Read Tzotzil Ezequiel 25 Bible Online

Ezequiel 25 - Tzotzil bible

Ezequiel 25

¹Xi laj yalbun ti Dios laj sc'oponun talele:

²“Yojtot, joybijan, q'uelo batel bu oyic ti amonitaetique, va'ano aba ta c'opojel ta jventa ta scontrainel.

³Albo ya'iic ti sts'etanuc xchiquinic ta ya'yiel ti xi s'elan ta x'albat yu'un ti Diose: ‘Xa'avanic xa ta muyubajel ti laj avilic laj yich' soquesel ti jch'ulnae, ti laj yich' lilinel slumal ti Israele, ti bec'bil loc' ta slumalic ti Judae.

⁴Lec un cha'e, ta xcac'oxuc ta yoc ta sc'ob ti lumetic liquem talel ta sloq'ueb c'ac'ale. Ta xu'ninic ti avosil abanomilique, ta sva'anel yaxibal na'ic ta naclej ti bu taje. Ta stun ta slajesic ti c'usitic xloc' x'ayan avu'unique. Ta xuch'ic ti chu' vacax avu'unique.

⁵Ta joybin ta slo'ob yaxal camelloetic ti jteclum Rabae, ta slamleb chij yosilal ti Amone. Ta xlic ana'ic unbi ti vu'un Ajvalilune.

⁶‘Ti vu'un Diosune xichi ta xcale: Ti amonitaoxuque laj amaj ac'obic, xabitic no'ox ta muyubajel, yic'obal asat laj avil ti Israele.

⁷Ta jyales coc jc'ob ta stsitseloxuc ava'i un. Ta xcac'oxuc ech'el ta yoc ta sc'ob ti muc'tiquil lumetique yo' ta spojboxuc scotol ti c'usitic x'ayan avu'unique. J'ech'el ta jtenoxuc loq'uel ti oyoxuc ta jteclumetique. Jbel sc'oplal ch'ab xi ats'unubalic ta muc'tiquil lumetic. Ta xlic ana'ic unbi ti vu'un Ajvalilune.’

⁸“Xichi ta xcal ti vu'un Diosune: Moab, Seir, ta xavalic co'ol no'ox sba jech c'u cha'al yan lumetic ti Judae.

⁹Jech o xal ta jpol jutebuc xocon ti Moabe, mu junuc jteclum ta xquicta comel ti xi s'elan sc'ulejal c'upil sba ta xil ti muc' ta lume: ti Bet-jesimote, ti Baal-meone, ti Quiriataime.

¹⁰Ti jteclumetic liquemic talel ta sloq'ueb c'ac'ale, ta xcac'be yu'nin ti alumalique, xchi'uc slumalic ec ti amonitaetique, ti mu xa svulesat ta o'ntonal yu'un yan jteclumetic ti amonitaetique.

¹¹Ta xquich'be ye sti' ya'i ta xchapanel ti Moabe. Ta xlic sna' unbi ti vu'un Ajvalilune.

¹²“Ti vu'un Ajvalilune xi ta xcale: Xcuchoj no'ox svocol ta xa'i ti Edom ti laj spacbe sutel ti Judae.

¹³Jech o xal xi ta xcal ti vu'un Ajvalilune: Ta jyales coc jc'ob ya'i ta stsitsel ti Edome. Tub xi sc'oplal ti jnaclejetic yu'une, xchi'uc ti chon bolometique. Lilijem ta xcom cu'un. Espada xve' yu'un ti jnaclejetic ta Temane, ta Dedane.

¹⁴Ta sventa jlumal Israel, ta jpacbe ya'i sutel ti lum Edome. Ta spasic ta stojol Edom jech c'u cha'al liquem ti sc'ac'al co'ntone, ti scapemal jol yu'unique. Ta sna'ic unbi ti vu'un laj jpac sutele. Mu stselbuj jc'op ti vu'un Ajvalilune.

¹⁵“Xi ta xcal ti Ajvalilune: Ti filisteoetique, cuxul yajcontra ti israeletic ti batem yo'ntonic spaquel sutel ta stsutsesele, ta yilbajinele.

¹⁶Jech o xal xi ta xcal ti Ajvalilune: Ta jyales coc jc'ob ta stsitsel ya'i ti filisteoetique, ta stsutsesel ta j'ech'el ti cereteoetique, xchi'uc ti c'u yepal oyic ta xquixnal banomil ta ti' nabe.

¹⁷Spajebal xa no'ox ti c'u s'elan ta jpacbeic sutel ya'iique. Ta sc'ac'al co'nton ta jtsitsic ya'iic. Ti jech ta xc'ot ta pasel taj une, ta xlic sna'ic unbi ti vu'un Ajvalilune.”