Read Tzotzil Ezequiel 22 Bible Online

Ezequiel 22 - Tzotzil bible

Ezequiel 22

¹Xi laj yalbun ti Dios laj sc'oponun talele:

²“Yojtot, ta xava'an aba ta sbejtsanbel ya'iic smilvanejal ti jteclume, xchi'uc scotol ti mu stac' alel c'usitic laj spasique.

³Xi s'elan ta xal ma' ti Diose, xavut ya'i: ‘Ti naca xamil no'ox ti avinquilele, ti smeltsanel no'ox avu'un ti loc'obbail diosetic ti ta xasoquesel aba xchi'uque, ¡sta xa yorail ta xac'ot ta tsutsel!

⁴Ti lamilvan une, ti laj ameltsan ti loc'obbail diosetic ti laj asoques aba xchi'uque, loc' ta sa'el avu'un ti tenel c'ot ta aba ti sta yorail ta xac'ot ta tsutsel xchi'uque. Ta jpas un ti bisbilot ta cotol chaval yu'un ti jteclumetique, ti na'lebilot yu'un scotol ti muc'tiquil lume.

⁵Ti vo'ote, jteclum, ta xavich' labanel yu'un jteclumetic ti nopol oye, xchi'uc ti nom oye, ti cajal ta j'ech'el ti ac'oplal yu'un ti loc'obbailetic avu'une, xchi'uc ti c'usi mu'yuc smelol ta xapase.

⁶Oy ta venta ec un ti ajvaliletic yu'un Israel ti nacal ta atojol ti yac'ojbeic yipal ta spasel ti c'usi xa xal ti yo'ntonic ta milvaneje.

⁷Mu xaq'uic ta venta stot sme'ic ti jnaclejetic avu'une, naca xilbeic no'ox svocol ti jyanlumetique, ta yilbajinel ti buch'u mu'yuc buch'u x'ayan yu'une, xchi'uc ti me'unal antsetique.

⁸Ti c'usitic c'otemic ta jventae, ti sc'ac'alil cuxob o'ntonal cu'une, mu xaq'uic ta venta.

⁹Ta scoj ti naca sjutel no'ox c'op yu'unique, oy jlom alumal tenel ta xc'ot ta sba ta scoj ti ta xlajic ta milel ti yane. Lec xa xa'iic xvoletic ta slajesel ti compiral ta sventa yich'obil ta muc' ti c'usitic meltsanbil ta c'abal ti oy ta c'opojebal ta jujun stselejale. Mu stac' q'uelel ti c'usitic laj spasique.

¹⁰Oy jlom ta slo'labe sjol ti xcha'me'e, mi ta yilbajinel ants ta yorail ta xil ti xchamele.

¹¹Oy buch'utic ta slo'labe sjol yajnil ti svinquilele. Oy buch'utic ta slo'label sjol ti yalib ti toj q'uexlal sbae. Oy buch'utic ta xilbajin ti xcha'ixlele,

¹²J'ech'el mu xa xiyaq'uic ta venta. Stsaquic no'ox taq'uin ti jlom jnaclejetic avu'un yo' ta smilic ti yane. Ech'em no'ox sjol ta sc'anic ta xaq'uic ta ch'om ti taq'uine. Ta slo'la svinquileltac ta yilbel ti svocole. Mu lo'iluc no'ox ta xcal ti vu'un Ajvalilune.

¹³“ ‘Capem jol xchi'uc ti alo'lavanejal ta yilel ti vocole, xchi'uc ti amilvanejale.

¹⁴Mu xaval ti tsalbilun xa avu'un c'alal ta xquich' ave ati' ta scontrainelote. Mu stselbuj, ta xc'ot ta pasel cu'un ti xi laj cal ti vu'un Ajvalilune:

¹⁵Tan puc ta xabatic ta sbejel banomil, ta jujun muc'tiquil lum, ti bu ta xavich' poquel tusel yu'un ti atuil axinale.

¹⁶Ta acojic ta xasoques ti jc'oplal ta sba ta satic ti yan muc'tiquil lume, ta xlic ana'ic ti vu'un Ajvalilune.’ ”

¹⁷Xi laj yalbun ti Dios laj sc'oponun talele:

¹⁸“Ti c'otem ta jventa ti Israel ta xquile, co'ol s'elan jech c'u cha'al sjipemal ti c'anal taq'uine, ti c'unil saquil taq'uine, ti tsatsal taq'uine, ti platae, ti jip xi ochel ta jornoe.

¹⁹Xichi ta xcal ti vu'un Diosune: Ti mu'yuc atunelic acotolique, ta jvoloxuc ta tsobel ta o'lol Jerusalén.

²⁰Ta tilemal c'oc' ta jipot ochel ava'i ta sloq'uesel ti ac'a'epal jech c'u cha'al ta xich' loq'uesel sc'a'epal ti platae, ti c'anal taq'uine, ti tsatsal taq'uine, ti c'unil taq'uine, ti c'unil saquil taq'uine. Jech ta jpas ta sc'ac'al co'nton ta atojolic. Ta jvoloxuc ta tsobel ta sloq'uesel ti ac'a'epalique.

²¹Jech, ta jtiles ti sc'ac'al co'ntone, ta jtsoboxuc ta sloq'uesel ac'a'epalic ta o'lol ti jteclume.

²²Jech c'u cha'al ta xich' loq'uesbel sc'a'epal ta jorno ti platae, jech ta xich'ic loq'uesel ac'a'epalic ta o'lol ti jteclume. Ta xlic ana'ic ti laj jlaman talel ta abaic sc'ac'al co'nton ti vu'un Ajvalilune.”

²³Xi laj yalbun ti Dios ti laj sc'oponun talele:

²⁴“Xi xavalbe ya'i ti Israele, Yojtot: ‘Ti atsitsel ta xatae, muc' ta lum, mu xtal chaquilo', ts'ij xi ti vo' ta atojole.

²⁵Yu'un co'ol s'elan leonetic xloquet no'ox snuc' ti ajvaliletic avu'une, muc' ta lum, naca slilin no'ox ta ti'el ti jnaclejetic ta sve'elinel ta yosilal ti bu nacale. Naca yelc'anbel no'ox yu'un ti c'usi toyol stojole, xchi'uc ti sc'ulejalique. Yepal no'ox me'unal antsetic smeyoj yoc sc'obic ta xcomic yu'un.

²⁶Ta muc' ta lum li'e, ti paleetique naca syanijesel no'ox yu'unic ti chanubtasel cu'une. Naca soquesel no'ox yu'unic ti c'usi c'otem ta jventae. Mu sna'ic st'ujel ti bu leque xchi'uc ti bu ta soquesvane. Mu xchanubtasic ti yan ta st'ujel ti bu leque xchi'uc ti bu mu lecuque. Mu xa xaq'uic ta venta sc'ac'alil ti cuxob o'ntonal cu'une. Laj c'op ti ta snijan xchiman sbaic ta yich'elun ta muq'ue.

²⁷Ta muc' ta lume li'e, ti banquilaletique, co'ol s'elan jti'oval oq'uil slilin no'ox ta ti'el ti sve'ele, chapal ta smalel ch'ich' ta smilel ti jnaclejetic ta stael ti c'ulejale.

²⁸Co'ol s'elanic jaxtaniej pac'bal ti j'alc'opetique. Mu jamaluc ta xalic ti bu melele. Naca jutbil, yesomal sjolic ta xalic ti oy c'usi laj yilic ti jam sba satic yalojique. Yaleluc xa yu'unic ti ta xc'opojic ta jventae, ti c'alal mu'yuc jc'oponojique.

²⁹Ti jnaclejetic ta jteclume, naca ilbajinvanej, elec' ta spasic. Ta slo'la ta yilbel svocol ti me'un mu'nate, xchi'uc ti buch'u mu'yuc c'usi x'ayan yu'une. Naca no'ox xilbe svocol ta yilbajinel ti jyanlumetique.

³⁰Laj xa jsa'ilan ta stojol ti jnaclejetique, ti oyuc buch'u spac ti c'op ta sventa ti muc' ta lume, ti oyuc to buch'u xet'es ti c'op ta jtojol yo' mu jtubbe ti sc'oplalique. Mu'yuc bu laj jta un.

³¹Jech o xal ta jbusan ti sc'ac'al co'nton ta atsitselique. J'ech'el ta jtubbe sc'oplalic ta capemal yu'un ti sc'ac'al co'ntone yo' jech ta xa'i sbaic cu'un c'u s'elan ti stalelique. Mu lo'iluc no'ox ta xcal ti vu'un Ajvalilune.’ ”