta xlic xlich'olan ti xiq'uic yo' ta xtoyic muyel ta banomile, jech ti carosetique, nabal ta xbatic ec.

¹⁷Yu'un c'alal ta xlic spajes sbaic ta xanobale, ta xpajic ec ti carosetique. Jech ti c'alal ta xliquic batel ta xanobale, ta xanav ec ti carosetique. Yu'un ti carosetique yich'ojbeic xcuxlejal ti c'usitic oy xiq'uique.

¹⁸Va'i un, ti yutsilal slequilal ti Diose, tots loq'uel ti tey ta ch'ulnae. C'ot ta stuq'uil sjolic ti c'usitic oy xiq'uique.

¹⁹Taje, lic xlich'olan ti xiq'uique. Lic toyicuc muyel ta banomil. Laj quil ti laj xchech sba muyel ti carosetic ti oy ta jujujot xoconique, xchi'uc ti c'u s'elan c'otic ta pajel tey ta ti'na ti oy ta stuq'uil sloq'ueb c'ac'al yu'un xch'ulna ti Diose. Jech ti yutsilal slequilal ti Dios yu'un ti Israele, tey oy ta stojolic ti c'usitic oy xiq'uique.

²⁰Ti c'usitic oy xiq'uique, ja'ic ono'ox ti laj quil ta ba'yel ti oyic ta stuq'uil yolon ti Dios yu'un ti Israele, ti laj quil ta sts'el ti uc'um Quebare. Jech o xal un, ti c'usi laj quile, mu yanuc.

²¹Ti jujunique, laj quil ti oy chantos (4) ta q'uelel ti satique, xchi'uc chanib (4) ti xiq'uique. Ti ta yolon ti xiq'uique, ta xvinaj ti tey oy c'obaletic.

²²Ti sat yelovic ti c'usitic oy xiq'uique, jech no'ox s'elan jech c'u cha'al laj quil tey ta sts'el uc'um Quebare. Ti jujunique tuc' stamojic batel ti bu sq'uelojique.