Read Tzotzil Ezequiel 14 Bible Online

Ezequiel 14 - Tzotzil bible

Ezequiel 14

¹Yepal no'ox moletic yu'un Israel talic ta jtojol yo' ta sjac' sbaic c'u s'elan oyic ta stojol ti Diose.

²Va'i un, ti Diose xi laj yal ti laj sc'oponun talele:

³“Ti viniquetic le'e, ta j'ech'el bat xa yo'ntonic ta snijanel sbaic ta yich'el ta muc' ti meltsanbil loc'obbailetique. Laj xa sta smulic yu'un ti yac'oj satic ta stojolique. ¿Mi yu'un lec xa xca'i yalojic ti ta sjac' sbaic ta jtojole?

⁴“Chi'ino ta lo'il ti xi xavalbe ya'iique: ‘Ja' jech ta xal ti Dios jech c'u cha'al li'e: Scotol Israel ti buch'utic bat xa yo'ntonic ta snijanel xchimanel sbaic ta stojol ti loc'obbailetique, ti ta sta smulic yu'un ti yac'oj satic ta stojole, ti ta jech to yepal ta sjac' sbaic ta stojol ti j'alc'ope, ta jtac'be sutel un jech c'u cha'al loc' xa ta sa'el yu'unic ta yepajesel ti loc'obbailetic yu'unique.

⁵Vu'un ta jtijbe yo'nton scotol ti israeletic ti laj xa xch'ac sbaic ta jtojol ta scoj ti loc'obbailetic yu'unique.

⁶“Ja' yu'un un, xi xavalbe ya'iic ti israeletique: ‘Ja' jech ta xal ti Dios jech c'u cha'al li'e: Sutanic talel ta jtojol. Jipic tenic comel ti loc'obbailetic avu'unique. Ictaic scotol ti c'usitic toj chopol ta q'uelele.’

⁷“Ja' yu'un un, mi ja' jun israel, mi jun jyanlum ti nacal ta jteclum Israele, mi ta xlic xch'ac sba ta jtojole, mi ta j'ech'el ta snijan xchiman sba ta yich'el ta muc' ti loc'obbailetic yu'une, ti batem xa sat ti bu ta sta smul xchi'uque, ja' jech xtoc un, mi ts'acal to ta xtal ta stojol jun j'alc'op yo' ta sjac' sba ta jtojol ti c'u s'elane, le'e, ac'o xa no'ox smala ya'i ti xi ta jpas ta stojole:

⁸Ta jtsac ta c'op ya'iic ti vinic taje. Ta jtsits ya'iic ti na'bil ta xcom ti mu xlaj ta alel yu'unique. Ta jten loq'uel ta stojol ti jteclumale. Va'i unbi, ta xana'ic ti vu'un Ajvalilune.

⁹“Ti mi oy jun j'alc'op ti mu xc'ot ta pasel ti c'usi ta xale, ti vu'un Diosune, yu'un me laj jlo'la ti j'alc'op taje yo' jech ta jyales ti coc jc'ob ta stsitsele. Yu'un me ta jten loq'uel ta stojol Israel ti ja' jteclumale.

¹⁰Ti c'u s'elan laj yich' ti vinic ti buch'u ta sjac' sbae, ja' no'ox jech ta xich' tsitsel ec ti j'alc'op ta scoj ti smule.

¹¹Yu'un ja' to jech mu xch'ac sbaic yan velta ta jtojol ti Israel ti ja' jteclumale. Ta j'ech'el mu xa xba scapin sbaic ta xchi'inel ti jmilvanejetic taje. Jech ti stuquique, ja'ic xa bats'i jteclumal. Jech ti vu'un eque lic'ot xa ta Dios yu'unic. Ti vu'un Ajvalilune, mu me lo'iluc no'ox ta xcal.”

¹²Ti Diose xi laj yalbun ti laj sc'oponun talele:

¹³“Mi ta sa' smul ta jtojol ti jun muc' ta lume, mi yan ti yo'nton ta xquile, ta jyales ti coc jc'ob ta stsitsele, ta ic' ta maj no'ox ta xbat cu'un ti c'usitic ta stun ta slajesique. Yu'un ta jtac talel vi'nal ta stojolic. Ta xcham xlajic cu'un ti jnaclejetique xchi'uc ti chon bolometique.

¹⁴Ti nacalicuc ti Noee, ti Daniele, ti Job ti ta jteclum taje, c'ajomal no'ox ta xcolic ti oxib taje, ti oy slequil yutsilique. Ti vu'un Ajvalilune, mu me lo'iluc no'ox ta xcal.

¹⁵“Mi ta jc'an ta jtac batel jti'oval chon bolometic ta jun muc' ta lume, ti ta xmilatic ti jnaclejetic teye, ti ta xlic pasuc ta sts'ijlajan sbajtical banomile, ti mu'yuc buch'u junucal ta x'ech' ta scoj xi'elal ti jti'oval chon bolometique,

¹⁶ti nacalicuc ti oxib viniquetic taje, mu'yuc c'usi xut ta spojic ti yalab xnich'nabique. C'ajomal no'ox ta xcolic ti stuquique. Jech ti muc' ta lum taje, ta xjoybij ta sts'ijlajan sbajtical banomil. Ti vu'un Ajvalilune, j'ech'el ta jva'an jba.

¹⁷“Mi ta jc'an ta xcac' taluc leto ta stojol ti muc' ta lum taje, mi ta xcal mantal ti ac'o chamuc ti jnaclejetique xchi'uc ti chon bolometique,

¹⁸ti nacalicuc ec ti oxib viniquetic taje, mu'yuc c'usi xut ta spojic ti yalab xnich'nabique. C'ajomal no'ox ta xcol ti stuquique. Ti vu'un Ajvalilune, j'ech'el ta jva'an jba.

¹⁹“Mi ta jc'an ta jtac talel chameletic ta stojol ti muc' ta lum taje, mi ta sti'emal jol ta xcac' vuluc ta bajel ti chamel lajele, mi ta xcac' chamuc ti jnaclejetique xchi'uc ti chon bolometique,

²⁰ti nacalicuc ti Noee, ti Daniele, ti Jobe, mu'yuc c'usi xut ta spojic ti yalab xnich'nabique. C'ajomal no'ox stuc ta xcolic ti oy slequil yutsilique. Ti vu'un Ajvalilune, j'ech'el ta jva'an jba.

²¹“Ti vu'un Diosune xichi ta xcale: Ja' x'ech' to ti xi s'elan ta xc'ot ta pasel ti ta jtac talel ti chantos tsots tsitsel ta stojol ti jteclum Jerusalene: ti letovajele, ti tsots vi'nale, ti ta xvul ta loq'uel ti jti'oval chon bolometique, ti ta xvul ta loq'uel ti ep ta tos chameletic ta smilel ti jnaclejetique xchi'uc ti chon bolometique.

²²Ja' yu'un un, jun chib xa no'ox ti cuxul ta xcomique, ti xu' to ta xloq'uic batel xchi'uc ti squeremique, ti stsebique. C'alal ta xc'ot ta atojolique, jech ti vo'oxuque ta xlic avilic ti c'u s'elan laj ech'icuc talel xchi'uc ti c'usitic laj spasique. Jech ti stuquique, xlaet to ta xa'iic ti laj cac' taluc tsitsel ta stojol ti Jerusalene.

²³Yu'un xlaet to ta xava'iic ti c'alal ta xavilic ti c'u s'elan stamojic batele, ti c'u s'elan laj spasique. Va'i un, ja' to tey ta xvul ta avo'ntonic ti mu ta jeche'uc no'ox c'ot ta pasel cu'un scotol ti c'u s'elan laj jpas ta stojol ti Jerusalene. Ti vu'un Ajvalilune, mu me lo'iluc no'ox ta xcal.”