Read Tzotzil Ezequiel 37 Bible Online

Ezequiel 37 - Tzotzil bible

Ezequiel 37

¹Ti Diose laj yac' talel sc'ob ta jtojol. Ventainbil lic'ot yu'un ti smuc'ul stsatsale. Bat sva'anun ta jun stenlejal ti bu busul ti baque.

²Laj jxani yu'un Dios ta sq'uelel sjunul stenlej ti noj ta baquetic ti naca taquin ta j'ech'ele.

³Va'i un, xi lic yalbune: “¿Mi ta xach'un xana' xu' to ta stam sba liquel ta yich'el xcuxlejal ti taquin baquetic le'e?” Xi laj jtac'bee: “Xana' atuc, Cajval.”

⁴Va'i un, ti Diose xi laj yalbune: “Va'ano aba ta c'opojel ta jventa yu'un ti taquin baquetic le'e. Xi xavalbe ya'iique: ‘Taquin baquetic, a'yio ava'iic sc'opojel ti Dios li'e.

⁵Xi ta xalboxuc ava'iic ti Diose: Ta xcac' avich'ic ic' yo' ta xacha'cuxiic liquel.

⁶Ta jtsacanan liquel ach'uxuvilique, abec'talic, ta yich'el anuculilic, ta yich'el acuxlejalic, yo' ta xacha'cuxiic. Va'i unbi, ta xlic ana'ic vu'un ti Ajvalilune.’ ”

⁷Jech laj jc'oponic jech c'u cha'al laj yalbune. Xi s'elan laj ca'i ti c'alal yacal ta jc'oponique: jun to niquel ti xtinet ta a'yiele. Ti taquin baquetique laj stsacanan sba.

⁸Tumajtic no'ox liquel ti xch'uxuvile. Lic ayanuc sbec'tal, snuculil. Ja' no'ox un, mu'yuc ta xich'ic ic'.

⁹Va'i un, ti Diose xi laj yalbune: “C'opojan ta jventa, xi xavalbe ya'i ti ic' yich'oj ta sventa ti cuxleje: ‘Xi ta xal ti Diose: j'ac'-cuxlejal ic', la'ic ta xchanjechal banomil, licuc yich'ic ic' avu'unic ti jlajel jtubeletic li'e.’ ”

¹⁰Lic'opoj liti'in ta sventa Dios jech c'u cha'al laj yalbune. Tal ti j'ac'-cuxlej iq'ue. Lic ochuc ta stojolic, cha'cuxiic, lic va'iicuc. Ep ta j'ech'el, co'ol to s'elan epal soldadoetic ti mu'yuc spajeb yepal ta j'ech'ele.

¹¹Va'i un, xi laj yalbun ti Diose: “Ti jteclum Israele, co'ol s'elan jech c'u cha'al ti taquin baquetic le'e, yu'un xi ta xalolanique: ‘Ta xitaquilaj ta j'ech'el. Laj sc'oplal ma' ti oy patob o'ntonale, mu xa cha'bel un.’

¹²C'opojan ta jventa ti xi xavalbe ya'iic une: ‘Xi ta xal ti Diose: Jteclumal, ta jam liquel ti amuquinalique. Ta xa jloq'uesoxuc. Ta xasutic batel ta yosilal ti Israele.

¹³C'alal ta jam ti amuquinalique, ti ta jloq'uesoxuc ech'ele, ta xlic ana'ic, jteclumal, vu'un ti Ajvalilune.

¹⁴Ta xcac'boxuc ti jcuxlejale. Ta xlic cuxianic yu'un. Ta jnacanoxuc liquel ta avosilalic. Va'i unbi, ta xlic ana'ic vu'un ti Ajvalilune. Jech ono'ox caloj ta xc'ot ta pasel cu'un. Ti vu'un Ajvalilune, mu lo'iluc no'ox ta xcal.’ ”

¹⁵Xi laj yalbun ti Dios laj sc'oponun talele:

¹⁶“Tamo junuc te' ti xi xats'ibtae: ‘Ti israeletic ti jmoj svoloj sc'opic xchi'uc ti Judae.’ Tamo yan te' xtoc ti xi xats'ibtae: ‘Ti Efraín xchi'uc ti israeletic ti c'u yepal jmoj svoloj sc'opique, ja' c'otem ta José.’

¹⁷Mi laj une, loto ta xchibal ta ac'ob yo' ta xc'ot ta jun.

¹⁸Ti avinquileltac c'alal xi ta sjac'boxuque: ‘Albun ca'icutic, ¿c'usi smelol ti vi s'elan ta xapase?’,

¹⁹xi xavalbe ya'ie: ‘Yu'un xi ta xal ti Diose: Ta x'och ta coc ta jc'ob ti José ti ventainbil yu'un ti Efraín xchi'uc ti jvoc' israeletic jmoj svoloj sc'opique. Ta jpasic ta jun xchi'uc ti Judae yo' ta xc'otic ta jun ta coc ta jc'ob ti chib jventainvanejetic taje.’

²⁰“Ta sba ta saticuc yomo ta ac'ob ti chib te' ti laj ats'ibae.

²¹Ts'acal to un, xi xavalbe ya'iique: ‘Xi ta xal ti Diose: Ti bu xa c'alal xloq'uic batel ti israeletic ta caplej ta yan muc'tiquil lumetique, ti buyuc xa oyic ta jujujote, ta jtsob talel. Ta sut talel ta yosilalic cu'un.

²²Ta jpasic ta jun li' ta muc' ta lume, ta vitsetic yu'un ti Israele, jun no'ox ti ajvalil yu'unique. Laj sc'oplal ma' ti ch'acal ta xc'otic ti chib muc'tiquil lume, ti slecoj ta xventainvanique.

²³Laj c'op ma' ti ta xlic soques sbaic ta yich'el ta muc' ti c'usitic meltsanbil ta c'abal ti spajebal mu stac' albel sc'oplal ti xlic xcaj no'ox ta sa'el ep ta tos ti mulile. Ta jva'an jba ta spojelic ti c'usitic mu'yuc stuq'uil laj spasique. Ta jmesbe ta jtusbe ti smulique. Ta xc'otic ta calab jnich'nab. Ta xic'ot ta Dios yu'unic.

²⁴Ta xc'ot ta ajvalil yu'unic ti cajtunel Davide xchi'uc ti banquilal jq'uel-chij yu'unic scotolique. Ta xiyaq'uic ta venta. Ta xc'ot ta pasel yu'unic ti oy jbel c'usi tsots albile, xchi'uc ti c'usi caloje.

²⁵Ta xnaquiic liquel ta jteclum bu laj cac'be ti cajtunel Jacobe, ti bu naquiic ti smuc'tot syayaic laj ech'icuc ta vo'nee. Ti bu taje, j'ech'el ta xnaquiic liquel xchi'uc ti yalab xnich'nabique, xchi'uc scotol ti snitilulique, banquilal o yu'unic ti cajtunel Davide.

²⁶J'ech'el ta jpas trate xchi'uquic ti mu'yuc c'usi sna'ic ta nacleje. Mu'yuc stsutseb ti jtratee. Ta xquepajesic liquel. J'ech'el ta jva'an jch'ulna ta o'lol yu'unic.

²⁷Ta xinaqui ta stojolic. Ta xic'ot ta Dios yu'unic. Ta xc'otic ta calab jnich'nab ec un.

²⁸C'alal j'ech'el va'al xa ti jch'ulna ta o'lol yu'unique, ti yan muc'tiquil lume ta xlic sna'ic ti vu'un laj jt'uj ti Israele, ti c'otem no'ox ta cu'une.’ ”