Read Tzotzil Ezequiel 20 Bible Online

Ezequiel 20 - Tzotzil bible

Ezequiel 20

¹Ta slajunebal (10) c'ac'al yu'un ti yo'obal (5) ue, ti ta yucubal (7) xa jabile, tal sjac' sba ta stojol Dios jun chib moletic yu'un Israel ti c'ot chotliicuc ta jts'ele.

²Xi laj yalbun ti Dios ti laj sc'oponun talele:

³“Yojtot, chi'ino ta lo'il ya'i ti moletic yu'un ti Israele. Xi ta xal ti Diose, xavut ya'i: ‘¿Mi tal to la ajac' abaic ta jtojol? J'ech'el ta jva'an jba ta yalel ava'iic ti mu jq'uelojuc jba ta xajac' abaic ta jtojol ti vu'un Diosune.’

⁴“Ti xcaltique, baino ta svinajesbel ya'iic ti smulique, Yojtot, vinajesbo ya'iic ta sna'el ti mu stac' alel c'usitic xchopolal laj spasic ti stot sme'ic laj ech'icuque.

⁵Xi s'elan ta xal ti Diose, xavut ya'i: ‘C'alal laj jt'uj ti Israele, laj cal jtrate ta stojol ti snitilultaque. Laj cac' jba iluc ta stojolic ti oyic ta Egiptoe, ti j'ech'el xi laj jva'an jba ta yalele: Vu'unun ma' ti Ajvalil Dios avu'unique.

⁶Ti jech c'ac'al taje, laj jva'an jba ta yalbel ya'iic ti ta jloq'uesic balel ta Egiptoe, ta yiq'uelic ech'el ta jun muc' ta lum ti laj jsa'ilan bu co'ol s'elan vo' ta xbein ti chu' vacaxe, ti ajapome, ¡ti stuc xa no'ox muc' ta lum c'upil sba ta scotole!

⁷Ti vu'un Ajvalil Diosun yu'unique, scotolic laj calbeic ya'iic ti xch'acuc sbaic ta stojol ti loc'obbail diosetic yu'un ti Egiptoe, ti mu soques sbaic xchi'uc ta yich'el ta muq'ue.

⁸‘Lic scontrainicun. Mi jutebuc laj xchiquintaic ti jc'op une. Mu'yuc laj yictaic ti soquesvanej diosetic yu'unique. Mi ja'uc laj sjip ta yo'ntonic ti loc'obbail diosetic yu'un ti lum Egiptoe. Laj jnop un ta jbusan ti sc'ac'al co'nton ta stojolic ta stsitselic ya'iic ta Egiptoe, ja' to ti c'uxi x'ech' ti sc'ac'al co'ntone.

⁹Le' une, ja' laj jpas ti mu jsoques ti jc'oplal ta sba ta sat ti muc'tiquil lumetic bu capal ta naclej xchi'uque, yu'un ta sba ta satic ti muc'tiquil lumetic taje, laj cac' jba iluc ta stojolic, laj calbeic ya'iic ti ta jloq'uesic ech'el ta Egiptoe.

¹⁰‘Laj jloq'uesic ech'el ta Egipto. Quic'ojic batel ta sbajtical banomil.

¹¹Ti bu taje, lic jchanubtasic ta sventa ti oy c'usi jbel tsots albil sc'oplale, xchi'uc ti jmantaltac ti ta sta xch'iel sc'opojel yu'un ti buch'u ta xabtelan ta spasele.

¹²Sc'ac'alil ti cuxob o'ntonal cu'une, laj cac'be sna'ic svinajeb c'u s'elan oyic ta jtojole, svulesobil ta yo'ntonic ti c'otic ta cu'untaque.

¹³Ti oyic ta sbajtical banomil une, lic scontrainicun, mu xa xaq'uic ta venta ti oy c'usi jbel tsots albil sc'oplale. J'ech'el laj svalopatinic comel ti jmantaltac ti c'ot ta sventaic ti ta xch'i xc'opojic yu'un mi ta xc'ot ta pasel yu'unique. Laj soquesbeic sc'oplal ta j'ech'el sc'ac'alil ti cuxob o'ntonal cu'une. Laj jnop un ta jbusanbe ta sbaic ti sti'emal jol ti j'ech'el ch'ayuc sts'unubalic ta sbajtical banomile.

¹⁴Ta sventa ti mu jsoques ti jc'oplale, mu jechuc laj jpas yo' mu chopol xi'ile yu'un ti muc'tiquil lumetic ti laj yilic c'u s'elan laj jloq'uesic ech'el ta Egiptoe.

¹⁵‘Ta sbajtical banomile, laj jva'an jba ta yalbeic ya'iic ti mu x'ochic batel ta muc' ta lum ti albil sc'oplal ta xcac'beique, ti stuc no'ox c'upil sba ta j'ech'el bu co'ol s'elan vo' ta xbein ti chu' vacaxe xchi'uc ti ajapome.

¹⁶J'ech'el laj svalopatinbeicun ti jmantaltaque. Mu xa xac'beicun ta venta ti oy c'usi jbel tsots albil sc'oplale. Laj soquesbeicun sc'oplal sc'ac'alil ti cuxob o'ntonale. Ic'bil yo'ntonic ta j'ech'el ta sts'acliel ti loc'obbailetic yu'unique.

¹⁷‘Ti jech taj une, ti j'ech'el ox ta jtsutsesique, c'uxubaj to co'nton yu'unic. Mu'yuc laj jtubbeic sc'oplal ta sbajtical banomil.

¹⁸Va'i un, ti xnich'nabique, laj calbe ya'iic ti mu spasic c'u s'elan ta x'albat yu'un ti stot sme'ique, ti mu xch'unbeic c'u s'elan ta xchanubtasatic ta spasele, ti mu soques sbaic yu'un ti loc'obbailetique.

¹⁹Xichi laj calbeique: Vu'un ti Ajvalil Dios avu'unique. J'ech'eluc c'otuc ta pasel avu'unic ti oy c'usi jbel tsots albil sc'oplale, ti c'u s'elan nopbil cu'une.

²⁰Ich'ic ta muc' ti sc'ac'alil cuxob o'ntonale, ti tsots sc'oplal t'ujbil ti c'otem ta aventaique, svinajeb ti c'u s'elan oyoxuc xchi'uc ti vu'une. Ta xlic ana'ic unbi ti vu'un Ajvalil Dios avu'unique.

²¹‘Ti yalab xnich'nabic eque lic stoy sbaic ta scontrainelun. Mu'yuc xac'beicun ta venta ti oy c'usi jbel tsots albil sc'oplale. Mu'yuc xabtelanic. Mu'yuc spasic ti jmantaltaque, ti ta sta xch'iel sc'opojel yu'un ti buch'u ta xabtelan ta spasele. Laj soquesbeicun sc'oplal sc'ac'alil ti cuxob o'ntonale. Laj jnop un ta ox jbusanbe ta sba ti sc'ac'al co'nton ta stojolic ti j'ech'el ta jtubbe sc'oplalic ta sbajtical banomil yo' jech ta x'ech' ti sc'ac'al co'ntone.

²²Laj jpajes jba un yo' jech mu jsoques ti jc'oplale, ti mu chopoluc ta xiyilic ta sba ta satic ti muc'tiquil lumetic ti laj yilic laj jloq'uesic talel ta Egiptoe.

²³Ta sbajtical banomil une, laj jva'an jba ta yalbel ya'iic ti ta jtaniic batel ta muc'tiquil lum ti oy ta sbejel banomile.

²⁴Yu'un mu'yuc xc'ot ta pasel yu'unic ti jmantaltaque. Laj svalopatinic comel ti oy c'usi jbel tsots albil sc'oplal cu'une, xchi'uc laj soquesbeicun sc'oplal sc'ac'alil ti cuxob o'ntonale. T'ojol o satic ta stojol ti loc'obbail diosetic yu'un ti stot sme'ique.

²⁵‘C'ot ta pasel un laj cac'be ta sbaic ta spasel oy c'usi jbel ta alel yu'unic, mantaletic ti mu cha'bel xac' ch'iel c'opojele.

²⁶Ch'an xa no'ox xcutic ta soquesel sbaic ta yich'el batel smoton ti loc'tabil diosetique, ta yac'bel svocol xchiq'uel ta c'oc' ti sbanquilal queremique. Yich'uc xi'el ya'iic ma' ti jech laj jpas taj une, sna'icuc ti vu'un Diosune.’

²⁷“Xi s'elan ta xal ti Diose, xavut ya'i ti israeletic, Yojtot: ‘Ti atot ame'ic eque laj soquesbeicun co'nton. Mu'yuc stuq'uil c'usi laj spasic ta jtojol.

²⁸C'alal ochic batel ta banomil cu'un ti jbel sc'oplal ta xcac'beique, naca to no'ox laj staic ta ilel toyol stselej mi jun limlim te'. Lic yaq'uic ta anil milbil matanal ti bu taje. Yepal no'ox laj soquesbeicun co'nton yu'un ti matanale, naca yac'bel no'ox yu'unic ti muil momoletique, ti matanal vinoe.

²⁹Xichi laj jac'beic une: ¿C'usi xa ono'ox c'opojebal ti'inebal ti bu ta xabatic ti yan yajvale? Laj sbiin o yu'unic c'opojebal ti'inebal yan yajval, xi ta xalbeic tana le' une.’

³⁰“Xi s'elan ta xal ti Diose, xavut ya'i ti lum Israele: ‘¿C'u cha'al lec no'ox xava'iic ta soquesel abaic jech c'u cha'al laj spasic ti atot ame'ic laj ech'uque? ¿C'u cha'al yan ajolic ta jtojol ti nijiloxuc ta yich'el ta muc' ti soquesvanej loc'obbailetique?

³¹Staoj yav ta xasoques abaic ta scoj ti ta xamilic ta xchiq'uel ti avalab anich'nabic ta yaq'uel ta matanal yu'un ti loc'obbail diosetic avu'unique. ¿Mi ja' jech ta xtal ajac' abaic ta jtojol le' une, israeletic? Ta jva'an jba ta yalel ava'iic ti mu jq'uelojuc jba ta xtal ajac' abaic ta jtojol ti vu'un Diosune.

³²Ochem lec ta ajol ta j'ech'el ti jech ta xapas ava'i jech c'u cha'al ta spasic ti muc'tiquil lum ta banomil ti ta snijan xchiman sbaic ta yich'el ta muc' ti loc'tabil te'e, ti loc'tabil tone. Mu me jechuc ta xc'ot ta pasel un.

³³‘Ta jva'an jba ta yalel ava'iic ti vu'un Diosune, ta jventainojoxuc ta jmuc'ul jtsatsal ta stsitseloxuc ta sc'ac'al co'nton.

³⁴Ta jtsoboxuc loq'uel ti bu capaloxuc ta naclej ta jujun jteclum, ta muc'tiquil lum ti tanijemoxuc batele. Ta jmuc'ul jtsatsal ta jtsitsoxuc ta sc'ac'al co'nton.

³⁵Ta xquic'oxuc batel ta sbajtical banomil yu'un ti jteclumetique. Ta jq'uelbe jba jsatic ta xchapel jc'optic ma' ti bu taj une,

³⁶jech c'u cha'al laj jpasbeic ti atot ame'ic ti oyic ta sbajtical banomil yu'un ti Egiptoe. Mu lo'iluc no'ox ta xcal ti vu'un Diosune.

³⁷‘Ta jtuc'ulanoxuc c'u a'elanic jech c'u cha'al ta spas ta stojol xchijtac ti j'il-chije, c'otuc ta pasel avu'unic ti jtratee.

³⁸Ta jch'ac loq'uel ta atojolic ti jtoyobbaetique, xchi'uc ti buch'u sa'sun no'ox xa'i sbaic ti oyic ta yanlum bu nacaloxuc tana le'e. Ta jbeq'uic loq'uel ya'iic. Mu x'ochic batel ta yosilal Israel ma' ti stuquic une. Ta xlic ana'ic un ti vu'un Diosun avu'unique.

³⁹‘A'yio ava'iic, jteclum Israel, xi s'elan ta xal ti Diose: Ba loq'ueso avil avo'ntonic ta yich'el ta muc' ti loc'obbailetic avu'unique. Ta ts'acal ti vo'oxuc une ta xlic avaq'uicun ta venta, yu'un laj c'op ta soquesel jc'oplal ta yaq'uilanel matanal ta sventa ta yich'el ta muc' ti loc'obbailetic avu'unique.

⁴⁰Sjunul lum Israel ta xlic snijan sbaic ta yich'elun ta muc' ta jch'ul vits, ta cosilal ta toyol vits ti oy ta Israele. Mu lo'iluc no'ox ta xcal ti vu'un Diosune. Ximuyubaj xa ta xlic tunanic cu'un. Ta jc'anboxuc ti matanaletic ta xavac'beicune. Ich'beicun talel ti sba sat ts'unubaletic avu'unique, xchi'uc scotol ti c'usi loq'uem xa sc'oplal ta xavac'beicune.

⁴¹C'alal ta jtsoboxuc talel ta jteclumetic xchi'uc ta muc'tiquil lum ti bu tanijemoxuc batel tanae, ta svinajesel cutsilal jlequilal ta sba ta satic scotol ti jteclumetic ta atojolique, va'i unbi, ta jtsac ta xquich' ti muil matanal ta xavac'beicune.

⁴²C'alal mi la'ochic xa batel cu'un ta Israele, ta muc' ta lum ti cac'oj que jti' ta yac'bel sventain ti atot ame'ic laj ech'icuque, va'i unbi, ta xana'ic liquel ti vu'un Diosune.

⁴³Ti bu taje, ta xvul liquel ta avo'ntonic scotol ti c'usitic laj apasic ti laj asoques abaic yu'une, xchi'uc mu xal avo'ntonic yu'un ta spasel ti c'usitic mu albajuc xchopolal laj apasic talele.

⁴⁴Jteclum Israel, c'alal ta xc'ot ta atojolic cu'un ti ma'uc xa avuni c'oplal ta ya'yiel ti yan ti avuni talele, ti c'usitic mu stac' albel sc'oplal laj apase, ti ja' no'ox ta jcaj-tsan ti jc'oplale, ta xlic ana'ic unbi ti vu'un Diosune. Mu lo'iluc no'ox ta xcal ti Ajvalilune.’ ”

⁴⁵Xi laj yalbun ti Dios laj sc'oponun talele:

⁴⁶“Yojtot, ta stuq'uiluc yolon ti yac'ol xocon sloq'ueb c'ac'al xaq'uel batele, c'opojan ta jventa ta stojol ti muc' ta vitstic ti oy ta yosilal ti yolon ti yac'ol xocon sloq'ueb c'ac'ale.

⁴⁷Xi ta xal ti Diose, xavut ya'i: ‘Ta jtiles c'oc' ta atojol ta xchiq'uel scotol ti yaxal te'e xchi'uc ti taquin te'tic avu'une. Mu cha'bel xtub ta tilel ti c'oc' taje. Ta xchic'be sat scotol ti buch'utic nabal ta atojol ti oyic ta yolon ti yolon xocon sloq'ueb c'ac'ale, xchi'uc ti oyic ta yolon ti yac'ol xocon sloq'ueb c'ac'ale.

⁴⁸Scotol banomil ta xilic ti vu'un Diosun laj jtiles ti c'oq'ue. Mu cha'bel xtub ti c'oq'ue.’ ”

⁴⁹Xichi laj jtac'bee: “Mu xa ono'ox cha'bel un, Cajval, ti jnaclejetic ta banomile yacalic ta yalel, mu xa'iic ti c'usi ta xcale.”