Read Tzotzil Ezequiel 18 Bible Online

Ezequiel 18 - Tzotzil bible

Ezequiel 18

¹Xi laj yalbun ti Dios ti laj sc'oponun talele:

²“¿C'u cha'al ya'yel un mu xlaj ta alel yu'unic ta jteclum Israel ti oy xi x'ale ti c'ope: ‘Ti totil me'iletique, naca pajal uva ta slajesic, ta stsic' ye yu'unic ti yalab xnich'nabique?’

³“Ti Ajvalilune ta jva'an jba ta yalel ti j'ech'el ta xtub sc'oplal ta yalilanel ta lum Israel ti va'i s'elan ti lo'il taje.

⁴Scotol jnaclej oy ta coc ta jc'ob jech c'u cha'al ti totiletique, ti nich'nabiletique. Ti buch'u ta sa' ti smule ta xcham.

⁵“Xi s'elan ta spas ma' ti buch'u oy stuq'uil sjol yo'ntone, naca lec, naca oy stuq'uil:

⁶Mu xcapetuc xa ta spasbel stoyel xi'el loc'obbailetic ti oy ta jujun stseleje. Mu stsinanojuc xa yo'nton ta stojol uni diosetic yu'un ti Israele. Mu spojbe yajnil ti xchi'ile. Mu xchi'in yajnil c'alal yorail ta xil ti ue.

⁷Mi junuc oy buch'u ta xilbe svocol. Ti c'usi yich'oj ta rental ti buch'u oy yil yu'une, ta sutesbe. Mi junuc oy buch'u ta xelc'an. Xt'olbij ta yac'bel sve'el ti buch'u ta xa'i vi'nale. Ta sc'u'iltas ti buch'u ch'abal yu'une.

⁸Ma'uc ech'em sjol ta xac' ta ch'om ti staq'uine, ti sujvan xa xchi'uc ti sjole. Mi junuc ta xilbe svocol. Ti buch'u ta stsac sbaic ta c'ope, oy stuq'uilal ta xchapan.

⁹Yu'un ja' jech ta spas jech c'u cha'al ta xal ti oy c'usi jbel tsots albile, ti jmantaltaque. Ti vinic taje, ti tuc' sjol yo'nton une, ta xcuxi. Ti vu'un Ajvalilune, mu lo'iluc no'ox ta xcal.

¹⁰“Xcaltic xtoc un, oy jun xnich'on ti vinic taj une, mu x'ac'van ta venta, jmilvanej xa'i sba. C'usiuc no'ox sbol pasolan jtosuc taje

¹¹ti mu jechuc laj spas ti stote. Xcapet ta compiral ta sventa stoyel xi'el ti loc'obbailetic ti oy ta c'opojebaletic ta jujun stseleje. Ta spojbe yajnil ti xchi'ile.

¹²Ta xilbe svocol ti me'un mu'nate xchi'uc ti buch'u ch'abal c'usi x'ayan yu'une. Ta xelc'an ti yane. Mu sutes ti c'usi sc'anojbe comel ta rental ti buch'u oy yile. Stsinanoj yo'nton ta stojol ti diosetique. Ta spas ti c'usi mu lecuc ta xquile.

¹³Ti xi s'elan ta spase, ti ech'em sjol ta xac' ta ch'om ti staq'uine, ti ta sujvan xa xchi'uc ti sjole, laj c'op ma' ti ta xcuxi ti vinic taje, yu'un laj xa spas scotol c'usi mu lecuc ta xquile, j'ech'el ta xcham. Laj yac'be sba svocol stuc, xvalc'uj sutbij ti lum ach'el yu'une.

¹⁴“Xcaltic xtoc un, oy xnich'on ti vinic taje, ta xil scotol ti muliletic ta spasolan ti stote. Mu spas c'u s'elan ta spas ti stote.

¹⁵Mu xcapetuc ta compiral bu xyaquet q'uin ta jujun stselej sventa yich'el ta muc' ti loc'obbailetique. Mu stsinanojuc yo'nton ta stojol diosetic yu'un ti Israele. Mu spojbe yajnil ti xchi'ile.

¹⁶Mu junuc ta xilbe svocol. Mu stsatsal-c'anbe rental ti buch'u ta xch'amunaje. Mu'yuc junuc oy c'usi ta xelc'anbe. Xt'olbij no'ox xchi'uc sve'el ta stojol ti buch'u ta xvi'naje. Ta sc'u'iltas ti buch'u ch'abal yu'une.

¹⁷J'ech'el mu xilbe svocol junuc. Ma'uc ech'em ti sjol ta xac' ta ch'om ti taq'uine, ti sujvan xchi'uc ti sjole. Ta xc'ot ta pasel yu'un ti oy c'usi jbel albil cu'une. Ta spas jech c'u cha'al ta xal ti jmantale: Ti vinic taje mu xcham ta scoj smul scolo' ti stote. Ta xil ti xch'iel sc'opojel une.

¹⁸“Ti ja' jun j'ilbajinvanej ti stote, ti ja' jun j'eleq'ue, ti laj yilbe svocol ti steclumale, ta j'ech'el ta xcham o ta tsitsel yu'un ti smule.

¹⁹“Xachi ta xajac'be abaic une: ‘¿C'u cha'al ti nich'onile, mu x'abolaj ta stojbel smul ti stote?’ Yu'un xi s'elan laj spas ti nich'onile: Laj spas ti c'usi leque, ti c'usi oy stuq'uile. Laj yabtelan, c'ot ta pasel yu'un scotol jech c'u cha'al ta xal ti oy c'usi jbel albile. Jech o xal j'ech'el ta xch'i xc'opoj un.

²⁰Ti buch'u ta sa' ti smule ta xcham. Mu stojbe smul stot ti nich'onile. Mi ja'uc ti totil ta stojbe smul ti xnich'one. Ta matanal ta sta lequilal ti buch'u oy stuq'uil slequile. Ta sta tsitsel ta scoj xchopolal ti buch'u mu'yuc xch'ulel xa'i sbae.

²¹“Mi ta xlic yicta sba ta sa'ilan smul ti c'usitic chopol laj xa spas scotol ti buch'u mu'yuc xch'ulel xa'i sbae, ta xlic c'otuc ta pasel yu'un scotol ti c'usitic oy jbel tsots albile, ta spasel ti c'usi oy slequil yutsile, j'ech'el ta xil ti xch'iel sc'opojele. Mu xac' o sjol sbaquil xchi'uc.

²²J'ech'el mu jvules ta jol scotol ti c'usitic chopol xa laj spase. Ta xch'i xc'opoj ta sventa ti laj spas ti c'usi oy stuq'uil yutsile.

²³Mu jc'an ta xcham ti buch'u mu'yuc xch'ulel xa'i sbae. Jeluc ti snopbenal yu'une yo' jech ta xch'i xc'opoj un. Ti vu'un Ajvalilune, mu lo'iluc no'ox ta xcal.

²⁴“Mi ta xlic stam ta spasel chopol ti buch'u lec to ox ti c'usi ta spase, scotol mu albajuc xchopolal ta spas jech c'u cha'al laj spas ti buch'u mu'yuc xch'ulel xa'i sbae, ¿mi ta xanopic xana' q'uelbil no'ox ta xch'i xc'opoj? J'ech'el xi s'elan mu jvules ta jol ma' ti oy c'usi lec laj spas une: Ta xcham ta scoj smul ti xcuchoj c'ot ti laj syanijes ti sjol yo'ntone.

²⁵“Ta xavalic un ti mu'yuc stuq'uil ti c'u s'elan ta jpase. A'yio ava'iic li' une, Israel, ¿mi ta xanopic xana' ti mu'yuc stuq'uil c'u s'elan ta jpase? ¿Mi mu van ja'uc vo'oxuc xana' atamojic ta spasel ti c'usi chopole?

²⁶Mi laj yicta sba ta spasel c'usi lec ti buch'u oy stuq'uil slequile, ti lic stam ta spasel ti c'usi chopole, ta xcham ta scoj ti c'usi mu'yuc stuq'uil ta spase.

²⁷Ti le' une, mi ta xlic yicta sba ta spasel chopol ti buch'u mu'yuc xch'ulel xa'i sbae, ti lic stam ta spasel ti c'usi oy stuq'uil yutsile, ta spoj ti xch'iel sc'opojele.

²⁸Lic jamuc sat ta yilel ti c'usi chopol laj xa spase, xchi'uc yicta sba ta spasel scotol ti c'usi mu stac' albel sc'oplal laj spase, ta xil ti xch'iel sc'opojele. Mu xac' sjol sbaquil.

²⁹Ti lum Israel une ta xalic ti mu'yuc stuq'uil c'u s'elan ta jpase. ¿Mi j'ech'el mu'yuc stuq'uil ti c'u s'elan ta jpase? ¿Mi mu ja'uc van ti lum Israel mu'yuc stuq'uil ti c'u s'elan ta spase?

³⁰“Israeletic, vu'un ta jchapanoxuc ta jujun tal ti c'u s'elan laj xa apasique. Ti vu'un Ajvalilune, mu lo'iluc no'ox ta xcal. Lum Israel, j'ech'eluc jipic tenic comel scotol ti c'usitic mu stac' albel sc'oplal ti chopol xquil laj apasic ta jtojole.

³¹Joybijuc ta ach' ti xcuxlejal ajol avo'ntonique. Jipic tenic comel scotol ti c'usitic mu stac' albel sc'oplal laj xa apasic ta jtojole. ¿C'u cha'al ta xavac' o ajol abaquil yu'un

³²ti mu'yuc ta co'nton ta xcham junuque? Ictaic ta spasel ti c'usi mu stac' albel sc'oplal ta xapasique, ta xach'i xac'opojic unbi. Ti vu'un Ajvalilune, mu lo'iluc no'ox ta xcal.