Read Tzotzil Ezequiel 36 Bible Online

Ezequiel 36 - Tzotzil bible

Ezequiel 36

¹“Yojtot, c'opojan ta jventa ta stojol ti vitsetic yu'un ti Israele, ti xchiquintaicuc ya'iic ti jc'op ta xavalbee.

²Xi ta xcal ma' ti vu'un Diosune: Ti yajcontra Israele, ti yu'ninojic xa yalojic ti vitsetic ti mu'yuc sc'oplal ta soquesele,

³xi xavalbe ya'i ti va'ano aba ta c'opojel ta jventa un cha'e: ‘Xi ta xal ti Diose: Buyuc no'ox ta xlic talel avajval ta jujujot ta stsaquelot ta leto. Ta slilinot ta j'ech'el. Scotol ti jyanlumetique, ta xa'ochic ta c'abal yu'un, jipbil tenbiloxuc yu'un. Xvulajetic xa ana'leelic yu'un ti jnaclejetique.

⁴A'yio ava'iic li'e, vitsetic yu'un Israel, chiquintao ava'i sc'opojel ti Diose, vitsetic, stselejaltic, uc'umetic, stenlejaltic, yav naetic jipbil tenbil lacom, sts'ijlajan lacom, Israele, ti latambat loq'uel yu'un alac'na jteclumetic ti c'usitic oy avu'une xchi'uc ti lac'ot ta j'ac'-labal yu'unique.

⁵Xi ta xal ti Diose: Xic'aq'uet ta jcapemal xchi'uc jc'op ta scontrainel ti yan jteclumetique, ti c'otem lec ta sba ti jteclum Edome, yu'un xmuyubajic xa laj yu'ninic ti jbanomile, ti spajeb xa labanel laj stsobbeic batel ti c'usitic xch'i ta osil banomile.’

⁶“Xi xaval ti va'ano aba ta c'opojel ta jventa sc'oplal yosilal ti Israele: ‘Ti Diose xi ta xalbe ya'i ti vitsetique, ti stselejaltique, ti uc'umetique, ti stenlejaltique: Staoj yav xic'aq'uet ta jcapemal xchi'uc jc'op ta scoj laj avich'ic c'ac'al c'optael yu'un ti jyanlum muc'tiquil lumetique.

⁷Ta xcal ti vu'un Diosune ti nijil chimil ta xcomic ta q'uexlal ti alac'na jteclumetic joyol ta apat ta axocone.

⁸Ja'uc ti vo'oxuque, vitsetic yu'un Israel, volibiloxuc ta muc'tiquil te'tic ti yepal no'ox lisil sat yo' ta stunes ti jnaclejetic yu'un Israel ti jutuc xa sc'an ta sutic talele.

⁹Ta jbain ta xchabiel. Ta jventa licuc yich' abtelanel ta sts'unbel ti sbele.

¹⁰Ti bu taje, ta xquepajes ti jnaclejetic yu'un ti jteclum Israele yo' ta xnaquiic. Ta xnoj liquel ta jnaclejetic ti jteclumetique. Ta xich' cha'meltsanel ti lilijeme.

¹¹Ta xquepajes ti yajvaltaque, ti chon bolometique, ti epajicuc ta j'ech'ele. Yepal no'ox liquel ti jnaclejetic jech c'u cha'al ta ba'yele. X'ech' to lec ta xataic, mu sta c'u s'elan la'ech'ic ta ba'yele. Va'i unbi, ta xlic ana'ic ti vu'un Ajvalilune.

¹²Ta xlic xanavuc beinicuc cu'un ti jnaclejetic ta atojole, vitsetic yu'un Israel. Ta xc'ot ta avajvalic ti jujuti' oyoxuque. Laj to c'op ma' ti mu junuc ti xnich'nabic ta xavictabee.

¹³‘Xi ta xcal ava'i ti vu'un Diosune: Ta xalic ti oy amulic, vitsetic, ta la xati'ic ti jnaclejetique, ti mu la junuc ta xavictabeic ti yalab xnich'nabic ti jteclume.

¹⁴Tana une, laj ta alel ti naca sti'el avu'unic ti jnaclejetique, ti mu junuc ta xavictabeic yalab xnich'nabic ti jteclume. Mu stselbuj jc'op ti vu'un Ajvalilune.

¹⁵Mu xcac' que jti' ta xlic vinajuc ta sa'el amulic ti jyanlum muc' ta lumetique. Ts'ij xi ta sa'el amulic ti lumetic taje. Laj ta alel ti mu junuc ta xavictabeic yalab xnich'nabic ti jteclume. Mu stselbuj jc'op ti vu'un Ajvalilune.’ ”

¹⁶Xi laj yalbun ti Dios laj sc'oponun talele:

¹⁷“C'alal lic naquiicuc ta yosilal stuquique, ti israeletique laj soquesic ta scoj ti mu'yuc stuq'uil c'usi laj spasique. Ib o'nton xac' ta xquil ti c'u s'elan oyique.

¹⁸Va'i un, laj jbusanbe ta sbaic ti sc'ac'al co'nton ta scoj ti smilvanejalic ta muc' ta lume, xchi'uc ti laj soquesic ta scoj ti laj snijan sbaic ta yich'el ta muc' ti loc'obbail diosetique.

¹⁹Ti tsitsel laj staic ta scoj ti mu'yuc stuq'uil c'usi laj spasique, tan puc batic cu'un ta scotol banomil.

²⁰Ta scotol ti muc' ta lumetic bu c'otic une, lic sbisicun ta cotol chaval ti xi ta xalic ti jnaclejetique: ‘Le'e, ja' yalab xnich'nabtac Dios loq'uic talel ta slumalic.’

²¹Va'i un, toj c'ux laj ca'i ti ta scoj Israel bisbilun ta cotol chaval yu'unic ti jujun muc'tiquil lum ti bu c'otique.

²²“Jech o xal xi xavalbe ya'i ti Israele: ‘Xi ta xal ti Diose: Ti c'u s'elan ta xlic jpase, ma'uc ta aventaic, Israel, ja' ta sventa ti laj asoquesic jlequil cutsilal ti bisbilun ta cotol chaval yu'un ti muc'tiquil lumetic ti bu la'ochic batele.

²³Ta xcac' iluc ta sba ta sat ti muc'tiquil lumetic ti jlequilal cutsilal ta acojic ti bisbilun ta cotol chaval yu'unique. C'alal ta xc'ot ta pasel cu'une, ta xlic sna'ic vu'un ti Ajvalilune. Mu stselbuj jc'op ti vu'un Ajvalilune.

²⁴Ta jloq'uesoxuc talel ta scotol ti muc'tiquil lumetic buyuc no'ox batemoxuque. Ta xajtsoboxuc sutel talel ta avosilalic.

²⁵Ta yax jipan vo' ta jpocoxuc. Ta jmes ta jtus loq'uel ti c'usitic mu xtun oy ta atojolique, xchi'uc ti sbolil laj ach'ambeic ti laj anijan abaic ta yich'el ta muc' ti c'usitic meltsanbile.

²⁶Ta xlic cac' ta atojolic jun ach' o'ntonal, ach' snopbenal. Ta jten loq'uel ti yijuneb avo'ntonic jech c'u cha'al ti tone. Ta xa'i xa liquel c'oponel ti o'ntonale.

²⁷Ta jtic' jcuxlej ta atojolic. Ta jventa, ta xc'ot ta pasel avu'unic ti oy c'usi jbel tsots albile, xchi'uc ti c'usitic caloje.

²⁸Ta xlic naclanic liquel ta muc' ta lum ti laj cac'beic ti atot ame'ic laj ech'uc ta vo'nee. Ta xac'otic ta calab jnich'nab, Diosun avu'unic ti vu'une.

²⁹Ta jten loq'uel scotol ta atojolic ti bu laj soquesoxuque. Ta jventa, busul liquel ti trigo avu'unique. Mu'yuc xa ta jtac talel vi'nal ta atojolic.

³⁰Ta jventa, ta xac' lec sat ti lobolal te'etique xchi'uc lec ta xac' sat ti ts'unubaletic ta osiletique, yo' jech mu nijil chimilucoxuc ta q'uexlal ta sba ta sat yan muc'tiquil lumetic ta scoj ti vi'nale.

³¹C'alal ta xavules ta ajolic c'u s'elan ti atalelique, ti c'usitic laj apasique, ta xlic ava'iic q'uexlal yu'un ti amulique, xchi'uc ti c'u s'elan ti atalelique.

³²Xi ta xcal ti vu'un Ajvalilune: Na'ic, israeletic, ma'uc ta jpas ti ja' xatunic oe. A'yiic ti mu xa stac' c'usi ta xapasic yu'un q'uexlal ta scoj ti atalelique.

³³‘Xi ta xcal ti vu'un Diosune: C'alal ta jmes ta jtus loq'uel scotol ti amulique, ta jnacanoxuc liquel ta jteclumetic avu'unic. Ta xlic acha'va'anic ti lomemal naetique.

³⁴Ti sts'ijlajan com ti banomile, ma'uc xa liquel sbajtical banomil. Ta xich' abtelanel liquel ta sba ta sat scotol ti buch'u ta x'ech'ique.

³⁵Xi ta xalic liquel une: Ti com to ox ta sbajtical ti banomil li'e, tana le'e, co'ol xa s'elan ts'unubaletic ta Edén. Ti laj to ox yich' lilinel ti jteclumetique, ti tsuts sc'oplal ti stuc xch'uch'ulil busul come, tana le'e, c'ot ta jun pojobbail, noj ta jnaclej.

³⁶Va'i un, ti c'u yepal cuxul com ti jnaclejetic joyol ta spat xocone, ta xlic sna'ic ti vu'un Ajvalilun ti ta xlic jcha'va'an ti lilijeme, ta sts'unbel sbel ti jipbil come. Laj xa cal ti vu'un Ajvalilune. Ta xc'ot ta pasel cu'un.

³⁷‘Ti vu'un Diosune xi ta xcale: Oy to yan ma' ti c'usi ta jpase. Ti c'usi ta xisc'anbeic ti jteclum Israel ti ac'o jpasbeique, ta staic cu'un. Ta xquepajesbe ti jnaclejetic yu'un jech c'u cha'al junuc chij ti yepal no'ox ta bolele.

³⁸Ta x'epaj liquel jnaclejetic ta jteclumetic ti lilijem come, ti co'ol s'elan chij xc'ulet no'ox ti ic'bil ta xbat ta Jerusalén yo' ta xich' aq'uel ta matanal ta yorail ti q'uine. Va'i unbi, ta xlic sna'ic vu'un ti Ajvalilune.’ ”