Read Tzotzil Ezequiel 33 Bible Online

Ezequiel 33 - Tzotzil bible

Ezequiel 33

¹Xi laj yalbun ti Dios laj sc'oponun talele:

²“Yojtot, xi xavalbe ya'i ti avinquileltac ti c'opojan ta jventae: ‘C'alal ta jtac talel j'ac'-leto ta jun muc' ta lume, ti jnaclejetic une st'ujicuc loq'uel junuc xchi'ilic ta scotolic yo' ta x'och ta jq'uel-osil.

³C'alal ta xil ta xnopaj talel ta muc' ta lum ti j'ac'-leto soldadoetique, yoq'uisanuc oq'ues ta anil ti jq'uel-osil ta sbijubtasel ti jnaclejetique.

⁴Mi oy buch'u laj ya'i laj yich' oq'uisanel ti oq'uese, mu'yuc laj yac' ta venta c'ot ti jcontrainvaneje, mi mile une, smul stuc ti chame.

⁵Laj ya'i oc' ti oq'uese, mu'yuc laj yac' ta venta, smul stuc ti xchame. Lajuc yac' ta ventae, col to batel ti jechuque.

⁶Mi yiloj xvolet talel jcontrainvanej soldadoetic ti jq'uel-osile, mu'yuc laj yoq'uisan oq'ues yo' ta sbijubtas ti jnaclejetique, c'ot ti jcontrainvanej une, mi oy buch'u laj smile, ja' smul ti cham yu'une. Ta xquich'be ya'i ye sti' ti jq'uel-osile.’

⁷“Yojtot, co'ol a'elan jq'uel-osil laj jva'anot yu'un ti lum Israele. Avabtel ta xchiquintael ti c'usitic ta xcale, ta yalbel ti scajbijubtaselique.

⁸Xu' nan xloc' ta que xcaltic ti chapal xa sc'oplal ta xcham ti buch'u mu'yuc xch'ulel xa'i sbae. Mi mu'yuc ta xavalbe ya'i ti sutesuc sba bu stamoj batele, mi mu'yuc ta sutes sba une, xcuchoj smul xcham xlaj ti buch'u mu'yuc xch'ulel xa'i sbae. Ta xquich'bot ave ati' ava'i mi cham laj une.

⁹Mi ta xabijubtas yictauc sba bu stamoj batel ti buch'u mu'yuc xch'ulel xa'i sbae, mi mu sutes sba une, xcuchoj smul cham laj. Mu'yuc atijel ta c'op ti vo'ote.

¹⁰“Yojtot, xi xavalbe ya'i ti jteclum Israele: ‘Ti vo'oxuque xachi ta xavalique: Ech'em jcuchoj jmultic. Mu lecuc bu laj jtamtic batel. Tana li' une, cuxul ta x'och jc'a'emaltic. ¿C'usi xu' ta jpastic yo' to ta xijcuxi?

¹¹Ta jva'an jba ta yalel ti vu'un Diosune, mi jutebuc oy ta co'nton ta xcham ti buch'u mu'yuc xch'ulel xa'i sbae. Ja' ta jc'an ti yictauc sba ta spasel ti bu chopol stamoj batele yo' jech ta xcuxi. Jteclum Israel, ictao ti bu chopol atamoj batele. ¿Mi yu'un aq'ueloj aba ta xacham?’

¹²“Yojtot, xi xavalbe ya'i ti avinquileltaque: ‘Mi ta xlic sa' smul junuc ti buch'u oy slequil stuq'uile, mu xpoje yu'un ma' ti oy c'usi lec laj spas ta ba'yele. Mi ta xicta sba ta spasel c'usi chopol ti buch'u mu'yuc xch'ulel xa'i sbae, ma'uc ta xcham yu'un ti oy c'usi chopolal laj spas talel ta ba'yele. Mi ta xlic sa' smul ti buch'u oy slequil stuq'uile, ma'uc tsacbil ta venta ti oy c'usi lec laj spas ta ba'yel yo' ta xcuxie.

¹³Xcaltic no'ox, mi ta xloc' ta que, ta jc'an ta xcuxi ti buch'u oy slequil stuq'uile, ti yip xa yo'nton ta xa'i oy slequil yutsile, ts'acal to un ta xlic spas ti c'usi chopole, ma'uc ta jtsac ta venta ti oy c'usi lec laj spase. Ta xcham ono'ox ta scoj ti oy c'usi chopol laj spase.

¹⁴Mi chapal sc'oplal ta xcac' chamuc ti buch'u mu'yuc xch'ulel xa'i sbae, ta xlic yicta ta spasel ti mulile, ta xlic stam ta spasel ti c'usi oy stuq'uil yutsile,

¹⁵ta xlic sutes ti c'usi yich'oj ta rentale, mi ja' ti c'usi yelc'anoje, ta xc'ot ta pasel yu'un ti c'usitic tsots jbel albil sc'oplal ta xac' cuxleje, ta xicta ta spasel ti c'usi chopole, jbel sc'oplal ta xcuxi, mu'yuc ta xcham.

¹⁶Ti stuq'uil yutsil xa ti c'usi ta spas une, mu xcham xchi'uc, mi ja'uc ta jvules ta jol ti c'u s'elan laj sa'ilan talel ti smule.’

¹⁷“Ti avinquileltaque ta xalic ti mu'yuc stuq'uil ti c'usi ta jpase. Ja' stuquic ti mu'yuc stuq'uil ti c'usi ta spasique.

¹⁸Mi ta xicta sba ta spasel c'usi lec ti buch'u oy stuq'uil xa'i sbae, ti ta xlic spas ti c'usi chopole, ta xcham ta scoj ti va'i s'elan ta spas une.

¹⁹Mi ta xlic yicta sba ta spasel c'usi chopol ti buch'u mu'yuc xch'ulel xa'i sbae, ta xlic spas ti c'usi oy stuq'uil yutsile, ta xcuxi ta sventa taje.

²⁰Ti vo'oxuque xachi ta xavalilanique: ‘Mu'yuc stuq'uil ma' ti c'usi ta spas ti Diose.’ Taje, israeletic, ta jchapanoxuc ava'iic ti c'u s'elan ta xapasique.”

²¹Ta yo'obal (5) c'ac'al yu'un ti slajunebal (10) ue, ta xlajchebal (12) xa jabil jbeq'uelcutic loq'uele, oy jun vinic jatvil loc' ta Jerusalén, tal xchapbun ca'i ti tsale xa yu'un yajcontra ti jteclume.

²²Ta yac'ubalil c'alal mu ta xvul ti buch'u jatav loq'uele, ti Diose laj yac' talel sc'ob ta jtojol. Ta yoc'omal un c'alal vul ta jtojol ti vinique, laj sjambun que jti' ta c'opojel ti Diose.

²³Xi laj yalbun ti Dios laj sc'oponun talele:

²⁴“Ti jnaclejetic nacalic ta lilijemal jteclumetic yu'un ti Israele, xi ta xalolanique: ‘Ti Abrahame, yo junomal. Manchuc mi jech un, c'ot ta jun yajval muc'ul lum. Jech o xal ti vo'otic un cha'e, ta xijc'ototic ta yajval jun muc' ta lum ec.’

²⁵“Xi xavalbe ya'iic ma' taj une: ‘Xi ta xal ti Diose: Ti vo'oxuque, capal xchi'uc xch'ich'el ti beq'uet ta xalajesique. Naca xyal no'ox avoc ac'obic ta milvanej. Quejel chimiloxuc ta yich'el ta muc' ti c'usitic meltsanbil ta c'abale ¿Mi xc'ot to o avalojic ta xac'otic ta yajval jun muc' ta lum une?

²⁶Sbeelinoj ac'obic ti avabtejebic ta ilbajinvaneje. Ta xapas ti c'usi mu jc'an jq'uele. Acotolic naca jlo'laej joliloxuc. ¿Mi xc'ot to o avalojic ta xac'otic ta yajval jun muc' ta lume?’

²⁷“Xi xavalbeic ya'iic xtoque: ‘Xi ta xal ti Diose: Ta jva'an jba ta yalbel ti buch'utic nacalic ta lilijemal jteclume, milel xa'i xcham xlajic. Te'tical jti'oval chon bolometic xa'i xcham xlajic ma' ti buch'utic nacalic ta osiltique. Tsots chamel xa'i xcham xlajic ti buch'utic nacalic ta nail ch'entic mi ta tontic.

²⁸Sts'ijlajan, stuc slilijemal busul ta xcom cu'un ma' ti muc' ta lume. Ta jlilin ta j'ech'el ma' ti yip xa yo'ntonic stoyoj sba xchi'uquique. Sts'ijlajan ta xcom ma' ti vitsetic yu'un ti Israele. Mi junuc oy buch'u ta x'ech'.

²⁹C'alal sts'ijlajan, stuc xa slilijemal busul com ti muc' ta lum ta scoj ti mu stac' albel sc'oplal ti smulic laj spasolanic talele, ta sna'ic unbi vu'un ti Ajvalilune.’

³⁰“Ti avinquileltaque xi ta xalbe sbaic ta jujun ti xlo'ilajic xa ta atojol ta sts'el ti moque, ta ti'naetique: ‘La'ic, ba ca'itic lo'il a'yej liquel talel ta stojol ti Diose.’

³¹Ti jteclumale ta xtalic, xchotiic xa vulel ta ats'el jech c'u cha'al liquem yu'unic ta ya'yiel ti ac'ope. Ti c'usi ta xaval une, mi jutebuc ta yo'ntonic ta spasic. Cacal ta yeic ta yalel jech c'u cha'al sq'uejimol jun lecombail, yu'un naca taq'uin ti ic'bil yo'ntonic xchi'uquique.

³²Ta xalic ac'oplal ti c'otemot ta jun jq'uejintaej jlecomajel ti jun yutsil xq'uejine, ti stsac sba lec snuc' xchi'uc ti arpae. Sts'etel xa xchiquin ta xa'iic ma' ti ac'op une. Ja' no'ox un, mu xabtelanic ta spasel.

³³Manchuc mi jech un, scotol ta xc'ot ta pasel ta stojolic. C'alal mi c'ot xa ta pasele, ta xlic sna'ic ti oy jun j'alc'op ta stojolique.”