Read Tzotzil Ezequiel 34 Bible Online

Ezequiel 34 - Tzotzil bible

Ezequiel 34

¹Xi laj yalbun ti Dios laj sc'oponun talele:

²“Yojtot, xi vulvunan liquel ta jventa ta scontrainel ti jq'uel-chijetic yu'un ti Israele: ‘Xi ta xal ti Diose: Mu cha'bel uni jq'uel-chijetic yu'un Israel ti atuc no'ox atuc'ulanoj abaique, ti c'alal tsots sc'oplal abainojic ta sq'uelel ti chijetique.

³Lec xava'iic yuch'bel ti ya'lel xchu'e. Xameltsanic xa ac'u'ic xchi'uc ti stsotsile. Naca smilel avu'unic ti bu lec jubemique. Mu xac'an xatuc'ulanic ti chije.

⁴Mu xacoltaic ti bu ta xlom xchi'uc svocol ti chijetique. Mu xapoxtaic ti oy xchamele. Mu xats'otbeic ta poc' ti bu tsiq'uem ti yacane. Mu xajoybinic sutel tal ti jatvile. Mi ja'uc xasa'ic ti ch'ayemique, naca yilbel svocol ta yilbajinel.

⁵Ch'abal yajval ta stuc'ulanel ti jchijtaque. Tan puc ta xbat un. Ta xlajic ta ti'el yu'un ti te'tical jti'oval chon bolometique.

⁶Tan puc ta xbat ta te'tic ta toyol vitstic. Ta xch'ayic batel ta sbejel banomil. Mi junuc oy buch'u laj stij yo'ntonic ta sa'el talel ti jchijtaque.

⁷‘A'yio ava'iic li' une, jq'uel-chijetic, chiquintao ava'iic ti jc'op ca'yeje.

⁸Xi ta jva'an jba ta yalel ti vu'un Diosune: C'usiuc no'ox te'tical chon bolometic laj yelc'anic batel ta sti'el ti jchijtaque, yu'un mu'yuc buch'u ta xtuc'ulanun. Ti cajq'uel-chijtaque mu'yuc ta stij yo'ntonic ta sa'el talel ti chijetique. Stuc no'ox ta stuc'ulan sba ma' ti cajq'uel-chijtaque, ma'uc ti jchijtaque.

⁹A'yio ava'i ti jc'op une, jq'uel-chijetic,

¹⁰xi ta xcal ava'iic ti vu'un Diosune: Contra xaquiloxuc, jq'uel-chijetic, ta jvuloxuc ava'iic yu'un ti jchijtaque. Mu'yuc xa ta xabainic cu'un ta sq'uelel ti oy to ox ta ac'obic ta stuc'ulanele. Ta jpoj ma' ti cuni chijtaque yo' mu xquechetuc avu'unic ta ti'el.’

¹¹“Xichi ta xcal ma' ti vu'un Diosune: Ta jbain ta sq'uelel ta stuc'ulanel ma' ti jchijtaque.

¹²Jech ta jpas jech c'u cha'al jun jq'uel-chij ta svul yo'nton yu'un ti tanijem xa batel ti xchijtaque. Jech ta jtij co'nton yu'un ti jchijtac ti bu tanijemic batele. Ta jpoj loq'uel talel ti oy jun c'ac'al ta x'ic'ub ti osil banomil yu'un ti banomilal vo'e.

¹³Ta xquiq'uic talel ti oyic ta yan muc'tiquil lumetique. Ta jvolic ta stsobel ta yiq'uel batel ta yosilal stuquic ta stael lec sve'elic ti ta xquiq'uic batel ta vitstic yu'un ti Israele, ta uc'umaltic, ta buyuc no'ox ti stac' ta xnaquiic ta muc' ta lume.

¹⁴Ta xquiq'uic batel ta ve'el ti bu jun yutsil sve'el ta staique, ti co'ol s'elan jun pulem yaxal ta staic ti sve'elic ta toyol vitstic yu'un ti Israele. Ti bu taje, ta xcux yo'ntonic, ta slajesic ti lequil pulem ve'liletique.

¹⁵Ta xic'ot ta bats'i jq'uel-chij yu'un ti jchijtaque. Vu'un ta xquic' batel ta xcuxel yo'ntonic. Ti vu'un Ajvalilune, mu lo'iluc no'ox ta xcal.

¹⁶“Ti ch'ayemal chijetique, ta xi'och ta sa'el. Ta jtsob talel ti jatavemic xa batele. Ta jts'ot ta pixel ti bu tsiq'uem ti yacanique. Ta jcolta ti bu ch'abal xa yipal yu'unique. Ta jchabi ti bu lec jubemique, ti tsots xu' yu'unique. Ta jchabi ti c'u s'elan sc'an ta xquile.

¹⁷“A'yio ava'iic, cuni chijtac, xi ta xcal ti vu'un Diosune: Ta jbain ta xch'aquel loq'uel ti chijetic xchi'uc ti tentsunetique.

¹⁸¿Mi mu nacauc sju'el comel ta teq'uel avu'unic scomelal ti c'usitic lec ta lajesel ti x'ech' xa avo'nton yu'une? Ti yaxjipan vo' ta xavuch'e, ti c'u yepal oye, naca statubtasel ta tec'olanel avu'unic.

¹⁹Ti cuni chijtac une ta stun ta slajesic avu'unic scomelal ti sve'el laj aju'ic ta teq'uele, ta yuch'el ti vo' avu'unic ti laj atatubtasic ta tec'olanele.

²⁰“Jech o xal ti vu'un Diosune xi ta xcale: Ta xquich' ave ava'iic yu'un ti baquiquil chij ti vo'oxuc oy yipal avu'unique.

²¹Laj atacoltaic loq'uel ti bu lubtsajeme. Laj apujic loq'uel ta luchel ti jatav batel avu'unique.

²²Ta jtic' jba ta spojel ma' ti cuni chijtaque. Mu jq'uelojuc no'ox ma' ti xquechet ta elc'anel avu'unique. Ta jbain ta sventainel ti bu bats'i chijetique.

²³Ta jbain ti cha'vuluc ta loq'uel ti cajtunel Davide. Stuc no'ox ta xc'ot ta jq'uel-chij ti vu'un ta jva'ane, ta stuc'ulan ta sq'uelel un. Ta xc'ot ta jq'uel-chij yu'unic.

²⁴Ti xic'ot ta Dios yu'unic ti vu'un Ajvalilune. Ta xc'ot ta banquilal yu'unic ti cajtunel Davide. Jech xcal ma' ti vu'un Ajvalilune.

²⁵Ta jpas jtrate ta stojolic yo' mu'yuc c'usi sna'ic ta cuxlej. Ta jtubbe sc'oplal ta j'ech'el ti jti'oval chon bolometic oy ta muc' ta lume yo' jun yo'ntonic xlamet ta yaxaltic ta xcux yo'nton ta yolon te'tic ti cuni chijtaque.

²⁶“Ta sjoylej ti ch'ul vits cu'une, ta jlaman batel ti cuni chijtaque. Ta jva'an jba ta xc'uxubinelic. Ta jtac no'ox talel vo' ta stojolic sventa xc'uxubinelic.

²⁷Ti te'etic oy ta osiltique, ta satin lec. Oy no'ox c'usi ta xloc' lec ta banomil. Jun yo'nton ta xcuxiic ta yosilal stuquic. Ta sna'ic unbi ti vu'un Ajvalilun c'alal ta xc'ot yorail ta jpoj loq'uel ti jteclumal ta yoc ta sc'obic ti buch'u smosovinojique.

²⁸Mu xa x'och ta c'abal yu'un ti yan muc'tiquil lumetique. Mi ja'uc ta xlilinatic ta ti'el yu'un ti jti'oval chon bolometique. Jun yo'nton ta xcuxiic. Laj sc'oplal ti ta sibtasatique.

²⁹Ta xcac' ts'unubajicuc ta jun ve'ebal banomil. Mu xich' svocolic ta vi'nal, mi ja'uc ta xlabanatic yu'un ti muc'tiquil lumetique.

³⁰Va'i unbi, ta xlic sna'ic vu'un ti Ajvalilune, Diosun yu'unic, ti jva'anoj jba ta stojolique, ti ja' jteclumal ti Israele. Ti vu'un Ajvalilune, mu lo'iluc no'ox ta xcal.

³¹“C'otemoxuc ta jchijtac, yajvaltac ti pulem yaxaltic cu'une. Diosun avu'unic. Mu lo'iluc no'ox ta xcal ma' ti vu'un Ajvalilune.”