Read Tzotzil Ezequiel 11 Bible Online

Ezequiel 11 - Tzotzil bible

Ezequiel 11

¹Ti smuc'ul stsatsal ti Diose laj xchechun batel. Laj yic'un batel c'alal to ta ochebal sti' xch'ulna Dios ti oy ta stuq'uil sloq'ueb c'ac'ale. Va'i un, ti ta ti'nae, laj quil vo'ob xcha'vinic (25) ta vo' viniquetic. Ti ta scotolic taje, laj jta ta ojtiquinel ti Jaazanías ti ja' xnich'on ti Azure, xchi'uc ti Pelatías ti ja' xnich'on ti Benaiase, ti ja'ic banquilaletic yu'un ti jteclume.

²Ti Diose xi laj yalbune: “Ti viniquetic le'e, ja'ic ti j'ac'vanejetic ta milele, xchi'uc ti yabtelinojic ta snopel ti c'uisitic chopol ta spasic li' ta jteclume.

³Xi ta xalique: ‘Mu ta sjaliluc tsutsem cu'untic ta xcha'meltsanel ti naetique. Avie, colemotic xa xcaltic. Ma'uc xa jc'oplaltic jech c'u cha'al ta xta'aj ti beq'uet ta bine.’

⁴Jech o xal un, va'ano aba ta jventa ti ta xac'opoj ta stojolique.”

⁵Ti xcuxlejal ti Diose vul ta jtojol, ti laj yalbun mantal ti xi ac'o cale: “Ja' jech ta xal ti Dios jech c'u cha'al li'e: ‘Ja' jech yepal stsoboj sba avu'unic ta xquil ti c'usi ta xanopique, israeletic. Yu'un ti snopbenal avu'unique, xcojtiquin lec.

⁶Yu'un ti vo'oxuque ep xa lamilvanic ti li' ta jteclume. Busul no'ox avu'unic ti animaetic ti ta bebetique.

⁷“ ‘Jech o xal ti vu'un Diosune xi ta xcalboxuc ta jbel sc'oplale: Ti jteclum Jerusalene, co'ol s'elan jbej bin. Ma'uc ta xac'otic ta beq'uet un, ja' c'ot ta beq'uet sbec'talic ti buch'utic laj amilique. Ja'uc ti vo'oxuque, ta xajtenoxuc loq'uel ta Jerusalén ti co'ol s'elan jbej bine.

⁸¿Mi ta xaxi'ic yu'un ya'yel ti letoe? Le'e, mu ono'ox stselbuj ti ta jtac talel ti leto ta atojolique. Yu'un jbel xic'opoj ti vu'un Ajvalilune.

⁹Yu'un xi s'elan ta jchapan ac'oplalic ti j'ech'el mu xacolique: Ta xajtenoxuc loq'uel ti li' ta jteclume. Ta xcac'oxuc ech'el ta yoc ta sc'ob ti jyanlumetique.

¹⁰Espada xava'i xacham xalajic. Yu'un vu'un ta xcac' avocolic acotolic ti bu c'alal smacoj ti jteclum Israele. Ja' to jech ta xana'ic ti vu'un Ajvalilune.

¹¹Ma'uc ta xc'ot ta apojobbailic ma' ti jteclume jech c'u cha'al ti beq'uet ti ch'amal ta sbinale. Ta xcac' vocol ti bu c'alal smacoj ti jteclum Israele.

¹²Ja' to jech ta xana'ic ti vu'un Ajvalilune. Yu'un mi ja'uc jutebuc laj avabtelanic ta spasel ti c'usi caloje. Mi ja'uc laj apasic ti jmantaltaque. Le'e, laj avac'beic yipal ta xchanel jech c'u cha'al ta spasic ti muc'tiquil jteclum ti joyol ta apat ta axoconique.’ ”

¹³C'alal jech yacal to ta xic'opoj ta sventa Dios ta stojolique, ti Pelatías xnich'on ti Benaiase, xnijij yalel un, toj chamel c'ot. Ti vu'une jnupilan xa banomil laj jquejan jba, ti xi tsots li'avane: “Teque' no'ox xch'a un, Cajval. ¿Mi ta jbel xa avo'nton ta xatsutses ti vi xa no'ox yepal oy ti Israele?”

¹⁴Ti Diose xi laj yal ti laj sc'oponun talele:

¹⁵“Ti jnaclejetic ti nacalic ta Jerusalene, xi ta xalbeic sc'oplal ti israeletic ti ja' avinquileltaque: ‘Le'e, toj nom batemic ta stojol ti Diose. Ja'uc ti vo'otique, laj yac'botic ti muc' ta jteclume, ti com ta cu'untic yu'une.’

¹⁶“Ja' yu'un un, xi xavalbe ya'iique: ‘Xi ta xal ti Diose: Ti laj jbeq'uic loq'uele, ti tan puc batic ta jujun lumetic ti oy ta jujun muc' ta lum ti mu xojtiquinique, xi no'ox yuni jalile. Avi tana une, vu'un jtuc ta jva'an jba ta stojolic ti bu tanijemic batele.’

¹⁷“Albo ya'i xtoc: ‘Xi ta xal ti Dios jech c'u cha'al li'e: Vu'un ta xquic' talel ta muc'tiquil lum ti bu tan puc batic cu'une. Yu'un ta jtsobic talel yo' ta xcac'beic ti lum Israele.

¹⁸Jech ti stuquique ta sutic talel ta slumal stuquic. Jech xtoc un, tey ta xlaj sc'oplal yu'unic ti c'usitic mu xtun ti yac'ojbeic to ox yipal ta spasele, xchi'uc ti c'usi mu xtun ta q'uelel ti oy ta stojolique.

¹⁹Vu'un ta jelbe ti yo'ntonic ti toj yij jech c'u cha'al ti tone. Ta xcac'be ach' snopbenal yu'unic.

²⁰Ja' yu'un unbi, ja' to jech jun yo'ntonic ta xcuxiic ta spasel ti jmantaltaque, xchi'uc ti c'usitic nopbil cu'une. Jech ti stuquique, ja' xa bats'i calab jnich'nab. Jech ti vu'une, ja' xa Diosun yu'unic.

²¹Yan ti buch'utic yac'ojbeic yipal ta spasel ti c'usitic chopole, xchi'uc ti c'usitic mu lecuc ta q'uelele, ta me xquich'be ye sti' ti c'u s'elan laj spasique. Jbel me xcal ti vu'un Ajvalilune.’ ”

²²C'alal lic vilicuc batel ti c'usitic oy xiq'uique, jech ti carosetique nabal batic ec. Ja' yu'un un, ti yutsilal slequilal ti Dios yu'un ti Israel ti tey to ox oy ta stuq'uil sjolic ti c'usitic oy xiq'uique,

²³tots batel ec. Laj yicta comel ti jteclume. C'ot ta jun vits ti oy ta stuq'uil yelov sloq'ueb c'ac'al yu'un ti jteclume.

²⁴Laj taj une, ti smuc'ul stsatsal ti Diose, laj sva'anun, lisut batel ta Babilonia yu'un ti bu oy ti jlom ti bec'bil loq'uic ta slumalique. Ja' jech c'ot ta pasel ti laj sjambun jba jsat ti xcuxlejal Dios ti c'usi laj yac'bun quile. Ts'acal to un, sac ch'ay batel ti c'usi laj quile.

²⁵Scotol ti c'usitic laj yac'bun quil ti Diose, xchapet lic calbeic ya'iic ti buch'utic bec'bilic loq'uele.