Read Tzotzil Ezequiel 13 Bible Online

Ezequiel 13 - Tzotzil bible

Ezequiel 13

¹Ti Diose xi laj yalbun ti laj sc'oponun talele:

²“C'opojan ta jventa ta scontrainel ti j'alc'opetic yu'un ti Israele. Yu'un ti j'alc'opetic taje, naca yesomal sjolic ti c'usi ta xalique. Albo ya'iic ti ta xa'iic ti c'usi ta xal ti Diose.

³“Laj xa c'op un, mu xa ono'ox xcolic ya'i ti jsoquesvanej j'alc'opetique, ti ja' no'ox yac'ojbeic yipal ta spasel ti c'usi s'esomaj talel ta sjolique, ti jeche' no'ox ta sjutic ti oy xa c'usi ta x'ac'bat yilic ti yalojique.

⁴Ti j'alc'opetic avu'une, Israel, ja' xa xchi'ilic jech c'u cha'al ti vetetic ti ja' xa snainojic ti lomem naetique.

⁵Yu'un mu'yuc c'usi spasojic jutebuc ta spojel ti Israele yo' jech xu' yu'unic ti tsalvanej ta leto c'alal ta xvul ta loq'uel ti c'usi ora chapanbil yu'un ti Diose.

⁶Yu'un naca yesomal jolil ti jam ba satile. Naca jutbil ti c'usi ta scaj'alilanique. Yu'un ti ta xalic ti ja' xa la va'anbil cu'un ti c'usi ta xalique, bu xata un, mi jutebuc ti ja' tacbilic cu'une. Batem xa yo'ntonic ta smalael ti ta xc'ot ta pasel ti c'usi ta xalique.

⁷Ti ta xavalic ti jam aba asatique, naca yesomal jolil ta j'ech'el. Ti c'usi ta xacaj'alilanique, naca jutbil! Yu'un ta xavalic ti ta xac'opojic ta jventae ti c'alal mu'yuc c'usi calojboxuc jutebuque.

⁸“Jech o xal un, xichi ta xcal ti vu'un Diosune: Naca yesomal jolil ti c'usi ta xavalique. Naca jutbil scotol ti ta xavalic ti jam xa ti aba asatique. Jech ti vu'une, jbel sc'oplal, mu lecuc xaquilic. Ti vu'un Ajvalilune, mu me lo'iluc no'ox ta xcal.

⁹Yu'un ta ono'ox jyales coc jc'ob ta stsitselic ti j'alc'opetic ti ta xalic ti jam sba satic ti oy c'usi laj yilic ti yalojique, ti naca jutbil ti c'usi ta scaj'aq'uic ta na'ele. Mu xu' scap sbaic ta tsoblej xchi'uc ti jteclumal ti ja'ic Israele. Mi ja'uc xu' tey jmoj ta x'och ta vun sbiic xchi'uc ti israeletique. Mi ja'uc xu' ta x'ochic ta naclej ta yosilal ti Israel xtoque. Va'i unbi, ja' to jech ta xvul ta avo'ntonic ti vu'un Ajvalilune.

¹⁰“Jech unbi, ja'ic ti laj slo'labeicun ti jteclumal ti laj yalic ti lec ta xbat yu'unic scotol ti c'usitic ta spasique, ti ja' yijil lo'lael ta j'ech'ele. Yu'un ja' xa xchi'ilic ti buch'u ti jech no'ox ta sjovil quican muyel ti pac'bale, ti ta xjaxtani leque.

¹¹Ja' yu'un un, albo ya'i ti buch'u laj xjaxtani ti pac'bale, ti mu ta vocoluc ta xlome. Yu'un ti c'alal ta xtal ti tsots vo'e, xchi'uc ti co'ol s'elan ton xlamet no'ox ta xyal talel ti bote, xchi'uc ti xvo'o'et no'ox ti xi'bal sba iq'ue,

¹²ja' yu'un un, ti pac'bale ta xjin yalel. Xi me ta xlic sjaq'uic xtoc une: ‘¿Mi jeche' no'ox ti lec xa jaxtanibil yu'unic yilel une?’

¹³“Jech o xal un, xichi ta xcal ti vu'un Diosune: Ta sc'ac'al xa co'nton, xvo'o'et no'ox ta xcac' taluc ti ic' xchi'uc ti ya'lele. Ta soquemal jol ta xcac' taluc ti xlomet no'ox ti vo' ta j'ech'ele. Co'ol s'elan tonetic ta xcac' taluc ti bot xtoque yo' jech ta jtsutses scotolic ta j'ech'el ta soquemal jol.

¹⁴Ta jines ti pac'bal taje ti laj ajaxtaniique. Busul ta lum ta xcom cu'un, ti stuc xa no'ox yavil t'ajal ta xcome. Jech ono'ox un, mu xch'ay ta be ti ta xjin yalel ti pac'bale. Ja' yu'un un, net'bil ta xachamic yu'un ti slomemale. Ja' to ta xana'ic un ti vu'un Ajvalilune.

¹⁵“Ta jloq'ues scotol ti sc'ac'al co'nton ta stojol ti pac'bal taje, xchi'uc ta stojol ti buch'u laj xjaxtanie. Va'i un, xi ta xlic yalic ti jnaclejetique: ‘Mu'yuc c'usi x'ayan com yu'un ti pac'bale, mi ja'uc ti buch'utic laj xjaxtaniique.

¹⁶Yu'un ti j'alc'opetic ta jteclum Israele, naca lo'lael scotol ti laj yalic ti jam satique, ti laj scaj'alic ti mu'yuc c'usi chopol ta xc'ot ta stojol ti jteclum Jerusalene, ti c'alal mu jechuc ti va'i s'elan ta xalique.’ Ti vu'un Ajvalilune, mu me lo'iluc no'ox ta xcal.

¹⁷“Avi tana une, yojtot, va'ano aba ta scontrainel ti antsetic yu'un ti alumale, ja' ti buch'utic ti co'ol xa s'elan ti ja' va'anbilic cu'un ti ta xc'opojic ti c'alal ja' no'ox yesomal sjol stuquic ti c'usi ta xalique.

¹⁸Xi xavalbeic ya'iic une: ‘Xi s'elan ta xal ti Diose: Teque'oxuc xa no'ox xch'a ta xquil un, ti xaloc' xa'ochic no'ox batel ta sna ti jnaclejetique, ti xats'isanic xa uni poq'uetic ti oy slo'laob yo' jech scotol banomil utsuc ta xchuc ta sc'obique, xchi'uc xameltsanic xa uni volob jolil yo' jech scotolic ta xchuc ta sjolic. ¿Mi ta xanopic xana' ta xac' ti cuxlejale xchi'uc ta smilel jteclumal ti c'usi xtal ta ajolic ta spasele?

¹⁹Ti vo'oxuque, ta jop cha'jop no'ox jchop o ta trigo, xchi'uc ta jxoxel ta jcha'xoxel no'ox ve'lil, ta xasoquesbeicun jc'oplal ta sba ta sat ti jteclumale. Muts'ul sba sat ta xavaq'uic ta milel ti buch'utic mu'yuc to loq'uem sc'oplal ta xchame. Yan ti buch'u loq'uem xa sc'oplal ta xchame, lec xava'iic ti cuxule. Ja' jech ta xlaj ta lo'lael avu'unic ti jteclumal ti buch'u ta x'och ta yo'ntonic ti jutbil c'opetique.’

²⁰“Ja' yu'un un, xichi ta xcal ti vu'un Diosune: Ta xcal ta jamal ti jcontra ta xquil ti uni ts'isbil poq'uetic ti oy slo'laob ta xavalique, ti syacobil avu'unic ti jnaclejetic jech c'u cha'al ta xich' yaquel ti mutetique. Vu'un ta jpoj loq'uel yo' mu x'och ta avoc ta ac'obic ti buch'utic jech ta xapasbeic taje. Ta staic un ti mu xa c'usi sna'ic ti colem ta xloq'uic batel cu'une.

²¹Ta jpoj loq'uel ta atojolic ti jteclumal ti jech u'ninbil xa avu'unique. Ta jip loq'uel ti smac sjolic avac'ojbeique. Ta xlic pajuc un ti u'ninbil avu'unique. Ta xlic ana'ic un ti vu'un Ajvalilune.

²²“Ta scoj ajutbilal c'opic, tsic' xa yo'ntonic ti buch'utic xa'ibeic xchiquinale c'alal mu jechuc oy ta co'nton ti vu'une. Ti buch'utic mu'yuc xch'ulel xa'i sbaique, laj avac'beic sna' ti yac'beicuc yipal ta spasel ti chopole yo' mu staic ti xcuxlejalique.

²³Jech o xal un, li' ta xlaj sc'oplal avu'unic ta yalel ti jam aba asatique, ti oy c'usi ta xacaj'alic ti naca jutbile. Ta jva'an jba ta spojelic ti jteclumal ti uninbil avu'unique. Ta xvul ta avo'ntonic unbi ti vu'un Ajvalilune.”