Read Tzotzil Ezequiel 29 Bible Online

Ezequiel 29 - Tzotzil bible

Ezequiel 29

¹Ta xlajchebal (12) c'ac'al yu'un ti slajunebal (10) ue, ta slajunebal (10) xa jabile, xi laj yalbun ti Dios laj sc'oponun talele:

²“Yojtot, vulvunan liquel ta c'opojel ta jventa ta scontrainel ti faraone, ajvalil yu'un ti Egiptoe, xchi'uc ta scontrainel sjunul ti lum Egiptoe.

³Xi xavalbee: ‘Xi s'elan ta xal ti Diose: Contra xaquil, faraón, ajvalilot yu'un ti Egiptoe, muc' ta chanul vo' xava'i aba xanuxet no'ox ta sti'il avuc'ume, ti xi ta xavale: Cu'un ma' ti muc' ta uc'um Niloe, laj jmeltsan un.

⁴Ta jxojbot ava'i xot-xot taq'uin ta ave ta xjochelot loq'uel, ti volol no'ox choyetic ta amic'al ti c'alal ta jochot loq'uele.

⁵Ta jipot batel ta sbajtical banomil xchi'uc scotol ti choyetic oy ta avuc'umale. Ta jamalaltic, telel ta xac'ot. Mi junuc oy buch'u ta x'abolaj ta amuquel. Ta xalaj ta ti'el cu'un ta jti'oval te'tical chon bolometic, xchi'uc ti jti'oval mutetique.

⁶Scotol ti jnaclejetic ta Egiptoe ta xlic sna'ic unbi vu'un ti Ajvalilune. Ti jteclum Israele laj sa' spojel ta atojol, co'ol a'elan jun aj ti xi s'elan lac'ot ta stojol une:

⁷C'alal laj squican sbaic ta atojole, lac'as, laj ayayijesbe ti xocone. C'alal laj sc'anic coltael ta atojole, laj asutes ave, yal ta lum avu'un.

⁸‘Jech o xal xichi ta xcal ti vu'un Diosune: Egipto, ta xc'ot ta pasel cu'un ta atojol ti espada xve' avu'une. Ta xich'ic milel ti jnaclejetic avu'une xchi'uc ti chon bolometique.

⁹Ta xajoybij ta sbajtical banomil. Ti jnaclejetic une ta xlic sna'ic unbi vu'un ti Ajvalilune. Ti vo'ot une xachi laj avalbe abae: Cu'un ma' ti muc' ta uc'um Niloe, laj jmeltsan un.

¹⁰Lec un, contra xaquilot xchi'uc ti avuc'ume. Xi'el xac' ma' ti c'u s'elan ta joybin ta sbajtical banomil ti bu c'alal amacoje. Ta xlic ech'el ta Migdol. Ta x'ech' ta Asuán. Ta xc'ot c'alal to sti'il sts'ac Etiopia.

¹¹Mu x'ech' liquel mi junuc jxanvil, mi junuc chon bolometic. Cha'vinic (40) jabil sjalil mi junuc oy buch'u ta xnaqui.

¹²Ta xajoybinot ava'i ta jun sts'ijlajan banomil, Egipto. Ta x'ech' cha'vinic (40) jabil sts'ijlajan ti jteclumetic avu'une, ti stuc xa no'ox x'ech' to sts'ijlajan ta xacome, mu sta ti yan jteclum jipbil tenbil xa comele. Ta jbec' loq'uel ti jnaclejetic avu'une. Tan puc ta xbatic cu'un ta yan lum, ta yan muc'tiquil lumetic.

¹³‘Xi ta xcal ma' ti vu'un Diosune: Mi ech' ti cha'vinic (40) jabil une, ta jtsob sutel talel ti egipcioetic ti bu tanijemic batel ta jujun lumetique.

¹⁴Ta xc'ot ta pasel cu'un ta sutic talel ti jchuquel egipcioetic ti ta xlic snacan sbaic ta yolon ti yac'ol xocon sloq'ueb c'ac'al ta Egiptoe, ta yosilic ono'ox. Ta xlic sva'anic ajvalil yu'unic ti mu xa tsotsuc sc'oplal ta x'ilee.

¹⁵Mu'yuc xa tsots sc'oplal ta xc'ot yu'unic ta scotol un. Mu xa stam sba liquel ma' ti ich'bil ta muc' ta xc'ot yu'un ti yan muc'tiquil lume. Ta jpec'tsanbe sc'oplal ta j'ech'el ti mu xa stsal yu'un ti yan muc'tiquil lume.

¹⁶Laj sc'oplal ma' ti ta spat yo'nton ti Israel ta stojol ti Egiptoe. Ta x'ac'bat sna'ic un ti ch'ayemic ta j'ech'el ti bat ox sa' yuni pojelic ti bu taje. Ta sna'ic unbi vu'un ti Ajvalilune.’ ”

¹⁷Ta sba c'ac'al yu'un ti sliqueb ue, ta yucubal xa xcha'vinic (27) jabile, xi laj yalbun ti Dios ti laj sc'oponun talele:

¹⁸“Ti Nabucodonosor ajvalil yu'un ti Babiloniae, xvolet no'ox batel yu'un yajsoldadotac ta stsaquel ta leto ti Tiroe. Scotolic lic t'anbujuc ti sjolique, lic ayanuc xchinal snequebic. Ti stuque xchi'uc ti yajsoldadotaque, mu'yuc c'usi laj sbalinic ti xvoletic ta stsaquel ta leto ti Tiroe.

¹⁹Jech o xal xichi laj cal ti vu'un Diosune: Ta xcac' que jti' ta stojol ti Nabucodonosore ta yu'ninel ta spojbel sc'ulejal scotol ti c'usi oy yu'un ti Egiptoe. Ti c'u yepal laj sta ta elc'anel une, xtoj o xa yu'un ti yajsoldadotaque.

²⁰Ta jpas ta stojol ti Nabucodonosor une, yu'ninuc c'usi oy yu'un ti Egiptoe. Ta xc'ot ta stojol yajsoldadotac ti xvoletic no'ox ta scontrainel ti Tiroe, yu'un ja' caj'abtel. Ti vu'un Ajvalilune, mu lo'iluc no'ox ta xcal.

²¹Ti jech yorail taje, ta jpas ta stojol Israel yich'uc liquel ti yipique yo' jech jamal ave ati' ta stojolic, Ezequiel. Ta xlic sna'ic unbi vu'un ti Ajvalilune.”