Read Tzotzil Ezequiel 23 Bible Online

Ezequiel 23 - Tzotzil bible

Ezequiel 23

¹Xi laj yalbun ti Dios ti laj sc'oponun talele:

²“Oy bu c'ot ta pasel j'ech'el oy chib antsetic jun ti sme'ique.

³Ta stsebalic no'ox ti chib antsetic taje, lic sbolomalin sbaic. Laj yac' sbaic ta picolanel ta Egipto. Laj to me c'op ma' ti tojol tseb une.

⁴Ahola sbi ti vixile, ‘ta xac' ta na'el ti ja' sc'oplal ti Samariae’. Ti muquile, Oholiba sbie, ‘ta xac' ta na'el ti ja' sc'oplal ti Jerusalene’. Laj quic' ti xchibalique. Laj quil jquerem jtsebcutic xchi'uc.

⁵Ti Ahola une laj smucul satiun. Ic'bat yo'nton ta sc'upinel sba xchi'uc ti j'ac'-leto asirioetique,

⁶ti jun yutsiquil stsajal ti sc'u' slapojique, scotolic banquilaletic, ajvaliletic, c'ac'al querem viniquetic, scotol xcajetic no'ox ta ca' ta xanavic,

⁷ti t'ujbilic yu'un ti asirioetique. Ti Ahola une lic sbolomalin sba ta stojolic. Ic'bat yo'nton yu'un ti loc'obbail diosetic yu'unic ti bat ta yoc xchi'uque.

⁸C'alal oy ta Egiptoe, lic sjoy ti yepal no'ox vay xchi'uc ta sbolomalinel sbae, ti mu jutebuc laj yicta sbae. Tey laj sc'oplal ti tojol tseb to une.

⁹Jech o xal laj cac' ech'el ta yoc ta sc'ob ti slo'labil sjol asirioetic ti ic'bil c'ot yo'nton yu'une.

¹⁰Laj soquesbeic sc'oplal un. Ta jech yepal laj spojbeic squerem stsebtac. Laj smilic ta espada. Lamal c'ot ta stojol un ti jbel yich' oe. Laj yich' o yo'nton yu'un yan antsetic ti jech c'ot ta stojole.

¹¹“Ti Oholibae xchi'il ta voq'uel ti Aholae, manchuc mi laj yil ti va'i s'elan taj une, x'ech' to jelav ti sc'upijel yo'nton ta sbolomalinel sbae, mu sta ti xvixe.

¹²Ic'bat yo'nton yu'un ec ti asirioetique, yu'un scotol banquilaletic, ajvaliletic xa'i sbaic, j'ac'-letoetic ti spajeb xa yutsil sc'u' slapojique, viniquetic ti xcajetic ta ca' ta xanavique, c'ac'al querem viniquetic xa'i sbaic.

¹³Laj quil un laj soques sba ec. Laj stam ta spasel jech c'u cha'al ti xvixe.

¹⁴“Yu'un xi s'elan ti lic yich' yip xchi'uc ta sbolomalinel sbae: laj yil luchbil ta bonel ta tsoj ta pac'bal ti sloc'obbail jbabiloniaetique.

¹⁵Ti c'u s'elan ta xvinaj ti xchuquique, ti sts'ot sjolique, naca soldadoetic scotolic ta q'uelel.

¹⁶Ti jech laj yil ti sloc'obbail jbabiloniaetic une, ic'bil c'ot yo'nton yu'un. Laj stac batel j'al-mantal j'ich'-c'opetic ta Babilonia.

¹⁷Talic ti jbabiloniaetic une, vay xchi'uc. Lic spas c'u s'elan xal ti yo'ntone. Laj soques sc'oplal ta sbolomalinel sba. Mu stac' alel sc'oplal ti c'u s'elan laj soquesique. I'baj laj ya'i yu'un ti c'u s'elan pasbate.

¹⁸Ta sba ta sat scotol, lic sbolomalin sba. Xt'anet no'ox ta xac' sba iluc. Lic ibuc co'nton yu'un ec un jech c'u cha'al ib co'nton yu'un ti xvixe.

¹⁹J'ech'el laj sten sba ta sbolomalinel sba, ta svulesel ta sjol jech c'u cha'al ech' talel ta sbolomalinel sba ta stsebal ta Egiptoe.

²⁰Ic'bat yo'nton yu'un ti egipcio viniquetique, ti oy ono'ox yipal yu'un ta tavanej jech c'u cha'al ta xcuchumaj ti burroe xchi'uc ti ca'e.

²¹“Ti atsebal to oxe, Oholiba, yan xa banomil laj ava'i ta sc'upinel c'alal xpich' no'ox achu' ti egipcioetique.

²²Jech o xal xi ta xcal ti vu'un Diosune: Ti x'ibet xa avo'nton yu'un tana ti slo'labil ajole, ta joybin liquel ta acontra. Buyuc no'ox ta jvol talel ta atojol ta scontrainelot

²³ti jbabiloniaetique, ti caldeoetique, ti oyic ta Pecode, ta Soae, ta Coae, xchi'uc scotol ti asirioetique, ti c'ac'al querem viniquetic xa'i sba scotolique, banquilal xa'i sbaic, its'inal ajvalil xa'i sbaic, opisialetic xa'i sbaic, j'ac'-leto xa'i sbaic, scotolic xcajet ca' ta xanavic.

²⁴Yepal no'ox scarreta xchi'uc soldadoetic ta xtal scontrainot, ti buyuc no'ox ta svolot talel ta jujujote, smacoj sbaic lec xchi'uc smacobbailic xchi'uc sbin-jolic. Ta xcac' que jti' ta yich'belot ave ta xchapanelot jech c'u cha'al ta xal ti oy c'usi jbel tsots albil yu'unique.

²⁵Ta jbusan talel ta aba ti jcapemal jti'emale. Ta xacuxul yilbajinic ta j'ech'el. Ta setbot loq'uel ani'. Ta setbot loq'uel achiquin. Ta smilic ta espada ti buch'u cuxul ta xcome. Ta stsatsal pojbot ti aquerem atsebtaque. C'oc' xve' avu'un ec un.

²⁶Ta spojic ti ac'u' apoq'ue. Ta xu'ninic ti c'usitic toyol stojol oy avu'une.

²⁷Ta jtsutsesbot ti sc'upijel avo'nton ta sbolomalinel aba ti laj avac' aba ta Egiptoe. J'ech'el ta xch'ay ta asat ti egipcioetique, mi ja'uc xa ta xvul ta ajol.

²⁸“Xi ta xcal ti vu'un Diosune: Jq'ueloj xa no'ox ta xcac'ot ech'el ta yoc ta sc'ob ti muc'tiquil lum ti xti'et ajol yu'une, ti x'ibet xa ta xava'i yu'une.

²⁹Xti'et sjolic avu'un. Ta xu'ninic ti c'usitic x'ayan avu'un ta sventa ti laj apich' avoc ac'ob yu'un ti avabtele, xchi'uc ti laj avac'be yipal ti bu xal avo'nton ta sc'upinel abae. Ta xa xcuxul t'ananic, ta xvinaj ti bu laj abolomalin aba xchi'uque.

³⁰Ja' ta scoj ti va'i s'elan ta xc'ot ta atojol yu'un une, ti laj abolomalin aba xchi'uc ti muc'tic lum taje, labat ta yoc xchi'uc ti laj anijan aba ta yich'el ta muc' ti loc'obbail dios yu'unique.

³¹Ja' laj atam ta spasel jech c'u cha'al laj spas ti avixe. Ja' jech ta xavich' ava'i ec un jech c'u cha'al laj yich'e.

³²“Xi ta xcal ti vu'un Diosune: Jech ta xavich' ava'i jech c'u cha'al sbisol laj yich' ti avixe. Ch'enel lec, muc', jamal, ti noj lec ta sventa labanel xchi'uc ti jipel tenele.

³³Noj ta tsutsesvanej ta lilinvanej, ja' sbisol laj yich' ti avuni vix Samariae, ti jyacubel ta xacom yu'un ti yipal xc'uxule.

³⁴Xats'ubi xa ta ave ti slajebe. Ta jech yepal un ta xalilin ta voq'uel, ti xach'i xa ta yayijesel ti sti' avo'nton xchi'uque. Jech laj cal lic'opoj ti vu'un Diosune.

³⁵“Jech o xal xi ta xcal ti vu'un Diosune: Ti laj atenun ta avo'ntone, ti laj avalopatinun comele, ta xavich' avocol ta tsitsel yu'un ti laj abolomalin abae.”

³⁶Ti Diose xi laj yalbune: “Yojtot, ¿mi xac'an xavich'be ye ti Aholae xchi'uc ti Oholibae? Tic'bo ya'i ta sat unbi ti c'usitic mu stac' albel sc'oplal laj spase.

³⁷Laj xa svalopatinicun comel. Bonol ta ch'ich' ti sc'obique. Laj svalopatinicun comel ta scoj ti laj snijan sbaic ta yich'el ta muc' ti loc'obbail diosetic yu'unique. Ta sventa xi'el stoyel ti diosetic yu'unique, laj yac'be yich' svocol ta xchiq'uel ta c'oc' ti yalab xnich'nab laj quilic xchi'uque.

³⁸Ma'uc no'ox taje, xi s'elan laj spasic ta scontrainelune: Ta jun no'ox sc'ac'alil, laj soquesbeicun sc'oplal ti jch'ulnae, xchi'uc laj syanijesbeic sc'oplal sc'ac'alil ti cuxob o'ntonal cu'une.

³⁹Ti sc'ac'alil taje, laj yac'beic yich' svocol ti yalabic xnich'nabic sventa yich'el ta muc' ti loc'obbail dios yu'unique, talic ta jch'ulna ti laj soquesbeic ti sc'oplale. ¡Ja' jech laj spasic ti ta jna une!

⁴⁰“Laj staquic batel j'al-mantal j'ich-c'opetic ta yiq'uel talel viniquetic ti oyic ta nome, talic ec un. Ti xchibalic une lic atinicuc lec. Laj sbon satic. Laj stsoyanic ti c'usi toyol stojole yo' chapalic ta smalael.

⁴¹Chotolic ta ti' tem ti spajeb yutsile. Chapal xa ti mexae. Yac'ojic xa ti jtunel pom xchi'uc ti jtunel aceite c'otem ta jventae.

⁴²Yepal no'ox xvochetic ta avlajetel ta spasel ti q'uine, viniquetic liquemic talel ta sbajtical banomil yacalic ta xch'alel ta xojbel xojob c'obal ti antsetic xchi'uc ta slapbel ti c'upil sba ronail jolile.

⁴³Xi laj calbe jba une: ‘¿Mi xtun to yu'unic ti antsetic me'elubemic xa ta mulivajele? ¿Mi ta to xmulivaj xchi'uquic? Ja' no'ox jech ta sc'anic.

⁴⁴Talic ta stojol ti Oholae xchi'uc ti Oholibae, ti co'ol s'elan antsetic ti buch'u lec xa'i sbolomalinel sbae.’

⁴⁵Ta x'ich'bat ye yu'un viniquetic ti oy stuq'uil sjol yo'ntone jech c'u cha'al ta spasbeic ti antsetic ti ta sbolomalin sbae, xchi'uc ti ta xmilvane, yu'un jbolomalinej bail xa'i sbaic xchi'uc bonol ta ch'ich' ti sc'obique.”

⁴⁶Ti Diose xi s'elan ta xale: “Svoluc sbaic talel ti jteclum ta stojole. Ac'baticuc tsots xi'el yu'un. Elc'anbatuc ech'el yu'un ti c'usi oy yu'unique.

⁴⁷Pujbatuc ton yu'un scotol ti jteclume. Ts'apbatuc ti espadae. Milbatuc ti squerem stsebe. Chic'batuc ti snaique.

⁴⁸Ta jtub li' ta muc' ta lum ti c'usitic mu stac' albel sc'oplal ta spasique yo' jech ta xich' yo'nton scotol antsetic ti mu xchanic ta sbolomalinel sbaique.

⁴⁹Ti cha'vo' antsetic taje, ta xich' tsitsel ta scoj ti laj sbolomalinel sbae, ti laj sta smul ta snijanel xchimanel sba ta yich'el ta muc' ti loc'obbaile. Ta xlic ana'ic unbi ti vu'un Ajvalilune.”