Read Tzotzil Ezequiel 27 Bible Online

Ezequiel 27 - Tzotzil bible

Ezequiel 27

¹Xi laj yalbun ti Dios laj sc'oponun talele:

²“Yojtot, laetan liquel ta q'uejimol ta sventa lajel jtubel

³sc'oplal ti Tiroe, jun jteclum oy ta sti'il nab smanolajebic xchonolajebic ti muc'tiquil lumetique, xchi'uc ti epal lumetic oyic ta sti' ti' nabe. Albo ya'i ti xi ta xcal ti vu'un Diosune: ‘Abisoj aba ta c'upil sba ochebal loq'uebal, uni jteclum Tiro.

⁴C'alal to o'lol nab amacoj. C'upil aba ta j'ech'el lac'ot yu'un ti buch'u laj sva'anote.

⁵Naca tojal tenel-te' liquem talel ta vits Senir scotol ti atenel-te'altac ti amac'obiltaque. Laj smeltsanic ta ch'ut te' liquem talel ta Líbano ti avoyal oy ta o'lole.

⁶Laj smeltsanic ta c'an tulan liquem talel ta Basán ti sbec'obil vo' avu'une. Naca ta pech-pech oq'uil te' laj smeltsanic liquem talel ta ti'il nab yu'un ti Chipre ti smacobil apate, ti pac'bil lec ta jayal tsatsal saquil bax-tone.

⁷Xlich'et no'ox avu'un ta toyol ti muc' ta poc' sventa xtuch'obil ti iq'ue, ti liquem talel ta Egipto jun yutsil luchbile. Ta yax'elan tsajal xela poc' liquem talel ta ti'il nab yu'un ti Elisá meltsanbil ti yaxibale.

⁸Ti sbainojic ta sla'olanel ti xujobile, viniquetic liquemic talel ta Sidone xchi'uc ta Arvade. Ti banquilaletic avu'une, naca avinquileltac bijil viniquetic.

⁹Ti sbainojic ta smeltsanel ti bu ta soque, naca bijil moletic liquemic talel ta Gebal. Ti jbolomajel xchi'uc ti abolomale, naca xanviletic xchi'uc sbarcoic ta nab.

¹⁰‘Ti j'ac'-letoetic c'otem ta avajsoldadotaque, naca viniquetic liquemic talel ta Persiae, ta Lidiae, ta Libiae, xach'alet no'ox yu'unic xchi'uc ti smacobbailique, ti sbin-jolique, xtixet no'ox xojobal ta atojol.

¹¹Ti avaj'ac'-letotaque, xchi'uc ti liquemic talel ta Arvade, jmoj xvoletic ta sq'uelel ti spat xocon amoque. Ta sq'uelel osil ta toyol luchlebal avu'un, viniquetic liquemic talel ta Gamad. Joc'ajtic no'ox smacobbailic c'u sjamlej ti amoque, jun avutsil xac'ot o yu'un.

¹²“Yepal no'ox ma' ti ac'ulejale, xmanolaj no'ox ma' ti jteclum Tarsis ta atojole, ta sjel ta naca plata, ta naca tsatsal taq'uin, ta naca pac'obil taq'uinetic, ta naca c'unil taq'uin ti abolomale.

¹³Ti abolomale, ta smanic ti Greciae, ti Tubale, ti Meseque. Naca ta mosovil xchi'uc c'usitic ta c'anal taq'uin ta xajelic xchi'uc.

¹⁴Ti abolomale, ta smanic ti Bet-togarmae. Naca ta j'abtel ca'etic, ta jcajlebal ca'etic, xchi'uc ta mulaetic ta xajelic xchi'uc.

¹⁵Naca jnaclejetic yu'un Rodas ti jmanolajel avu'une. Yepal no'ox muc'tiquil lum ma' ti ta xabolomaje, xchi'uc ti oyic ta ti' nabe. Naca ta c'upil sba saquil tsatsal bax-ton, xchi'uc te'el ac-te' ta xajelic xchi'uc ti abolomale.

¹⁶Ta xmanolaj ta atojol ec ti jteclum Edome, ta sventa ti col no'ox la'albat ti xi s'elan c'usitic ep xloc' x'ayan avu'une: ta xajelic xchi'uc ti abolomale, ta c'upil sba bax-ton ti ep ta tos ta xac' xojobale, ta bonbil poc' yax'elan xyaxale, ta luchbil poq'uetic, ta c'upil sba saquil xela poq'uetic, ta c'upil sba bax-ton ti yax'elan saquile, ta bax-ton ti tsoj-tsojtic ta xac' xojobale.

¹⁷Ta xmanolajic ta atojol ec ti jteclum Judae, xchi'uc ti jteclum Israele, naca ta trigo liquem talel ta Minit, ta c'unil pan, ta ajapom, ta aceite, xchi'uc ta bálsamo ta xjelic xchi'uc ti abolomale.

¹⁸Ti ac'ulejal ti c'usitic xloc' x'ayan avu'une, yepal no'ox ta smanbot ti jteclum Damascoe. Ta stojbot comel ta vino ti liquel talel ta Helbone, xchi'uc tsotsil chij ti liquem talel ta Sahare.

¹⁹Ta xich'beicot talel vino ta jteclum Uzal, tenbil taq'uinetic, canela, c'unil vale', ta xajelic xchi'uc ti abolomale.

²⁰Ti jnaclejetic ta jteclum Dedane, tal manolajicuc avu'un xtoc, naca lequil stas-pat ca'etic laj yac'beicot ta stojol.

²¹Ti yajvaltac abolomal ta smanele, xi s'elane: ti jteclum Arabiae, xchi'uc scotol ti banquilaletic yu'un Cedare. Naca ta ch'iom chij, ta muc'tiquil chij, xchi'uc ta tentsunetic ta sjelic xchi'uc ti abolomale.

²²Ti yajvaltac abolomal ta smanele, naca liquemic talel ta jteclum Saba, xchi'uc ta jteclum Raama. Naca muil poxiletic, c'upil sba bax-tonetic, xchi'uc oro ta xjelic xchi'uc ti abolomale.

²³Ta xbolomajic ta atojol ec ti jteclum Harane, ti Cane, ti Edene, jbolomajeletic oyic ta jteclum Sabá, ta Asiria, xchi'uc scotol jteclum ti oyic ta Mediae.

²⁴Ta xchonic ta atojol un ti lequil poq'uetique, ti c'u'iletic yax'elan sba stsajale, ti luchbil c'u'iletique, ti tenbil pimil tsots ep ta tos sbontaque, xchi'uc pechbil ch'ojon.

²⁵Ti barcoetic yu'un ti Tarsise, sjel stsac no'ox sba ta xich'belot talel ti c'usitic stac' manele. “Co'ol to ox a'elan jech c'u cha'al jun muc' ta barco xcajet ta snatil nabe, ti yepal no'ox xcuchoj ti ac'ulejale.

²⁶Ta snatil nab ta xic'ot batel ti buch'utic ta sla'olan xujobiltac ti barco avu'une. Ta snatil nab un, laj slilinot ta voq'uel ti ic' lic talel ta sloq'ueb c'ac'ale.

²⁷Ti ac'ulejale, ti abolomale, ti c'usitic x'ayan avu'une, ti jbainej barcoe, ti sbainojic ta xujele, ti sbainojic ta xq'uixnael ti barcoe, ti jbolomajeletic avu'une, ti j'ac'-letoetique, ti j'abteletic ta barco avu'une, ta sna'bil to nab ta xbat c'alal ta sta sc'ac'alil ta xamut'ije.

²⁸Xnic to yu'unic ta yech'omal snuq'uic ti ya'lel nab xva'i xcoti ta avlajetel ti j'abteletic yu'un ti abarcoe. b

²⁹“Sjip xa sbaic yalel ta barco ti sbainojic ta sla'olanel ta xujele. Xbitic xa yalel ta banomil scotol ti j'abteletique, xchi'uc ti banquilaletic yu'une.

³⁰Ta sjambeic snuq'uilal ta avanel, ta smil sbaic ta oq'uel ta aventa. Svijbe xa sba pucuc ta sjolic, sbalalin xa sbaic ta tanil c'oc'.

³¹Xt'axbun xa ta loq'uel sjolic ta aventa. Slapic lajemal c'u'il yu'un me'inal, smil xa sbaic ta oq'uel.

³²Ta aventa un, xlaetic liquel ta q'uejimol sventa ti lajebal tubele, xme'inal oq'uic xa ti xi ta xalique: ‘¿Mi oy la bu stac' co'oltasel ti Tiroe, jun jteclum ti oy ta sti'il nabe?

³³Ti busul no'ox ta xvul ti abolomal ta ti' nabe, xcuxet to ta xa'i banomil ti muc'tiquil lumetique. C'otic ta jc'ulej avu'un ma' ti ajvaliletic ta banomile, ta sventa yepal no'ox ti ac'ulejale, xchi'uc ti c'usi xloc' x'ayan avu'une.

³⁴Tana le' une, ch'ay ac'oplal ta nab, lamut'ij yalel ta sninabil. Ti c'usitic xloc' x'ayan avu'une, xchi'uc ti j'abteletic ta barcoe, jmoj ta xamut'ijic yalel xchi'uc c'alal to sninabil.’

³⁵“Mu xa ta banomiluc ta xa'iic avu'un scotol ti jnaclejetic ta jujun muc'tiquil lum ti oy ta sti' ti' nabe. Xvinaj xa ta satic ti ajvaliletique mu'yuc xa xchi'uc xch'ulel ta xa'iic yu'un ti xi'ele.

³⁶Xbat xa xch'ulel ta xi'el ti yan jbolomajel muc'tiquil lum c'alal ta xayilote. Mu stac' alel ma' ti c'u s'elan lac'ot ta joybijel une, j'ech'el com ti banomil avu'un une.”