Read Tzotzil Ezequiel 32 Bible Online

Ezequiel 32 - Tzotzil bible

Ezequiel 32

¹Ta sliquebal c'ac'al yu'un ti xlajchebal (12) ue, ta xlajchebal (12) xa jabile, xi laj yalbun ti Dios laj sc'oponun talele:

²“Ta sventa ti jlajel jtubel faraón ajvalil yu'un ti muc' ta lum Egiptoe, xi xachapan jun me'inal q'uejimol ta sventa: ‘C'otemot ta jcot león xava'i aba yu'un ti muc'tiquil lume, ti co'ol a'elan jun muc' ta chanul nab ti xapuc'pun no'ox ta avuc'ume. Ta xatatubtas ta avacan ti vo'e, ti x'uc'ubin no'ox ti yoc avu'une.

³‘Xi s'elan ta xal ti Dios une: Manchuc mi volol ta atojol ti epal jteclume, ta jip talel ta atojol ti ayacobile. Ta jts'otot ava'i xchi'uc un.

⁴Ta jochot loq'uel ava'i ta staquinal banomil. Telel ta xquictaot comel ta lumtic. C'usiuc no'ox jti'oval mutetic xvilte-vilte ta vinajele, ta xluchiic ta aba cu'un. Ta snojes xch'ut avu'un scotol ti jti'oval te'tical chon bolometique.

⁵Tan mac ta xbat cu'un ta vitstic, ta stenlejtic ti abec'tal ti c'a'em xae.

⁶Ta jmal ta banomil ti ach'ich'ele, ta xc'ot ta vitstic, ta snojesel yoc ti uc'umetique.

⁷C'alal ta jtsutsesote, ta x'ic'ub cu'un ti vinajele. Ta xmac sat ti c'analetique. Ta xmac ta toc sat ti c'ac'ale. Mu xac' xojobal ti ue.

⁸Ta acoj vo'ot un, ta jmacbe sat scotol ti c'usitic ta xac' xojobal ta vinajele. Ic'uneb ta osil ta xc'ot ti ateclumale. Ti vu'un Ajvalilune, mu lo'iluc no'ox ta xcal.

⁹‘Ti jteclumetic ti mu xavojtiquine, c'alal ta xc'ot ta xchiquin ti lalilij xae, ta x'ochic ta vul o'ntonal epal jteclumetic cu'un.

¹⁰Ta acoj un, epal jteclumetic ta xbat xch'ulelic ta xi'el un. Xbat xa xch'ulelic ta xi'el cu'un ma' ti ajvaliletic yu'unique c'alal ta xilic sts'aylajet no'ox ti quespadae. C'alal mi layal ta lume, xnicnunic xa ta xi'el ti buch'u mu to tenbaj ti sbec'tal stacopalique.

¹¹‘Ti Diose xi ta xale: Yespada xa ajvalil yu'un muc' ta lum Babilonia xve' avu'un.

¹²Ti yepal no'ox ti jnaclejetic avu'un ta ateclumale, yespada pucujil j'ac'-letoetic xve' yu'unic ta j'ech'el cu'un. Ta xlaj sc'oplal cu'un ti cajal xa'i sba ti muc' ta lum Egiptoe. Ts'ij xi sc'oplal ec ti yepal no'ox jnaclejetic yu'une.

¹³J'ech'el ta jtubbe sc'oplal ti chon bolometic ti ta xuch'ic ti ava'ale. J'ech'el ts'ij xi sc'oplal ta puc'lajetel ti jnaclejetique, ti chon bolometic ta statubtasel ti ava'ale.

¹⁴Ta xlic yaxubuc ti vo' cu'une, co'ol xa s'elan aceite xjaxet ta xanav ti uc'umetique. Ti vu'un Ajvalilune, mu lo'iluc no'ox ta xcal.

¹⁵C'alal ta joybin ta sbajtical banomil ti muc' ta lum Egiptoe, ti sts'ijlajan xae, ti mu xa junuc ti jnacleje, ta sna'ic unbi vu'un ti Ajvalilune.

¹⁶Q'uejimol yu'un jlajel jtubel ma' taj une. Jechuc sq'uejintaic ti xchopol-chop steclumal ti antsetic c'alal ta xoq'uitaic ti muc' ta lum Egiptoe, xchi'uc ti yepal no'ox ti jnaclejetic yu'une. Ti vu'un Ajvalilune, mu stselbuj ma' ti jc'op une.’ ”

¹⁷Ta yo'lajunebal (15) c'ac'al yu'un ti xlajchebal (12) ue, ta xlajchebal (12) xa jabile, xi laj yalbun ti Dios ti laj sc'oponun talele:

¹⁸“Yojtot, ti xchopol-chop steclumal ti antsetique, xi laetanic liquel ta q'uejimol sventa ti jlajel jtubel yepal no'ox ti jnaclejetic yu'un ti muc' ta lum Egiptoe, xchi'uc ti ajvaliletic yu'une: ‘Bat ta ch'en un ma' ti buch'u cajal toyol xa'i sba une. C'ot stsob sbaic xchi'uc ti buch'u oyic xa ta muquinale.

¹⁹¿Mi yu'un atuc xa no'ox avaloj x'ech' to la ti avutsil une? Yu'un ta xayal batel, jmoj telel ta xac'ot xchi'uc ti buch'u yan yajvalique.’

²⁰“Jech ta xc'ot ta stojolic ec jmoj xchi'uc ti buch'utic ta xlajic ta letoe. Chapal xa ti espadae. Jmoj ta stam batel sbeic ti c'u yepal xvoletic une.

²¹Ti egipcioetique, malabilic xa ta lajebal yu'un ti banquilaletic ti jelavem cuchem yu'unic ti xi ta xalique: ‘¡Yalic xa talel ec un! ¡Pisile, quiil xa com ta lum ti buch'u yan yajvalic cham lajic ta letoe!’

²²“Le' oy ec ti Asiriae, volol tal ta spat ta xocon ta muclej xchi'uc scotol ti yajsoldadotaque. Chamic ta leto scotolic ma' le' une.

²³Spajeb xa snatil muquinal muculic. Ti yajsoldadotac ti laj yac'beic xi'el ti buch'u cuxulic ta banomile, cham lajic ta leto ec un, joyolic ta muclej ta muquinal yu'un Asiria.

²⁴“Le' oy ec ti Elame, volol tal ta spat xocon ta muclej xchi'uc scotol ti yajsoldadotaque. Chamic lajic ta leto scotol ma' le'e. Talic ta muquel ec un ti buch'u yan yajvalic ech'ique. Ti yajsoldadotaque laj yac'beic xi'el ti buch'u cuxulic ta banomile. Laj c'op ma' ti ich'bil ta muc' ti vulic xa ta muquinal ti bu muculic ti yan tana une.

²⁵Ti Elame telel xa ta o'lol xchi'uc scotol yajsoldadotac ti chamemic xae. Yu'un scotol chamic ta leto ti yan yajval ech'ic ti oyic xa ta muquinal avi tana li'e. Laj yac'beic xi'el ti buch'u cuxulic ta banomile. Laj c'op ma' ti ich'bilic ta muc' ti vulic xa ta muquinal ti bu muculic ti yan tana une. Jech c'otic ec ti buch'u lajic ta milele.

²⁶“Le' oy ec ti Meseque, ti Tubale, xchi'uc scotol yajsoldadotac joyol ta muclej ta muquinal. Scotolic yan yajvalic. Cham lajic ta letoe, ti laj yac'beic xi'el ti buch'u cuxulic ta banomile.

²⁷Mu jmojuc laj yich'ic muquel xchi'uc ti banquilaletic yu'unic laj ech'icuc ta vo'nee, ti palch'uj batel jmoj xchi'uc yabtejebic ta lajebale, xchi'uc ti xoncolinojic no'ox ti yespadaique, ti lamal no'ox ta sbaic ti smacobbailique, ti laj yac'beic to ox xi'el ti buch'u cuxulic ta banomile.

²⁸“Ti bu taj une, labat ec un, muc' ta lum Egipto, ti bu oyic ti buch'u yan yajvalique, tuch'anticot xa, jmoj muc xachi ta o'lol xchi'uc ti buch'u cham lajic ta letoe.

²⁹“Le' oy ec ti lum Edome, ti ajvaliletic yu'une, xchi'uc ti its'inal ajvaliletic yu'une. Cuchem to ox yu'un, li' xa capal xchi'uc ti buch'u laj chamuc ta letoe. Jmoj xa muculic xchi'uc ti buch'u yan yajvalic valc'uj ti lum ach'el yu'unique.

³⁰“Le' oyic ec scotolic ti banquilaletic liquemic talel ta yolon ti yolon xocon sloq'ueb c'ac'ale, jech c'u cha'al scotolic liquemic talel ta Sidone. Jelavem cuchem yu'unic to ox, laj yaq'uic ti xi'el une. Talic xa ta xchi'inel tana un ti buch'u cham lajic ta letoe. Nijil chimilic xa ta q'uexlal apun un. Naca yan yajvalic, muculic xa. Mu'yuc xa ich'bilic ta muc' bu muculic ti buch'u chamic lajic ta letoe. Jmoj xa batic xchi'uc ta muquinal.

³¹“Xpatet to yo'nton ta xa'i ti faraón c'alal ta xil cham laj scotol ti svinictaque, ti yajsoldadotaque, ti chamic ta letoe. Ti vu'un Ajvalilune, mu stselbuj ma' ti jc'op une.

³²Ti faraone laj yac'be xi'el ti buch'u cuxul ta banomile. Jech o xal jmoj ta xich' muquel xchi'uc ti buch'u yan yajvalique, jmoj xchi'uc ti buch'u cham lajic ta letoe, jech c'u cha'al ti epal soldadoetic yu'une. Ti vu'un Ajvalilune, mu stselbuj ma' ti jc'op une.”