Read Tzotzil Ezequiel 28 Bible Online

Ezequiel 28 - Tzotzil bible

Ezequiel 28

¹Xi laj yalbun ti Dios laj sc'oponun talele:

²“Yojtot, xi xavalbe ya'i ti ajvalil yu'un ti jteclum Tiroe: ‘Xi s'elan ta xal ti Diose: Mu'yuc xa ono'ox buch'u xtaun o laj ava'i xchi'uc ti atoyobbaile, lac'ot ta jun dios laj ava'i aba ti chotolot ta spasob mantal ti diosetic ti joyobtabilot ta nabe. Laj anop ti jech abijil jech c'u cha'al jun diose, naca vinicot no'ox, ma'uc jun dios.

³¿Mi xavac'touc xjelav to abijil jech c'u cha'al ti Daniele? ¿Mi yu'un mu'yuc macal aba asat ta sna'el ti c'usi vocol ta a'yiel stuq'uile?

⁴Ti laj ana' c'usi laj avut aba yu'un ti abijile, yepal no'ox ti ac'ulejale, noj ta xcaxailtac avu'un ti oroe, ti platae.

⁵Ti xatojob ta bolomajele, yepaj no'ox ti ac'ulejale, laj atoy aba yu'un ti c'ulejal une.

⁶‘Jech xal ti Diose xi ta xalbote: Ti c'otem ta ajol jech abijil jech c'u cha'al ti jun diose,

⁷ta jtac talel ava'i jyanlumetic ta scontrainelot ti pucujic ta j'ech'ele, ti nit xut loq'uel ti yespada stsaquelot ta letoe, vo'ot ti jun avutsile, ti bijot xava'i abae. Lumtic to ta xc'ot ma' ti xtixet no'ox avutsilale.

⁸Slajebal vocol xava'i xalaj ta o'lol nab, ta snatil vo' ta xamut'ij yalel un.

⁹¿Mi jech to van diosot xava'i xcal va'alot ta stojol ti avajcontrae? Uni vinicot no'ox ma' ti oyot xa ta sc'ob ti buch'u ta smilote.

¹⁰Ta yoc sc'ob jyanlumetic xacham xalaj, jech c'u cha'al cham lajic ti yan yajvalique. Jech laj xa cal, mu stselbuj jc'op ma' ti vu'un Ajvalilune.’ ”

¹¹Xi laj yalbun ti Dios laj sc'oponun talele:

¹²“Yojtot, xi laetan liquel ta me'inal q'uejimol sventa jlajel jtubel ti ajvalil yu'un ti Tiroe: ‘Xi s'elan ta xal ti Diose: Mu'yuc buch'u staoj yan ma' ti c'u s'elan lac'ote. Mu albajuc ma' ti abijile, xchi'uc ti alequil avutsilale.

¹³Oyot to ox ta ts'unubaletic yu'un Dios ti sbiinoj Edene, ti xi a'elan ch'albilot ep ta tos c'upil sba bax-tonetique: ti tsoj-tsojtic sba xojobale, ti c'on-c'ontic sba xyaxale, ti ic'-ic'tic sba xyaxale, ti xlablun sba sc'anele, ti ic'-ic'tic sba stsajale, ti yox-yoxtic sba stsajale, ti yax'elantic sba stsajale, ti ep ta tos xojobale, ti c'on-c'ontic sba xyaxal xlablun ta q'uelele, ti c'usitic x'ayan avu'une, ti taq'uinal chiquinale, naca ta oro, chapanbil xa ono'ox c'alal laj avich' ac'bel ach'ulele.

¹⁴Chabibil lac'ot cu'un yu'un ti c'usi oy xiq'ue. Oyot to ox ta ch'ul vits yu'un Dios ti xaxanav no'ox bu oy ti tonetic ti xlaplun no'ox ta xac' xojobal jech c'u cha'al ti c'analetique.

¹⁵Lec ono'ox ti atalel laj avich' ti la'ac'bat ach'ulele, vul ta loq'uel un ti chopol ta atojole.

¹⁶Ti yepal no'ox oy ti abolomale, lic atam ta spasel ti c'usi chopole, ti mulile. Va'i un, laj jtenot loq'uel ta jtojol. Laj jtenot loq'uel ta jch'ul vits un. Ti c'usi oy xic' ta xchabiot to oxe, laj sjipot loq'uel ti bu jun yutsiquil ta xac' xojobal ti tonetic jech c'u cha'al ti c'analetique.

¹⁷Laj atoy aba xchi'uc ti avutsile. Ti xatixet no'ox xchi'uc ti alequile, laj soques ti abijile. Laj jipot yalel ta lum un. Laj cac'ot ta lo'il maxil ta sba ta sat ti ajvaliletique.

¹⁸Yepal no'ox ti amul laj atae. Yepal no'ox laj asoques aba xchi'uc ti abolomale, ti c'ot ta soquel avu'un ti ach'ulnataque. Va'i un, vul ta loq'uel ta atojol cu'un jun c'oc' ti ta sbalot ta chiq'uele. Scotol ta xilic tana un ti atanil xa busul ta banomile.

¹⁹Scotol ti muc'tiquil lumetic xayojtiquine, xi'ic xa liquel c'alal ta xilote. Mu stac' alel sc'oplal ma' ti c'u s'elan lac'ot ta joybijele, j'ech'el com o avu'un ma' ti banomil une.’ ”

²⁰Xi laj yalbun Dios ti laj sc'oponun talele:

²¹“Yojtot, joyijan, q'uelo batel stuq'uil jteclum Sidón, c'opojan ta jventa ti vulvunan liquel ta scontrainele,

²²ti xi xavalbe une: ‘Xi s'elan ta xal ti Diose: Contra xaquil, jteclum Sidón. Cajal ta xc'ot jc'oplal ta aventa. C'alal ta xquich'bot ave ta xchapanelote, xchi'uc ta svinajesel ti jlequilal cutsilale, ta sna'ic unbi vu'un ti Ajvalilune.

²³‘Ta jtac talel alajel. Buyuc no'ox ta beetic avu'une, ta xbein ch'ich'. Naca xlajic no'ox ti jnaclejetic avu'une, ti macbilic ta espada ta jujujote. Ta xana'ic unbi vu'un ti Ajvalilune.

²⁴‘Israel, ta xlaj sc'oplal avocol yu'un ti jteclumetic joyol ta axocone ti co'ol s'elan ch'ix ts'apal ta xti'van ta xava'i yu'unic ti jipel tenele. Ta xana' unbi vu'un ti Ajvalilune.’

²⁵“Ti vu'un Diosune xi ta xcale: Ti israeletic ti tanijemic batel ta yan muc'tiquil lumetique, ta jtsob talel. Ta xcac' ta ilel ta sba ta sat muc'tiquil lumetic ti jlequil cutsilale. Ti Israele ta xcha'naquiic ta steclumal stuquic ti laj cac'be ti cajtunel Jacobe.

²⁶Ta stsinan lec yo'ntonic ta naclej. Mu'yuc c'usi sna' ta xa'iic. Ta smeltsan snaic. Ta sts'un s'uvaic. Ta xquich'be ye ya'iic ta xchapanel ti slac'naic yic'obal satic laj yil ti Israele. Va'i unbi, ta sna'ic ti vu'un Ajvalilune, ti Diosun yu'un ti Israele.”