Read Tzotzil Ezequiel 35 Bible Online

Ezequiel 35 - Tzotzil bible

Ezequiel 35

¹Xi laj yalbun ti Dios laj sc'oponun talele:

²“Vulvunan xa liquel ta jventa ta scontrainel ti vits Seir ti aq'uelojuc batele.

³Xi xavale: ‘Xi s'elan ta xal ti Diose: Contra ta xaquilot, vits Seir, ta jtsitsot ava'i ti sts'ijlajan ta xacom ta sbajtical banomil, ti stuc alilijemal busul ta xcome.

⁴Lilijem ta xquicta comel ma' ti jteclumetic avu'une, sbajtical banomil ta xacom ec un. Va'i unbi, ta xana' ti vu'un Ajvalilune.

⁵‘Cuxul jcontrainej Israel, vits Seir, laj atsac ta leto ti c'alal naca xa stamoj sba ta tsitsel ta scoj ti smulique.

⁶Ti vu'un Diosune ta xcal ava'i, milel xava'i xalaj, mu cha'bel stselbuj. Lamal c'ot ta aba ti amilvanejale, milel xava'i ec un.

⁷Vits Seir, ta xac'ot cu'un ta sbajtical banomil ti stuc alilijemal busul ta xcome. Laj to c'op ma' ti xcac' que jti' oy buch'u ta x'ech' ta atojole.

⁸Ti ta vitstique, ti ta stselejtique, ti ta uc'umetic avu'une, ta xc'ot ta pasel cu'un ti busul no'ox ta xcom ti animaetic ti buch'utic laj chamicuc ta letoe.

⁹J'ech'el ta xac'ot ta sbajtical banomil cu'un. Laj c'op ma' ti buch'u ta xnaqui ta jteclumetic avu'une. Va'i unbi, ta xana'ic liquel ti vu'un Ajvalilune.

¹⁰‘Xachi laj avale: Ti slecoj ajvalil yu'un ti chib lum Israele, ta xcu'nin ya'i, manchuc mi nacal ti Dios une.

¹¹Ti vu'un Ajvalilune ta xcal ava'i ti jech ta jpas ta atojol jech c'u cha'al laj avilbe svocol ti Israel ta sti'emal ajol ta yit'ixal avo'ntone. C'alal ta jtsitsote, ta xlic avojtiquinicun.

¹²Va'i un, ta xlic ana' ti vu'un Ajvalilune ca'binoj scotol c'u s'elan laj abis ta cotol chaval ti vitsetic yu'un ti Israele. Xachi laj avale: Jipbil xa comel. Tana le'e, xu' xa xcu'nintic ta stsutsesel.

¹³Laj ca'i ti xbet'bun no'ox ave stsaquelun ta c'ope, ti mu'yuc spajeb xavulvun ta scontrainelune.

¹⁴‘Xichi ta xcal ma' ti vu'un Ajvalilune: C'alal ta xajlilinote, scotol banomil xmuyubajic xa liquel.

¹⁵Xamuyubaj xa yu'un c'alal lilij ti muc' ta lum yu'un Israel ti c'otem ta xrextoique. Xi s'elan ta xc'ot ta atojol eque, vits Seir, ta xac'ot ta jun sbajtical banomil, muc' ta lum yu'un Edom. Va'i unbi, ta xana'ic liquel ti vu'un Ajvalilune.’ ”