Read Tzotzil Ezequiel 31 Bible Online

Ezequiel 31 - Tzotzil bible

Ezequiel 31

¹Ta sba c'ac'al yu'un ti yoxibal (3) ue, ta sbuluchibal (11) xa jabile, xi laj yalbun ti Dios ti laj sc'oponun talele:

²“Xi xavalbe ya'i ti faraón ajvalil yu'un ti muc' ta lum Egiptoe xchi'uc scotol ti jnaclejetic yu'une: ‘¿C'u s'elan ta co'oltaselot ti atuc no'ox cajal c'otem ti ac'oplale?

³Co'ol a'elan jech c'u cha'al jtec' oq'uil te', mi jtec' ch'ut te' ti oy ta vits Libanoe, jun yutsil limil xchi'uc sc'obtac ta xac'be yaxinal ti vitse, ti stuc xa no'ox spajebal ti xch'iele, ti tijil xa c'otem ta toc ti sni'e.

⁴Ch'i yu'un ti vo' ta xtal ta vinajele, xchi'uc ti ta xtuc talel ta banomile. Laj ayanuc uc'um ta joyob ti bu teq'uele. Ti xbalaq'uin no'ox ti yoque, laj smalta scotol ti te'tic ta banomil ti bu taje.

⁵Ti yepal no'ox oy ti vo'e, stuc no'ox ech'em xch'i, mu sta ti yan te'tic oy ta vitse. Ti yepal no'ox ti sc'obe, limil no'ox ta j'ech'el.

⁶C'usiuc no'ox mutal ta xac' stasic ta sc'ob-c'obtac. C'usiuc no'ox te'tical chon bolometic ta svoq'ues yolic ta yolon. Ta yolon ti yaxinale, yepal no'ox muc'tiquil lum ta xcuxiic.

⁷C'otem ta jtec' te' c'upil sba ta j'ech'el, nat ti sc'ob-c'obtaque, yu'un ts'unul yalel yi'bel bu oy yepal ti vo'e.

⁸Mu jpetsuc ch'ut te' xco'olaj teq'uel ta sts'unubal ti Diose, mi jpetsuc jech sc'obtac jech c'u cha'al ti avu'une, mi jpetsuc castanyo te' yepal yanal jech c'u cha'al ti avu'une, mi petsuc te' ta sts'unubal Dios stac' co'oltasel jech c'u cha'al ti avutsile.

⁹Vu'un laj jpas ti c'upil sbae, ti limil no'ox yutsil ti ac'obtaque. Ti yan te'tic oy ta sts'unubal ti Diose, it'ix ta xaya'iic.

¹⁰‘Le' une, xi s'elan ta xal ti Dios une: Ti ech'em toyol bat ti jtec' te'e, ti tijil c'ot ta toc ti sni'e, laj stoy sba xchi'uc ti ech'em snatil ti xch'iele.

¹¹Jech o xal laj xa jten loq'uel. Jq'ueloj xa no'ox ta x'och ta yoc ta sc'ob yu'un jun banquilal ajvalil yu'un jyanlumetic, ti jech ta spasbat jech c'u cha'al loc' ta sa'el yu'un ti mu stac' alel ti xchopolal laj spase.

¹²Ta sts'ete loq'uel, telel ta x'ictae comel yu'un jyanlumetic ti spajebal spucujilique. Ta xlilij scotol sc'obtac ta vitsetic, ta stenlejaltic, ta slomlejal, ta spulul-pul yu'un ti muc' ta lume. Ti c'u yepal ta xcuxiic ta yolon yaxinale, ta xjatavic batel, stuc chexel ta xictaic comel.

¹³C'usiuc no'ox mutal ta xtal svol sbaic ta lomem te'e. C'usiuc no'ox te'tical chon bolometic ta xtal svayebinic ti sc'ob-c'obtaque.

¹⁴Mu xa jpetsuc te' jech staylej ta xbat jech c'u cha'al ti jtec' taje. Manchuc mi ch'iem ta ti' vo', mu xa ono'ox cha'bel sta ti tijil ta xc'ot ta vinajel ti sni'e, manchuc mi maltabil lec. Yu'un yich'oj talel ta xbat stsob sbaic ta ch'en xchi'uc scotol ti buch'u oyic ta muquinal mi valc'uj ti lum ach'el yu'une.

¹⁵‘Xichi ta xcal ti Diosune: C'alal mi quilbat xa batel yacan yu'un lajebal ti jtec' te' taje, ta xtaquij cu'un ti natil nab ta scoj ti at-o'ntone. Ta jmacanbe yoc ti uc'ume xchi'uc ti bu ta xtuc talel ti vo'e. Ta xc'ot ta pasel un ta x'uninat ta at-o'nton cu'un ti vits Libanoe, xchi'uc scotol ta xlic nucultajuc ti te'tic ta osiltique.

¹⁶Xi'ic xa ti muc'tiquil lumetic ti xvo'o'et to ti lom yalel ta lum cu'une, ti bat stsob sba xchi'uc ti buch'u chamemic xae. Xpatet to yo'ntonic ta xa'iic ma' ti te'tic ta Edene, xchi'uc ti c'upil sba maltabil lec te'tic ta Líbano ti ta xvalc'uj ech'el ti lum ach'el yu'unique.

¹⁷Ta xpalch'ujic ech'el ta lajebal ec un jmoj xchi'uc ti buch'u lajic ta letoe. Ti buch'u cuxiic ta yolon squeoval yaxinale, tan puc ta xbatic ta yan muc'tiquil lumetic.

¹⁸‘Mu jtec'uc te' ta Edén sta xco'olaj ti yutsilale xchi'uc ti stayleje. Ta xyalic batel ta jc'ol banomil jmoj xchi'uc ti te'tic ta Edene. Ta xnaquiic xchi'uc ti buch'u yan yajvalique, xchi'uc ti buch'u chamic ta letoe. Sc'oplal faraón ma' ti jtec' te' taje, xchi'uc ti svinictaque. Ti vu'un Ajvalilune, mu lo'iluc no'ox ta xcal.’ ”